TLEN KINTLAJTOLTISKEJ AKIN KINEKIJ NOAPOLAKTISKEJ
Parte 1: Tlen kineltokaj akin kichiuaj ken Cristo
Ijkuak otipeuj timomachtia imiuan iteixpantijkauan Jehová, otikixmat tlen melauak. Tlen yomitsmachtijkej yomitspaleui xmouika iuan Jehová niman xneltoka ika yejua mitsmakas se nemilistli tlen xkeman tlamis ijkuak peuas tlayekanas ipan yejuin tlaltikpaktli. Noijki, aman melak kuajli yotikneltokak ika Biblia ualeua itech toTajtsin. Niman aman ika itinemi ipan ikalpan Jehová, tikita kenon mitsteochiua niman kenon kinyekana itekipanojkauan (Zac. 8:23).
Tlayekankej kachtopa mitstlajtoltiskej tlen noneki kasikamatiskej akin kichiuaj ken Cristo, niman ijkon uelis timoapolaktis (Heb. 6:1-3, TNM). Tiktlajtlaniliaj Jehová mamitspaleui pampa timokojtilia tikixmatis niman mamitsmaka tlen yejua yokijto (Juan 17:3).
¿Tleka tikneki timoapolaktis?
¿Akinon Jehová?
Jehová “san yejua melauak Dios ipan in tlaltikpaktli niman ipan iluikak, niman ika xnemi okse más ken yejua” (Deut. 4:39).
“Niman ijkon makimatikan tlaltikpakchanejkej ika tejua, akin motoka Jehová, san tejua tiUeyixtika ipan nochi tlaltikpaktli” (Sal. 83:18, TNM).
¿Tleka noneki tiktekitiltiskej itoka toTajtsin?
“Nemejuamej, ijkin nenkichiuaskej teoyotl: ‘ToTajtsin akin tinemi ne iluikak, machipaui motoka’” (Mat. 6:9, TNM).
“Nochimej akin kinotsaskej Jehová ika itokayo makisaskej” (Rom. 10:13, TNM).
¿Kenon noijki noixmati Jehová ipan Biblia?
“ToTEKO Dios yejuan nochipa nemi, yejua okichijchiu nochi in tlaltikpatli; xkaman siaui. On itlamachilis xkaman tlami” (Is. 40:28).
“ToTajtsin akin tinemi ne iluikak, machipaui motoka” (Mat. 6:9, TNM).
“Dios yejua tetlajsojtlalistli” (1 Juan 4:8).
¿Tlenon uelis tikmakas Jehová?
“Xtlajsojtla moTEKO Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis” (Mar. 12:30).
“Xtlakaita moTEKO Dios, niman san yejua xtekipano” (Luc. 4:8).
¿Tleka tikneki nochipa tiktlakamatis Jehová?
“Nokoneu, xpiya tlamatkilistli, niman on nechpaktis. Ijkon uelis nikinnankilis yejuan nechijijtouaj” (Prov. 27:11).
¿Akinon tikchiuilia teoyotl, niman akinon noijki noneki tiktokayotis?
Jesús okijto: “Ika tlen melauak tej, nemechijlia ika noTajtsin mechmakas nochi tlen nenkitlajtlaniliskej ikan notokatsin” (Juan 16:23).
¿Tlenon uelis tiktlajtlanis ipan moteoyouan?
“Yejua ika tej, ijkin xchiuakan oración: ‘ToTajtsin, akin tinemi ne iluikak, ma mitsyekteneua nochi tlakatl. Xuajla, xmandaroki nochi tlakatl. Ipan in tlaltikpaktli on tlakamej ma kichiuakan on tlen tikneki ijkon ken nochiua ne iluikak. Aman niman mojmostla xtechmaka tlen tikuaskej. Niman xtechtlapojpoluili totlajtlakoluan ijkon ken tejuamej tikintlapojpoluiyaj on yejuan techchiuiliaj tlen xkuajli. Niman xtechpaleui para maka titlajtlakoskej, yej xtechejeua maka tikchiuaskej tlen xkuajli’” (Mat. 6:9-13).
“Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis” (1 Juan 5:14).
¿Tlenon ueliskia kichiuas ika Jehová maka makikaki toteoyouj?
“Kitlajtlaniliskej Jehová makinpaleui, san ika, yejua xkinnakilis [...] pampa melak xkuajli tlen yokichiujkej” (Miq. 3:4, TNM).
“Pampa Dios kintlakaita on yejuan yolmelajkej, niman kaki inoración. Pero yejua xkinkakis on yejuan kichiuaj tlen xkuajli” (1 Ped. 3:12).
¿Akinon Jesucristo?
