Matijkixtikan nochi tlanemilijli tlen xualeua itech toTajtsin

1. ¿Tlenon okimijlikej tokniuan akin tlapejpeniltin katkaj?

“MAKA sa xmouikakan ken on tlaltikpaktlakamej nouikaj”, Pablo ijkon okimijli akin kichiuayaj ken Cristo ipan kachtopa siglo (Rom. 12:2). ¿Tleka Pablo ijkon okimijli akin yonosentemakakaj itech toTajtsin niman akin yokintlapejpenijkaj ika espíritu santo? (Rom. 1:7).

2, 3. a) ¿Tlenon kichiua Satanás niman ijkon kiyejyekos maka matiktlakamatikan Jehová? b) ¿Kenon uelis tijkixtiskej tlen melak saliujtok ipan totlamachilis?

² Pablo kajmanaya ika itlamachtiluan tlaltikpakchanejkej akin Satanás kinyekana yokimijtlakojkaj sekimej tokniuan (Efes. 4:17-19). Yejon noijki uelis topan nochiuas. Satanás, akin kiyekana tlaltikpaktli, miyek tlen kikui niman ijkon kichiuas matiktlalkauikan Jehová. Yejua kichiua matiknekikan tikpiyaskej miyek tlemach noso tiuejueyixtoskej ipan tlaltikpaktli. Uelis kikuis tlen otiuelkej tochan, ipan kaltlamachtijli niman tlen yotiuelkej intech oksekimej niman ijkon kichiuas matitlanemilikan ken yejua kineki.

³ ¿Uelis tijkixtiskej tlen melak saliujtok ipan totlamachilis? (2 Cor. 10:4). Matikitakan tlen okijto Pablo: “Tikxoxotoniaj nochi on xkuajli tlateixpanuijli yejuan ika techixnamikij. Tikxoxotoniaj on noueyimatilistli yejuan kichiua para se xueli kiselia kajsikamatilistli itech ika Dios. Intlamachilis [...] nochi tlakatl tikchiualtiaj ma kitlakamati Cristo” (2 Cor. 10:5). Kema, ika itlapaleuilis Jehová uelis tikinkixtiskej tlanemililtin tlen xkuajkualtin. Ijkon ken se pajtli uelis kichiuas maka matechijtlako itlaj veneno, iTlajtol toTajtsin uelis techpaleuis maka matechijtlako tlen onka ipan yejuin tlaltikpaktli tlen kiyekana Satanás.

MATIKYENKUILIKAN TOTLAMACHILIS

4. ¿Tlenon ononek tikpatlaskej ijkuak otikselijkej tlen melauak?

⁴ Matikilnamikikan tlenon ononek tikpatlaskej ijkuak otikselijkej tlen melauak itech iTlajtol toTajtsin niman ijkuak otiktlapejpenijkej tiktekichiuiliskej Jehová. Timiyekej ononek tijkauaskej tlen xkuajli tikchiuayaj (1 Cor. 6:9-11). Melak tiktlasojkamachiliaj toTajtsin ika otechpaleui tijkauaskej nochi yejon tlemach.

5. ¿Tlenon ome tlemach techijlia matikchiuakan Romanos 12:2?

⁵ San ika, maka san ijkon matokauakan. Maski xok tikchiuaj uejueyimej tlajtlakoltin tlen tikchiuayaj ijkuak xtoapolaktiayaj, ok noneki tokojtilijtoskej niman ijkon tikmapeuaskej tlen uelis kichiuas oksejpa ompa matiuetsitij. ¿Tlenon uelis techpaleuis? Pablo technankilia: “Maka sa xmouikakan ken on tlaltikpaktlakamej nouikaj, yej xkauilikan Dios ma yejua kiyenkuili nemotlamachilis” (Rom. 12:2). Kuakon, noneki tikchiuaskej ome tlemach. Kachtopa, xok kipiya ika titlanemiliskej ken tlaltikpakchanejkej. Ika ome, kipiya ika tikyenkuiliskej totlamachilis noso topatlaskej.

6. ¿Tlenon tiuelij itech tlen Jesús okijto ipan Mateo 12:43-45?

⁶ Ijkuak Pablo kijtoua matopatlakan, xsan kijtosneki tikpatlaskej ken tinesij. Kijtosneki tikpatlaskej tonemilis (xkita recuadro “¿Timopatla noso san timixpatla?”). Noneki tikyenkuiliskej totlamachilis, kijtosneki tikyenkuiliskej tlen tikileuiyaj, tlen tikchiuaj niman tlen yemelak tikmachiliaj. Kuakon, tinochimej kipiya ika totlajtoltiskej: “¿Kenon ninopatlatika? ¿San seki yonikpatlak? ¿Kuajli nesi ika nikchiua ken Cristo?”. Melak noneki matikasikamatikan yejuin. Ipan Mateo 12:43-45, onka se neskayotl tlen Jesús okijto niman techijlia tlenon noneki tikchiuaskej (xpoua). Yejuin neskayotl kuajli techasikamachiltia itlaj: xsan noneki tijkixtiskej xkuajkualtin tlanemililtin; aman noneki tijkalaktiskej ipan totlamachilis tlanemililtin tlen kuelita toTajtsin.

