XPEUA XTENOTSA
TLAMACHTIJLI 6
Xyolchikauak
Tlen Biblia kijtoua: “Dios otechpaleuij para otemechmakakej on kuajli tlajtojli” (1 Tes. 2:2).
Tlen okichiuj Jesús
1. Xkita VIDEO noso xkamapoua Lucas 19:1-7. Tla ijkon yotikchiuj, aman xkinnankili yejuin:
¿Tleka miyekej xkinekiyaj kinotsaskej Zaqueo?
¿Tleka Jesús okinojnots Zaqueo maski miyekej xkinekiyaj kinotsaskej?
¿Tlenon tiuelij itech ken Jesús okichiuj?
2. Noneki toyolchikauaskej niman ijkon uelis nochimej tikinnojnotsaskej.
Xchiua ken Jesús
3. Xtlaneltoka itech Jehová. Iespíritu toTajtsin okiyolchikauj Jesús para matenojnotsa, tejua noijki uelis mitsyolchikauas (Mat. 10:19, 20; Luc. 4:18). Xkijli Jehová mamitsyolchikaua para uelis tikinnojnotsas akin ueliskia tikinmakasis (Hech. 4:29).
4. Maka xtechikoita. Kemantika xok más tiknekij yakaj tiknojnotsaskej tla yotikitakej kenijki notlakentia, tla tikitaj kenijki nemi, tla otikmatkej ika kipiya se religión, tla tikitaj ika melak kipiya tomin noso xmás kipiya tomin. San ika, xkilnamiki:
Tejuamej xtikmatij tlenon kipiyaj ipan inyojlo akin tikinnojnotsaj, san ika, Jehová niman Jesús kema.
Maka matiknemilikan ika yejon tlaltikpakchane xkinamiki ika Jehová makipaleui.
5. Xyolchikaui, san ika, xmotlajpiya (Mat. 10:16). Xtetlakaita niman maka teuan xmokualani. Tla tikita ika akin tiknojnotsa xkineki mitskakis noso tikmachilia ika ueliskia mopan nochiuas itlaj tlen xkuajli, san kualtsin xkijli ika yetiauj (Prov. 17:14).