“Simón Pedro okijlij: ‘Tejua tiCristo [...]. Tejua tiiKonetsin Dios yejuan melauak nemi’” (Mat. 16:16).
¿Tleka Jesús ouajla ipan tlaltikpaktli?
“Noijki ken nejua yejuan oninochiu Tlakatl xoniuajlaj para nechtekichiuiliskej, yej para nitetekichiuilis, niman niktemakas nonemilis para nikmakixtis miyek tlakatl” (Mat. 20:28).
“Pero Jesús okinmijlij: ‘Nejua no ika onkaj nitemachtis on kuajli tlajtojli yejuan kiteijlia ken Dios temakixtia ipan on oksekimej kalpanmej, pampa yejua ika Dios onechajtitlan’” (Luc. 4:43).
¿Kenon uelis tikteititis ika tiktlasojkamati tlen Jesús okichiuj topampa?
“Cristo omik ipampa nochi tlakatl para on yejuan nemij maka kinoyaxkatikan innemilis, yej ma kimaktilikan on yejuan impampa omik niman onokuiteu ipan itlalkon” (2 Cor. 5:15).
¿Kech ueyilistli kipiya Jesús?
“Nejua yonechmakakej nochi tekiuajyotl para nitlamandaros ne iluikak niman nikan ipan in tlaltikpaktli” (Mat. 28:18).
“Dios okimakak más ueyilistli yejuan xakaj okse kipiya, niman itokatsin yejua más ueyi kijtosneki xken yakaj okse kipiya itoka” (Filip. 2:9).
¿Tikneltoka ika Grupo akin Kinyekana iTeixpantijkauan Jehová yejua “tekitketl” yolmelauak niman tlamachilise akin Jesús okitlali?
“¿Akinon on tekitketl ken on yejuan nochipa kichiua ken iteko kinauatia niman kipiya kuajli itlamachilis? On tekitketl sano yejua on, yejuan iteko kimaktilia ifamilia niman itekitkauan para kinmaka on tlen kikuaskej ijkuak noneki” (Mat. 24:45).
¿Espíritu santo se tlakatl?
“On ángel okinankijlij: ‘On Espíritu Santo mopan uajlas, niman ipoder on yejuan más ueyixtikaj Dios kichiuas sen milagro tejua mopan. Yejua ika, on konetsintli yejuan tlakatis yolchipauak yes niman itoka yes iKonetsin Dios’” (Luc. 1:35).
“Aman tej, tla nemejuamej yejuan xnenkuajkualtin tlakamej nenkimatij ken nenkinmakaskej nemokoneuan on tlajtlamach tlen kuajli, sanoyej pantlannestikaj ika nemoTajtsin iluikak chanej kiminmakas Espíritu Santo on yejuan kitlajtlaniliskej” (Luc. 11:13).
¿Kenon Jehová yokitekitilti iespíritu santo?
“ToTEKO san ika itlajtol okinchijchiu on cielos, niman san ika ijyo okichijchiu nochi kech sitlalin onkaj” (Sal. 33:6).
“Ijkuak on Espíritu Santo uajlas nemopan, nenkiseliskej poder. Niman noka nentenojnotsaskej [...] nochiuiyan ipan in tlaltikpaktli” (Hech. 1:8).
“Xakaj tlakatl iselti uelis kijtos tlinon kijtosneki on tlajtoltin yejuan on tiotlajtojkej okijkuilojkej ipan on Yektlajkuilojli. Xakaj uelis kijtos tlinon kijtosneki, pampa intemachtil on tiotlajtojkej xopeu intechkopa on tlakamej yejuan san okinejnemilijkej ken okinekkej, yej on tlakamej okijtojkej itechkopa on Espíritu Santo” (2 Ped. 1:20, 21).
¿Tlenon kijtosneki iTekiuajyo toTajtsin?
“Dios yejuan nemi ne iluikak kipeualtis sen reinojyotl yejuan xkaman kixoxotoniskej nion yakaj nación kikuilis, yej kimpojpolos on oksekimej reinojyomej, niman ireinojyo nokauas para nochipa” (Dan. 2:44).
¿Tlenon kichiuas iTekiuajyo toTajtsin mopampa?
“Dios kimpopouilis nochi iminixayo, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (Apoc. 21:4).
¿Kenon tikmati ika itlayektlalis iTekiuajyo toTajtsin?
“Inomachtijkauan okinisiuijkej niman san ichtaka okitlajtoltijkej: ‘Xtechijli, ¿kemanon nochiuas yejuin tlemach, niman tlenon panotos ijkuak tikiminualitstos tlaltikpakchanejkej niman ika sa achijtsin poliuis ijkuak tlamis tlajtlamach ken nochiua ipan tlaltikpaktli?’. Jesús okinnankili: ‘[...] Pampa países nouisokiskej, niman onias apistli niman miyekan tlalolinis. Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis ipan yejuin tlaltikpaktli’” (Mat. 24:3, 4, 7, 14, TNM).
