ITECH TLEN TLAJTOUA IXPAN | ¿UELIS MITSPALEUIS TLA TIKNOTSA TOTAJTSIN?
¿Tleka tlaltikpakchanejkej kinotsaj toTajtsin?
“Nikpiaya se vicio, ninauiltis. Niknotsaya toTajtsin pampa niknekiya niktlanis miyek tomin. Xkeman opanok yejon.” (Samuel,a Kenia)
“Ipan kaltlamachtijli san nonekiya tiueliskej rezos niman tikijtoskej tla yotiktsontekontlalijkej.” (Teresa, Filipinas)
“Ijkuak itlaj nechtekipachoua niknotsa toTajtsin. Noijki, ijkuak niktlajtlani manechtlapopoluilikan notlajtlakoluan niman ijkon kuajli nikchiuas ken Cristo.” (Magdalene, Ghana)
Tlen kijtouaj Samuel, Teresa niman Magdalene kiteititia ika miyekej tlaltikpakchanejkej kinotsaj toTajtsin ipampa miyek tlemach. Sekimej pampa kinekij tlen kuajli niman oksekimej ka. Sekimej kijtouaj tlen kisa itech inyojlo niman oksekimej san tlen yokitsontekontlalijkej niman xtlaj kimachiliaj. San ika, maski tla kinotsaj toTajtsin san pampa kitlajtlaniliaj makipanoltikan se examen, matetlani yakaj ijkuak nauiltilo, kuajli manemikan inchanejkauan noso ipampa okse tlemach, melak miyekej kimachiliaj ika noneki kinotsaskej toTajtsin. Niman ijkuak tetlajtoltiaj miyekej tla kinotsaj toTajtsin, nesi ika hasta akin xkipiyaj se tlaneltokijli noijki kinotsaj toTajtsin.
Niman tejua, ¿tiknotsa toTajtsin? Tla kema, ¿tlenon tiktlajtlani? Tla tiknotsa toTajtsin noso ka, kanaj timotlajtoltia: “¿Yemelak tepaleui?” “¿Nemi yakaj akin techkaktika?”. Se tlajkuilojketl kinemilia ika tiknotsas toTajtsin kentla san ijkuak tiknekis “kuajli timomachilis”. Sekimej tlapajtikej noijki ijkon tlanemiliaj, kijtouaj ika tiknotsas toTajtsin “noijki ijkon kuajli timopajtis”. ¿Tlenon tiknemilia tejua? ¿Kinotsaj toTajtsin tlaltikpakchanejkej pampa ijkon yonomatkej noso san pampa ijkon kuajli nomachiliaj?
Biblia tlamantik noso sejneka temachtia. Kijtoua ika tiknotsas toTajtsin xsan ken itlaj ika kuajli timomachilis. Noijki kijtoua ika yakaj techkaki ijkuak tikchiuaj ken noneki niman tiktlajtlani tlen kuajli. ¿Yemelak? Matikitakan san seki tlen techpaleuis matiknemilikan ika kema.
a Seki tokayomej yonopatlakej.