Jehová kipatiojkaita ijkuak tikijtouaj “amén”
JEHOVÁ kipatiojkaita ijkuak itekipanojkauan kiueyichiuaj. Yejua kinkaki, niman kita kenon kiueyichiuaj maski kemantika nesis ika xueyi kijtosneki (Mal. 3:16). Xnemili, ¿kechpa yotikijtokej tlajtojli “amén”? Kanaj nion xtikilnamikij. ¿Kipatiojkaita Jehová ijkuak tikijtouaj “amén”? Tikmatstokej ika kema. Matikitakan tlenon kijtosneki niman kenon notekitiltia ipan Biblia, ijkon tikasikamatiskej tleka Jehová kipatiojkaita.
NOCHIMEJ OKIJTOKEJ: “¡AMEN!”
Tlajtojli “amén” [ijkon manochiua] ualeua itech Hebreo, kijtosneki “timelajkanemis” noso “motech tlaneltokaskej”. Kemantika noijtouaya yejon ipan se juicio. Se neskayotl, tlaltikpakchanejkej kijtouayaj “amén” ijkuak notlajtolkauayaj, ijkon teasikamachiltiayaj ika tlen okijtokej melauak katka niman ika yejuamej kitaskiaj kenon nochiuas tlen yokijtokaj (Núm. 5:22). Tla ipan tlajtolkaualistli kijtouayaj itlaj tlen kichiuaskiaj, ijkuak teixpan kijtouayaj “amén” kichiuaya maka makauilmatikan intlajtol (Neh. 5:13).
Ipan capítulo 27 itech Deuteronomio, tiknextiaj se neskayotl itech kenon okikuikej tlajtojli amén. Ijkuak israelitas yokalajkaj ipan Tlajli tlen yokimijlikaj kinmakaskiaj, onosentlalijkej ipan tepetl Ebal niman Guerizim niman ijkon kikakiskiaj tlanauatijli niman kijtoskej tla kitlakamatiskiaj. Okichiujkej yejon ijkuak okijtokej “amén” niman okikakej tlenon panoskiaj tla xijkon kichiuaskiaj (Deut. 27:15-26). Xkonnemili kenon chikauak kakistiyaj tlakamej, siuamej niman kokonej akin miyekej katkaj (Jos. 8:30-35). Tikmatstokej ika xkeman okilkaujkej tlen okijtokej kichiuaskej. Ijkon tikmatij pampa Biblia kijtoua: “Israelitas okitekipanojkej toTEKO chika sanken nemiya Josué, niman chika sanken nemiyaj nochimej on uejueyitlayekankej yejuan kimatstikatkaj nochi on tlen toTEKO okichiu impampa on israelitas” (Jos. 24:31).
Jesús noijki okitekitilti tlajtojli “amén” niman ijkon kijtos ika melauak katka tlen kijtotoya, san ika, okse tlamantik kichiuaya. Yejua xokijto yejon tlajtojli sakin ijkuak yakaj ontlamiya tlen kijtouaya, yejua kachtopa kijtouaya “amén” niman ijkon teijliaya ika melauak tlen kijtouaya. Ijkuak ijkon kichiuaya, kijtosnekiya “melauak nimechijlia”. Kemantika, Jesús okpa kijtouaya “amén amén” (Mat. 5:18; Juan 1:51). Ijkon, teasikamachiltiaya ika melauak tlen kijtouaya. Kichiuaya yejon pampa san yejua akin yokikauilijkej makichiua nochi tlen toTajtsin yokijto (2 Cor. 1:20; Apoc. 3:14).
OKIJTOKEJ “AMÉN” NIMAN “OKUEYILIJKEJ TOTEKO”
Israelitas noijki kijtouayaj “amén” ijkuak kikuikatiliayaj Jehová niman kichiuiliayaj teoyotl (Neh. 8:6; Sal. 41:13). Ijkuak tlamiya teoyotl niman akin kikaktoyaj kijtouayaj “amén”, kiteititiayaj ika noijki ijkon tlanemiliayaj. Pampa nochimej kichiuayaj, kualtsin ken kiueyichiuayaj toTajtsin. Ijkon opanok ijkuak tekiuaj David okuikak Jerusalén Arca tlen iyaxka Jehová. Ijkuak yotlanka yejon iluitl, okijto se teoyotl ken se tlakuikajli (1 Crón. 16:8-36). Itlajtoluan David melak oteyolchikauj pampa nochimej okijtokej “amén” niman “okueyilijkej toTEKO”. Pampa nochimej ijkon okijtokej, yejon okichiuj ika melak mayolpakikan.
