¿Kemanon opeuj tekiuajti iTekiuajyo toTajtsin? (PARTE 2)

MATIKITAKAN TLEN OKITEMIK NABUCODONOSOR

Julio: Ernesto, nipaki oksejpa nimitsitas niman nipaki oksejpa mouan nitlajtos itech Biblia.a ¿Kenon tinemi?

Ernesto: Kuajli ninemi tlaxtlaui.

Julio: ¡Melak nipaki! Ijkuak oniuajlaka otitlajtokej itech tleka iteixpantijkauan Jehová tikijtouaj ika iTekiuajyo toTajtsin opeuj tlanauatia ipan 1914.b Otikitakej ika ipan Daniel capítulo 4 onka itlaj tlen techpaleuis matikasikamatikan yejon. ¿Tikilnamiki katlejua?

Ernesto: Kema, tlen okitemik tekiuaj Nabucodonosor.

Julio: Kema, yejua okitemik se kojtli tlen melak ouejkapantiak hasta oajsik iluikak. Ipan itemik okikak ika se ángel otlanauati makitsontekikan yejon kojtli, san onokaujkej ikojyo niman ineluayouan. Sakin ika opanok chikome xipan, yejon kojtli oksejpa oueyiyak.c Noijki otikitakej ika yejon teotlajtojli okpa yonochiuj. ¿Tikilnamiki katlejua on kachtopa?

Ernesto: Tlen ipan onochiuj Nabucodonosor, ¿ka? Okipolo itlamachilis niman ijkon onen chikome xiuitl.

Julio: Kema. Pampa ijkon opanok, ononek kikauas ika tekiuajti. Ijkuak iTekiuajyo toTajtsin xok otlanauati chikome xipan ipan tlaltikpaktli, ijkuakon onochiuj ika okpa yejuin teotlajtojli. Niman opeuj nochiua ijkuak Jerusalén okixoxotonijkej ipan xiuitl 607 ijkuak xpeuaya xiuitl 1, desde ijkuakon xok nemiyaj tekiuajkej akin kixpantiayaj Jehová ipan yejuin tlaltikpaktli. Ijkuak tlamiskia yejuin tiempo, toTajtsin kitlaliskia se yenkuik tekiuaj, san ika, aman ne iluikak. Yejuin kijtosneki ika iTekiuajyo toTajtsin oksejpa peuaskia tlayekanas. Kuakon yotikitakej kemanon opeuj yejuin chikome xipan, san ika, aman matikitakan kech ouejkaujkej, niman ijkon tikmatiskej kemanon opeuj tekiuajti iTekiuajyo toTajtsin. ¿Kema tikasikamatstiuj?

Ernesto: Kema, achijtsin inikilnamiktiuj itech tlen otitlajtokej.

Julio: Melak kuajli. Nejua noijki ononek oksejpa kuajli ninomachtis niman ijkon uelis kuajli nimitstomilis. Kuakon Ernesto, matikitakan kech ouejkaujkej yejon chikome xipan.

Ernesto: Kuajli.

TLAMI CHIKOME XIPAN, PEUA ITLAMIYAN TONALTIN

Julio: Teotlajtojli kachtopa onochiuj ipan Nabucodonosor niman yejuin chikome xipan san ouejkauj chikome xiuitl. San ika, ijkuak onochiuj ika okpa ipan iTekiuajyo toTajtsin, ouejkauj más xiujtin.

Ernesto: ¿Kenon tikmati?

Julio: Pampa tla peuaj tikpouaj chikome xiuitl ipan 607 ijkuak xpeuaya xiuitl 1, kuakon tajsij hasta ipan xiuitl 600 ijkuak xpeuaya xiuitl 1. Ipan yejon xiuitl xtlaj opanok tlen matechititi ika iTekiuajyo toTajtsin yopeujka tlayekana. Niman, ken yotikitakej, ijkuak Jesús ouajla ipan tlaltikpaktli, yopanokaj miyek xiujtin niman yejua okijto ika yejon chikome xipan xitlamiyaj.

Ernesto: Ah, kema, inikilnamiki.

Julio: Kuakon, chikome xipan xsan uejkauiskiaj chikome xiuitl, yej uejkauiskiaj más xiujtin.

Ernesto: ¿Yemelak? ¿Kech xiuitl uejkauiskia?

