Tlamachtijli 13
Kenon uelis tiknextis tlaneltokijli tlen melauak
¿Kuelita toTajtsin nochi tlaneltokiltin, noso san se? (1)
¿Tleka onka miyek tlaneltokiltin akin kijtoaj kichiuaj ken Cristo? (2)
¿Kenon uelis tikimixmatis akin yemelak kichiuaj ken Cristo? (3-7)
1. Jesús okitlali san se tlaneltokijli tlen melauak. Ika on, amanin nemij san sekimej akin kiueyichiuaj toTajtsin Jehová ken yejua kineki (Juan 4:23, 24; Efesios 4:4, 5). Biblia kijtoa ika xmiyekej akin yauej ipan ojtli pitsauak tlen teuika itech nemilistli (Mateo 7:13, 14).
2. Biblia okijtojka ika ijkuak mikiskiaj inomachtijkauan Cristo, kikalaktiskiaj ika yolik kampa nosentlaliaj, tlamachtiltin xmelajkej tlen xotemachti Cristo. Nemiskiaj tlakamej akin kintilanaskej tlaneltokakej niman kinxeloskiaj maka sa makitokakan Cristo (Mateo 7:15, 21-23; Hechos 20:29, 30). Ika on tikitaj miyekej sesejneka noso tlamantikej tlaneltokiltin akin kijtoaj kichiuaj ken Cristo. ¿Kenon uelis tikimixmatiskej akinomej yemelak kichiuaj ken Cristo?
3. Niman nesi akin kichiuaj ken Cristo, pampa yejuamej yemelak notlasojtlaj se iuan okse (Juan 13:34, 35). Xkiminmachtiaj manoueyimatikan tla chipaujkej noso ika tlajtoaj okse tlajtojli. Noijki xkiminmachtiaj makintlauelitakan akin ualeuaj oksekan (Hechos 10:34, 35). Ika on xtlapaleuiyaj ijkuak onka guerra. Akin yemelak kichiuaj ken Cristo noitaj kentla ikniujtin (1 Juan 4:20, 21).
4. Okse tlen ika uelis tikimixmatis akin kineltokaj tlen melauak, ika sajnoye kitlakaitaj Biblia. Kiseliaj kentla iTlajtol toTajtsin niman kineltokaj tlen kijtoa (Juan 17:17; 2 Timoteo 3:16, 17). Yejuamej, kinekij kichiuaskej tlen kijtoa iTlajtol toTajtsin, xyejon tlen kinemiliaj tlaltikpakchanejkej (Mateo 15:1-3, 7-9). Kiyejyekoaj nochipa kitlakamatiskej. Kuakon xtenojnotsaj itech Biblia niman kichiuaj okse (Tito 1:15, 16).
5. Akin kipiyaj tlaneltokijli tlen melauak noijki kitlakaitaj itokatsin toTajtsin (Mateo 6:9). Jesús okitekakistili itokatsin toTajtsin, Jehová. Niman akin yemelak kichiuaj ken Cristo noneki noijki ijkon kichiuaskej (Juan 17:6, 26; Romanos 10:13, 14). ¿Akinomej kitekakistiliaj itokatsin toTajtsin kampa tichanti?
6. Akin yemelak kichiuaj ken Cristo noneki matenojnotsakan itech iTekiuajyo toTajtsin. Jesús okichiuj. Yejua nochipa tenojnotsaya itech Tekiuajyotl (Lucas 8:1). Niman noijki, okiminauati inomachtijkauan matenojnotsakan itech Tekiuajyotl ipan nochi tlaltikpaktli (Mateo 24:14; 28:19, 20). Akin yemelak kichiuaj ken Cristo kineltokaj ika san iTekiuajyo toTajtsin kuajkuis yolseuilistli ipan nochi tlaltikpaktli (Salmo 146:3-5).
7. Inomachtijkauan Jesús xkichiuaj tlen xkuajli nochiua ipan tlaltikpaktli (Juan 17:16). Xnokalaktiaj ipan política nion xnokamauisokij kampa onka tlauejli itech in tlaltikpaktli. Xnouikaj, xkichiuaj niman xtlanemiliaj ken nochiua ipan tlaltikpaktli (Santiago 1:27; 4:4). ¿Tikimixmati kampa tichanti sekimej akin yemelak kichiuaj ken Cristo okichiuj?
[Pictures on page 26, 27]
Akin yemelak kichiuaj ken Cristo notlasojtlaj se iuan okse, kitlakaitaj Biblia niman tenojnotsaj itech iTekiuajyo toTajtsin