¿Kemanon opeuj tlayekana iTekiuajyo toTajtsin? (PARTE 1)

XTEJTEMOJTOKAN TLEN MELAUAK

Julio: Melak nikuelita mouan nitlajtos itech Biblia, Ernesto.a Nikilnamiki ika ijkuak oniuajlaka otinechtlajtolti itech iTekiuajyo toTajtsin. Otinechijli ika tiknekiya tikmatis tleka iteixpantijkauan Jehová tikijtouaj ika opeuj tekiuajti ipan 1914.

Ernesto: Kema, yejon tlen onikpouj ipan se nemorevista, ika iTekiuajyo toTajtsin opeuj tlayekana ipan 1914, ika yejon, onimitstlajtolti. Nemejuamej nenkijtouaj ika nochi tlen nenkineltokaj ualeua itech Biblia.

Julio: Kema, nochi.

Ernesto: San ika, yonikpouj nochi Biblia niman xkanaj oniknexti yejon xiuitl. Ika yejon, oniktejtemo “1914” ipan se Biblia tlen onka ipan internet niman xtlaj onesiko.

Julio: Nipaki ika yotikpouj nochi moBiblia, nesi ika melak tikpatiojkaita.

Ernesto: Kema, pampa xonka okse libro ken yejuin.

Julio: Noijki ijkon nitlanemilia. Niman melak nipaki pampa tiktejtemoua tlen timotlajtoltia. Tikchiua ijkon ken kijtoua Biblia matikchiuakan, ika matiktejtemojtokan tlen melauak.b ¡Kuajli ika timokojtilia!

Ernesto: Tlaxtlaui Julio, nikneki niuelis. Hasta oniktejtemo más niman oniknexti itlaj itech xiuitl 1914 ipan yejon librito tlen otinechmakak. Kijtouaya itlaj itech se kojtli tlen melak uejkapan, sakin okitsontejkej niman sakin oksejpa oueyiyak... Xmás nikilnamiki.

Julio: Ah, kema, tlen uajlauj ipan Daniel capítulo 4. Tlajtoua itech tlen okitemik Nabucodonosor, akin tekiuaj katka ipan Babilonia.

Ernesto: Kema, yejon, miyekpa onikpouj, san ika, xnikmati tleka nenkijtouaj ika tlajtoua itech iTekiuajyo toTajtsin niman itech 1914.

Julio: Maka xmajmana, hasta akin okijkuilo yejuin teotlajtoltin, teotlajtoketl Daniel, xokasikamat tlen kijtosnekiya.

Ernesto: ¿Yemelak?

Julio: Kema. Xkita tlen okijkuilo nikan ipan Daniel 12:8: “Nejua onikak tlinon okijtoj, pero xitlaj onikajsikamat”.

Ernesto: Kuakon xsan nejua. Más kuajli ninomachilia.

Julio: Daniel ijkon ipan onochiuj pampa toTajtsin okijto ika ijkuakon xinonekiya nasikamatis yejuin tlajtoltin. San ika, yonopatlak. Aman uelis tikasikamatiskej tlajtojli tlen yejua okijkuilo.

Ernesto: ¿Yemelak?

Julio: Kema, niman yejuin tikasikamatij ika tlen kijtoua tlaxelojli 9, xkita tlen kijtoua: “In tlajtlamach noneki ichtaka onyas hasta ma ajsi on sa ika nochi tonajli”. Ken tikita, yejuin teotlajtoltin san nasikamatiskia ipan itlamiyan tonaltin. Niman ika nochi tlen tikitstokej aman, tikasikamatij ika itinemij san ika tlami itlamiyan tonaltin. Yejuin sakin tikasikamatiskej ipan libro tlen tomachtijtokej.c

Ernesto: ¿Uelis tinechijlis más itech yejuin teotlajtojli?

Julio: Nikyejyekos.

TLEN OKITEMIK NABUCODONOSOR

Julio: Kachtopa matikitakan achijtsin itech tlen okitemik tekiuaj Nabucodonosor. Niman sakin tikitaskej tlen kijtosneki. ¿Kenon tikita?

