Tikchiuas tlen kuajli: Biblia kuajli techyekana

Tla ijkuak itlaj tiktlapejpeniaj san techyekana totlamachilis noso tlen oksekimej kinemiliaj, xkeman tikmatiskej tla kuajli tonkisaskej. Biblia kijtoua tleka ijkon panoua niman techijlia tlenon uelis tikchiuaskej para tiyolpakiskej niman kuajli tinemiskej. Kema, uelis tikneltokaskej ika Biblia uelis techyekanas.

NONEKI TOTAJTSIN MATECHYEKANA

Biblia kijtoua ika toTajtsin Jehováa yejua noneki matechyekana. ToTajtsin xotexchijchiuj san para tejuamej matoyekanakan (Jeremías 10:23). Ika yejon, otechmakak Biblia para techyekanas ijkuak tiktlapejpeniskej itlaj tlen ueyi kijtosneki ipan tonemilis. Yejua melak techtlasojtla niman xkineki matitlajyouikan san ipampa tlen xkuajli tiktlapejpeniaj (Deuteronomio 5:29; 1 Juan 4:8). Pampa yejua otexchijchiuj, melak tlamachilise niman kuajli techixmatstok, uelis techijlis tlen uelis techpaleuis (Salmo 100:3; 104:24). San ika, toTajtsin xkeman kichiualtia yakaj makitlakamati tlen yejua kijtoua.

Ijkuak Jehová okichijchiuj kachtopa siuatl niman kachtopa tlakatl, Adán niman Eva, okinmakak nochi tlen nonekiya para yolpakiskej (Génesis 1:28, 29; 2:8, 15). Noijki okimijli seki tlen nonekiya kichiuaskej. Maski ijkon, yejuamej nonekiya kitlapejpeniskiaj tla kitlakamatiskiaj noso ka (Génesis 2:9, 16, 17). San ika, Adán niman Eva okitlapejpenijkej kichiuaskej tlen san yejuamej kinekiyaj niman xokitlakamatkej Jehová (Génesis 3:6). San ika ¿kenon tinemij pampa san tejuamej tikijtouaj tlenon kuajli? ¿Kuajli tinemij? Ka. Nochi tlen yopanok yokiteititi ika xtiyolseujtokej nion xtipakij tla xtiktlakamatij itlanauatiluan Jehová (Eclesiastés 8:9).

Biblia techyekana para matiktlapejpenikan tlen kuajli maski san kanon matiualeuakan (2 Timoteo 3:16, 17; xkita recuadro “Se libro tlen nochimej kinpaleuiya”). Matikitakan kenon toTajtsin techyekana ika Biblia.

Xkita tleka tikijtouaj ika Biblia “itlajtol Dios” (1 Tesalonicenses 2:13). Xuiya ipan jw.org niman xkita video ¿Akinon okichijchiuj Biblia?

TLEKA SEKIMEJ XTLANELTOKAJ ITECH BIBLIA

Sekimej kijtouaj ika Biblia xuelis techijlis tlen aman matechpaleui. Yejuin tlen sekimej kijtouaj:

Tlen noijtoua: “Biblia xnotlajtolnamiki”.

Tlen melauak: Kanaj ijkuak peua tikamapouaj Biblia uelis tiknemiliskej ika seki tlen ompa kijtoua xnotlajtolnamiki. San ika, tla kuajli tikitaj tlen panotoya, tlen nochiuayaj yeuejkaui, tlen kinemiliayaj akin otlajkuilojkej niman okseki tlemach, tikitaskej ika nochi kuajli notlajtolnamiki.

Tla tikneki tikmatis más itech yejuin, xuiya ipan jw.org niman xkita tlamachtijli “¿Se contradice la Biblia?”.

Tlen noijtoua: “Sekimej akin nomachtiaj Biblia noijki kichiuaj tlen xkuajli. Kuakon, Biblia xtepaleui”.

Tlen melauak: Sekimej kichiuaj tlen xkuajli pampa xkichiuaj tlen Biblia kijtoua. Ika yejon, xuelis tiktlajtlakoltiskej Biblia ipampa tlen xkuajli kichiuaj. Biblia yokijtojka ika miyekej, hasta akin tlayekanaj ipan religiones, xkichiuaskiaj tlen yejuamej temachtiaj. Noijki okijto ika ipampa tlen xkuajli kichiuaj, “kiteneuiliskej tlen xkuajli” tlen temachtia Biblia (2 Pedro 2:1, 2).

