ITECH TLEN TLAJTOUA IXPAN | UELIS TIKUELITAS TIKAMAPOUAS BIBLIA
¿Tleka nikpouas Biblia?
“Niknemiliaya ika xnikasikamatiskia tlen kijtoua Biblia” (Jovy).
“Niknemiliaya ika nikpouas Biblia melak nechtlatsiuitiskia” (Queennie).
“Ijkuak onikitak ika kinpiya miyek páginas, xok oniknek nikpouas” (Ezekiel).
¿Kanaj noijki ijkon yotitlanemilijka? Kanaj tiknekiya tikpouas, san ika, itlaj xomitskauili. Miyekej nion xkinekij kipouaskej Biblia. San ika, ¿noijki ijkon tlanemiliskiaj tla kimatiskiaj ika tlen ompa kijtoua uelis kichiuas mayolpakikan niman ika inyojlo manemikan? ¿Tikpouaskia Biblia tla tikmatiskia ika onka tlen uelis mitspaleuis más xkuelita tlen ompa kijtoua?
Xkita tlen okijtokej sekimej akin opeuj kipouaj Biblia niman yokitakej ika yokinpaleui.
Ezekiel, akin kipiaya ipantsin 20 xiuitl, kijtoua: “Yeuejkaui nikchiuaya ken akin yauej ipan carretera niman xkimatij kanon kineki ajsiskej, san ika, ijkuak opeuj nikpoua Biblia onechpaleui manikmatsto tlenon nikneki nikchiuas. Tlen ompa kijtoua uelis nochipa mitspaleuis”.
Frieda, akin noijki kipiya kanaj 20 xiuitl, kijtoua: “Nejua san tlenon nechkualaniaya, san ika, ijkuak opeuj nikpoua Biblia, oniuel xok más nikualanis. Ika yejon, aman nikinpiya más noamigos”.
Se siuatl akin kipiya ipantsin 50 xiuitl itoka Eunice kijtoua: “Biblia yonechpaleui manikajkaua tlen xkuajli nikchiuaya”.
Tla tikpoua Biblia uelis melak tiyolpakis, ijkon ken okinpanok akin yotikinteneujkej niman oksekimej (Isaías 48:17, 18). Tikpouas Biblia uelis mitspaleuis kuajli xtlapejpeni tlen tikchiuas, tikinnextis amigos, xmelak timajmanas niman kuajli tikixmatis toTajtsin. Tlen Biblia kijtoua ualeua itech toTajtsin, ika yejon, nochipa kuajli tonkisaskej pampa tlen toTajtsin techijlia nochipa techpaleuiya.
San noneki tipeuas tikpouas Biblia. Ipan okseki tlamachtiltin tikitas tlen mitspaleuis tipeuas tikpouas Biblia niman noijki melak tikuelitas.