Ernesto: Kema.

Julio: Nabucodonosor okitemik se kojtli tlen melak uejkapan, hasta oajsik iluikak. Ipan itemik okikak ika se ángel otlanauati makitsontekikan on kojtli, san onokaujkej ikojyo niman ineluayouan. Sakin ika opanokej “chikome xipan” yejon kojtli oksejpa oueyiyak.d Yejuin teotlajtojli onochiuj ipan Nabucodonosor, yejua katka se tekiuaj akin melak kojtik, ken yejon kojtli tlen oajsik ne iluikak. San ika, ijkon ken yejon kojtli, uelis tikijtoskej ika Nabucodonosor kentla okitsontejkej niman xtlaj ouel okichiuj ipan “chikome xipan”. ¿Tikilnamiki tlenon kijtosneki yejuin?

Ernesto: Mmm... Ka, xnikilnamiki.

Julio: Biblia kijtoua ika okipolo itlamachilis. Ijkon onen chikome xiuitl noso “chikome xipan”. Pampa ijkon opanok, yejua xok otekiuajtik, san ika, ijkuak otlan yejon xiuitl yejua opajtik niman oksejpa otekiuajtik.e

Ernesto: Kema, nikasikamatstiuj. San ika, ¿Tleka nenkijtouaj ika tlajtojtika itech iTekiuajyo toTajtsin niman 1914?

Julio: Bueno, noneki tikasikamatiskej ika yejuin teotlajtojli okpa ken onochiuj. Kachtopa itech itekiuajyo Nabucodonosor. Ika ome, ipan iTekiuajyo toTajtsin.

Ernesto: Niman, ¿kenon tikmati ika okpa onochiuj?

Julio: Pampa yejuin teotlajtojli techijlia kenon. Ipan Daniel 4:​17, kijtoua ika yejuin teotlajtojli onoijkuilo niman ijkon “nochi tlakatl ma kimati ika Dios yejuan más ueyixtikaj, yejua tlamandaroua impan nochimej on reinos de in tlaltikpaktli. Yejua kitlalia para tlamandaroua akin yejua kineki”. ¿Otikitak kampa kijtoua “on reinos de in tlaltikpaktli”?

Ernesto: Kema, nikan kijtoua “yejuan akin más ueyixtika”.

Julio: Kema. Niman, ¿akinon tiknemilia más ueyixtika?

Ernesto: ToTajtsin, ¿ka?

Julio: Kema ijkon. Kuakon, yejuin teotlajtojli techititia ika xsan tlajtoua itech Nabucodonosor, noijki tlajtoua itech iTekiuajyo toTajtsin. Tla más kuajli tomachtiaj yejuin teotlajtojli, kuajli tikasikamatiskej ika tlajtojtika itech iTekiuajyo toTajtsin.

Ernesto: Kuakon, matikitakan.

ITECH TLEN TLAJTOUA AMOXTLI DANIEL

Julio: Ipan amoxtli Daniel tlajtoua itech itlaj tlen miyekpa kiteneua: ijkuak iTekiuajyo toTajtsin peuas tlayekanas niman tlanauatis Jesucristo. ¿Ken tikita tla más tikasikamatij? Yejuin uajnestiuj ipan Daniel 2:​44, ¿uelis tikpouas?

Ernesto: Kema, kijtoua: “Ijkuak tlamandaroskej yejuamej in reyes, Dios yejuan nemi ne iluikak kipeualtis sen reino yejuan xkaman kixoxotoniskej nion yakaj nación kikuilis, yej kimpojpolos on oksekimej reinos, niman ireino nokauas para nochipa”.

Julio: Tlaxtlaui. ¿Tiknemilia ika yejuin tlaxelojli tlajtotika itech iTekiuajyo toTajtsin?

Ernesto: Mmm.... Xnikmati.

