Tlen noneki kimatiskej tajtin:

Tajtin kinekij ika inkoneuan makitlasojtlakan Jehová niman itech manosentemakakan. ¿Kenon uelis kimatiskej tla inkoneuan iuelis noapolaktiskej?

Jesús okimijli inomachtijkauan ika nochimej makinmachtikan niman makinapolaktikan (Mat. 28:19, TNM). San ika, tla se kineki noapolaktis, noneki nochiuas inomachtijkauj Cristo. Timochiuas inomachtijkauj Cristo xsan kijtosneki tikneltokas niman tikasikamatis tlen Jesús otemachti, noijki kijtosneki tikchiuas tlen yejua okijto. Niman yejuin, hasta telpokamej niman ichpokamej uelis kichiuaskej.

Tajtin, nemejuamej kachtopa xtlakamatikan Jehová niman xkimititikan nemokoneuan kenon kitlakamatiskej (Deut. 6:6-9). Xkinmachtikan nemokoneuan tlen temachtia Biblia ika libro ¡Nochipa uelis tiyolpakis!. Yejuin kinpaleuis kuajli makitlapejpenikan tlen kichiuaskej. Noijki, xkimititikan kenon kiteijliskej tlen yejuamej kineltokaj (1 Ped. 3:15). Nemokoneuan kinekiskej noapolaktiskej niman nochipa kitekichiuiliskej Jehová tla kuajli nenkinmachtiaj, nenkinyolchikauaj, san sekan nemomachtiaj ken familia, nenyauej tlanechikoltin, tla nenkinpaleuiyaj inselti manomachtikan niman tla nenkinpaleuiyaj makinpiyakan kuajli amigos ipan tlanechikojli. Noijki, xkinpaleuikan makitakan kenon más kitekichiuiliskej Jehová.

Proverbios 20:11 kijtoua: “Hasta sen konetl nimantsin tikitas ken ijki nouika. Tiueli tikitas tla nouika kuajli noso xkuajli”. ¿Kenon uelis tikmatis tla mokoneuj kichiujtika ijkon ken Cristo niman tla iuelis noapolaktis?

Biblia kijtoua ika ijkuak Jesús kipiaya 12 xiuitl nochipa kintlakamatiya itajuan (Luc. 2:51). Noijki ijkon, tla se telpochtli noso ichpochtli kineki noapolaktis noneki kintlakamatis itajuan (Hech. 5:29; Col. 3:20). Melauak, nemokoneuan nopopoloskej. San ika, yejuamej noneki nokojtiliskej kichiuaskej ijkon ken Jesús niman noijki noneki kiteititiskej ika tetlakamatij. Noijki, se telpochtli noso ichpochtli akin kineki noapolaktis noneki kiteititis ika kineki kuajli kasikamatis tlen kijtoua Biblia (Luc. 2:46). Xmotlajtoltikan: “¿Nokoneuj kuelita yas tlanechikoltin niman tlanankilis? ¿Kuelita kiamapouas niman nomachtis Biblia?” (Sal. 122:1; Mat. 4:4).

Kokonej akin kinekij noapolaktiskej nokojtiliaj chikauak kitekichiuiliskej Jehová (Mat. 6:33). Kimatstokej ika noneki kimijliskej oksekimej tlen yejuamej kineltokaj. Nochipa kitejtemouiliaj kenon tenojnotsaskej. Xpinauij kimijliskej inmaestros niman akin inuan nomachtiaj ika yejuamej iteixpantijkauan Jehová. Noijki, nochipa nokojtiliaj kuajli kinpanoltiskej intlamachtiluan ipan tlanechikojli.

Yejuamej nokojtiliaj chipaujkanemiskej. Yejua ika, kuajli kitlapejpeniaj akinon iuan nouikaskej, katlejua tlakuikaltin kinkakiskej, tlenon kitaskej ipan televisión, katlejua videojuegos kinnauiltiskej niman tlenon kitaskej ipan Internet (Prov. 13:20; 1 Cor. 15:33). Miyekej telpokamej niman ichpokamej yokixmatkej tlen melauak niman yonoapolaktijkej pampa intajuan melak okinpaleuijkej. Tiktlajtlaniliaj Jehová ika mamechteochiua pampa nenkinpaleuiyaj nemokoneuan manosentemakakan itech Jehová.

Tlen noneki kimatis akin xinoapolaktia:

Melak tiyolpakij pampa yopeuj titenojnotsa. Ijkon tikchiujtika pampa Biblia yomitspaleui kuajli xkixmati toTajtsin, itech xtlaneltoka niman xchikaua motlaneltokil (Juan 17:3; Heb. 11:6).

