TLAMACHTIJLI 18

¿Kenijki uelis tikmatiskej akinomej melauak kichiuaj ken Cristo?

Ika amatl

Melak miyekej kijtouaj ika kichiuaj ken Cristo, san ika, xsan no yejua tlen kineltokaj niman xsan no yejua tlen kichiuaj. Kuakon, ¿tlenon uelis techpaleuis matikmatikan akinomej melauak kichiuaj ken Cristo?

1. ¿Kenijki uelis tikmatiskej akinomej melauak kichiuaj ken Cristo?

Akin melauak kichiuaj ken Cristo noijki noixmatij ken inomachtijkauan Jesús (xkita Hechos 11:26). ¿Kenijki kiteititiaj ika melauak inomachtijkauan? Jesús okijto: “Tla nenmelajkanemiskej ipan on tlen nemechijlia, nenmochiuaskej melauak nennomachtijkauan” (Juan 8:31). Yejuin kijtosneki ika akin melauak kichiuaj ken Cristo kitlakamatij tlen yejua otemachti. Niman, nochi tlen kineltokaj, kikixtiaj ipan Biblia, ijkon ken Jesús okichiuj (xkita Lucas 24:27).

2. ¿Kenijki kiteititiaj ika tetlasojtlaj akin melauak kichiuaj ken Cristo?

Jesús okimijli inomachtijkauan: “Xmotlajsojtlakan iuan oksekimej ijkon ken nejua nemechtlajsojtla” (Juan 15:12). ¿Kenijki okiteititi Jesús ika kintlasojtlaya inomachtijkauan? Yejua okixelo tiempo niman ijkon imiuan nemis, okinyolchikauj, okinpaleui niman hasta omik inpampa (1 Juan 3:16). Ijkon ken Jesús, akin melauak kichiuaj ken Cristo xsan kijtouaj ika tetlasojtlaj, yejuamej noijki kiteititiaj ika melauak tetlasojtlaj.

3. ¿Katlejua tekitl noneki kichiuaskej akin melauak kichiuaj ken Cristo?

Jesús okinmakak inomachtijkauan se tekitl, okimijli ika noneki kiteijliskej tlen kichiuas iTekiuajyo toTajtsin (Lucas 9:2). Akin kachtopa opeujkej kichiuaj ken Cristo xsan tenojnotsayaj kampa nosentlaliayaj, yejuamej noijki tenojnotsayaj techajchan niman kampa tojlan (xkita Hechos 5:42; 17:17). Aman, akin melauak kichiuaj ken Cristo, noijki nochiuiyan tenojnotsaj. Yejuamej kintlasojtlaj oksekimej, ika yejon, kixelouaj intiempo niman ijkon nochimej kimijliskej tlen kijtoua Biblia (Marcos 12:31).

OKSEKI XKASIKAMATI

Matikitakan tlenon uelis mitspaleuis xmati akinomej melauak kichiuaj ken Cristo.

4. Kineltokaj ika Biblia temachtia tlen melauak

Omemej tlakamej akin yeuejkaui nemiyaj kitstokej tlenon kijtoua iTlajtol toTajtsin ipan seki tlajkuilolamamej. — Akin kachtopa opeujkej kichiuaj ken Cristo kineltokayaj ika Biblia kijtoua tlen melauak

Miyekej kijtouaj ika kichiuaj ken Cristo, san ika, xtemachtiaj tlen kijtoua Biblia. Xkitakan VIDEO niman xtlajtokan itech yejuin:

VIDEO: Miyekej opeujkej temachtiaj tlen xmelauak (5:11)

Seki religiones xkinekiyaj ika oksekimej makimatikan tlen otemachti Jesús, ¿otikitak tlenon okichiujkej?

Jesús nochipa otemachti tlen melauak kijtoua Biblia. Xkitakan Juan 18:37 niman xtlajtokan itech yejuin:

Ijkon ken okijto Jesús, ¿kenijki uelis tikmatiskej akinomej melauak kichiuaj ken yejua?

5. Kiteijliaj tlen melauak kijtoua Biblia

Itekipanojkauan toTajtsin techajchan tenojnotstinemij. — Akin kachtopa opeujkej kichiuaj ken Cristo tenojnotsayaj.

Ijkuak Jesús nemiya ipan tlaltikpaktli, okinmakak inomachtijkauan se ueyi tekitl. Yejuin tekitl ok nochiujtika. Xkitakan Mateo 28:19, 20 (TNM) niman Hechos 1:8, niman xtlajtokan itech yejuin:

¿Hasta kanon notenojnotsaskia niman hasta kemanon tlamiskia yejuin tekitl?

6. Kichiuaj tlen temachtiaj

¿Kenijki ouel okasikamat Tom ika yokinextijka religión tlen temachtia tlen melauak? Xkitakan VIDEO niman xtlajtokan itech yejuin:

VIDEO: Xonikuelitak tlen kichiuaj religiones (5:20)

¿Tleka Tom xokuelitak tlen kichiuaj religiones?
¿Tleka Tom kuajli kimatstika ika yokinexti religión tlen temachtia tlen melauak?

Xsan noneki tikijtoskej ika tikchiuaj ken Cristo, noijki noneki tikteititiskej. Xkitakan Mateo 7:21 niman xtlajtokan itech yejuin:

¿Tlenon kuelitaskia Jesús matikchiuakan: san matikijtokan ika tikchiuaj ken yejua noso matikteititikan ika tikchiuaj ken yejua?

7. Kintlasojtlaj oksekimej

Sekimej tokniuan akin yeuejkaui nemiyaj kimitkiliaj tlakuajli oksekimej tokniuan. — Akin kachtopa opeujkej kichiuaj ken Cristo kintlasojtlayaj oksekimej.

Akin kichiuaj ken Cristo hasta kinektokej mikiskej inpampa imikniuan. Xkitakan VIDEO niman xtlajtokan itech yejuin:

VIDEO: Kinektoya makimiktikan ipampa ikniuj (2:55)

¿Tleka tokniuj Lloyd kinektoya mikis ipampa tokniuj Johansson?
¿Tiknemilia ika okiteititi ika melauak kichiua ken Cristo?

Xkitakan Juan 13:34, 35 niman xtlajtokan itech yejuin:

¿Techikoitaj akin kichiuaj ken Cristo? ¿Tleka ijkon tikijtoua?
Niman tla oniaskia se guerra, ¿tlenon nonekiskia kichiuaskej akin kichiuaj ken Cristo?

SEKIMEJ KIJTOUAJ: “ToTajtsin kinselia nochi religiones”.

¿Katlejua texto tikteititiskia niman ijkon oksekimej makimatikan akinomej melauak kichiuaj ken Cristo?

TLEN OTIUEL

Akin melauak kichiuaj ken Cristo kitlakamatij tlen kijtoua Biblia, tetlasojtlaj, kichiuaj tlen kuajli inpampa oksekimej niman tenojnotsaj itech Biblia.