¿Tikilnamiki?
¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:
¿Kenon tikmatij ika ipan Biblia kijtoua ika toTajtsin techasikamati?
Ijkuak israelitas okintlajyouiltijkej Egipto, toTajtsin kimatiya ika tlajyouijtoyaj niman kimachiliaya kenon tlajyouiayaj (Éx. 3:7; Is. 63:9). Pampa toTajtsin otexchijchiuj ken yejua itlachialis, tejuamej noijki uelis titeasikamatiskej. Yejua techasikamati maski ijkuak tikmachiliskej ika xtechmelaua matechtlasojtla (wp18.3, páginas 8 niman 9).
¿Kenon Jesús okinpaleui tlaltikpakchanejkej maka makinemilikan tlen xkuajli intech oksekimej?
Ipan tonaltin ijkuak Jesús nemiya, miyekej judíos kinemiliayaj tlen xkuajli intech oksekimej. Jesús kuajli okijto ika melak noneki tiyolyemankej yeskej niman okijto ika xkuajli tla tikinchikoitaj oksekimej. Noijki okijto ika inomachtijkauan noneki noitaskej ken ikniujtin (w18.06, páginas 9 niman 10).
¿Tlenon tiuelij itech tleka toTajtsin xokikauili Moisés makalaki ipan Tlajli tlen yokimijlikaj kinmakaskej?
Moisés kuajli nouikaya iuan Jehová (Deut. 34:10). Kanaj 40 xiujtin sakin, ijkuak itlamiskia ika kistinemiskiaj ipan tlaluaktli, israelitas ika okpa okualankej pampa xkipiayaj atl. ToTajtsin okijli Moisés makinotsa se ueyi tetl. San ika, xyejon tlen okichiuj, Moisés okiuitek yejon ueyi tetl. Kanaj Jehová xokuelitak tlen okichiuj Moisés pampa xokichiuj tlen okinauatijka noso pampa xokitlakaitak ken kinamikiya ipampa milagro tlen okichiuj (Núm. 20: 6-12). Yejuin techmachtia ika melak noneki matiktlakamatikan niman matiktlakaitakan Jehová (w18.07, páginas 13 niman 14).
¿Itech tlenon ueliskia topopoloskej tla tikinchikoitaj oksekimej san ipampa tlen tikitaj?
Onka yeyi tlemach tlen kichiua matiknemilikan itlaj intech oksekimej: san pampa oksekan ualeuaj, san ipampa tomin niman san pampa iuejueyimej noso melak telpokamej. Melak noneki matikimitakan oksekimej ijkon ken kimita Jehová (Hech. 10:34, 35) (w18.08, páginas 8-12).
¿Kenon tokniuan akin iuejueyimej ueliskej tepaleuiskej ipan tlanechikoltin?
Tokniuj akin iueyi niman kipatiliaj itekiyo, toTajtsin ok kinpatiojkaita niman melak uelis kinpaleuiskej oksekimej. Uelis kinpaleuis teueuentsitsinuan akin xnomachtiaj, akin youejkaujkej xok tenojnotsaj, uelis temachtiskej itech Biblia niman miyek kichiuaskej ipan tenojnotsalistli (w18.09, páginas 8-11).
¿Tlenon kipiya yejon tlen ika titemachtiaj?
Kipiya amatsitsintin tlen tetitlanij jw.org niman tenotsalistin, chikueyi amatlajkuiloltin pitentsitsintin tlen kuajli onochijchiujkej niman revistas Amatl Tekakistilijketl niman ¡Despertad! Noijki tikpiyaj seki amatlajkuiloltin, ome amoxtin tlen ika titemachtiaj niman naui videos tlen melak techpaleuiyaj, se itoka ¿Tleka noneki timomachtis Biblia? (w18.10, página 16).
¿Kenon akin kichiua ken Cristo uelis kikouas tlen melauak, ken kijtoua Proverbios 23:23?
Xnoneki tiktemakaskej tomin niman ijkon tijkouaskej tlen melauak. San ika, kema noneki tikxeloskej tiempo niman tokojtiliskej niman ijkon uelis tikpiyaskej tlen melauak (w18.11, página 4).
¿Tlenon tiuelij itech tlen Oseas okichiuili isiuatsin Gómer?
Gómer miyekpa oauilnen, san ika, Oseas okitlapopolui niman xokikauj. Tla se tokniuj auilnemi, ixnamik uelis kitlapopoluis. Tla akin xkipiya tlajtlakojli oksejpa iuan noteka ixnamik akin okikajkayauj, xok uelis kikauas ixpan tekiuajkej (w18.12, página 13).