Julio: Ipan amoxtli Revelación noso Apocalipsis, onka se teotlajtojli tlen techpaleuis más kuajli matikasikamatikan tlen okijto Daniel itech chikome xipan. Ompa kijtoua ika yeyi xipan uan tlajko, kijtosneki 1,260 tonaltin.d Kuakon, yejuin kijtosneki ika chikome xipan uejkauiskia 2,520 tonaltin. ¿Kuajli tikasikamatstiuj?

Ernesto: Kema, san ika xnikasikamati tleka nemejuamej nenkineltokaj ika iTekiuajyo toTajtsin opeuj tekiuajti ipan 1914.

Julio: Maka xmajmana, kuajli matikasikamatikan. Ipan seki teotlajtoltin kijtoua ika se tonajli kijtosneki se xiuitl.e Kuakon, yejon chikome xipan kijtosneki 2,520 xiuitl. Tla peua tikpouaj 2,520 xiuitl desde 607 ijkuak xpeuaya xiuitl 1, tontlamij ipan xiuitl 1914. Kuajli nesi ika ipan yejon xiuitl otlan yejon chikome xipan, ijkuakon Jesús opeuj tekiuajti ipan iTekiuajyo toTajtsin. Noijki ipan 1914, opeuj tlen Biblia kiteneua ken itlamiyan tonaltin.

Ernesto: ¿Kema?

Julio: Xkita tlen Jesús okijto ika panoskia ijkuak peuaskia tekiuajtis ne iluikak, ipan Mateo 24:7: “On uejueyitekiuajkej nouijsokiskej inuan oksekimej uejueyitekiuajkej niman on países nomiktiskej inuan oksekimej países. Onyas apistli, niman onyas miyek kualolistli, niman miyekan tlalolinis”. ¿Otijkak? Jesús okijto ika oniaskia apistli niman ika miyekan tlaloliniskia. ¿Xmelak ika yejon uajnochiujtiuj desde 1914?

Ernesto: Kema yemelak.

Julio: Jesús noijki okijto ika oniaskia guerras. Niman ipan Apocalipsis techijlia ika xsan nochiuaskiaj guerras ipan se país, kijtoua ika oniaskia ipan miyekej países, yejuin kijtlakoskia nochi tlaltikpaktlif ¿Tikilnamiki kemanon opanok Kachtopa Guerra tlen onochiuj ipan nochi tlaltikpaktli?

Ernesto: Ipan 1914. Yejon xiuitl tlen nemejuamej nenkijtouaj ika Jesús opeuj tekiuajti. Xkeman oniknemili yejuin.

Julio: Kema, ijkuak tikitaj tlen panoskia ipan yejon chikome xipan niman tlen nochiuaskia ipan itlamiyan tonaltin, kuajli tikasikamatij yejuin teotlajtojli. Ken tiiteixpantijkauan Jehová kuajli tikmatstokej ika ipan 1914, Jesús opeuj tekiuajti. Niman desde ijkuakon tinemij ipan sa ika tlami tonaltin.g

Ernesto: Ika yolik nikasikamatstiuj.

Julio: Maka xmajmana. Nejua noijki ouijtika onikitak nikasikamatis ijkuak onechtomilijkej yejuin. San ika, nikchia ika tlen amantsin otikonitakej mamitspaleui xkita ika maski Biblia xkiteneua xiuitl 1914, kema kiteneua miyek tlen techititia ika ipan yejon xiuitl Jesús opeuj tlayekana. ¿Otikitak ika nochi tlen tejuamej tikneltoka ualeua itech Biblia?

Ernesto: Kema, yejon tlen melak nikuelita itech nemejuamej. Ika xkeman nenkijtouaj san tlen nenkinemiliaj, nochipa nenkitekitiltiaj Biblia. San ika, ¿tleka melak ouijtika tikasikamatis Biblia? ¿Tleka toTajtsin xsan okijto ika ipan 1914 tekiuajtiskia Jesús?

Julio: Kuajli tlen tinechtlajtoltia Ernesto. Biblia xnochi techmelajkaijlia. ¿Tleka ijkon okichijchiuj toTajtsin? Noso, ¿tleka melak noneki matokojtilikan niman ijkon tikasikamatiskej? ¿Tikuelitaskia matitlajtokan itech yejuin ijkuak oksejpa niuajlas?

Ernesto: Kema nikuelitaskia, nikan nimitschia.