Parte 2: Tlen noneki kichiuaskej akin kichiuaj ken Cristo

Pampa timomachtia Biblia itikmati tlen Jehová kineki xchiua niman noijki itikmati kenon tikchiuas tlen mitstlajtlanilia. Yejua ika, aman yotimopatlak, yotikijto tikintlakamatis itlanauatiluan Jehová niman tikteijlis iTlajtol.

Tlen nikan mitstlajtoltiskej, mitspaleuis xkita tlen mitstlajtlanilia Jehová niman noijki mitsilnamiktis tlenon noneki tikchiuas tla tikneki tiktekichiuilis. Niman noijki, tlen nikan tikitas mitspaleuis nochipa xtlapejpeni tlen kuajli niman nochipa xkueyichiua Jehová (2 Cor. 1:12; 1 Tim. 1:19; 1 Ped. 3:16; 1 Ped. 3:21, TNM).

Kuajli tikmatstokej ika tikneki ika iTekiuajyo Jehová mamitsyekana niman ika tikneki tinemis ipan ikalpan. Tlen amantsin tiknankilis niman textos tlen tikimitas mitspaleuis xkita tla tikasikamati tlen Jehová yokijto manochiua ipan tlanechikojli, ipan familias niman noijki mitspaleuis xkasikamati ken kintekitiltia tekiuajkej. Tlen mitstlajtoltiskej mitspaleuis más xpatiojkaita ken Jehová techmachtia niman ken texchikauilia totlaneltokil. Noijki, mitspaleuis nochipa xuiya tlanechikoltin niman xtlanankili ijkuak tiuelis.

Noijki mitspaleuis kuajli xkasikamati tleka noneki titenojnotsas nochi metstin niman titemachtis itech tlen toTajtsin kichiujtika (Mat. 24:14; Mat. 28:19, 20, TNM). Sa ika tlami, kuajli tikasikamatis tlenon kijtosneki timosentemakas itech toTajtsin niman timoapolaktis. Kuajli xmatsto ika Jehová melak yolpaki pampa tikneki tiktekichiuilis ika nochi moyojlo.

1. ¿Kenon kineki toTajtsin matonamiktikan? ¿Kemanon kijtoua Biblia ika se uelis tekauas?

   • “¿Nemejuamej xkaman nenkimomachtiaj ipan on Yektlajkuilojli ika on yejuan okichichiu in tlaltikpaktli ijkuak kemach nochi opeu onkaj, okintlalij tlakatl niman siuatl? No okijtoj: ‘Yejua ika on tlakatl kikauas itataj niman inanaj para nosentlalis iuan isiuau, niman ijkon on omemej nochiuaskej ken san se tlalnakayotl’. Ijkon tej, yejuamej xok omemej, yej nochiuaj san se. Yejua ika se tlakatl xuelis kixelos on tlen Dios okisentlali”. “San akinon yejuan noxotonis iuan isiuau, pero xpampa on siuatl iuan onotekak okse tlakatl, niman nonamiktis iuan okse siuatl, yejua siuapapatla. Niman on yejuan nonamiktis iuan on siuatl yejuan yokajkej, no siuapapatla” (Mat. 19:4-6, 9).

2. ¿Tleka noneki manonamiktikan ixpan tekiuajkej akin san yonosentlalijkej? Tla tejua yotimonamikti, ¿kuajli tikmatstika tla tiijkuiliujtok ixpan tekiuajkej?

   • “Xkinmelnamikti on tlaneltokakej para ma kintlakaitakan on yejuan tlayekanaj niman on yejuan kipiyaj ueyitekiuayotl” (Tito 3:1).

   • “Nemochimej xtlakaitakan on namiktilistli. Maka yakaj ma siuapapatla nion maka yakaj ma tlakapapatla, yej xnemikan ipan chipaualistli, pampa Dios kincastigaros on yejuan auilnemij niman on yejuan siuapapatlaj noso tlakapapatlaj” (Heb. 13:4).

3. ¿Kenon noneki tikimitas mochanejkauan?

