“Nenmelajkanemiskej ipan on tlen nemechijlia”
“Nenmelajkanemiskej ipan on tlen nemechijlia, nenmochiuaskej melauak nennomachtijkauan. Nenkixmatiskej tlen melauak, niman on tlen melauak yejua mechmanauis” (JUAN 8:31, 32).
¿Tlenon kijtosnekiya Jesús? Ijkuak Jesús okijto “tlen nemechijlia” kiteneujtoya tlen temachtiaya, san ika, noijki okijto ika tlen temachtiaya ualeuaya itech yakaj akin más ueyixtika, yejua okijto: “Ijkon nochiuas pampa nejua xnikijtoua on tlen san nejua niknemilia, yej noTajtsin, yejuan onechajtitlan, yejua onechnauatij on tlen nikijtos niman nikteititis” (Juan 12:49). Sejpa katka okichiuili oración itaj, toTajtsin Jehová, ijkin okijli: “Motlajtoltsin yejua tlen melauak”. Ika yejon, ijkuak temachtiaya nochipa kijtouaya tlen toTajtsin yeuejkaui yokimijlika itekipanojkauan (Juan 17:17; Mateo 4:4, 7, 10). Kuakon, ¿kenon melajkanemij itech tlen okijto Jesús akin melauak kichiuaj ken yejua? Ijkuak kiseliaj ika iTlajtol toTajtsin, Biblia, kijtoua tlen melauak, kinamiki makimijli tlenon kichiuaskej niman tlenon kineltokaskej.
Tlen okichiujkej akin yeuejkaui kichiuayaj ken Cristo. Pablo, se akin okichiuj ken Cristo niman okimijkuilo miyek amatlajkuiloltin ipan Biblia, melak kitlakaitaya iTlajtol toTajtsin ijkon ken Jesús. Yejua okijto: “Nochi Yektlajkuilojli itech Dios ualejtikaj, niman [...] techpaleuiya” (2 Timoteo 3:16). Noijki akin temachtiayaj ipan tlanechikojli okimijlikej ika xnonekiya temachtiskej ika tlen xuajlaya ipan iTlajtol toTajtsin (Tito 1:7, 9). Niman nochimej akin kichiuayaj ken Cristo okimijlikej: “Maka yakaj xkauilikan mechkajkayaua ika on xkuajli temachtilistli tlen xmelauak. On ken on tlajtlamach temachtilistli, san intemachtil niman incostumbre on tlaltikpaktlakamej. On temachtilistli xkisa itech Cristo” (Colosenses 2:8).
¿Akinomej noijki ijkon kichiuaj aman? Ipan Constitución dogmática sobre la divina revelación, tlen Vaticano ipan 1965 okijto manokixti niman tlen noijtoua ipan Catecismo de la Iglesia Católica, kijtoua ika xnochi tlen kineltokaj ipan iglesia católica kikixtiaj ipan Biblia, noijki okijto ika la Sagrada Tradición nonekiya noselis niman notlakaitas ijkon ken la Sagrada Escritura. Revista Maclean’s okijto ika se akin temachtiaya ipan se religión de Toronto (Canadá), okijto: “¿Tleka san noneki toyekanaskej ika itlaj tlen yeuejkaui onoijto? Tejuamej noijki titlamachilisejkej, kuakon xok tepaleui tla tikitaj tlen Jesús otemachti niman tlen Biblia kijtoua”.
Ipan New Catholic Encyclopedia kijtoua yejuin itech iteixpantijkauan Jehová: “Yejuamej san ipan Biblia kikixtiaj tlen kineltokaj niman tlen kichiuaj”. Xiuejkaui, ne Canadá se tlakatl okitlajtolkoton se iteixpantijkauj Jehová niman okijli: “Inikmatstika nenakinomej”. Niman okimajpilui Biblia tlen kipiaya yejon siuatl niman okijli: “Yejon libro tlen tikuajkui ipan moma mitsteixpantia”.