Noijki, akin kichiuayaj ken Cristo ipan kachtopa siglo kijtouayaj “amén” ijkuak kikuikatiliayaj Jehová. Niman, sekimej akin okijkuilojkej Biblia kemantika kitlaliayaj yejuin tlajtojli ipan incartas (Rom. 1:25; 16:27; 1 Ped. 4:11). Ipan Apocalipsis, noijki kinteneua sekimej iluikaktekitkej kiueyichiujtokej Jehová ika yejuin tlajtoltin: “¡Ma ijki nochiua! ¡Ma kiyekteneuakan toDios!” (Apoc. 19:1, 4). Akin kichiuayaj ken Cristo ipan kachtopa siglo kijtouayaj “amén” ijkuak tlamiyaj teoyotl tlen kichiuayaj ipan tlanechikoltin (1 Cor. 14:16). San ika, xkipiayaj ika san kijtoskiaj yejuin pampa ijkon yonomatkaj.
TLEKA NONEKI TIKIJTOSKEJ “AMÉN”
Itech tlen yotikitakej, tikasikamatij tleka ueyi kijtosneki tikijtoskej “amén” ijkuak tlami se teoyotl. Ijkuak tlami tikchiuaj teoyotl niman tikijtouaj yejuin tlajtojli, tikteititiaj ika melauak tlen tikijtotokej. Niman ijkuak tikijtouaj “amén”, maski makakisti noso san ipan toyojlo, sakin ijkuak tijkakij se teoyotl, tikteititiaj ika noijki ijkon titlanemiliaj itech tlen yonoijto. Aman matikitakan ome tlemach itech tleka ueyi kijtosneki tikijtoskej “amén”.
Tikchiujtokej tlen noneki ijkuak tikueyichiuaj toTajtsin. Tikteititiaj ika tikueyichiuaj Jehová xsan pampa tlen tikijtouaj ijkuak ontlami se teoyotl, tikteititiaj ika tlen tikchiuaj ijkuak nochiujtok teoyotl. Pampa ika nochi toyojlo tiknekij tikijtoskej “amén”, yejon uelis techpaleuis matitlakaktokan niman matiktlakaitakan akin kichiujtok teoyotl.
Techpaleuiya san sekan matinemikan. Ijkuak nochiua teoyotl ipan tlanechikojli, nochimej san sekan tijkakij tlen noijtoua (Hech. 1:14; 12:5). Ijkuak san sekan titlanankiliaj, kichiua matiknekikan san sekan tinemiskej. Maski tla tikijtouaj “amén” chikauak noso san ipan toyojlo, tikchiuaj ika Jehová makineki techmakas tlen san sekan tiktlajtlanilijtokej.
Ijkuak tikijtouaj “amén”, tikueyichiuaj Jehová.
Tikueyichiuaj Jehová. Yejua kita nochi tlen tikchiuaj niman ijkon tikueyichiuaskej, maski manesi kentla xueyi kijtosneki (Luc. 21:2, 3). Ijkuak tikueyichiuaj, toTajtsin kita tleka tikchiuaj niman ueli kita tlenon tikpiyaj ipan toyojlo. Maski tla san tijkakij tlanechikojli ipan teléfono, uelis tikmatstoskej ika yejua techkaki ijkuak tikijtouaj “amén”. Tlen tikijtouaj teuan nopoua ijkuak tlanechikojli kiueyichiua Jehová.
Ken yotikitakej, tikijtoskej “amén” uelis nesis kentla xueyi kijtosneki, san ika, kema. Obra Perspicacia kijtoua ika yejuin tlajtojli uelis noijtos niman ijkon teasikamachiltis “ika yakaj itech tlaneltokaj, itlaj kiselia niman kiteititia tlamachialistli tlen kipiya ipan iyojlo”. Kuakon, ijkuak tikijtouaj “amén” tikyolpaktiaj Jehová (Sal. 19:14).