Ipan itlamiyan tonaltin “on tlakamej ijkin nouikaskej: sanoyej notlajsojtlaskej sano yejuamej, sanoyej tominnekiskej, noueyimatiskej, xkitlakaitaskej Dios, xkintlakamatiskej intajuan, xitlaj kitlajsojkamatiskej, niman sanoyej xompayejyeuaskej. Xkintlajsojtlaskej oksekimej nion xteikneliskej, chakuamej yeskej, xkiteltiskej iminxkuajlieleuilis, sanoyej xipanteitaskej niman xitlaj kuelitaskej tlen kuajli. Teichtakauiskej, xnomojtiskej itlaj kichiuaskej, noueyimatiskej, sanoyej kinekiskej nopaktiskej, niman xkinekiskej kipaktiskej Dios. Nochiuaskej ken kineltokaj Dios, pero ika on tlen kichiuaj nesi ika xnejli kineltokaj” (2 Tim. 3:1-5).
¿Kenon uelis tikteititis ika tikpatiojkaita iTekiuajyo toTajtsin?
“Xtejtemojtiakan, tej, kachtopa iTekiuajyo toTajtsin niman imelajkayo, niman nochi okseki tlemach noijki nenkiseliskej” (Mat. 6:33, TNM).
“Kemaj Jesús okinmijlij on inomachtijkauan: ‘Tla yakaj kineki nouan yas, ma kelkaua nochi on tlen más kitlajsojtla, ma nemi listo para tlajyouis noso mikis nopampa, niman kemaj ma uajla nouan’” (Mat. 16:24).
¿Akinon Diablo niman demonios?
“Nemejuamej nemotataj on diablo [...]. On diablo desde opeu in tlaltikpaktli temiktia” (Juan 8:44).
“On ueyi dragón okuajkixtijkej ne iluikak. On dragón, sano yejua on kouatl yejuan desde yeuejkaui nemi, itoka diablo noso Satanás. Yejua okajkayau nochi tlakatl chanej ipan in tlaltikpaktli. Yejua tej, niman iángeles okinuajxinijkej ipan in tlaltikpaktli” (Apoc. 12:9).
¿Tlenon okijto Satanás itech Jehová niman itekipanojkauan?
“Niman on siuatl okinankilij [kouatl]: ‘Uelis tikuaskej itlakyo nochi on kojtlakijlotl, pero san on yejuan onkaj itlajkotian on xochitlan, Dios otechijlij maka tikuaskej, nion tikitskiskej itlakyo, pampa tla tikitskiskej timikiskej’. Pero on kouatl okijlij on siuatl: ‘Xnejli. Xnenmikiskej. Kuajli kimati Dios ika tla nenkikuaskej itlakyo on kojtlakijlotl nentlakajsikamatiskej, niman nenkimatiskej on tlen kuajli niman on tlen xkuajli. Niman ijkon nemochiuaskej ken yejua Dios’” (Gén. 3:2-5).
“Pero Satanás ijkin okinankilij toTEKO: ‘Tla sen tlakatl xakaj kiteloua, yejua xitlaj kijtoua. Pero tla yakaj kimiktisneki, san tlinon kitemakasneki para nomanauis’” (Job 2:4).
¿Kenon uelis tikteititis ika xmelak tlen Satanás okijto itech Jehová niman itekipanojkauan?
“Xseli [toTajtsin] niman xtekipano ika nochi moyojlo” (1 Crón. 28:9).
“¡Xkaman nemechijlis melauak tlen nenkijtouaj!” (Job 27:5).
¿Tleka timikij?
“Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Yejua ika nochimej mikiskej pampa nochimej tlajtlakouaj” (Rom. 5:12).
¿Kenon nemij akin yomijkej?
“Pampa yejuan nemij kimatstokej ika mikiskej, pero on yejuan yomikkej xokuitlaj kimatij” (Ecl. 9:5).
¿Tlenon inpan nochiuas akin yomijkej?
“Niman nikpiya tlamachalistli itech Dios no ijki ken kipiyaj in tlakamej, ika on mikatsitsimej yoliuiskej nochimej yejuan yolmelajkej niman on yejuan xyolmelajkej” (Hech. 24:15).
¿Kechmej ontekiuajtiskej iuan Cristo ne iluikak?
“Kemaj onikitak on Borreguito ijkatikatka ipan on tepetl itoka Sión. Iuan yejua nemiyaj 144 mil tlakamej yejuan ipan iminixkuatipan tlajkuilolnestikatka itoka on Borreguito niman itoka on iTajtsin” (Apoc. 14:1).