Matikpaleuikan iueyitlayekanalis Jehová

1, 2. ¿Tlenon noneki tinochimej kuajli matikmatstokan? (Xkita tlaixkopinajli kampa peua tlen tomachtijtokej).

KEN otikitakej ipan tlamachtijli tlen yotiuajpanokej, Satanás kijtoua ika Jehová xkinamiki makinyekana tlaltikpakchanejkej. Yejua kijtoua ika Jehová xkuajli ken tlayekana niman ika tlaltikpakchanejkej yolpakiskiaj tla sa no yejuamej noyekanaskiaj. ¿Melauak tlen kijtoua Satanás? Xkonemili ika tlaltikpakchanejkej sa no yejuamej noyekanaskiaj niman nemiskiaj nochipa. ¿Melak pakiskiaj xijkon ken tla toTajtsin kinyekanaskia? ¿Tiknemilia tejua ika melak tipakiskia tla san tejua timoyekanas niman tinemis nochipa?

² Xakaj uelis kinankilis yejuin tlajtoltilistin mopampa. Tinochimej noneki kuajli titlanemiliskej itech yejuin. Ijkuak ijkon tikchiuaskej, nesis ika ken tlayekana Jehová melak kuajli niman ika kimelaua matikpaleuikan ika nochi toyojlo. Yejuin uelis kuajli tikmatstoskej ipampa tlen Biblia techijlia. Matikitakan tlenon kijtoua Biblia itech san Jehová kinamiki tlayekanas ipan iluikak niman ipan tlaltikpaktli.

JEHOVÁ YEJUA KINAMIKI TLAYEKANAS

3. ¿Tleka Jehová kinamiki yes akin Ueyixtika?

³ Jehová san yejua Ueyixtika ipan iluikak niman ipan tlaltikpaktli pampa yejua Tlachijchiujketl niman nochi ueli kichiua (1 Crón. 29:11; Hech. 4:24). Ipan se tlatlachalistli, 144,000 akin tekiuajtiskej iuan Jesucristo okijtokej: “ToTeko Dios [Jehová], tejua mitsmelaua para tikselis ueyilistli, tetlakaitalistli, niman poder, pampa tejua nochi tlajtlamach otiktlalij niman ken tejua otiknek otikintlalij niman onokej” (Apoc. 4:11). Jehová okichijchiuj nochi tlen onka. Ika yejon, yejua kinamiki makinyekana nochimej ipan iluikak niman ipan tlaltikpaktli.

4. ¿Tleka maski uelis tiktlapejpenis tlen tikchiuas xkijtosneki uelis tikixnamikis toTajtsin?

⁴ Satanás xtlaj okichijchiuj. Ika yejon, yejua nion achijtsin xkinamiki matlayekana. Satanás niman kachtopa tlakatl niman siuatl oteixnamijkej ijkuak xokiselijkej iueyitlayekanalis Jehová (Jer. 10:23). ¿Kinamikiya makimapeua itlayekanalis Jehová yakaj akin okichijchiujkej pampa ueli kitlapejpenia tlen kichiuas? Ka. Yakaj akin ueli kitlapejpenia tlen kichiuas kikauilia makitlapejpeni tlen kichiuas, san ika, xkinamiki makixnamiki Akin otlachijchiuj, Jehová. Kuajli nesi ika ijkuak se kixnamiki toTajtsin xkuajli kitlapejpenia tlen kichiuas. Tejuamej noneki Jehová matechyekana.

5. ¿Tleka tlen toTajtsin kinemilia kichiuas nochipa melajki?