   • “Nokoneu, xkaki niman xtlakamati motataj. Niman maka xtlalkaui on tlen mitsmachtia monanaj” (Prov. 1:8).

   • “Dios okitlalij on tlakatl tlayekanki itech isiuau, ijkon ken Cristo yejua tlayekanki intech on yejuan kineltokaj. On yejuan kineltokaj nochiuaj icuerpo niman yejua kimakixtia”. “On tlakamej ma kintlajsojtlakan insiuauan ijkon ken Cristo okintlajsojtlak on yejuan kineltokaj niman impampa onotemakak para omik” (Efes. 5:23, 25).

   • “Tatajtin, nemejuamej maka xkinkuajkualanikan nemokoneuan, yej kuajli xkinmachtikan niman xkinchikajkanotsakan ken toTEKO kineki” (Efes. 6:4).

   • “Kokonej, nochi ika xkintlakamatikan nemotajuan, pampa in yejua kipaktia toTEKO” (Col. 3:20).

   • “Nemejuamej siuamej, xtlakaitakan nemoueuentsin” (1 Ped. 3:1).

4. ¿Tleka noneki tiktlasojkaitaskej tonemilis?

   • ToTajtsin “otechmakak tinochimej tijyo niman tonemilis, noijki nochi tlajtlamach”. “Niman san ipampa yejua tiyoliujtokej, niman titoliniaj niman tinemij” (Hech. 17:25, 28).

5. ¿Tleka xnoneki titemiktiskej? ¿Tleka xnoneki tikmiktiskej se konetsintli akin xiuajtlakati?

   • “Tla omemej tlakamej nouijsokij niman kokouaj sen siuatl yejuan koneuaj, niman yejua kitlajkali ikoneu, [...] ika onkaj nenkimiktiskej on yejuan otekokoj” (Éx. 21:22, 23).

   • “Tejua kuajli otikitak ken opeu nochijtiu notlalnakayo. Nochi tlen ipan nonemilis nochiuaskia yotiktlalijka ipan on moamamox. Maski xe nitlakatiya, tejua otiktlalij keski xipan ninemis” (Sal. 139:16).

   • “ToTEKO sanoyej kikualania, yejuan [...] ikan iminmauan kinmiktiaj yakamej maski yejuan xkipiyaj tlajtlakojli” (Prov. 6:16, 17).

6. ¿Tlenon kijtoua toTajtsin itech yestli?

   • “Maka xkuakan yestli nion innakayo on yolkej yejuan san nokechmiktiaj” (Hech. 15:29).

7. ¿Tleka noneki tikintlasojtlaskej tokniuan?

   • “Nemechmaka in yenkuik tlanauatijli: xmotlajsojtlakan inuan oksekimej. Ijkon ken nejua nemechtlajsojtla, nemejuamej no ijki xmotlajsojtlakan inuan oksekimej. Tla nemotlajsojtlaj inuan oksekimej, nochi tlakatl kitas ika nennotemachtijkauan” (Juan 13:34, 35).

8. a) Tla tikpiya se kokolistli tlen temiktia niman notepanoltilia, ¿tleka xnoneki tikinnapalos, tikintenkuas noso tikinpipitsos oksekimej? b) ¿Tleka xnoneki tikualanis tla oksekimej xmitsnotsaj inchan? c) Tla tiknemilia ika tikpiya se kokolistli tlen notepanoltilia, ¿tleka noneki tias kampa tepajtiketl tla tiknemilijtika tikpiyas monovio noso monovia? d) Tla tikpiya se kokolistli tlen notepanoltilia niman tiknemilijtika timoapolaktis, ¿tleka noneki kachtopa tikijlis akin kixeloua tekitl itech tlayekankej?

   • “Maka yakaj itlaj xkuikilikan, yej xpiyakan on tetlajsojtlalistli yejuan noneki nemopiyaliskej. [...] ‘Xtlajsojtla motlaltikpakchanejkau no ijki ken tejua timotlajsojtla’. Yejuan tetlajsojtla xkitechiuilia on tlen xkuajli” (Rom. 13:8-10).

