Ken onoyektlali Traducción del Nuevo Mundo ika inglés

ITECH xiuitl tlen yotiuajpanokej, Traducción del Nuevo Mundo de las Santas Escrituras ika inglés xsan sejpa yonoyektlali. San ika, ken onoyektlali ipan 2013 melak ueyi kijtosneki itech tlen onochiuj. Aman, Biblia ika inglés xok miyek tlajtoltin kipiya; onopatlakej seki tlajtoltin; onotlalijkej seki tlaxeloltin uejueyimej ken verso, niman onotlalilijkej notas ipan edición regular. Pampa melak ouijtika tikijtoskej nochi tlen onopatlak, ipan yejuin tlamachtijli tikitaskej san seki.

Onopatlakej seki tlajtoltin itech Biblia. Ken otikijtokej ipan tlamachtijli tlen yopanok, tlajtojli sche’óhl niman háides yonoyektlalijkej. Niman noijki onoyektlalijkej oseki tlajtoltin niman ijkon kuajli manasikamatikan.

Ijkuak xinoyektlaliaya Traducción del Nuevo Mundo ika inglés tlen okis ipan 2013, uajnestiaya tlajtojli seed (“xinachtli”) ijkuak tlajtouaya itech xinachtli tlen kisaya itech xiujtli noso itech inkoneuan tlaltikpakchanejkej. San ika, yejuin xok ijkon nasikamati ika inglés ika yejon notekitiltia offspring (tlen noijki kijtosnekij “inkoneuan”) ipan Génesis 3:15; 22:17, 18 niman noijki ipan Revelación 12:17. Niman oksekan, tlajtoltin ika hebreo niman ika griego onotlajtolkuep ken nonekiya itech tlen kijtouaya (Gén. 1:11; Sal. 22:30; Is. 57:3).

¿Tleka onoyektlalijkej ika inglés kampa onotlajtolkuep ijkon ken uajnestiayaj tlajtoltin? Ipan Apéndice A1 itech tlen onoyektlali ipan 2013 kijtoua ika kuajli notlajtolkuepa Biblia tla “notlalia ken uajnestiuj tlajtoltin san ijkuak kuajli nasikamati tlen kijtosneki noso tla xouijtika nasikamati”. Se neskayotl, “niktejtemoua [...] inyojlo” tlen onotekitilti ipan Revelación 2:23, xouijtika nasikamati ipan miyek tlajtoltin. Tlen kema ouijtika tlen kijtoua “niktejtemoua riñones”, tlen noijki uajnestiuj ipan yejuin tlaxelojli. Kuakon yonopatlak riñones ika “tlanemililtin tlen xakaj kita”. Ipan Deuteronomio 32:14, tlajtoltin “ichauilis tlen kipiya iriñones trigo” onopatlak ika “tlen melak kuajli trigo”. Noijki ijkon tlajtoltin “notenxipaluan xokichiuilijkej circuncisión”, tlen ouijtika tikasikamatis, onopatlak ika “ouijtika nitlajtos” (Éx. 6:12). Miyek okseki tlajtojli ika hebreo aman kuajli onoyektlali ika inglés niman ijkon kuajli manasikamati niman xouijtika tikasikamatis.

¿Tleka onopatlak “ikoneuan Israel” ika “israelitas”? Ika hebreo (niman ika náhuatl), tlajtojli tekoneuan kijtosneki tlakamej niman siuamej. San ika, ika inglés noneki notlapejpenis itech ome tlajtoltin, tla tlajtotika itech tlakamej noso siuamej. Ipan Traducción del Nuevo Mundo ika inglés yonotlapejpenika se tlajtojli tlen san kijtosneki tlakamej itech tlajtojli “ikoneuan Israel”. San ika, nesi ika hebreo noijki kijtosnekiya siuamej. Ika yejon, onotlapejpeni notlalis “israelitas” ipan Biblia tlen onoyektlali, tlen makijtosneki tlakamej niman siuamej (Éx. 1:7; 35:29; 2 Rey. 8:12).

¿Tleka aman onka okseki tlaxeloltin uejueyimej ken verso? Pampa miyekan itech Biblia yeuejkaui onoijkuilo ken verso. Ipan tlajtoltin tlen onka ipan yejuin tonajli, ipan poesía melak noneki maonia rima. San ika, ipan hebreo melak noneki manotlalikan tlajtoltin ken noneki. Tla noneki makakiskti ken verso noneki notlalis ken paralelos niman contrastes.