⁵ Xtlanemili itech tleka noijki Jehová kinamiki matlayekana. Yejua kitekitiltia itlanauatijkayo ika melajkayotl tlen xnopopoloua. Yejua techijlia: “Nejua niJehová, Akin teititia tetlasojtlalistli tlen xtekaua, melajkayotl niman tlen melajki ipan tlaltikpaktli, pampa ipan yejuin tlemach ninoyolpaktia” (Jer. 9:24). Xnonekij intlanauatiluan tlaltikpakchanejkej ijkuak Jehová kitlapejpenia kichiuas tlen melajki. Jehová akin kijtoua tlenon melajki. Yejua kinmaka tlanauatiltin tlaltikpakchanejkej tlen kisa itech imelajkayo tlen xnopopoloua. Salmista okijto: “Tlen melajki niman melajkayotl tlayekanaj kampa titlanauatia”. Kuakon san katlejua tlanauatijli, tlajtolyekanalistli noso tlanemilijli tlen ualeua itech Jehová melajki yes (Sal. 89:14; 119:128). Satanás kijtoua ika Jehová xtlayekana ika melajkayotl. San ika, Satanás xuelis kichiuas maonia melajkayotl ipan tlaltikpaktli.

6. ¿Tlenon okse techititia ika Jehová kinamiki matlayekana?

⁶ Jehová noijki kinamiki matlayekana pampa kipiya tlaixmatilistli niman tlamachilistli tlen ika kitlajpiyas tlen yokichijchiuj. Yejuin tikitaj ijkuak okichiuj ika ikoneuj maueli kinpajtis akin kualouayaj tlen nion se tepajtiketl xueli kichiuaya (Mat. 4:23, 24; Mar. 5:25-29). Maski yejon tejuamej tikitaj ken milagros, Jehová xkita ken milagros. Pampa yejua kuajli kasikamati ken tekiti totlalnakayo niman uelis kipajtis maski san itech tlenon. Yejua noijki uelis oksejpa kinmakas innemilis akin yomijkej niman kiteltis tlen tlaixpoloua itech tlaltikpaktli.

7. ¿Tleka tlamachilistli tlen kipiya Jehová xijkon ken tlen onka kampa tlayekana Satanás?

⁷ Satanás xuelis kuajkuis yolseuilistli ipan se país noso itech okseki países ipan tlaltikpaktli tlen kiyekana. San Jehová kipiya tlamachilistli niman ijkon kichiuas maonia yolseuilistli ipan tlaltikpaktli (Is. 2:3, 4; 54:13). Tomachiliaj ijkon ken Pablo, itlatitlankauj Cristo, ijkuak okijto: “¡Sanoyej xuelis tikixitaskej on irriquezas Dios, on itlamatkilis niman ikajsikamatilis! Xakaj ueli kiteijlia tlika Dios kichiua itlaj, nion xakaj kajsikamati ken ijki kichiua on itekiu” (Rom. 11:33).

JEHOVÁ MELAK KUAJLI TLAYEKANKETL

8. ¿Kenon timomachilia itech ken Jehová tlayekana?

⁸ Ken yotikitakej, Biblia kuajli teititia ika Jehová kinamiki matlayekana. Noijki teititia tleka yejua se tlayekanketl melak kuajli. Se neskayotl, yejua tlayekana ika tlasojtlalistli. Tomachiliaj ika tinemij nisiuj itech ijkuak titlanemiliaj kenon yejua “teikneliani, tepaleuiya, xnimantsin kualani niman kipiya ueyi tlasojtlalistli tlen xtekaua niman tlen melauak” (Éx. 34:6). ToTajtsin techititia tlakaitalistli. Yejua melak kuajli techtlajpiya xijkon ken tejuamej ueliskia totlajpiyaskej. Satanás kijtoua ika Jehová xkinmaka tlen kuajli itekipanojkauan, san ika, yejuin se tlakajkayaualistli. ToTajtsin hasta okitemakak ikoneuj akin melak kitlasojtlaya niman ijkon tejuamej ueliskia tikpiyaskej nemilistli tlen xkeman tlamis (xpoua Salmo 84:11;a Romanos 8:32).