   • “Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli” (Filip. 2:4).

9. ¿Tleka Jehová kineki matitetlapopoluikan?

   • “Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia, ijkon ken Cristo omechtlapojpoluij” (Col. 3:13).

10. ¿Tlenon noneki tikchiuas tla se tokniuj mitstlajtolchijchiuilia noso mitskajkayaua?

    • “Tla mokniu mitschiuilia itlaj tlen xkuajli, xnotsa san iselti niman xkijli on tlinon xkuajli omitschiuilij. Tla kijtos ika melauak okichiu tlen xkuajli niman noyoltlalia, ijkon tiktlanis mokniu niman xtikpolos. Pero tla yejua xmitstenkaki, tla ijkon, xkuika se noso ome tlakatl para nochi tlen nijtos ma kimati ome noso yeyi testigos. Tla no xkineki kinkakis, tla ijkon, xkinnotsa on tlaneltokakej ipan itiopan Dios para no ma kitlakanonotsakan. Niman tla yejua xkintenkaki, tla ijkon xpiyakan, ken se yejuan xkineltoka Dios noso ken sen tlaixpachouani tlacobrarojketl ikan on impuestos para Roma” (Mat. 18:15-17).

11. ¿Kenon kimita Jehová yejuin tlajtlakoltin?

    • ▪ Tiauilnemis

    • ▪ Tikinueyichiuas tajtsitsintin

    • ▪ Ijkuak tlakamej kinuelitaj tlakamej niman siuamej kinuelitaj siuamej

    • ▪ Titlachtekis

    • ▪ Timotlatlanis ika tomin

    • ▪ Titlauanis

    • “Maka xmokajkayauakan, yej kuajli xmatikan ika on yejuan auilnemij, noso on yejuan kinyekteneuaj ídolos, xkalakiskej ne kampa Dios tlamandaroua. No xkalakiskej on yejuan siuapapatlaj, noso tlakapapatlaj, noso on siuamej yejuan keleuiyaj sano siuamej, noso on tlakamej yejuan keleuiyaj sano tlakamej. Niman no xkalakiskej kampa Dios tlamandaroua on yejuan tlachtekij, yejuan sanoyej tlajtlamach kinoyaxkatisnekij, yejuan tlauanij, yejuan tetejteneuaj, niman on yejuan tlaixpachouaj” (1 Cor. 6:9, 10).

12. ¿Tlenon tikchiuas tla kemantika yakaj mitsijlia iuan xauilnemi?

    • “Xtlalkauikan tej, on auilnemilistli” (1 Cor. 6:18).

13. ¿Tleka xnoneki tiktekitiltiskej itlaj tlen sakin xok uelis tijkauaskej noso tlen uelis kijtlakos totsontekon, tla tepajtiketl xtechijlia matiktekitiltikan?

    • “Xmotemaktilikan itech Dios ken itlaj uentli yejuan yoltikaj niman yektli ijkon ken yejua kineki. Tla ijkon nenkichiuaskej, nenkimauistiliskej Dios ken noneki. Maka sa xmouikakan ken on tlaltikpaktlakamej nouikaj, yej xkauilikan Dios ma yejua kiyenkuili nemotlamachilis. Ijkin tej, nenkimatiskej tlinon Dios kineki: on tlen kuajli, on tlen kipaktia niman nochi on tlen chipauak” (Rom. 12:1, 2).

14. ¿Tlenon melak kitlauelita toTajtsin?

    • “Maka kaman yakaj kiuentlalis ipan tlitl sen ikoneu, nion maka kejekos para tetlatejtemouilis, nion maka kinekis kiteijlis on tlen nochiuas sakin, nion maka kejekos on nauajlotl. Maka yakaj kejekos xkuajli tlaixkajkayaualistli, nion maka kintejtemos on tetlatejtemouilijkej niman on yejuan kiminnotsaj ajakamej, nion maka tlajtos iminuan mikatsitsimej” (Deut. 18:10, 11).

