SECCIÓN 18
Milagros tlen Cristo okichiuj
Jesús kiteititia ika imilagros kenon kitekitiltis ikojtilis ijkuak Tekiuaj yes
TOTAJTSIN okimakak kojtilistli iKoneuj niman ijkon ueliskia kichiuas tlen nion se tlaltikpakchane xueliya, miyek teixpan okichiuj. Ijkon Jesús okiteititi ika uelis kipopolos tlen tlaltikpakchanejkej xuelij kipopolouaj. Matikitakan san seki tlen okichiuj.
Apistli. Kachtopa imilagro Jesús —okichiuj atl manokuepa vino— okiteititi ika uelis kichiuas maka keman mapoliui tlakuajli niman tlen noonis. Jesús okpa okichiuj mamiyekiya pan niman michimej, niman ijkon okintlakualti melak miyekej tlaltikpakchanejkej. Niman ijkuak okichiuj yejon nochipa onokauj tlakuajli.
Kokolistli. Cristo okipajti “nochi tlajtlamach kualolistli niman kokolistli” (Mateo 4:23). Okimpajti akin xtlachiayaj, akin xtlakakiyaj, akin xueliyaj nejnemiyaj, akin kipiayaj kokolistli lepra niman akin sojsotlauiyaj. Xonkatka se kokolistli tlen xueliya kipajtiaya.
Ajakakiyaujtin. Se yeuajli ijkuak Jesús niman inomachtijkauan yayaj ipan mar tlen onkatka ipan Galilea, opeuj chikauak ajakakiyaui. Inomachtijkauan melak onomojtijkej, niman Jesús san oajkotlachix niman okijto: “Xmotelti, niman ma ka sa tlamach xchiua”. Nimantsin onotelti ika ajakakiyaui (Marcos 4:37-39). Niman noijki okse tonajli onejnen ixko atl ijkuak ajakatl melak chikauak kikoxonijtoya (Mateo 14:24-33).
Xkuakualtin espíritus. Yejuin espíritus akin kintokayotiaj demonios, melak kipiyaj chikaualistli xijkon ken tejuamej. Yokintlajyouiltijkej miyekej tlaltikpakchanejkej niman miyekej xuelij kiminokixtiliaj. Jesús xkiminmakasiya. Yejuamej akin nomojtiayaj ijkuak kiminisiuiaya niman kitlakamatiyaj ijkuak kimijliaya makisakan intech tlaltikpakchanejkej.
Mikilistli. Yejuin, tlen iTlajtol toTajtsin kitokayotia ‘on sa ika nochi tetlauelikniuʼ, xakaj ueli kinokixtilia (1 Corintios 15:26). Cristo okiyoliti itelpokatsin se siuakauajli niman se ichpochtsintli. Tlen melak nomojkaita itech imilagros Jesús, ijkuak okiyoliti Lázaro imixpan miyekej, akin kipiaya naui tonajli ika yomijka. Akin kitlauelitayaj okitakej ika kipiaya ueyi kojtilistli (Juan 11:38-48; 12:9-11).
Tlaltikpakchanejkej akin Jesús okimpajti, sakin oksejpa okualokej niman omijkej. Kuakon, ¿tleka okichiuj milagros? Pampa ika yejon okiteititi ika nochi tlen onoijto itech iTekiuajyo Mesías yemelak nochiuas. Kuajli tikmatstokej ika ijkuak tekiuajtis Mesías akin toTajtsin okitlali, xok onias apistli, kokolistli, ajakakiyaujtin, xkuakualtin espíritus niman xok onias mikilistli. Jehová yokimakak kojtilistli tlen ika uelis kichiuas.