9. ¿Kenon tikmatij ika toTajtsin techtlajpiya toseselti?

⁹ Jehová kitlasojtla nochi ikalpan ken grupo. San ika, noijki melak najmana inpampa inseselti. Xtlanemili itech tlen opanok yeuejkaui. Kanaj trescientos xiujtin, Jehová okintekitilti jueces tlen ika okiyekan ikalpan niman okintlan intlauelikniuan. Ijkuak panotoya nochi yejuin, Jehová kimitstoya inseselti. Se itech yejuamej katka se siuatl itoka Rut. Yejua xkatka israelita, san ika, yokikaujka miyek tlemach niman ijkon kiueyichiuas Jehová. ToTajtsin okiteochiuj pampa okichiuj makipiya se iueuentsin niman se ikoneuj. San ika, xsan yejon, ikoneuj Rut onochiuj familia akin itech uajnemiskia Mesías. Jehová noijki okinek ika inemilis Rut manoijkuilo ipan Biblia, ipan se amoxtli tlen kipiya itokayo. ¿Kenon tiknemilia nomachilis Rut ijkuak oksejpa nemis niman kimatis yejuin? (Rut 4:13; Mat. 1:5, 16).

10. ¿Tleka uelis tikijtoskej ika itlayekanalis Jehová xteyolkokoua?

¹⁰ Itlayekanalis Jehová xteyolkokoua. Akin kitlakamatij kuajli nomachiliaj niman yolpakij (2 Cor. 3:17). David okijto itech Jehová: “Kampa yejua nemij tlatsotlani niman onka ueyilistli; kampa chanti onka kojtilistli niman pakilistli” (1 Crón. 16:7, 27). Salmista Etán okijkuilo: “Paki kalpan akin kixmati tsajtsis ika pakilistli. Jehová, yejuamej nejnemij ipan itlauil moxayak. Yejuamej yolpakij ipan motokayo nochi tonajli, niman ipan momelajkayo kinueyiteneuaj” (Sal. 89:15, 16).

11. ¿Kenon tikmatstokej ika melak kuajli iueyitlayekanalis Jehová?

¹¹ Ijkuak melak titlanemiliaj kenon Jehová melak yolkuajli, kuajli tikneltokaj ika melak kuajli ken tlayekana. Tomachiliaj ijkon ken salmista okijto itech toTajtsin: “¡Pampa se tonajli ipan mochan melak kuajli xijkon ken mil oksekan!” (Sal. 84:10). Jehová okinemili kenon texchijchiuas. Ika yejon, kuajli kimati tlenon kichiua matiyolpakikan. Yejua kuelita techmakas xsan tlen techpoloua. Nochi tlen Jehová techtlajtlanilia matikchiuakan kichiua pampa kineki kuajli matinemikan. Niman hasta tla nonekis itlaj tikpatlaskej, nochipa tiyolpakiskej tla tiktlakamatij Jehová (xpoua Isaías 48:17).b

12. ¿Tleka melak tiknekij tikpaleuiskej iueyitlayekanalis Jehová?

¹² Ipan Biblia yotomachtijkej ika sakin ijkuak Jesucristo yotekiuajtik mil xiuitl, sekimej kixnamikiskej iueyitlayekanalis Jehová (Apoc. 20:7, 8). ¿Tlenon kichiuas ijkon makichiuakan? Ipan yejon tonaltin, Satanás kiyejyekos manoueyimatikan tlaltikpakchanejkej. Yejua nochipa yokichiuj yejon. Yejua uelis kiyejyekos makineltokakan ika uelis nemiskej nochipa maski xkitlakamatiskej toTajtsin. San ika, yejuin nochipa yes se tlakajkayaualistli. Ika yejon, noneki matotlajtoltikan: “¿Nikneltokaskia se tlakajkayaualistli ken yejon?”. Tla yemelak tiktlasojtlaj Jehová niman kuajli tikmatstokej ika yejua yolkuajli niman ika yejua kinamiki tlayekanas, se tlakajkayaualistli ken yejon nochipa tikmapeuaskej. San tiknekiskej tinemiskej itech iueyitlayekanalis Jehová, akin tlayekana ika tlasojtlalistli.