15. Tla yakaj kichiua se ueyi tlajtlakojli, ¿tlenon noneki nimantsin kichiuas tla kineki oksejpa kuajli nouikas iuan Jehová?

    • “Pero motech oninoyolkuitij; xitlaj notlajtlakol onimitsiyanilij. Ijkin onikijtoj: ‘Nejua ninoyolkuitis itech noTEKO’” (Sal. 32:5).

    • “Tla se kualo, ma kinnotsa tokniuan yejuan ueuetkej tlayekankej ipan on tiopan para yejuamej ipampa ma kichiuakan oración niman ma kitlalilikan on aceite ikan itokatsin toTEKO. On oración yejuan kichiuaskej ikan tlaneltoktli kipajtis on kokoxki, niman toTEKO ketsteuas. Tla yejua okichijka tlajtlakojli, Dios kitlapojpoluilis” (Sant. 5:14, 15).

16. ¿Tlenon noneki tikchiuas tla otikmat ika se tokniuj okichiuj se ueyi tlajtlakojli?

    • “Tla yakaj kitestigojtlaliaj para ma kijto on tlen okitak, noso okak tlen onochiu niman xkineki kijtos, tla ijkon, yejua kipiyas tlajtlakojli, niman ika onkaj kitlaxtlauas” (Lev. 5:1).

17. Tla noteijlia ika yakaj xok iteixpantijkauj Jehová, ¿kenon noneki tikitaskej?

    • “Nejua tej, yej nemechijlisnekiya maka iuan xmonelokan on yejuan noteneua kineltoka Cristo, pero nemi ipan auilnemilistli, noso sanoyej tlajtlamach kinoyaxkatisneki, noso kinyekteneua ídolos, noso tetejteneua, noso tlauani, noso tlachteki. Nion siquiera iuan xtlakuakan on yejuan ijkon kichiua” (1 Cor. 5:11).

    • “Tla yakaj temachtijketl mechonnotsa niman xkiteijlia itemachtil Cristo, maka xselikan nemochan, nion maka xtlajpalokan” (2 Juan 10).

18. ¿Tleka noneki touikaskej imiuan akin kitlasojtlaj Jehová?

    • “Xmouika iuan sen tlamatki niman titlamatki yes, pero xmouika iminuan on tontos niman timixpolos” (Prov. 13:20).

    • “Maka xmokauilikan mechkajkayauakan. Onkaj tlajtojli yejuan ijkin kijtoua: ‘Yejuan iminuan nouika on yejuan xkuajli nouikaj, kijtlakouiliaj ikuajli nemilis’” (1 Cor. 15:33).

19. ¿Tleka akin tiiteixpantijkauan Jehová xtokalaktiaj ipan política?

    • “Ijkon ken nejua [Jesús] xninouika ken on tlaltikpaktlakamej, yejuamej no xnouikaj ken on tlaltikpaktlakamej” (Juan 17:16).

20. ¿Tleka noneki tikintlakamatis tekiuajkej?

    • “Nochi tlakatl ma tetlakamati intech on tekiuajkej, pampa xnemij tekiuajkej yejuan Dios xokinkalaktij, yej nochi kech tekiuajkej nemij Dios okinkalaktij” (Rom. 13:1).

21. Tla tekiuajkej mitsijliskiaj xchiua itlaj tlen toTajtsin xkuelita, ¿tlenon tikchiuaskia?

    • “Kitocaroua achtoj tiktlakamatiskej Dios xken nemejuamej yejuan san nentlakamej” (Hech. 5:29).

22. ¿Katlejua textos uelis techpaleuiskej kuajli matikitakan tlen tekitl tikseliskej?

    • “Se país xok kixnamikis okse país ika espada, nion xok nomachtiskej kenon tlaixnamikiskej ipan guerra” (Miq. 4:3, TNM).

    • “Nemejuamej yejuan nennoyaxkauan, xkisakan ipan on ueyikalpan [Ueyixtika Babilonia], para xinuan nenkichiuaskej on intlajtlakol, niman ijkon xinuan nenkiseliskej on iplagas” (Apoc. 18:4).

