TLAMACHTIJLI 21
Nochiuiyan noteijlijtika tlen kichiuas toTajtsin
Sa achijtsin poliui ijkuak Jehová, itechkopa iTekiuajyo, kipopolos nochi tlen xkuajli nochiua ipan yejuin tlaltikpaktli. Yejuin itlaj tlen melak noneki nochimej makimatikan. Jesús okimijli inomachtijkauan ika nonekiya kiteijliskej tlen toTajtsin kichiuas (Mateo 28:19, 20, TNM). ¿Tlenon kichiujtokej iteixpantijkauan Jehová niman ijkon kichiuaskej tlen Jesús okijto?
1. ¿Tlenon techititia ika nochiujtika tlen kijtoua Mateo 24:14?
Jesús okijto: “Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli” (Mateo 24:14, TNM). Akin tiiteixpantijkauan Jehová melak tikuelitaj tikteijliskej tlen toTajtsin kichiuas. Titenojnotsaj ipan nochi tlaltikpaktli ika más de 1,000 tlajtoltin. Tla Jehová xtechpaleuiskia, xtiueliskiaj tikchiuaskej yejuin ueyi tekitl.
2. ¿Tlenon tikchiuaj niman ijkon nochimej tikinnojnotsaskej?
Tejuamej nochimej tikinnojnotsaj. Ijkon ken kichiuayaj akin kachtopa opeujkej kichiuaj ken Cristo, tejuamej noijki titenojnotsaj techajchan (Hechos 5:42). Pampa ijkin tikchiuaj, melak miyekej tikinnojnotsaj. Noijki titenojnotsaj kampa tojlan nojuitilo pampa miyekej xnochipa nemij inchan. Nochipa tikitaj kenijki tikinnojnotsaskej oksekimej itech toTajtsin niman itech tlen yejua kineki kichiuas.
3. ¿Akinomej noneki tenojnotsaskej?
Nochimej akin kichiuaj ken Cristo noneki tenojnotsaskej. Ika yejon, tejuamej melak titenojnotsaj. Tikmatstokej ika san ijkon uelis tikinpaleuiskej oksekimej mamakisakan (xkita 1 Timoteo 4:16). Xakaj techtlaxtlauilia ijkuak titenojnotsaj pampa Biblia kijtoua: “Maka xtecobrarokan” (Mateo 10:7, 8). Maski xnochimej kinekij techkakiskej, tejuamej xtijkajkauaj ika titenojnotsaj pampa ijkon tikueyichiuaj toTajtsin niman tikyolpaktiaj.
OKSEKI XKASIKAMATI
Matikitakan tlenon tikchiujtokej akin tiiteixpantijkauan Jehová niman ijkon nochiuiyan titenojnotsaskej. Niman noijki matikitakan kenijki techpaleuijtika Jehová.
Nochiuiyan titenojnotsaj: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Nochimej tikinnojnotsaj
Akin tiiteixpantijkauan Jehová tiknekij nochimej tikinnojnotsaskej maski san kanon manemikan. Xkitakan VIDEO niman xtlajtokan itech yejuin:
¿Tlenon kichiuaj iteixpantijkauan Jehová niman ijkon nochiuiyan tenojnotsaskej?
Xkitakan Mateo 22:39 niman Romanos 10:13-15, niman xtlajtokan itech yejuin:
¿Tleka tikijtouaj ika ijkuak titenojnotsaj tikteititiaj ika tikintlasojtlaj oksekimej?
¿Tlenon kinemilia Jehová ijkuak titenojnotsaj? (Xkitakan Romanos 10:15).
5. Tikpaleuiyaj toTajtsin
Jehová techyekana ijkuak titenojnotsaj. ¿Tleka ijkon tikijtouaj? Matikitakan tlen opanok Nueva Zelanda. Se tonajli ika kualkan, se siuatl okinots toTajtsin ika itoka, Jehová, niman okitlajtlanili yakaj makipaleui makixmati. Ika tlakualispan, se iteixpantijkauj Jehová akin itoka Paul okitlajpaloto. Paul kijtoua: “San opanok yeyi hora niman nejua onajsik ichan”.
Xkitakan 1 Corintios 3:9 niman xtlajtokan itech yejuin:
¿Tleka tikijtouaj ika Jehová techyekana ijkuak titenojnotsaj?
Xkitakan Hechos 1:8 niman xtlajtokan itech yejuin:
¿Tleka melak noneki matechpaleui Jehová niman ijkon uelis tikchiuaskej tlen kijtoua yejuin texto?
¿Tikmatiya yejuin?
Ipan tlanechikojli tlen nochiua ipan semana nochipa techmachtiaj kenijki titenojnotsaskej. Tla tejua yotiajka ipan se totlanechikol, ¿tlenon tiknemilia itech ken ompa techmachtiaj?
6. Jehová yotechnauati matitenojnotsakan
Akin kachtopa opeujkej kichiuaj ken Cristo okintlaueltokakej pampa tenojnotsayaj. Yejuamej oyajkej imixpan tekiuajkej niman ijkon kiteijliskej tleka tenojnotsayaj (Filipenses 1:7). Aman, akin tiiteixpantijkauan Jehová noijki ijkon tikchiuaj.a
Xkitakan Hechos 5:27-29, 31-42 niman xtlajtokan itech yejuin:
¿Tleka xtijkajkauaskej ika titenojnotsaj? (Xkitakan Hechos 5:29, 38, 39).
SEKIMEJ UELISKIA KIJTOSKEJ: “¿Tleka iteixpantijkauan Jehová temachtijtinemij techajchan?”.
¿Tejua tlenon tikijtoskia?
TLEN OTIUEL
Jesús okinnauati inomachtijkauan nochiuiyan makiteijlikan tlen toTajtsin kichiuas. ToTajtsin kinpaleuijtika itekipanojkauan makichiuakan yejuin tekitl.
¿Kenon titlanankiliskia?
¿Tlenon nochiujtika niman ijkon nochimej makimatikan tlen kichiuas toTajtsin?
¿Tleka tikijtouaj ika ijkuak titenojnotsaj tikteititiaj ika tikintlasojtlaj oksekimej?
¿Tiknemilia ika uelis tiyolpakiskej tla titenojnotsaj? ¿Tleka ijkon tiknemilia?
OKSEKI XKITA
Xkita kenijki iteixpantijkauan Jehová tenojnotsaj ipan uejueyimej kalpamej.
¿Tlenon yokichiujkej iteixpantijkauan Jehová niman ijkon kinnojnotsaskej akin oksekan ualeuaj?
Xkita tleka se iteixpantijkauj Jehová melak yolpaki pampa tenojnotsa.
Miyekan xtechkauiliayaj matitenojnotsakan, san ika, aman yotechkauilijkej. Xkita tlenon yopanok.
“Akin tenojnotsaj yauej imixpan tekiuajkej” (ITekiuajyo toTajtsin itlanauatijtika, capítulo 13)
a Totajtsin Jehová yejua akin technauatia matitenojnotsakan. Ika yejon, akin tiiteixpantijkauan Jehová nochipa titenojnotsaskej maski tekiuajkej xtechkauiliskej.