Tlamachtijli 12
Matiktlasojkaitakan tonemilis niman toyesyo
¿Kenon noneki tikitaskej tonemilis? (1)
¿Niman ijkuak se siuatl kitlakali ikoneuj? (1)
Akin kichiuaj ken Cristo ¿kenon kiteititiaj ika xkinekij itlaj impan manochiua? (2)
¿Xkuajli tla tikiminmiktis yolkamej? (3)
¿Tlenon kichiuaj sekimej akin xkitlakaitaj iminemilis? (4)
¿Katlejua itlanauatil toTajtsin itech yestli? (5)
¿Katlejua itlanauatil toTajtsin tla timotlalilis yestli? (6)
1. Itech Jehová ualeujtika nemilistli. ToTajtsin okimakak nemilistli nochi tlen yoltikaj (Salmo 36:9). Nemilistli tlasojti itech toTajtsin. Noijki inemilis konetsintli tlen nemi ijtik inan, Jehová sajnoye kitlasojkaita. Xkuajli kita toTajtsin tla tikmiktis se konetsintli akin kemach ueyixtok noso noskaltijtika (Éxodo 21:22, 23; Salmo 127:3).
2. Akin yemelak kichiuaj ken Cristo xkinekij itlaj impan manochiua. Kitaj maka itlaj makimpolo intepostlauilanaluan niman iminchan niman ijkon maka ompa nokokoskej (Deuteronomio 22:8). Akin kitekichiuiliaj toTajtsin xkauilmatij iminemilis san pampa kinekij nopaktiskej. Ika on, xnauiltiaj noso xkichiuaj itlaj tlen kampa sekimej uelis nokokoskej. Xyauej noso xtlamauisouaj kampa nouisokilo (Salmo 11:5; Juan 13:35).
3. Maski toTajtsin akin otexchichiuj noijki kintlasojkaita iminemilis yolkamej, uelis tikmiktis yolkamej tla ika timotlakualtis, timotlakentis, timopajtis noso tla itlaj kinekij mitschiuiliskej (Génesis 3:21; 9:3; Éxodo 21:28). Xkuajli tla itlaj tikiminchiuilis noso tikiminmiktis san pampa tikneki timauiltis (Proverbios 12:10).
4. Tijkuis drogas, tipokis noso tikchichinas, tabaco noso marihuana san pampa tikuelita, yejon xkichiuaj akin kitokaj Cristo. Yejuin xkuajli pampa 1) ouijtika tijkauas, 2) kijtlakoa tonakayo niman 3) tsokuiltikej (Romanos 6:19; 12:1; 2 Corintios 7:1). Uelis ouijtika tijkauas yejon, san ika, tla tiknekij tikpaktiskej Jehová noneki tijkauaskej.
5. Ixko toTajtsin yestli sajnoye tlasojti. Yejua kijtoa ika, tonemilis, onka ipan toyesyo. Ika on xkuajli tla tijkuaj yestli. Noijki xkuajli tla tijkuas inakayo yolki tlen xkuajli onoyeskixti. Tla se yolki san okikexmiktijkej noso omik ipan se trampa, maka manokua. Tla okimiktijkej ika resorte noso okimotlakej, nimantsin manoyeskixti niman ijkon uelis nokuas (Génesis 9:3, 4; Levítico 17:13, 14; Hechos 15:28, 29).
6. ¿Xkuajli totlaliliskej yestli? Xkilnamiki ika Jehová xkineki matijkuakan. Kijtosneki maka matotlalilikan ipan tonakayo, iyesyo okse, nion maski tejuamej toyesyo tlen san okisentlalijkej (Hechos 21:25). Ika on, akin yemelak kichiuaj ken Cristo xnokauiliaj makintlalilikan yestli. San ika kema kiseliaj okseki medicinas, tlen xkipiya yestli. Kinekij nemiskej, niman kiyejyekoskej nomakixtiskej san tla kitlakamatij itlanauatiluan toTajtsin (Mateo 16:25).
[Pictures on page 25]
Tla tiknekij tikpaktiskej toTajtsin, noneki xtotlaliliskej yestli, xtikchiuaskej tlen tsokuiltik niman xtikauilmatiskej tonemilis