Jehová techyolseuiya itech nochi tlajyouilistli
“ToTajtsin Dios yejuan [...] nochipa techyoltlalijtikaj. Dios techyoltlalia ipan nochi on tlin techpajsoloua” (2 COR. 1:3, 4).
1, 2. ¿Kenon Jehová techyolseuiya itech nochi tlen tikixnamikij niman kenon iTlajtol techijlia ika yemelak kichiuas?
SE TELPOCHTLI tlanemiliaya itech 1 Corintios 7:28, kampa kijtoua ika akin nonamiktiaj kipiyaskej “tlajtlamach tlen “[te]pajsoloua”. Yejon tokniuj otlajto iuan se tlayekanketl akin yononamikti niman okitlajtolti: “¿Tlenon yejuin tlajtlamach tlen ‘[te]pajsoloua’, niman kenon nikixnamikis tla ninonamiktia?”. Achtopa kinankilis, tokniuj tlayekanketl okijli telpochtli matlanemili itech tlen Pablo, itlatitlankauj Cristo, okijkuilo, ika Jehová “Dios yejuan [...] nochipa techyoltlalijtikaj. Dios techyoltlalia ipan nochi on tlin techpajsoloua” noso techtlajyouiltia (2 Cor. 1:3, 4).
2 Tikmatij ika Jehová yejua toTaj akin techtlasojtla niman techyolseuiya ijkuak tikixnamikij tlen ouijtika. Tejua uelis tikilnamikis ika kemantika Jehová yomitspaleui niman yomitsyekan ika iTlajtol. Kuajli tikmatstokej ika yejua kineki melak kuajli matinemikan, ijkon ken yeuejkaui okichiuj kuajli manemikan itekipanojkauan (xpoua Jeremías 29:11, 12).a
3. ¿Tlenon tlajtoltilistin tikinnankiliskej ipan yejuin tlamachtijli?
3 Miyekpa panoua ika xouijtika tikxikouaj tlaueltin niman tlajyouilistin ijkuak tikmatij tleka tikixnamikij. Kuakon ¿tleka uelis tikpiyaskej tlajyouilistli ipan tonamiktilis noso ipan tofamilia? ¿Tlenon neskayomej tlen nesij ipan Biblia niman ipan yejuin tonaltin techpaleuiskej matiknextikan yolseuilistli? Matikinnankilikan yejuin tlajtoltilistin niman ijkon tikitaskej kenon tikxikoskej tlajyouilistin.
TLAUELTIN IPAN NAMIKTILISTLI
4, 5. ¿Tlenon seki tlemach uelis kichiuas matikpiyakan tlajtlamach tlen “[te]pajsoloua”?
4 Jehová okichijchiuj kachtopa siuatl. Sakin okimaktili tlakatl, niman yejua onochiuj isiuauj. Kuakon Jehová okijto: “Yejua ika tlakatl kikauas itaj niman inan, niman ijkon nosentlalis iuan isiuauj, niman nochiuaskej san se tlalnakayotl” (Gén. 2:24). Niman ipan yejuin tonajli tinochimej titlajtlakolejkej (Rom. 3:23). Ipampa yejuin, ijkuak se tlakatl niman se siuatl nonamiktiaj, uelis kipiyaskej tlaueltin. Se neskayotl, ijkuak xinonamiktiaya, siuatl kanaj nonekiya kintlakamatis itajuan. San ika, iTlajtol toTajtsin kijtoua ika ipan namiktilistli teueuentsin kiyekanas isiuauj (1 Cor. 11:3). Ijkuak peuas, teueuentsin kanaj ouijtika kiyekanas isiuauj. Niman aman tesiuauj ouijtika kitas makiyekana iueuentsin niman xok itajuan. Noijki, ijkuak se tlakatl niman se siuatl nonamiktiaj, uelis kipiyaskej tlauejli inuan inchanejkauan, niman yejuin uelis yes se tlajyouilistli.
5 Noijki xtlanemili itech kenon teueuentsin niman tesiuauj uelis nomachiliskej ijkuak kimatiskej ika kipiyaskej inkonetsin. Maski yejuin melak kinyolpaktia, miyekpa noijki melak nokuaajmanaskej. Kanaj tesiuauj niman iueuentsin notlajtoltiaj tla nochi kuajli onkisas pampa yejua koneua. Kanaj uelis kinajmanas tla kuajli noskaltis inkoneuj. Yejuamej noijki kimatij ika aman nonekis miyek tomin. Niman ijkuak tlakatis inkonetsin, yejuamej nonekis kipatlaskej okseki. Nantli uejkaujtipan panos iuan ikonetsin. Ika yejon, yejua iuan iueuentsin xok uelis uejkaujtipan panoskej san sekan ijkon ken kachtopa kichiuayaj. Noijki tajtli aman kipiyas okseki tekitl tlen nonekis kichiuas. Yejua noneki kitas ika isiuauj niman ikonetsin makipiyakan tlen kinpoloua.
