TLEN XKUAJLI PANOTIKA

1 | Xmotlajpiya maka tikualos

¿TLEKA NONEKI IJKON TIKCHIUAS?

Ijkuak tikixnamikij itlaj tlen xkuajli, uelis kichiuas matikualokan.

Ijkuak panoua tlen xkuajli, miyekej melak ajmankamikij, niman yejon kichiua ika más nimantsin makualokan.
Kemantika, tlapajtijkej xuelij nochimej kinpajtiaj niman kemantika nimantsin tlamij medicinas.
Kemantika, miyekej xkinmajxilia intomintsin para kikouaskej tlen kikuaskej noso tlen ika nopajtiskej.

¿Tikmatiya yejuin?

Estrés niman okseki kokolistin, uelis kichiuas maka kuajli xtlapejpeni tlenon ika timopajtis. Niman tla xkuajli otiktlapejpeni tlen ika timopajtis, uelis más tikualos.
Tla xtimopajtia, uelis más tikualos niman hasta uelis timikis.
Tla xtikualo, uelis más kuajli tikmatis tlenon noneki tikchiuas ijkuak tikixnamikis itlaj tlen xkuajli.
Maski tla tikpiya tomin noso maski tla xtikpiya, onka seki tlen uelis tikchiuas niman ijkon timotlajpiyas maka tikualos.

¿Tlenon uelis tikchiuas?

Se tlakatl akin tlamachilise kita tlenon uelis kichiuas niman ijkon xipan nochiuas itlaj tlen xkuajli. Kuakon, tla tejua timokojtilia tichipauak yes, mitspaleuis maka melak xkualo. Tla timotlajpiya para maka tikualos, más kuajli tonkisas.

“Tejuamej xsajnoye tikpopolouaj totomintsin kampa tlapajtikej pampa tokojtiliaj tichipaujkej yeskej niman titlachipauaskej tochan” (Andreas).a

a Seki tokayomej yonopatlakej.

¿KENON UELIS TIKXIKOS? Seki tlen uelis mitspaleuis

Tla tikchiua nochi yejuin, mitspaleuis maka melak xkualo

XMOKOJTILI TICHIPAUAK YES

Xmokojtili tichipauak yes

Biblia kijtoua: “Sen tlakatl yejuan nonemilia ijkuak kita itlaj xkuajli nochiua, nejkuania” (Proverbios 22:3). Xmotlajpiya maka tikualos.

Nochipa xmomapajpaka ika atl niman xapo, niman más ijkuak ititlakuas niman ijkuak yotonniajka baño.
Nochipa xtlachipaua mochan, niman más on tlen miyekpa tikajsi.
Maka sajnoye xmonisiui intech akin uelis mitskokolismauaskej.

KUAJLI XTLAKUA

Kuajli xtlakua

Biblia kijtoua: “Xakaj nemi yejuan xkitlajsojtla itlalnakayo, yej kitlakualtia niman cuidaroua” (Efesios 5:29). Tikteititiaj ika tiktlasojtlaj totlalnakayo ijkuak kuajli tikitaj tlen tijkuaj.

Xkoni miyek atl.
Xkinkua frutas niman verduras.
Maka sajnoye xkua tlen chiauak, tlen melak poyek niman tlen melak tsopelik.
Maka xpoki, maka xkinkui drogas niman maka sajnoye xkoni alcohol.

“Tejuamej xmiyekpa topajtiaj pampa tokojtiliaj kuajli titlakuaskej, yejon techpaleuiya maka sajnoye matikpopolokan totomintsin” (Carlos).

XCHIUA EJERCICIO NIMAN KUAJLI XKOCHI

Xchiua ejercicio

Biblia kijtoua: “Más kuajli titekitis ken kitokaroua, niman tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli. Yejua in no sen tlaixkajkayaualistli ken tla se kinekiskia kajsis ikan ima on ajakatl” (Eclesiastés 4:6). Noneki titekitiskej, san ika, noijki noneki toseuiskej.

Nochipa itlaj xchiujto. Maski tla tejua yotiueuentsintiak noso tikpiya se kokolistli tlen xueli pajti, xyejyeko nochipa xnejnemiti pampa yejon mitspaleuis maka sajnoye xkualo.
Kuajli xkochi

Kuajli xkochi. Tla xkuajli tikochi, xmás itlaj uelis tikchiuas niman melak tiajmankamikis. Niman ika tlayekapan hasta uelis peuas tikualos.
Xtlali se hora para tikochis niman ijkon xchiua. Xmokojtili timotekas niman timokuiteuas san noyejua hora.
Maka xkita tele, celular noso tableta ijkuak itikochis.
Ijkuak itikochis, maka sajnoye xtlakua, maka sajnoye xkoni alcohol noso itlaj tlen kipiya cafeína.

“Ijkuak xkuajli nikochi, nechkokoua notsontekon niman notlakayo, san ika, ijkuak kuajli nikochi, ¡san nochi nikneki nikchiuas! Niman xmás nikualo” (Justin).