23. ¿Tlenon noneki tiknemilis ijkuak tiktlapejpenis kenon timoyolpaktis?

    • “ToTEKO [...] kintlauelita ika nochi iyojlo on xompayejyeuamej niman on yejuan kichiuaj on tlen xkuajli” (Sal. 11:5).

    • “Xtlauelitakan on tlen xkuajli, yej xchiuakan on tlen kuajli” (Rom. 12:9).

    • “Xnemilikan nochi tlen melauak, nochi yejuan kipiya tetlakaitalistli, nochi tlen melajki, nochi tlen chipauak, nochi tlen tepaktia, niman nochi yejuan kipiya yekteneualistli. Xnemilikan nochi tlen más kuajli niman yejuan kipiya yekteneualistli” (Filip. 4:8).

24. ¿Tleka iteixpantijkauan Jehová xnosentlaliaj imiuan okseki religiones?

    • “Niman xuelis nentlakuaskej ipan imesa toTEKO, niman nentlakuaskej ipan inmesa on xkuajkualtin espíritus” (1 Cor. 10:21).

    • “Xkisakan ne intsajlan on yejuan xtlaneltokaj, niman intech xmoxelokan. Maka xchiuakan on tlen xchipauak, niman nejua nemechselis” (2 Cor. 6:17).

25. ¿Tlenon mitspaleuis xmati tla uelis tikchiuas noso tias ipan se iluitl?

    • “Yej ononelojkej iminuan on yejuan xkineltokaj Dios, niman no ijki opeu nouikaj. Opeu kinmauistiliaj on ídolos. Yejua ika onixpolojkej” (Sal. 106:35, 36).

    • “On yejuan yomikkej xokuitlaj kimatij” (Ecl. 9:5).

    • “Ijkon ken nejua xninouika ken on tlaltikpaktlakamej, yejuamej no xnouikaj ken on tlaltikpaktlakamej” (Juan 17:16).

    • “Ipan on tiempo yopanok, nemejuamej onenkichijkej miyek xkuajli no ijki ken on yejuan xhebreos. Onenkichijkej nochi tlen sanoyej xkuajli, onenkipixkej xkuajli eleuilistli, onenkichijkej iluimej kampa sanoyej nentlauaniyaj, nochipa nentlauantinemiyaj niman nenkinmauistiliayaj on ídolos” (1 Ped. 4:3).

26. ¿Kenon Biblia uelis mitspaleuis xtlapejpeni tla tikpanoltis se cumpleaños noso ka?

    • “Uajuiptla, iluiu katka on rey, niman okichiu sen ueyi iluitl para nochimej on iuejueyitekitkauan. Niman imixpan nochimej itenotskauan, on rey otlatitlan ma kinkixtikan ipan carcel on yejuan kimachiliaya ivino niman no on tlayekanki panchijketl. Niman on yejuan kimachiliaya ivino, oksejpa okitlalij ipan itekiu [...]. Pero otlanauatij para on panchijketl ma kechpilokan ipan sen kojtli” (Gén. 40:20-22).

    • “Pero ijkuak okichijkej iluitl ipan iluiu Herodes, imixpan on itenotskauan onijtotij ichpoch Herodías. Niman Herodes sanoyej okuelitak ken onijtotij on ichpochtli. Yejua ika okiprometerouilij niman onokalaktij ikan itlajtol para kimakas san tlinon yejua kitlajtlanis. Kemaj yejua ikan itlanauatil inanaj okijlij Herodes: ‘Nikan ipan sen plato xnechmaka itsontekon Juan on tlakuatekijketl’”. “[Tekiuaj] okintitlan on isoldados ma kikechtsontekitij Juan ne kampa tsakutikaj” (Mat. 14:6-8, 10).

27. ¿Tleka tikneki tikintlakamatis tlayekankej?

