¿Tenojnotsaj techajchan pampa ijkon makisaskej?

Ka. Tejuamej tikmatij ika xtikseliskej makixtilistli san pampa titenojnotsaj techajchan (Efesios 2:8). ¿Tleka?

Matitlanemilikan ika se tlakatl akin kuelita tepaleuis kijtoua ika kinmakas se tetlayokolijli nochimej akin yaskej kampa yejua kijtos niman ijkuak kichiuas. Tla yejon tlakatl yokichiuj ika matikneltokakan itech tlen kijtoua, ¿xmelak ika ompa tinemiskiaj? Niman xsan yejon tikchiuaskiaj, noijki tikimijliskiaj mayakan tochanejkauan niman akin imiuan touikaj. Aman, xakaj notlaniliskia yejon tetlayokolijli san pampa okichiuj tlen okijto yejon tlakatl. Pampa se tetlayokolijli xnotlani.

Noijki ijkon, iteixpantijkauan Jehová tikneltokaj ika toTajtsin kichiuas tlen yokijto ika kinmakas nemilistli tlen xkeman tlamis akin kitlakamatij (Romanos 6:23). Niman pampa tiknekij oksekimej noijki makiselikan, melak tochikauaj tikimijliskej. San ika, tikmatstokej ika yejuin tekitl xkichiuas matimakisakan (Romanos 1:17; 3:28). Niman tikmatstokej ika xtlaj uelis tikchiuaskej tlen ika uelis totlaniliskej yejuin ueyi tetlayokolijli tlen ualeua itech toTajtsin. Biblia kijtoua ika toTajtsin “otechmakixti xpampa tejuamej otikchijkej on tlen kuajli, yej pampa yejua otechiknelij” (Tito 3:5).