6-8. ¿Kenon uelis nomachiliskej akin yononamiktijkej tla xkinpiyaj inkoneuan maski kinekiskiaj?
6 Sekimej akin yononamiktijkej tlajyouiyaj itech okseki. Yejuamej kanaj melak kinekij kinpiyaskej inkoneuan, san ika, xueli kinpiyaj. Ijkuak tesiuauj xueli kipiya ikoneuj, kanaj uelis melak noyolkokos (Prov. 13:12). Yeuejkaui, melak ueyi kijtosnekiya ika siuamej manonamiktikan niman makinpiyakan inkoneuan. Ika yejon Raquel, isiuauj Jacob, melak onoyolkoko ijkuak xueliya kinpiaya ikoneuan niman ikniuj kema (Gén. 30:1, 2). Ipan yejuin tonajli, ipan seki países kinemiliaj ika melak ueyi kijtosneki kinpiyaskej miyek inkoneuan. Tlaltikpakchanejkej miyekpa kintlajtoltiaj misioneros akin tlapaleuiyaj ipan yejon países tleka yejuamej xkipiyaj nion se inkoneuj. Maski kuajli kimijliaj tleka, sekimej ok kimijliaj: “Teyolkoko, san ika, tikchiuaskej teoyotl nemopampa”.
7 Matitlanemilikan itech okse neskayotl. Se tokniuj siuatl chanej Inglaterra melak kinekiya kinpiyas ikoneuan. Ijkuak okimat ika xueliskia kinpiyas ikoneuan aman, yejua melak onajman. Kuakon yejua iuan iueuentsin okinemilijkej kiskaltiskej se konetl. San ika, maski ijkon ok melak onoyolkoko seki tonaltin. Yejua okijto: “Nikmatiya ika tikiskaltiskej se konetl xsan noijki ken tla nejua nikpiyaskia nokoneuj”.
8 Biblia kijtoua ika se siuatl “nomakixtis ijkuak kinemitis ikoneuan” (1 Tim. 2:15). San ika, yejuin xkijtosneki ika yejua kipiyas nemilistli tlen xkeman tlamis san pampa kinpiya ikoneuan. Kuakon, ¿tlenon kijtosneki yejuin? Se nantli kipiya melak miyek tekitl pampa kintlajpiya ikoneuan ipan ichan. Yejuin uelis kipaleuis maka kichiuas seki tlemach ken tetejteneuas noso nokalaktis kampa xnoneki (1 Tim. 5:13). San ika, maski ijkon, yejua uelis kipiyas tlaueltin ipan inamiktilis niman ichanejkauan.
¿Kenon uelis tiknextis yolseuilistli ijkuak moixnamik miki? (Xkita párrafos 9, 12)
9. ¿Tlenon okse tlajyouilistli uelis kixnamikiskej akin yononamiktijkej?
9 Okse tlajyouilistli tlen uelis kipiyaskej akin yononamiktijkej yejuin: ijkuak miki imixnamik. Niman maski yejuin xkeman kinemiliaj inpan nochiuas, miyekej yononek kixikoskej yejuin tlen melak ouijtika. Akin kichiuaj ken Cristo yemelak kineltokaj ika onias yoliuilistli, niman yejuin melak kinyolseuiya (Juan 5:28, 29). Ipan iTlajtol, toTajtsin Jehová techijlia miyek tlen kichiuas tlen ika techyolseuis ijkuak tikixnamikij tlen ouijtika. Aman matikitakan kenon sekimej itekipanojkauan Jehová yokimachilijkej yejon yolseuilistli niman kenon yokinpaleui.
YOLSEUILISTLI IJKUAK TIKPIYAJ TLAJYOUILISTLI
10. ¿Kenon Ana okinexti yolseuilistli? (Xkita tlaixkopinajli kampa peua tlen tomachtijtokej).
10 Xtlanemili tlen ipan onochiuj isiuauj Elqaná, Ana, akin melak kitlasojtlaya. Yejua kinekiya kinpiyas ikoneuan, san ika, xueliya. Niman okse isiuauj iueuentsin, Peniná, kema kinpiaya miyek ikoneuan (xpoua 1 Samuel 1:4-6).b Peniná kipijpinaujtiaya Ana nochi xiujtin ipampa yejon, niman kichiuaya xkuajli manomachili. Ana melak kiyolkokouaya yejon. ¿Tlenon okichiuj niman ijkon kinextis yolseuilistli? Yejua okichiuili teoyotl Jehová. Ana nochipa yaya kampa kiueyichiuayaj Jehová niman uejkaujtipan kichiuaya teoyotl. Yejua okitlajtlanili Jehová makimaka se ikonetsin, niman kimatstoya ika kimakaskia. Ijkuak otlan kichiuilia teoyotl Jehová, yejua melak kuajli onomachili niman “ixayak xok najmantoya” (1 Sam. 1:12, 17, 18). Yejua kuajli kimatiya ika Jehová uelis kimakaskia se ikoneuj noso kiyolseuiskia ika itlaj okse.
