¿Tleka iteixpantijkauan Jehová xkipanoltiaj Navidad?
Tlen noijtoua niman tlen melauak
Tlen noijtoua: Iteixpantijkauan Jehová xkipanoltiaj Navidad pampa xkineltokaj Jesús.
Tlen melauak: Tejuamej tikchiuaj ken Cristo niman tikmatstokej ika san ipampa uelis timakisaskej (Hechos 4:12).
Tlen noijtoua: Pampa temachtiaj ika xkipiya kipanoltiskej Navidad kichiua ika familias manoxelokan.
Tlen melauak: Tejuamej tikitaj ika melak ueyi kijtosneki san sekan manemikan familias, ika yejon, tikinyolchikauaj oksekimej makitlakamatikan tlen kijtoua Biblia niman ijkon san sekan manemikan.
Tlen noijtoua: Xkipiyaj yolpakilistli tlen ipan Navidad onka, xtlaj notlayokoliaj, xkipiyaj yolseuilistli niman xika inyojlo nemij ijkon ken miyekej.
Tlen melauak: Tikyejyekouaj mojmostla touikaskej ika yolseuilistli iuan oksekimej niman tikinmakaskej tlen tikpiyaj (Proverbios 11:25; Romanos 12:18). Matikteneuakan seki, xtiktlajtlanij tomin ipan totlanechikoluan niman xtikimijliaj matechtlaxtlauilikan akin tikinnojnotsaj itech Biblia, pampa Jesús okijto ika maka matiktlajtlanikan matechtlaxtlauilikan (Mateo 10:8). Noijki, tikteijliaj ika iTekiuajyo toTajtsin san yejua kichiuas matinemikan ika yolseuilistli (Mateo 10:7).
¿Tleka iteixpantijkauan Jehová xkipanoltiaj Navidad?
Jesús otlanauati ika manoilnamiki imikilis, maka ijkuak otlakat (Lucas 22:19, 20).
Itlatitlankauan Jesús nion akin opeujkej kichiuaj ken Cristo xkipanoltiayaj Navidad. Diccionario del cristianismo kijtoua ika yejuin iluitl “opeuj nochiua Roma ipan xiuitl 330”, ijkuak yopanoka ipantsin doscientos xiuitl ika yomijkaj nochimej itlatitlankauan Jesús.
Xonka itlaj kampa kijtoua ika Jesús otlakat ipan tonajli 25 metstli diciembre, niman Biblia xkijtoua kemanon otlakat.
Tikasikamatij ika toTajtsin xokijto manopanolti Navidad, pampa yejuin ualeua ipan tlaneltokijli xmelauak (2 Corintios 6:17).
¿Tleka xkichiuaj ijkon ken miyekej tlaltikpakchanejkej?
Miyekej tlaltikpakchanejkej kimatstokej ika ipan Biblia xkijtoua manopanolti Navidad niman ika ualeua itech tlaneltokijli xmelauak. Maski ijkon, kinemiliaj ika xueyi kijtosneki tlen kijtoua Biblia, ika yejon, noijki kichiuaj ken miyekej tlaltikpakchanejkej.
Biblia techyolchikaua kuajli matiktekitiltikan totlamachilis niman matiknemilikan tlenon tikchiuaskej (Romanos 12:1, 2). Noijki techmachtia matiktlasojkaitakan tlen melauak (Juan 4:23, 24). Yejuin xkijtosneki ika xtikneki tijkakiskej tlen oksekimej kinemiliaj totechkopa, san ika, tiknekij tiktlakamatiskej tlen kijtoua Biblia maski xtikchiuaskej ijkon ken kichiuaj tlaltikpakchanejkej.
Niman maski tejuamej xtikpanoltiaj Navidad, tinochimej ika toyojlo tiktlapejpeniaj tla ijkon tikchiuaskej noso ka. Ika yejon, xakaj tikchiualtiaj maka makipanolti Navidad.