    • “Xkintlakamatikan on yejuan mechyekanaj, niman xchiuakan intlanauatil, pampa yejuamej tlacuidarouaj ikan nemoalma. Yejuamej kimatstokej ika nemoka kitemakaskej cuenta itech Dios. Yejua ika tej, xkintlakamatikan para intekiu kichiuaskej ikan paktli niman xikan ajmantli, pampa tla xijki nenkichiuaj, yejua on xitlaj ika mechpaleuis” (Heb. 13:17).

28. ¿Tleka noneki tikamapouas niman timomachtis Biblia iuan mochanejkauan?

    • “Yej kuelita itlanauatil toTEKO niman ipan tlanemilia ikan tonajli niman ikan yeuajli. Yejua ken sen kojtli yejuan toktikaj ipan iatenko sen río. Tlaki nochipa ijkuak kitocaroua, niman xkaman xojyoxini. Ijkon tej, nochi tlen kichiua on tlakatl kuajli kisa” (Sal. 1:2, 3).

29. ¿Tleka tikuelita tias tlanechikoltin niman titlanankilis?

    • “Nejua, nikinnojnotsas nokniuan de tejua, niman nimitsueyiteneuas imintsajlan on yejuan mitsneltokaj, ijkuak nosentlaliaj para mitsmauistiliaj” (Sal. 22:22).

    • “Ma tiknemilikan kenijki uelis tikinyoleuaskej oksekimej para ma notlajsojtlakan niman para ma kichiuakan on tlen kuajli. Niman maka no ijki ma tikchiuakan ken sekimej yejuan xok nosentlaliaj touan kampa tikmauistiliaj Dios. Yej ma titoyoleuakan iuan oksekimej, niman más ma toyoleuakan pampa tikmatij ika ye nisiu uajlas toTEKO” (Heb. 10:24, 25).

30. ¿Katlejua tekitl okijto Jesús ika melak noneki matikchiuakan?

    • “Xuiyan niman xkinmachtikan tlaltikpakchanejkej ipan nochi kalpamej, xkinapolaktikan [...]. Xkinmachtikan makitlakamatikan nochi tlajtlamach tlen yonimechnauati” (Mat. 28:19, 20, TNM).

31. ¿Kenon Jehová kuelita matiktemakakan totomintsin noso matikinpaleuikan tokniuan?

    • “Xmaka toTEKO sen ofrenda de on tlen tikipiya” (Prov. 3:9).

    • “Cada se ma kitemaka iuentomin ken kixtia ipan iyojlo. Maka ma kixtoka tlen kitemaka, nion maka ma nomati san kichiualtiaj ma kitemaka, pampa Dios kitlajsojtla on yejuan kitemaka iuentomin ikan paktli” (2 Cor. 9:7).

32. ¿Tlenon tikixnamikiskej akin tikchiuaj ken Cristo?

    • “Dios kintiochiua on yejuan kijyouiyaj ijkuak kintlauelitaj san pampa kichiuaj on tlen kuajli. Kintiochiua pampa nemiskej ne kampa tlamandaroua Dios iluikak chanej. Dios mechtiochiuas nemejuamej ijkuak on tlakamej mechuijuikaltiaj, niman mechtlayouiltiaj, niman mechteneuiliaj tlajtlamach tlen xmelauak san pampa nennechneltokaj. Ijkuak ijkon mechchiuiliskej, xpakikan niman xnemikan ikan paktli, pampa ne iluikak nenkiseliskej sen ueyi tetlayokolijli. No ijki, okintlauelitakej niman tlajtlamach ika okintlajyouiltijkej on tiotlajtojkej yejuan onemikoj yeuejkaui ijkuak xe nennemiyaj” (Mat. 5:10-12).

33. ¿Tleka se ueyi tlateochiualistli timoapolaktis niman timochiuas iteixpantijkauj Jehová?

    • “Ijkuak tinechnotsaya, motlajtol nikejeuaya; yejua onechpaktij niman onechmakak pakilistli ipan noyojlo, pampa nejua nimoyaxka, noTEKO niman noDios akin nochi ueli tikchiua” (Jer. 15:16).