Tlamachtijli 11
Tlen toTajtsin xkuelita matikneltokakan niman matikilnamikikan
¿Tlenon xkuajli tikneltokaskej niman tikilnamikiskej? (1)
Akin kichiuaj ken Cristo, ¿kineltokaskej ika toTajtsin se Trinidad? (2)
Akin yemelak kichiuaj ken Cristo, ¿tleka xkipanoltiaj Navidad, Semana Santa nion xiluichiuaj ijkuak kaxiltiaj xiujtin? (3, 4)
Akin yomijkej, ¿uelis itlaj kinchiuiliskej akin yoltokej? (5)
¿Omik Jesús ipan se cruz? (6)
¿Melak noneki matikchiuakan tlen toTajtsin kuelita? (7)
1. Xnochi tlen noneltoka niman noilnamiki xkuajli. San ika, toTajtsin xkuelita tlen ualeua itech tlaneltokijli xmelauak noso kichiuaj tlen xtemachtia Biblia (Mateo 15:6).
2. Trinidad: ¿Jehová se Trinidad, kijtosneki, yeyimej kalaktokej ipan toTajtsin? Ka. Jehová, yejua Tajtli, ‘san iselti melauakʼ toTajtsin (Juan 17:3; Marcos 12:29). Jesús iyenkuiyoj, niman kitlakamati toTajtsin (1 Corintios 11:3). Tajtli ueyixtika xijkon ken teKoneuj (Juan 14:28). Espíritu Santo xse tlakatl; san ichikaualis toTajtsin tlen tekititok (Génesis 1:2; Hechos 2:18).
3. Navidad niman Semana Santa: Jesús xotlakatiko ipan diciembre 25, otlakatiko kanaj ipan octubre 1, ijkuak tlapixkej kintlajpiayaj inyolkauan ika youajli (Lucas 2:8-12). Jesús xkeman okiminauati akin itech tlaneltokayaj makilnamikikan ijkuak otlakatiko. Tlenon kema okimijli makisexiujtilikan, noso makilnamikikan, ijkuak omik (Lucas 22:19, 20). Tlen nochiua ipan Navidad ualeuaj itech iyeuejkaui tlaneltokiltin xmelajkej. Noijki ijkon uelis tikijtoskej itech Semana Santa, ijkuak kitlayoualoltiaj Cristo, ijkuak nosaualo niman xkikuaj nakatl. Akin kachtopa okitokakej Cristo xkipanoltiayaj Navidad nion Semana Santa, niman akin kichiuaj ken Cristo amanin noijki xkipanoltiaj.
4. Iluitl ijkuak kachiltiaj xiuitl: San ome ijkin iluitl kiteneua Biblia niman okichiujkej akin xkiueyichiuayaj Jehová (Génesis 40:20-22; Marcos 6:21, 22, 24-27). Akin kachtopa okitokakej Cristo xkipanoltiayaj iluitl ijkuak kachiltiayaj xiuitl. Yejuin noijki ualeua itech iyeuejkaui tlaneltokiltin xmelajkej. Akin yemelak kichiuaj ken Cristo, nomakaj tetlayokoliltin niman nopakilismakaj maski san kemanon.
5. Tikinmakasis akin yomijkej: Akin yomijkej xitlaj uelij kichiuaj nion xitlaj kimatij. Tejuamej xuelis tikinpaleuiskej, niman yejuamej xuelis itlaj texchiuiliskej (Salmo 146:4; Eclesiastés 9:5, 10). Ijkuak yakaj miki; xok itlaj yoltok (Ezequiel 18:4). San ika, kemantika iluikaktekitkej xkuakualtin, kintokayotiaj demonios, nochiuaj kentla iespíritus akin yomijkej. Tikinueyichiuas noso tikinmakasis akin yomijkej nochi yejon xkuajli (Isaías 8:19).
6. Cruz: Jesús xomik ipan se cruz, omik ipan se kojtli melaktik. Ika griego tlajtojli “cruz”, tlen kitlaliaj ipan miyek Biblias, kijtosneki san se kojtli melaktik. Cruz, ualeua itech iyeuejkaui tlaneltokijli xmelajkej. Akin kachtopa okitokakej Cristo xkikuiyaj nion xkiueyichiuayaj cruz. Ika on, ¿tiknemilia kuajli tla tijkuij cruz ijkuak tikueyichiuaj toTajtsin? (Deuteronomio 7:26; 1 Corintios 10:14.)
7. Kanaj ouijtika tijkauas seki tlen tikneltokaya noso tikilnamikiya. Uelis mochanejkauan noso akin iuan timouika mitsijliskej maka xpatla tlen tikneltoka. San ika, okachi kuajli tla tikpaktis toTajtsin maka on mochanejkauan noso on akin ken tikimita (Proverbios 29:25; Mateo 10:36, 37).
[Picture on page 22]
ToTajtsin xse Trinidad
[Picture on page 23]
Navidad niman Semana Santa ualeuaj itech iyeuejkaui tlaneltokiltin xmelajkej
[Picture on page 23]
Xkipiya tleka tikinueyichiuaskej mijkej nion tikinmakasiskej