11. ¿Kenon teoyotl uelis techyolseuis?
11 Pampa tinochimej titlajtlakolejkej niman tinemij kampa Satanás tlayekana, ok tikpiyaskej tlajyouilistin (1 Juan 5:19). San ika, tikpiyaj tlen techpaleuiya. Uelis tikchiuiliskej teoyotl Jehová, akin “nochipa techyoltlalijtikaj”. Yejuin tlen Ana okichiuj. Yejua okijli Jehová kenon yemelak nomachiliaya niman okitlatlaujti makipaleui. Noijki ijkon, ijkuak titlajyouijtoskej, xsan noneki tikijliskej Jehová tlenon techajmana. Noneki tiktlatlaujtiskej matechpaleui niman tikijliskej kenon yemelak tomachiliaj (Filip. 4:6, 7).
12. ¿Tlenon okipaleui Ana mapaki maski kipiaya tlajyouilistin?
12 Kanaj uelis tajmanaskej pampa xtikinpiyaj tokoneuan noso pampa yakaj akin tiktlasojtlaj omik. San ika, uelis tiknextiskej yolseuilistli. Xtlanemili itech ineskayo Ana, akin onen ipan itonaluan Jesús. Yejua ijkuak san chikome xiuitl kipiaya ika ononamikti, iueuentsin omik. Niman nesi ika yejua xokinpix ikoneuan. San ika ¿tlenon okipaleui? Yejua “xkaman kisaya ipan on ueyi tiopan”. Niman hasta ijkuak ikipiaya 84 xiuitl, yejua ok yaya ipan teopan konchiuas teoyotl niman konueyichiuas Jehová (Luc. 2:37). Yejon tlen okiyolseui niman okipaleui mapaki maski kipiaya tlajyouilistin.
13. ¿Kenon uelis akin kuajli imiuan touikaj techyolseuiskej tla tochanejkauan xkichiuaj?
13 Noijki uelis techyolseuiskej akin kuajli imiuan touikaj ipan tlanechikojli (Prov. 18:24). Paula san kipiaya makuijli xiuitl ijkuak inan okikauj Jehová. Paula melak onoyolkoko, niman melak ouijtika opanok. San ika, se tokniuj precusora itoka Ann okiyolchikauj niman okititi ika yemelak najmanaya ipampa. Paula kijtoua: “Maski Ann xnochanejkauj katka, melak onajman notechkopa niman onechpaleui. Yejua onechpaleui nochipa maniktekichiuili Jehová”. Aman inan Paula yonokuep ipan tlanechikojli, niman yejuin melak kiyolpaktia. Ann noijki paki ika ouel okipaleui Paula nochipa makitekichiuili Jehová.
14. ¿Kenon techpaleuiya tikinyolseuiskej oksekimej?
14 Ijkuak tikchiuaj miyek tlen kuajli inpampa oksekimej, techpaleuiya matikilkauakan totlaueluan. Se neskayotl, miyekej tokniuan siuamej, yononamiktijkej noso ka, kimatij ika ijkuak tenojnotsaj kuajli tlajtoltin itech Tekiuajyotl, tekititokej iuan Jehová niman kichiuaj tlen yejua kineki. Yejuin kichiua mayolpakikan. Uelis tikijtoskej ika tinochimej uelis tikteititiskej ika tajmanaj inpampa oksekimej tla tikinnojnotsaj itech kuajli tlajtoltin. Niman ijkuak tikchiuaj tlen kuajli ipampa tokniuan, kichiua kuajli imiuan matouikakan (Filip. 2:4). Yejon tlen Pablo, itlatitlankauj Cristo, okichiuj. Yejua okinpaleui oksekimej ken se “nantli yejuan kimiskaltia ikonetsitsiuan ikan tetlajsojtlalistli”. Pablo noijki okinyolseui niman okinyolchikauj ikniuan ken se “tajtli iuan ikoneuan” (xpoua 1 Tesalonicenses 2:7, 11, 12).
YOLSEUILISTLI TLEN TIKNEXTIAJ ITECH TOCHANEJKAUAN
15. ¿Akinon itekiyo kinmachtis kokonej itech Jehová?
