¿Akinon okichijchiuj toTajtsin?

Se tajtli kijlia ikoneuj akin san kipiyaj siete años: “Melak youejkauj ijkuak toTajtsin okichijchiuj tlaltikpaktli niman nochi tlen onka. Noijki okichijchiuj tonaltsintli, metstli niman sitlalimej”. Ikoneuj opeuj tlanemilia niman sakin kitlajtoltia: “Notaj... ¿niman akinon okichijchiuj toTajtsin?”.

Itaj okinankili: “Xakaj okichijchiuj toTajtsin, yejua nochipa nemi”. Nesi ika yejon konetl okasikamat tlen itaj okijli. San ika, ijkuak yejua onoskalti oksejpa opeuj notlajtoltiaj yejon. Xmás kuajli kasikamati tleka toTajtsin xakaj okichijchiuj, tla nochi tlen onka yakaj okichijchiuj. Kuakon notlajtoltia: “¿Kanon oualeuj toTajtsin?”.

¿Tlenon kijtoua Biblia? Noijki ken otenankili tajtli akin kemach otikonteneujkej. Moisés okijli Jehová: “Antes onyaskiaj tepemej niman tlaltikpaktli, desde yeuejkaui niman para nochipa, tejua tiDios” (Salmo 90:1, 2). Teotlajtoketl Isaías noijki okijto: “¿Tlen xtikmati? ¿Xkaman tikaki? ToTEKO Dios yejuan nochipa nemi, yejua okichijchiu nochi in tlaltikpatli?” (Isaías 40:28). Niman itech tlen okijkuilo Judas kuajli nesi ika yejua kineltokaya ika toTajtsin nochipa onen niman nochipa nemis (Judas 25).

Yejuin textos techititiaj ika toTajtsin yejua “toueyiRey yejuan nemi nochipa”, ken okijto apóstol Pablo (1 Timoteo 1:17). Yejuin kijtosneki ika toTajtsin desde yeuejkaui inemiya niman nochipa nemis (Apocalipsis 1:8). ToTajtsin xkipiya kemanon onen niman xkeman mikis. San yejua ijkon.

¿Tleka xtikasikamatij yejuin? Pampa tejuamej xuejkaui tinemij, ika yejon, xtikitaj tiempo ken toTajtsin kita. Matikonnemilikan yejuin, para toTajtsin mil xiuitl yeskia ken se tonajli, pampa yejua desde youejkauj nemi (2 Pedro 3:8). San matikonteneuakan yejuin, chapolimej san nemij kanaj 50 tonaltin. ¿Ueliskiaj kasikamatiskej tlenon kijtosneki tinemis kanaj 70 noso 80 xiujtin? ¡Kanaj ka! Tejuamej noijki ijkon ken yejuin chapolimej, xtikasikamatij kech youejkauj toTajtsin pampa tejuamej xuejkaujtipan tinemij. Niman totlamachilis xijkon ken itlamachilis toTajtsin (Isaías 40:22; 55:8, 9). Ika yejon, kemantika onka tlen xtikasikamatij itech kenon toTajtsin.

Maski xueli tikasikamatij akinon okichijchiuj toTajtsin, tikmatstokej ika yejon melauak. Pampa tla yakaj kichijchiuaskia toTajtsin, yejua yeskia akin nochi okichijchiuj. San ika, Biblia kijtoua ika Jehová yejua akin nochi okichijchiuj (Apocalipsis 4:11). Noijki, tejuamej kuajli tikmatstokej ika yeuejkaui xonkatka universo (Génesis 1:1, 2). ¿Kenon onesiko? Okichijchiuj yakaj akin inemiya niman noijki inemiya achto ika nemiskia Jesús niman ángeles (Job 38:4, 7; Colosenses 1:15). Kuajli tikitaj ika toTajtsin san iselti nemiya ijkuak opeuj tlachijchiua. Ika yejon tikijtouaj ika yejua xakaj okichijchiuj.

Pampa onka universo niman kuajli tekiti niman noijki pampa tejuamej nikan tinemij, kuajli tikitaj ika nemi se toTajtsin akin nochipa nemi (Job 33:4).