Julio: Yejuin tlaxelojli techijlia ika iTekiuajyo toTajtsin “nokauas para nochipa”, noso xkeman kipopoloskej ¿Akinon tiknemilia ika uelis tekiuajtis para nochipa?

Ernesto: Xakaj, san toTajtsin.

Julio: Kema ijkon. Aman matiktejtemokan okse teotlajtojli tlen noijki tlajtoua itech iTekiuajyo toTajtsin. Ipan Daniel 7:​13, 14, ompa noijki kiteneua yakaj akin tekiuajtis, xkita tlen kijtoua: “Niman okimakakej poder para tlamandaros, yekteneualistli niman sen reino. Niman nochi tlakatl de nochimej naciones, niman nochimej on yejuan tlajtlajtouaj sesekneka tlajtoltin, kimauistiliayaj. Ipoder nochipa ijki yes, xkaman nopatlas, niman ireino xkaman kixoxotoniskej”. Ipan yejuin tlaxeloltin, onka itlaj tlen yotikteneujkaj achto.

Ernesto: Kema, nikan oksejpa tlajtoua itech se tekiuajyotl.

Julio: Kema ijkon. Niman xsan katlejua tekiuajyotl. Tla otikitak, nikan kijtoua ika okimakakej poder para tlanauatis ipan “nochimej naciones, niman nochimej on yejuan tlajtlajtouaj sesekneka tlajtoltin”. Yejuin kijtosneki ika tlanauatis ipan nochi tlaltikpaktli.

Ernesto: Xnikasikamatiya ijkon, san ika, tlen kijtoua melauak.

Julio: Niman oksejpa xkita tlen ompa okijto: “Ipoder nochipa ijki yes, xkaman nopatlas, niman ireino xkaman kixoxotoniskej”. ¿Xmelak ika yejuin tlaxelojli san noijki kijtoua ken Daniel 2:​44, tlen kemach yotikpoujkej?

Ernesto: Kema.

Julio: Kuajli. Aman matikilnamikikan itech tlen yotitlajtokej. Teotlajtojli itech Daniel capitulo 4 kineki techasikamachiltis ika “on yejuan más ueyixtika” yejua tlanauatia ipan nochi tlaltikpaktli. Yejuin techititia ika yejuin teotlajtojli onochiuj ipan yakaj akin más ueyixtika xken Nabucodonosor. Niman ipan amoxtli Daniel, tiknextiaj okseki teotlajtoltin tlen san noijki kiteneuaj, ijkuak iTekiuajyo toTajtsin peuas tlayekanas niman tlanauatis Jesucristo. Nochi tlen amantsin otikitakej techititia ika tlen uajnestiuj ipan Daniel capítulo 4 tlajtoua itech iTekiuajyo toTajtsin, ¿kenon tikita?

Ernesto: Kuajli. San ika, xnikasikamati tleka nenkijtouaj ika ipan 1914 opeuj tlayekana iTekiuajyo toTajtsin.

PANOUA CHIKOME XIPAN

Julio: Bueno, matikilnamikikan ika yejon kojtli tlen kiteneua teotlajtojli, kachtopa kixneskayotia Nabucodonosor. Ijkuak okitsontejkej, yejua noijki xok otlanauati chikome xipan. Ipan yejuin tiempo, Nabucodonosor otlamachilispoliuj, san ika, ijkuak opanok yejuin chikome xipan, oksejpa okajsik itlamachilis niman opeuj tlayekana. Ijkuak iTekiuajyo toTajtsin xok otlanauati chikome xipan, ijkuakon onochiuj ika okpa yejuin teotlajtojli, san ika, yejuin xkijtosneki ika toTajtsin okichiuj itlaj tlen xkuajli.

Ernesto: ¿Kenon? Xnikasikamati.

