¿Itikmatiya?

¿Tleka Jesús okimijli ika “tlachtekij” akin kinnemakayaj yolkamej ipan teopan tlen onkatka Jerusalén?

IPAN Mateo tikpouaj yejuin tlajtoltin: “Kemaj Jesús okalak ne ikiauak on iueyi tiopan Dios, niman okinuajkixtij on yejuan ompa tlanamakatikatkaj niman tlakojtikatkaj. Okinxixinilij inmesas on yejuan kitepatiliayaj tomin, niman insietas on yejuan kinnamakayaj palomas. Niman okimijlij: ‘Ipan in Yektlajkuilojli, ijkin tlajkuilolnestikaj: “Nochan itoka yes tioyokajli kampa kichiuaj oraciónes”, pero nemejuamej yonenkuepkej ken teostotl kajli kampa on tlachtekij nosentlaliaj’” (Mat. 21:12, 13).

Tlen yeuejkaui opanok teititia ika akin tlanemakayaj ipan teopan melak patioj kintlanemakiltiayaj akin intech tlakouayaj. Se neskayotl, palomas melak xpatiojkej katkaj. Ika yejon, akin xkipiaya tomin ueliskia kinkouas niman kinuentlalis. San ika, yeuejkaui intlajkuiloluan judíos kijtouaj ika seki tonaltin ipan kachtopa siglo se tlaltikpakchane nonekiya tekitis kanaj 25 tonaltin niman ijkon uelis kikouas ome palomas. Palomas melak otlejkokej ika patiojkej niman se akin xkipiaya tomin xok ueliya kinkouas (Lev. 1:14; 5:7; 12:6-8). Se tlakatl rabino itoka Simeón ben Gamaliel xokuelitak yejuin tlen panotoya. Ika yejon, xok okitlajtlan miyek uentli makitemakakan judíos. Kuakon nimantsin melak ueyi otemok, niman aman se tlaltikpakchane san nonekiya tekitis yeyi hora niman ijkon kikouas ome palomas.

Ken tikitaj, tlanemakakej ipan teopan melak kinekiyaj tomin niman tetominkualiayaj. Ika yejon, kinamikiya ika Jesús makimijli ika “tlachtekij”.