MATIKPALEUIKAN IUEYITLAYEKANALIS

13. ¿Kenon tikpaleuiyaj iueyitlayekanalis toTajtsin ijkuak tikixkopinaj?

¹³ Ken yotikitakej, Jehová kinamiki matlayekana, niman san yejua melak kuajli ken tlayekana. Iueyitlayekanalis kinamiki matikpaleuikan. Tikpaleuiyaj ijkuak xtijkauaj Jehová niman tinemij ken yejua noso tikixkopinaj. Ijkuak tochikauaj ika tikixkopinaj tlen Jehová kichiua, tikteititiaj ika tiktlasojtlaj niman tikpaleuiyaj ken tlayekana (xpoua Efesios 5:1, 2).

14. ¿Kenon uelis tlayekankej niman akin tlayekanaj itech inchanejkauan kixkopinaskej Jehová?

¹⁴ Biblia techijlia ika Jehová nochipa kitekitiltia ikojtilis ika tlasojtlalistli. Akin tlayekanaj itech inchanejkauan niman tlayekankej akin kitlasojtlaj iueyitlayekanalis Jehová kixkopinaj niman xteyolkokouaj ken tlayekanaj. Pablo onochikauj kixkopinas toTajtsin niman iKoneuj (1 Cor. 11:1). Yejua xokinpinaujti oksekimej nion xokinchiualti makichiuakan tlen melajki. Yejua ika tlasojtlalistli okichiuj makinekikan kichiuaskej tlen melajki (Rom. 12:1; Efes. 4:1; Filem. 8-10). Ijkuak Pablo okichiuj yejuin, okixkopin Jehová. Ijkuak tikimititiaj tlasojtlalistli oksekimej, tikpaleuiyaj iueyitlayekanalis Jehová.

15. ¿Kenon tikpaleuiyaj itlayekanalis Jehová ijkuak tikintlakaitaj akin kipiyaj tlanauatijkayotl?

¹⁵ Noijki tikpaleuiyaj itlayekanalis Jehová ijkuak ika tlakaitalistli tikintlakamatij akin yokinmakakej tlanauatijkayotl. Maski ijkuak xtikasikamatij kuajli noso xtikuelitaj tlen yokitlapejpenijkej nochiuas, tikinpaleuiyaj manochiua. Tlaltikpakchanejkej xkichiuaj yejuin, san ika, tejuamej kema tikchiuaj pampa tikseliaj Jehová ken toTekiuaj (Efes. 5:22, 23; 6:1-3; Heb. 13:17). Kuakon tejuamej tipakij pampa toTajtsin kineki melak kuajli matinemikan.

16. ¿Kenon uelis tlen tiktlapejpeniaj teititis ika tikpaleuiyaj iueyitlayekanalis toTajtsin?

¹⁶ Noijki uelis tikpaleuiskej iueyitlayekanalis toTajtsin ika tlen tiktlapejpeniaj tikchiuaskej. Jehová xtechmaka tlanauatiltin itech nochi tlen tikchiuaskej. Yejua techijlia kenon tlanemilia. Yejuin techpaleuiya matikasikamatikan tlenon noneki tikchiuaskej. Se neskayotl, Jehová xkinmaka itekipanojkauan se lista itech ken noneki notlakentiskej niman kenon ka. Yejua kintomilia ika manesikan ken noneki niman ken kinamiki yeskej iteixpantijkauan (1 Tim. 2:9, 10). Yejua kineki matiknemilikan kenon tlen tiktlapejpeniaj uelis kimijtlakos oksekimej (1 Cor. 10:31-33). Ijkuak tlen tiktlapejpeniaj kisa itech ken Jehová tlanemilia, tikteititiaj ika tiktlasojtlaj niman tikpaleuiyaj ken tlayekana.