15 ¿Kenon uelis tikinyolseuiskej familias ipan tlanechikojli? Kemantika, akin yenkuikej uelis techtlajtlaniliskej matikinpaleuikan ika kinmachtiskej inkoneuan itech Jehová noso hasta tejuamej matikinmachtikan itech Biblia. Biblia kijtoua ika Jehová yokinmakak tajtin tekitl ika makinmachtikan inkoneuan (Prov. 23:22; Efes. 6:1-4). Maski kemantika sekimej uelis kinpaleuiskej, melak noneki ika tajtin makinmachtikan inkoneuan. Yejuamej noneki miyekpa nonotsaskej iuan inkoneuan.
16. ¿Tlenon noneki tikilnamikiskej ijkuak tikinpaleuiyaj inkoneuan oksekimej?
16 Ijkuak se tajtli techtlajtlanilia matomachtikan itech Biblia iuan ikoneuj, kuajli tla tikilnamikij ika xtechmakaj intekiyo ken tajtin. Kemantika kanaj uelis tomachtiskej iuan se konetl akin itajuan xnomachtiaj itech Biblia. Ijkuak tomachtiskej iuan kokonej akin xtokoneuan, melak kuajli tla tomachtiaj ipan inchan ijkuak intajuan noso okse tokniuj, akin chikauak ipan itlaneltokil, ompa nemij noso matikchiuakan kampa uelis techitaskej. Ijkon xtikchiuaskej manasikamati itlaj tlen xkuajli. Ika tlayekapan, kanaj tajtin ueliskej kinmachtiskej inkoneuan itech Jehová.
17. ¿Kenon uelis tekoneuan kinyolseuiskej inchanejkauan?
17 Kokonej akin yonomachtijkej kitlasojtlaskej Jehová uelis kinyolseuiskej niman kinyolchikauaskej inchanejkauan. ¿Kenon? Ijkuak kintlakaitaj intajuan niman tekitij chikauak ika kinpaleuiskej itech tlen noneki. Noijki ijkuak kokonej yolmelaujkanemij itech Jehová, yejuin kinyolchikaua nochimej inchanejkauan. Ijkuak xiuajlaya apachiuilistli, Lamec, akin kiueyichiuaya Jehová, okijto itech Noé: “Yejua techuajkuilis yolseuilistli itech totekiyo, niman itech tomauan tlen yotechkokojkej pampa Jehová okitlalili tlauijuikaltilistli tlajli”. Yejon teotlajtojli onochiuj ijkuak yopanok apachiuilistli niman Jehová okikixtili tlajli tlauijuikaltilistli (Gén. 5:29; 8:21). Ipan yejuin tonajli, kokonej akin yolmelaujkanemij itech Jehová noijki uelis kinyolseuiskej inchanejkauan. Yejuamej uelis kinpaleuiskej nochimej inchanejkauan makixikokan tlajyouilistin aman niman ika tlayekapan.
18. ¿Tlenon uelis techpaleuis titlaxikoskej maski san katlejua tlajyouilistli tikixnamikiskej?
18 Ipan yejuin tonajli, miyekej kinextiaj yolseuilistli ijkuak kichiuaj teoyotl, tlanemiliaj itech neskayomej itech Biblia niman itech akin kuajli imiuan nouikaj ipan tlanechikojli (xpoua Salmo 145:18, 19).c Tikmatij ika Jehová nochipa kinektika techyolseuis. ¡Niman kuajli tikmatstokej ika techpaleuis matikxikokan maski san katlejua tlajyouilistli tikixnamikiskej!
a Jeremías 29:11, 12: “‘Pampa nejua kuajli nikimixmatstika tlanemililtin tlen niknemilijtika nemotechkopaʼ, ijkon kijtoua Jehová, ‘tlanemililtin tlen kipiyaj yolseuilistli, niman xkipiyaj tlen xkuajli, tlen mechmakas se kuajli nemilistli niman tlamachialistli. Niman nemejuamej ninnechnotsaskej niman nenuajlaskej niman ninnexchiuiliskej teoyotl, niman nejua nimechkakisʼ”.
b 1 Samuel 1:4-6: “Se tonajli, ijkuak Elqaná okitemakak uentli, yejua okimakak seki isiuauj Peniná noijki nochimej ikoneuan niman ichpokauan. San ika, Ana okimakak san se xijkon ken sekimej, pampa Ana yejua akin kitlasojtlaya; san ika, Jehová xkinmakaya ikoneuan. Niman noijki tesiuauj akin kixnamiki melak kipijpinaujtiaya niman ijkon maka kuajli manomachili pampa Jehová xkinmakaya ikoneuan”.
c Salmo 145:18, 19: “Jehová nisiuj nemi itech nochimej akin kinotsaj, nochimej akin yemelak kinotsaj. Kinmaka tlen melak kinekij akin kimojkaitaj, yejua kinkaki akin kitlatlaujtiaj makinpaleui, niman kinmakixtia”.