¿Techpaleuiya itlayekanalis Biblia?
SEKIMEJ KIJTOUAJ IKA KA. Se tlapajtiketl okijto ika timoyekanas ika Biblia kentla tijkuiskia se amoxtli tlen onochijchiuj ipan 1920 niman ika titemachtis Química. Se akin xkitlakaita Biblia kanaj hasta mitstlajtoltis tla tiktekitiltiskia se amoxtli kampa kijtoua kenon tijkuis se computadora tlen xok notekitiltia niman ijkon tiktekitiltis se computadora tlen melak yenkuik. Yejuin teasikamachiltia ika sekimej kinemiliaj ika Biblia xok tepaleuiya.
¿Tleka yakaj kikuiskia se amoxtli tlen yeuejkaui onoijkuilo, ipan yejuin tonaltin ijkuak miyek yenkuik kistika niman notekitiltia miyek tecnología? Niman xsan yejon, aman onka melak miyek páginas ipan Internet kampa kitlejkoltijtokej miyek tlen mitsijlis tlen uelis tikchiuas noso kenon timopaleuis. Ipan televisión kinpanoltiaj melak miyekej ixtlamatkej akin tlajtouaj itech kenon noyekanaj tlaltikpakchanejkej, akin tlajtouaj itech kenon tinemis niman noijki akin kimijkuilouaj amoxtin. Niman akin kinchijchiuaj amoxtin kikixtiaj melak miyek tlen tlajtouaj itech kenon kuajli tinemis, niman melak yonotomintijkej.
Pampa miyek tlen yenkuik kistika, ¿tleka tijkuiskiaj Biblia, se amoxtli tlen ikipiya kanaj 2,000 xiuitl ika onoijkuilo? ¿Yemelak tlen kijtouaj akin xkitlakaitaj Biblia, ika tiktekitiltis Biblia yeskia kentla tikitas se amoxtli itech química tlen yeuejkaui onoijkuilo, noso se amoxtli itech se computadora tlen xok notekitiltia? Yejuin tlen kinemiliaj xmelauak. Ciencia niman tecnología nimantsin nopatlaj, san ika ¿yonopatlak tlen kinpoloua tlaltikpakchanejkej? Tlaltikpakchanejkej ok kinekij yolpakiskej, kuajli nomachiliskej, nemiskej ika inyojlo, kuajli nouikaskej iuan inchanejkauan niman kipiyaskej akin kuajli iuan nouikaskej.
Maski youejkauj ika onoijkuilo, Biblia tlajtoua itech yejuin tlen techpoloua niman noijki itech okseki. Noijki kijtoua ika tlen ipan ijkuiliujtika ualeua itech akin otexchijchiuj. Kitemaka tlajtolyekanalistin itech kenon tinemiskej niman techpaleuiya kuajli matikimixnamikikan uejueyimej tlaueltin (2 Timoteo 3:16, 17). Hasta kijtoua ika itlajtolyekanalisuan nochipa tepaleuiskej, ika ken kuajli techyekana xkeman panos. Biblia kijtoua: “Itlajtol Dios kipia nemilistli” (Hebreos 4:12).
¿Melauak yejuin tlen kijtoua Biblia? ¿Yemelak ika xok tepaleuiya? ¿Noso Biblia yejua tlen melak techpaleuiya ipan yejuin tonaltin, niman kipiya nemilistli? Yejuin Amatl Tekakistilijketl onochijchiuj ika mamitspaleui xkinnankili yejuin.