Kanaj ijkuak xtimomachtiaya imiuan iteixpantijkauan Jehová, itinemiya ipan se religión noso kanaj xitlaj tikneltokaya. Kanaj hasta tikchiuaya tlen toTajtsin xkuelita. San ika, aman yotikteititi ika yotimoyolkuep niman ika melak xkuajli timomachilia ipampa tlen otikchiuj. Noijki, yotijkauj nochi tlen xkuajli tikchiuaya niman kuajli yotikijto ika tikchiuas tlen kuelita toTajtsin (Hech. 3:19).

Noso, tla tejua “desde tikonetl” tikixmati Jehová, kanaj kuajli yotikitak ika tlen omitsmachtijkej yomitspaleui maka xmokalakti ipan tlen xkuajli niman maka xchiua se ueyi tlajtlakojli (2 Tim. 3:15). Yotikteititi ika xtikchiua tlen Jehová xkuelita maski oksekimej mitschiualtisnekij xchiua tlen xkuajli. Noijki, yotikteititi ika titlaneltoka itech toTajtsin pampa tikteijlia tlen melauak temachtia Biblia. Aman, ititenojnotsa pampa ikalpan toTajtsin yomitsmachti kenon tikchiuas motekiyo.

Maski tla otikixmat Jehová ijkuak tipitentsin katka noso ijkuak yotimoskalti, kanaj aman yotiknemili timosentemakas itech toTajtsin niman timoapolaktis. Tejuamej tosentemakaj itech Jehová ijkuak tikchiuiliaj se teoyotl niman tikijliaj ika san yejua nochipa tiktekichiuiliskej (Mat. 16:24). Sakin, tikteititiaj ika yotosentemakakej itech Jehová ijkuak toapolaktiaj (Mat. 28:19, TNM; Mat. 28:20). Ijkuak tosentemakaj niman toapolaktiaj, tochiuaj iteixpantijkauan Jehová. ¡Yejuin itlaj tlen melak kualtsin!

Biblia kijtoua ika sakin ika Jesús onoapolakti “on Espíritu Santo okuikak [...] kampa xalpatlajkan, para ompa on diablo ma kitlatlata” (Mat. 4:1). Ijkon ken yotiuel ipan Biblia, sakin ika yotimoapolakti noijki miyek tlen tikixnamikis (Juan 15:20). Kanaj mitstlaueltokaskej mochanejkauan, mitspijpinaujtiskej moamigos, akin imiuan titekiti noso akin imiuan timomachtia (Mat. 10:36). Maski san tlenon tikixnamikis, nochipa xkilnamiki tlen okijto Jesús ipan Marcos 10:29, 30: “Ika tlen melauak nemechijlia ika san akinon yejuan kikauas ichan, ikniuan, itataj, inanaj, isiuau, ikoneuan, noso itlaluan, san nopampa niman ipampa on kuajli tlajtojli yejuan kiteijlia ken Dios temakixtia, kiselis aman ipan in tlaltikpaktli se ciento más de on tlen kikaua. Kiselis se ciento más kaltin, ikniuan, inanajuan, ikoneuan niman itlaluan. Pero no kiselis tlauejli niman tlajtlamach ika kitlajyouiltiskej. Niman ipan on okse nemilistli yejuan uajlau, kiselis nemilistli yejuan para nochipa”. Ika yejon, ¡maka keman xtlalkaui Jehová niman nochipa xkintlakamati itlanauatiluan!

Ijkuak tiknekis timoapolaktis, xkimijli tlayekankej akin nemij ipan motlanechikol. Yejuamej mitstlajtoltiskej tlen uajlauj ipan yejuin amatlajkuilojli para kitaskej tla iuelis timoapolaktis. Kuakon, amantsin uelis timomajmachtijtias.

Ijkuak timomachtis, xkinpoua nochi textos niman intech xtlanemili. Tla tikneki, uelis tikijkuilos kenon titlanankilis. Ijkuak tlayekankej mitstlajtoltijtiaskej tlen uajlauj ipan yejuin amatlajkuilojli, uelis tikonitstias moamatlajkuilol niman tlen otikijkuilo. Tla itlaj xtikasikamati, xkijli akin mitsmachtijtok Biblia noso se tlayekanketl mamitspaleui.

Ijkuak tiknankilijtias tlen tlayekankej mitstlajtoltiskej, san xkijto tlen noneki, makakisti ika kisa ipan moyojlo niman xteneua se noso ome texto.

Tla tokniuan tlayekankej kitaj ika xmás tikasikamati tlen temachtia Biblia, yejuamej kitaskej akinon uelis mitspaleuis kuajli xkasikamati niman xtetomili tlen kijtoua Biblia. Niman sakin, uelis timoapolaktis.

[Tlayekankej: Ipan páginas 54-58 uajnestiuj tlenon noneki nenkichiuaskej ijkuak nemosentlaliskej imiuan akin kinekij noapolaktiskej].