Amoxtli Job niman Salmo onoijkuilojkej niman ijkon ika manokuikatikan noso sa manotsotekotlalikan ijkuak noijtos. Ika yejon, ijkuak kachtopa onotlajtolkuepkej ipan Traducción del Nuevo Mundo yejuin amoxtin onoijkuilojkej kentla verso. Ijkon tepaleuiya manesi kanon onka ken poesías niman matikilnamikikan. Ipan Traducción del Nuevo Mundo tlen onoyektlali ipan 2013 aman amoxtli Proverbios, El Cantar de los Cantares niman okseki amoxtin tlen kipiyaj teotlajtoltin noijki okintlalijkej ken verso, ijkon techkauilia kuajli matikitakan paralelos niman contrastes ken kachtopa onoijkuilo. Ipan Isaías 24:2, kipiya paralelo niman yejon tepaleuiya manasikamati ika xakaj uelis kichiuas ika toTajtsin maka makiyolkuiti. Ijkuak akin kipoua kita ika yejuin onka ika verso, nimantsin kasikamati ika akin okijkuilo xsan kinekiya miyekpa kijtos, yejua okitekitilti poesías niman ijkon kuajli manoneltoka tlen toTajtsin kijtoua.

Xnochipa nimantsin tikitas kanon ijkuiliujtok ika prosa niman verso. Ika yejon, xnochimej Biblias san noijki notlajtolkuepaj. Akin tlajtolkuepaj noneki kitaskej miyek tlemach niman sakin kitaskej kenon notlajtolkuepas. Niman, onka kampa ijkuiliujtok ika prosa, pampa noneki kuajli manasikamati notekitiltia poesías, tlajtoltin tlen kichiuaj itlaj matiknemilikan, tlajtoltin tlen san noijki kakistij noso paralelos.

Traducción del Nuevo Mundo ika inglés kipiya tlen yenkuik: ijkuak peua se amoxtli, kiteneua tlen melak noneki nomatis ipan se ueyi tlaxelojli. Se neskayotl, yejuin sección tepaleuiya nimantsin matikitakan akinon tlajtotika niman kemanon itech amoxtli El Cantar de los Cantares.

¿Kenon amatlajkuiloltin tlen youejkauj onoijkuilojkej otlapaleui ijkuak onoyektlali Traducción del Nuevo Mundo ipan 2013? Traducción del Nuevo Mundo onokixti itech tlajkuilojli masorético niman tlajkuilojli ika griego Westcott niman Hort. San ika, aman kuajli uajnomachtitiuej itech yejuin tlajkuiloltin niman ika yejon melak kuajli yonasikamat iTlajtol toTajtsin. Noijki yonomachtijkej okseki tlajkuiloltin tlen youejkauj onoijkuilojkej ika griego niman tlajkuiloltin tlen sakin ononextijkej itech mar Muerto. Miyek itech yejuin tlajkuiloltin aman ueli kitaj ipan computadora. Ijkon xouijtika kitaj tlen nopatla itech tlajkuiloltin niman kitlapejpeniskej katlejua tlajkuilojli ika hebreo noso griego melak kuajli. Grupo akin okitlajtolkuep Traducción del Nuevo Mundo okichiuj yejuin, melak kuajli onomachti seki tlaxeloltin pitentsitsintin, tlen okichiuj makitakan ika nonekiya makipatlakan seki tlajtoltin.

Se neskayotl, ipan 2 Samuel 13:21, Septuaginta griega kijtoua: “San ika, yejua xokinek kiyolkokos ikoneuj, Amon, pampa yejua kitlasojtlaya, pampa katka iyenkuiyouj” (La Biblia griega: Septuaginta). Hasta aman Traducción del Nuevo Mundo xkitlaliaya yejuin tlajtoltin, pampa xuajnestiaya ipan tlajkuilojli masorético. San ika, tlajkuiloltin tlen ononextijkej itech mar Muerto kema kipiaya, kuakon onotlali ijkuak onoyektlali Biblia ipan 2013. Noijki ika yejuin onotlali itoka toTajtsin makuilpa ipan amoxtli 1 Samuel. Noijki pampa okitakej tlen kijtouaj tlajkuiloltin ika griego ononek nopatlas ken yonotlalijkaj tlajtoltin ipan Mateo 21:29-31. Kuakon xonochiuj san tlen kijtouaya se tlajkuilojli ika griego, noijki tla kitayaj ika okseki tlajkuiloltin kiteititiaya ika nonekiya itlaj manopatla, onopatlak.

Yejuin san seki itech tlen miyek onopatlak ipan Traducción del Nuevo Mundo ika inglés niman ijkon xouijtika manopoua niman manasikamati. Yejuin Biblia se kualtsin tetlayokolijli itech toTajtsin akin kuelita tenotsas.