Julio: Bueno, yeuejkaui noijtouaya ika tekiuajkej akin tlayekanayaj Israel notlaliayaj ipan itrono Jehová,f yejon kijtosneki ika kichiuayaj ijkon ken yejua kinekiya. Ken yejuamej tlayekanayaj kiteititijtoskia kentla toTajtsin tlayekanaya. San ika, opanok tiempo niman yejuamej okitlalkauijkej, xok okichiujkej ken yejua kuelita, ika yejon, Jehová okitekauili ika Babilonia makinoyaxkati Israel ipan xiuitl 607 ijkuak xpeuaya xiuitl 1. Desde ijkuakon xok onen se tekiuaj akin makichiua ijkon ken Jehová kinekiya ne Israel. Uelis tikijtoskej ika desde ijkuakon xok otekiuajtik iTekiuajyo toTajtsin, ¿tikasikamatstiuj?

Ernesto: Kema.

Julio: Yejon chikome xipan opeuj nopoua ipan xiuitl 607 ijkuak xpeuaya xiuitl 1. Ijkuakon iTekiuajyo toTajtsin xok otekiuajtik, ijkuak otlan yejon tiempo Jehová okitlali se yenkuik tekiuaj, san ika, aman ne iluikak. Teotlajtoltin tlen otikitakej ipan Daniel, noijki onochiujkej itlamiyan on tiempo, san ika, aman kanaj totlajtoltiaj ¿kemanon otlan yejon chikome xipan? Tla tikmatij kemanon otlan noijki tikmatiskej kemanon opeuj tlayekana iTekiuajyo toTajtsin.

Ernesto: Xnechkauili manikijto, ¿opanok ipan 1914?

Julio: Kema Ernesto.

Ernesto: San ika, ¿ken tikmati ika opanok ipan yejon xiuitl?

Julio: Ijkuak Jesús ouajla ipan tlaltikpaktli, okijto ika yejon chikome xipan xitlamiyaj, uelis tikijtoskej ika yejuin melak ouejkauj.g Yejuin chikome xipan opeujkej miyek xiujtin achto ika Jesús uajlaskia ipan tlaltikpaktli, niman maski Jesús onokuep iluikak ok xitlamiyaj. Xkilnamiki ika teotlajtoltin tlen otikitakej ipan Daniel nasikamatiskiaj hasta ijkuak ajsiskia “on sa ika nochi tonajli”.h Temojkatlachialti ika ipan siglo diecinueve, sekimej onomachtijkej yejuin teotlajtoltin itech Biblia, niman ika yolik okasikamatkej ika yejon chikome xipan otlan ipan xiuitl 1914. Tlen youajnochiujtia, kuajli techititia ika ipan yejon xiuitl opeuj tekiuajti iTekiuajyo toTajtsin niman opeuj on sa ika tlami tonaltin. Melak miyek tlen yotikitakej, kanaj xnimantsin tikasikamatis nochi.

Ernesto: Kema yemelak, noneki oksejpa ninomachtis.

Julio: Maka xmajmana, nejua noijki onechtekiyomakak nikasikamatis nochi. San ika, nikchia ika tlen amantsin yotikitakej mamitspaleui xkita ika nochi tlen tikijtouaj itech iTekiuajyo toTajtsin tikixtiaj itech Biblia.

Ernesto: Kema, nochipa nechmojkatlachialtia kenon nemejuamej nentlaneltokaj itech tlen temachtia Biblia.

Julio: Nikita ika tejua noijki tikneki titlaneltokas. San ika, ken nimitsijlia, tla melak miyek tikijtouaj xuelis nochi tikasikamatiskej, niman kanaj melak miyek timotlajtoltia. Amantsin yotikitakej ika teotlajtojli itech yejon chikome xipan tlajtotika itech iTekiuajyo toTajtsin niman ika opeuj ipan xiuitl 607 ijkuak xpeuaya xiuitl 1. San ika, ¿tleka tikijtouaj ika otlan ipan xiuitl 1914?i

Ernesto: Kema yejon ninotlajtoltia.

Julio: Biblia techpaleuiya matikmatikan kech ouejkaujkej yejuin chikome xipan, ¿tikuelitaskia matitlajtokan itech yejuin ijkuak oksejpa niuajlas?j

Ernesto: Kema nikuelitaskia nikmatis, nikan nimitschia.