¿Kanon uelis tiknextis tlen mitspaleuis kuajli xnemi ika tlayekapan?

Ken yotikitakej, miyekej kinemiliaj ika uelis kuajli nemiskej ika tlayekapan tla nomachtiaj, tla kipiyaj tomin, tla kinpaleuiyaj oksekimej noso tla kineltokaj ika yonoijtoka tlen topan nochiuas. Tla toyekanaj ika yejuin, yeskia kentla tikuiskiaj ika tlayoua se lámpara tlen yoijtlakauj. San ika, yejuin xkijtosneki ika xonka tlen uelis techpaleuis kuajli matinemikan ika tlayekapan.

YAKAJ AKIN MELAK TLAMACHILISE UELIS TECHPALEUIS

Kemantika, ijkuak tiknekij tikchiuaskej itlaj, tiktlajtoltiaj yakaj akin más iueyi noso más tlamachilise. Noijki ijkon noneki tikchiuaskej tla tiknekij kuajli tinemiskej ika tlayekapan. ITlajtol toTajtsin noso Biblia, opeuj noijkuiloua ikipiya ipantsin 3,500 xiuitl.

¿Tleka uelis tikneltokas tlen kijtoua Biblia? Pampa xnemi yakaj akin melak tlamachilise ijkon ken akin okichijchiuj Biblia. Yejua desde yeuejkaui nemi niman nochipa nemis (Daniel 7:9; Salmo 90:2). Yejua “ToTEKO Dios yejuan okichijchiu on cielo, yejuan okichijchiu in tlaltikpaktli” (Isaías 45:18). Yejua techijlia ika itoka: Jehová (Salmo 83:18, TNM).

Pampa toTajtsin okichijchiuj Biblia, ompa xtechijlia matitechikoitakan. Tlen ompa kijtoua kinpaleuiya nochimej maski san kanon maualeuakan. Xonka okse libro tlen más yonotlajtolkuep niman tlen más yonoamapouj ipan nochi tlaltikpaktli.a Ika yejon, maski san akinon uelis kasikamatis niman nopaleuis ika Biblia. Ompa ijkin kijtoua:

“Aman nikmati ika melauak Dios xkichikoita se tlakatl iuan okse, yej kiselia san akinon yejuan kitlakaita niman kuajli nouika maski ualeua san katlejua país” (HECHOS 10:34, 35).

Ijkon ken se tajtli kintlasojtla niman kinpaleuiya ikoneuan, toTajtsin noijki techtlasojtla niman techpaleuiya ika iTlajtol (2 Timoteo 3:16). Tejua uelis titlaneltokas itech iTlajtol toTajtsin pampa yejua akin okichijchiuj Biblia niman nochipa kineki techpaleuis.

TLEN YEMELAK TECHPALEUIS

Uelis kuajli tikmatstoskej ika Biblia techpaleuis pampa ikipiya kanaj 2,000 xiuitl okijto tlenon panoskia ika tlayekapan niman tlenon kichiuaskiaj tlaltikpakchanejkej ipan yejuin tonaltin.

TLEN PANOSKIA

“On reyes nouijsokiskej iuan oksekimej reyes, niman on países nomijmiktiskej iuan oksekimej países” (LUCAS 21:10, 11).

TLALTIKPAKCHANEJKEJ

Ipan itlamiyan tonaltin “tlamach nochiuas tlen sanoyej xkuajli. On tlakamej ijkin nouikaskej: sanoyej notlajsojtlaskej sano yejuamej, sanoyej tominnekiskej, noueyimatiskej, xkitlakaitaskej Dios, xkintlakamatiskej intajuan, xitlaj kitlajsojkamatiskej, niman [...] xkintlajsojtlaskej oksekimej nion xteikneliskej, chakuamej yeskej, xkiteltiskej iminxkuajlieleuilis, sanoyej xipanteitaskej niman xitlaj kuelitaskej tlen kuajli. Teichtakauiskej, xnomojtiskej itlaj kichiuaskej, noueyimatiskej, sanoyej kinekiskej nopaktiskej, niman xkinekiskej kipaktiskej Dios” (2 TIMOTEO 3:1-4).

¿Tlenon tiknemilia ijkuak tikita ika nochi tlen Biblia yokijtojka yeuejkaui nochiujtika? Kanaj noijki titlanemilia ken Leung, se tlakatl akin ualeua Hong Kong. Yejua okijto: “Pampa Biblia melak yeuejkaui onoijkuilo niman nochi tlen kijtoua melauak , kuajli nesi ika xualeua itech se tlakatl. Niknemilia ika yakaj akin melak tlamachilise xijkon ken tejuamej okichijchiuj Biblia”.

Miyek tlen Biblia yokijtojka yeuejkaui yonochiuj.b Niman yejuin techititia ika Biblia ualeua itech toTajtsin. Jehová kijtoua: “Nejua niDios, niman xnemi okse yejuan no ijki ken nejua. Nejua desde antes niktemachistia tlinon nochiuas” (Isaías 46:9, 10). Ika yejon, uelis tikneltokaskej tlen Biblia kijtoua nochiuas ika tlayekapan.

ITLAJ TLEN NOCHIPA MITSPALEUIS

Tla tikchiua tlen kijtoua iTlajtol toTajtsin, kuajli tinemis ika tlayekapan. Xtlanemili itech yejuin.

TOMIN NIMAN TEKITL

“Más kuajli titekitis ken [...] kitokaroua, niman tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli” (ECLESIASTÉS 4:6).

MOCHANEJKAUAN

“On tlakatl noneki kitlajsojtlas isiuau sano ijki ken yejua notlajsojtla, niman on siuatl no noneki kitlakaitas iueuentsin” (EFESIOS 5:33).

KEN TIMOUIKAS IMIUAN OKSEKIMEJ

“Maka xkuajkualani, xkaua on tlauejli, pampa tla san tikuajkualani, nochi tlen tikchiuas xok kuajli kisas” (SALMO 37:8).

Tla tikchiua tlen Biblia kijtoua, mitspaleuis kuajli xnemi aman niman ika tlayekapan. Biblia techijlia kenon toTajtsin kineki matinemikan ika tlayekapan.

IKA TOYOJLO TINEMISKEJ

“Sanoyej pakanemiskej ikan yolseuilistli pampa xitlaj kimpajsolos” (SALMO 37:11).

NOCHIMEJ KIPIYASKEJ INKAL NIMAN TLEN KIKUASKEJ

“Kinchijchiuaskej inkaluan niman kuajli ompa chantiskej, tlatôkaskej ikan uvas, niman yejuamej kikuaskej itlakyo on uvas” (ISAÍAS 65:21).

XAKAJ KUALOS NION XAKAJ MIKIS

“Xok onyas mikilistli, nion chokistli, nion ajmantli” (APOCALIPSIS 21:4).

¿Tlenon noneki tikchiuas tla tikneki kuajli tinemis ika tlayekapan? Yejon tikitaskej ipan okse tlamachtijli.

a Tla tikneki okseki tikmatis itech kenon yonotlajtolkuep niman yonosemoyauj Biblia, xuiya ipan www.jw.org niman xpachouili kampa TLAMACHTILTIN ITECH BIBLIA > BIBLIA NIMAN TLEN OPANOK.

b Tla tikneki okseki tikmatis, xkita capítulo 9 itech libro La Biblia... ¿la Palabra de Dios, o palabra del hombre? Yejuin libro okichijchiujkej iteixpantijkauan Jehová niman uelis tiknextis ipan www.jw.org. Xpachouili kampa BIBLIOTECA > OTRAS PUBLICACIONES.