¿Yemelak kichiuaj ken Cristo nochimej akin notokayotiaj cristianos?
¿TIKMATI kechmej notokayotiaj cristianos ipan nochi tlaltikpaktli? Ipan Atlas of Global Christianity, noijtoua ika ipan 2010, nemiyaj kanaj 2,300 millones, san ika, xexeliujtokej kanaj ipan 41,000 tlaneltokiltin niman cada se de yejon tlaneltokijli kipiya tlenon kichiua niman tlenon kineltoka. Pampa miyekej nemij akin notokayotiaj cristianos, sekimej xok kimatij tlenon kineltokaskej niman tlenon kinemiliskej. Kanaj notlajtoltiaj: “¿Yemelak kichiuaj ken Cristo nochimej akin notokayotiaj cristianos?”.
San matikonteneuakan yejuin. Xkonnemili ika tejua tikneki tikalakis ipan okse país, ¿kenon uelis tikteititis ika tiualeua kampa tejua tikijtoua? ¿Xmelak ika xmitsneltokaskej tla xtikteititia se amatl? Noneki tikteititis se pasaporte noso itlaj okse. Noijki ijkon panoua iuan akin kijtoua ika cristiano, xsan noneki kijtos ika tlaneltoka itech Jesús, noneki kiteititis. Matikitakan kenon.
Tlajtojli “cristiano” opeuj notekitiltia kanaj ipan xiuitl 44. Lucas akin noijki otlajkuilo ipan Biblia, okijto ika ipan “Antioquía on tlaneltokakej kemach okintokayotijkej cristianos” (Hechos 11:26). Kuakon, akin cristianos nonekiya tlaneltokaskej noso yeskej inomachtijkauan Cristo. San ika, ¿tlenon kichiua akin inomachtijkauj Jesús? Diccionario Teológico del Nuevo Testamento kijtoua ika yejua kita tlenon kichiua Cristo niman ijkon kichiua niman noijki nosentemaka itech ipan nochi inemilis. Kuakon, akin yemelak cristiano kichiua nochi tlen Jesús otechnauati.
Itech nochimej akin aman notokayotiaj cristianos, ¿nemij akin yemelak kichiuaj ken Jesús? ¿Tlenon okijto Jesús ika kichiuaskiaj? Tla tikneki timatis tlenon kijtoua Biblia itech yejuin, xkimita makuijli tlamachtiltin tlen nikan uajlauej. Ipan cada se tikitaskej tlenon okijto Jesús ika kichiuaskiaj inomachtijkauan. Noijki tikitaskej tlenon tiuelij itech akin okichiujkej ken Cristo ipan kachtopa siglo niman akinomej kichiuaj ken Cristo aman.