¿Kanon peuas nikpouas?

¿Tlenon uelis tikchiuas para más tikuelitas tikpouas Biblia niman más mamitspaleui? Xkita yejuin makuijli tlemach tlen yokinpaleui miyekej akin yokipoujkej Biblia.

Xkita kanon uelis tikpouas Biblia. Xpoua kampa xitlaj mitspajsolos. Noijki, más kuajli tikpouas tla tinemi kampa tlauilpan niman kampa tlasesekan.

Xpoua Biblia niman xkauili mamitspaleui. ToTajtsin otechtlayokoli Biblia. Tla tikneki ika Biblia yemelak mamitspaleui, xpoua ijkon ken ijkuak se konetl kinokauilia itaj makimachti. Noijki tejua xmokauili toTajtsin mamitsmachti (Salmo 25:4).

Achto tikpouas xchiua teoyotl. Pampa Biblia kijtoua ken toTajtsin tlanemilia, kuakon, yejua noneki techpaleuis matikasikamatikan. Yejua kijtoua ika kinmakas iespíritu santo akin kitlajtlaniliaj (Lucas 11:13). Espíritu santo uelis mitspaleuis xkasikamati kenon tlanemilia akin otexchijchiuj. Ika yolik tikasikamatstias “on tlajtlamach yejuan más ueyi kijtosnekij itech Dios” (1 Corintios 2:10).

Xkasikamati tlen tikpoua. Maka san xpoua, noijki xnemilijtiuj tlen tikpojtiuj. Xmotlajtolti: “¿Tlenon kuajli okichiuj akin nikan noteneua? ¿Kenon uelis nikchiuas tlen nikan ninomachtijtika?”.

Kuajli xmatsto tleka tikpoua Biblia. Tla tikneki más tikuelitas tlen tikpoua ipan Biblia, xmokojtili tiuelis itlaj tlen yemelak mamitspaleui. Kanaj uelis timokojtilis más kuajli tikixmatis toTajtsin, nochipa tikchiuas tlen kuajli niman más tiyolpakis iuan mosiuatsin noso moueuentsin. Sakin, xkita kenon Biblia uelis mitspaleuis ijkon xchiua.a

Yejuin makuijli tlemach tlen yotikinteneujkej mitspaleuiskej tipeuas tikpouas Biblia. San ika, ¿tlenon uelis tikchiuas para más tiknekis tikpouas Biblia? Ipan okse tlamachtijli tikitas tlen mitspaleuis.