Tla tikneki tikitas kenon miyekej akin tlayekanaj ipan religiones xok kichiuaj tlen Biblia temachtia, xuiya ipan jw.org niman xkita video Xonikuelitak tlen kichiuaj religiones.

Tlen noijtoua: “Biblia techijlia maka matitetlakaitakan”.

Tlen melauak: Biblia techijlia ika noneki tikintlakaitaskej oksekimej. Niman kijtoua ika xkuajli tla tikchiuaj tlen amantsin tikteneuaskej.

Tiknemiliskej ika más tiuejueyixtokej xken oksekimej (Filipenses 2:3).
Xtikintlakaitaskej akin xtlaneltokaj niman xkichiuaj ijkon ken tejuamej (1 Pedro 2:17).
Tikinchiualtiskej oksekimej matlanemilikan ijkon ken tejuamej (Mateo 10:14).

Biblia techmachtia ika toTajtsin yolkuajli niman kinchiuilia tlen melajki tlaltikpakchanejkej, niman yejua kineki ika tejuamej noijki ijkon matikchiuakan (Romanos 9:14).

Tla tikneki tikmatis más itech yejuin, xuiya ipan jw.org niman xkita tlamachtijli “¿Uelis techpaleuis Biblia matiteasikamatikan?”.

TOTAJTSIN TECHYEKANA IKA BIBLIA

Biblia kijtoua kenon toTajtsin kimita tlaltikpakchanejkej. Ipampa tlen ompa ijkuiliujtika, ueli tikmatij tlen toTajtsin kita kuajli niman tlen xkuajli, tlen kita ika techpaleuis niman tlen techijtlakos (Salmo 19:7, 11). Ika yejon, ueli tikmatij tlen nochipa techpaleuiya niman tlen mojmostla techyekana.

San matikonteneuakan tlen kijtoua Proverbios 13:20: “Xmouika iuan sen tlamatki niman titlamatki yes, pero xmouika iminuan on tontos niman timixpolos”. Yejuin tlajtoltin melak tepaleuiyaj aman ijkon ken otepaleuijkej yeuejkaui. Ijkon ken yejuin texto, ipan Biblia onkatij miyek textos tlen melak tepaleuiyaj (xkita recuadro “Tlen techijlia Biblia nochipa techpaleuiya”).

Kanaj timotlajtoltia: “¿Kenon uelis nikmatis ika tlen kijtoua Biblia melauak tepaleuiya?”. Ipan okse tlamachtijli tikimixmatiskej sekimej akin yokitakej ika kema melak tepaleui.

a ToTajtsin itoka Jehová (Éxodo 15:3).

TLEN TECHIJLIA BIBLIA NOCHIPA TECHPALEUIYA

Maski Biblia ikipiya kanaj 2,000 xiuitl ika onoijkuilo, aman noijki techpaleuiya. Tejuamej xtopatlaj, tinochimej ok tiknekij tiyolpakiskej (Eclesiastés 1:9). Niman pampa tlen temachtia Biblia xkeman nopatla, uelis techpaleuis matiyolpakikan.

Xtitekajkayauas

“Tiknekij nochi tlajtlamach tikchiuaskej kuajli” (Hebreos 13:18).
“Yejuan tlachtekiya, maka sa ma tlachteki, niman ma peua tekiti” (Efesios 4:28).

Kuajli timouikas iuan oksekimej

“Maka yakaj kitejtemo on tlen kuajli san para yejua, yej ma kitejtemo on tlen kuajli para oksekimej” (1 Corintios 10:24).
“Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia” (Colosenses 3:13).

Tiktlapejpenis tlen kuajli

“On tlakatl yejuan tonto nochi kineltoka tlen kijliaj, pero on tlakatl yejuan tlamatki achtoj kinemilia tlinon kichiuas” (Proverbios 14:15).
“Sen tlakatl yejuan kuajli nonemilia ijkuak kita itlaj xkuajli nochiua, nejkuania. Pero sen telpokatl yejua xe ixtojtomi, xkita on tlen xkuajli nochiua, niman xnejkuania. Ijkon tej, yejua uelis tlajyouis” (Proverbios 22:3).