¿Tlenon yemelak kichiua se cristiano? | ¿Tlenon kijtoua Biblia?

Ipan yejuin tonaltin, miyekej kijtouaj ika cristianos noso ika kichiuaj ken Cristo. San ika, miyekej teyolkokouaj ika tlen kichiuaj pampa techikoitaj, tekajkayauaj, kitechiuiliaj tlen xkuajli niman miyekej kinkajkayauaj imixnamik. Ika yejon, miyekej notlajtoltiaj: “¿Tlenon yemelak kijtosneki tiyes cristiano?”.

Tlen kichiua akin yemelak cristiano

Se xouijtika uelis kijtos ika cristiano noso ika kichiua ken Cristo. San ika, xsan noneki tikijtoskej, noijki noneki itlaj tikchiuaskej. Biblia kijtoua ika akin kichiua ken Cristo, yejua inomachtijkauj Jesús (Hechos 11:26). Jesús okijto: “Tla nenkichiuaj tlen nitemachtia, nenkiteititiskej ika yemelak nejua onimechmachti” (Juan 8:31). Kanaj xakaj uelis nochi kuajli kichiuas tlen Jesús otemachti. San ika, akin cristiano noso akin kichiua ken Cristo, nokojtilia kichiuas tlen Jesús otemachti niman nokojtilia mojmostla kiteititis ika tlen kichiua. Matikitakan seki tlen kichiuaj akin cristianos noso akin kichiuaj ken Cristo.

Tetlasojtlaj

Tlen Jesús okijto: “Nimechmaka se yenkuik tlanauatijli: xmotlasojtlakan. Ijkon ken nejua yonimechtlasojtlak, nemejuamej noijki xmotlasojtlakan. Tla nemotlasojtlaj, nochimej kimatiskej ika nejua onimechmachti” (Juan 13:34, 35).

Tlen Jesús okichiuj: Jesús nochimej okintlasojtlaj, yejua xotechikoitak. Okinpajti akin kualouayaj, melak miyekej okintlakualti niman ipampa nochimej okitemakak inemilis (Mateo 14:14-21; 20:28).

Akin kichiuaj ken Cristo: Yejuamej kiteititiaj ika tetlasojtlaj ijkuak ika inyojlo kinpaleuiyaj oksekimej, ijkuak xtechikoitaj niman ijkuak tetlapopoluiyaj. Noijki, kinpaleuiyaj akin tlajyouiyaj niman kichiuaj nochi tlen noneki para tepaleuiskej (1 Juan 3:16).

Xtekajkayauaj

Tlen Jesús okijto: “Nejua [...] nitlenmelauak” (Juan 14:6).

Tlen Jesús okichiuj: Jesús nochipa kichiuaya niman kijtouaya tlen melauak. Xkeman otekajkayauj. Miyekej kimatiyaj ika nochipa kijtoskia tlen melauak maski ipampa tlen kijtoskia ueliskia kichiuiliskiaj tlen xkuajli (Mateo 22:16; 26:63-67).

Akin kichiuaj ken Cristo: Yejuamej xtlakajkayauaj. Kitlaxtlauaj tlen gobierno kitlajtlani, xtlachtekij niman kuajli kichiuaj intekiyo kampa tekitij (Romanos 13:5-7; Efesios 4:28). Xtekajkayauaj ijkuak kinchijchiuaj exámenes noso ijkuak kitemiltiaj se amatl nion xtekajkayauaj ika inamauan (Hebreos 13:18).

Kuajli tenotsaj

Tlen Jesús okijto: “Notech xuajlakan, nochimej nemejuamej akin chikauak nentekitij niman yonensiaujkej, nejua nimechyolseuis. Xmomamaltikan noyugo niman notech xuelikan, pampa nejua niyolsejki niman niyolyemanki. Nouan nenyolseuiskej. Pampa noyugo yemanki niman notlamamal xyetik” (Mateo 11:28-30).

Tlen Jesús okichiuj: Jesús nochimej kuajli kinnotsaya. Kinokauiliaya ika kokonej iuan matlajtokan, kinyolseuiaya akin najmanayaj niman nochimej kintlakaitaya (Marcos 10:13-15; Lucas 9:11).

Akin kichiuaj ken Cristo: Yejuamej kuajli tenotsaj, xteuijuikaltiaj niman xkitechiuiliaj tlen xkuajli (Efesios 4:29, 31, 32). Najmanaj ipampa oksekimej niman kitaj kenon tepaleuiskej (Gálatas 6:10).

Xkikajkayauaj imixnamik

Tlen Jesús okijto: “Tlen toTajtsin yokisetili, maka makixelo nion se tlakatl” (Marcos 10:9).

Tlen Jesús okichiuj: Maski Jesús xkeman ononamikti, okinyolchikauj akin yononamiktijkej para maka makinkajkayauakan imixnamik (Mateo 19:9). Okinmelajkaijli tlenon xnoneki kichiuaskej para xnokauaskej (Mateo 5:28).

Akin kichiuaj ken Cristo: Yejuamej notlajpiyaj para xauilnemiskej imiuan akin ximixnamik (Hebreos 13:4). Akin yononamiktijkej notlasojtlaj niman notlakaitaj (Efesios 5:28, 33).