17, 18. ¿Kenon uelis akin yononamiktijkej kiteititiskej ika kipaleuiyaj iueyitlayekanalis Jehová?

¹⁷ Xtlanemili itech se ken uelis kipaleuiskej iueyitlayekanalis Jehová akin yononamiktijkej. Akin yononamiktijkej kanaj kimachiliskej ouijtika nemiskej san sekan xijkon ken kinemiliayaj. Kanaj hasta uelis kipiyaskej uejueyimej tlaueltin. Tla ijkon panoua, yejuamej uelis kinpaleuis tla tlanemiliaj kenon Jehová onouikak yeuejkaui iuan ikalpan Israel. Jehová okijto ika yejua kentla yeskia iueuentsin ikalpan (Is. 54:5; 62:4). Yejon kalpan miyekpa okiyolkoko Jehová. Ken nouikayaj onochiuj kentla ijkuak akin yononamiktijkej ouijtika ken nemij. San ika, Jehová xnimantsin onosiaujkauj iuan ikalpan. Yejua okintlapopolui miyekpa niman okichiuj tlen yokimijlikaj (xpoua Salmo 106:43-45).c

¹⁸ Tokniuan akin yononamiktijkej niman kitlasojtlaj Jehová kiyejyekouaj kixkopinaskej. Maski kipiyaj tlaueltin ipan innamiktilis, xkitejtemouaj matlami innamiktilis ika itlaj tlen xkijtoua Biblia. Yejuamej kimatij ika Jehová kitaj melak ueyi kijtosneki tlen onoijlikej kichiuaskej ijkuak ononamiktijkej niman kineki ika teueuentsin niman tesiuauj manosentlalikan. San ipampa auilnemilistli se akin yononamikti uelis kikauas ixnamik ixpan tekiuajkej niman uelis oksejpa nonamiktis (Mat. 19:5, 6, 9). Ijkuak tokniuan kichiuaj nochi tlen uelij niman ijkon kuajli makisati innamiktilis, yejuamej kipaleuiyaj iueyitlayekanalis Jehová.

19. ¿Tlenon noneki tikchiuaskej ijkuak topopolouaj?

¹⁹ Tinochimej titlajtlakolejkej, niman kemantika tikchiuaj tlemach tlen kiyolkokoua Jehová. Yejua kimati yejuin, niman ika yejon okitemakak iKoneuj ken tlaxtlauijli. Kuakon, ijkuak topopolouaj, noneki tiktlajtlaniliskej Jehová matechtlapopolui (1 Juan 2:1, 2). Niman noneki matikyejyekokan matechmachti itlaj itech tlen otopopolojkej niman maka sa matajmanakan itech yejon. Tiknekij tinemiskej nisiuj itech Jehová, akin techtlapopoluis niman techpaleuis kuajli matomachilikan niman ijkon ok matiktekichiuilijtokan (Sal. 103:3).

20. ¿Tleka noneki tikpaleuis iueyitlayekanalis Jehová aman?

²⁰ Ipan yenkuik tlaltikpaktli, Jehová kinyekanas nochimej niman nomachtiskej iojuiuan tlen melaktikej (Is. 11:9). San ika, aman noijki yotomachtijkej miyek itech kenon tlanemilia niman kenon kineki ika yejuin matechyekana itech tlen tikchiuaj. Xok uejkaujtipan, xok xakaj kixnamikis ken tlayekana toTajtsin. Kuakon matikchiuakan nochi tlen tiueliskej aman niman ijkon tikpaleuiskej iueyitlayekanalis Jehová ijkuak tiktlakamatiskej, tiktekichiuiliskej nochipa niman tochikauaskej tikixkopinaskej ipan nochi tlen tikchiuaj.