MATIKYENKUILIKAN TOYOJLO NIMAN TOTLAMACHILIS

7. ¿Kenon uelis tikpatlaskej tonemilis?

⁷ ¿Uelis tikpatlaskej tonemilis? ITlajtol toTajtsin technankilia: “Nemejuamej xkauilikan [Dios] para kuajli ma kiyenkuilijtiu nemoyojlo niman nemotlamachilis. [...] Nemejuamej no xmotlakentikan  ika on yenkuik nemilistli. Xmelajkanemikan ken Dios yolmelajki niman yolchipauak” (Efes. 4:23, 24). Ken tikitaj, kema uelis tikpatlaskej tonemilis, san ika, ouijtika. Xsan noneki tikpopoloskej tlen xkuajli tikileuiyaj niman xok tikchiuaskej tlen xkuajli. Kipiya ika kuajli tikyenkuiliskej toyojlo niman totlamachilis. Yejuin kijtosneki tikpatlaskej tlen tikileuiyaj, tlen tikchiuaj niman tlen tiknemiliaj. Ika yejon, noneki nochipa tokojtilijtoskej.

8, 9. ¿Kenon tlen ipan onochiuj se tokniuj techititia ika noneki tikyenkuiliskej toyojlo niman totlamachilis?

⁸ Matikitakan tlenon ipan onochiuj se tokniuj akin tlauele katka, tlauaniya niman melak teuisokiya. Ijkuak onopatlak niman okichiuj tlen nonekiya niman ijkon noapolaktis, miyekej akin chantiyaj ipan ikalpan okinmojkatlachialti ika yonopatlaka. San ika, se teotlak, ijkuak kemach yonoapolaktijka, tokniuj okixnamik itlaj tlen xkichiaya: se tlauanketl okitejtemoto ichan pampa kinekiya iuan nouisokis. Tokniuj kachtopa xkinekiya iuan nouisokis. San ika, xok okixiko ijkuak yejon tlauanketl okijto tlen xmelauak itech Jehová. Kuakon okis niman okiuisok. ¿Tleka ijkon okichiuj? Pampa maski Biblia yokipaleuijka maka makineki teuisokis, tokniuj xikiyenkuiliaya iyojlo niman itlamachilis.

⁹ Maski ijkon, yejuin tokniuj xonosiaujkauj (Prov. 24:16). Pampa tlayekankej okipaleuijkej, tokniuj xokikajkauj ika nopatla, niman sakin okichiuj tlen nonekiya niman ijkon yes se tlayekanketl. San ika, se teotlak, ijkuak nemiya ikiyauatenko Kajli kampa Tosentlaliaj, okixnamik itlaj tlen yeuejkaui yokixnamijka: se tlauanketl kiuisokiskia se tlayekanketl. ¿Tlenon okichiuj tokniuj? Yejua xokualan, ononojnotsato iuan tlauanketl, okiyolseui niman okipaleui maajsi ichan. ¿Tleka ijkon okichiuj? Pampa yokiyenkuilijka iyojlo niman itlamachilis. Aman yemelak yonopatlaka, yolseujki niman yolyemanki katka. Yejon okiueyichiuj Jehová.

10. ¿Tlenon noneki tikchiuaskej niman ijkon tikpatlaskej tonemilis?

¹⁰ Xuelis nimantsin topatlaskej. Kanaj nonekis melak tokojtilijtoskej miyek xiuitl (2 Ped. 1:5). Maski youejkauj tiktekichiuilijtokej toTajtsin, ok noneki tokojtilijtoskej niman ijkon tikpatlaskej tonemilis. ¿Tlenon uelis techpaleuis? Matikitakan seki tlen melak noneki matikchiuakan.

¿KENON TIKYENKUILISKEJ TOYOJLO NIMAN TOTLAMACHILIS?

11. ¿Kenon techpaleuis teoyotl matikpatlakan toyojlo niman totlamachilis?

¹¹ Kachtopa noneki tikchiuaskej teoyotl. Noneki tiktlajtlaniskej san noijki tlen okitlajtlan salmista, akin okijto: “Ay Dios, xnechmaka se noyojlo yejuan chipauak. Xnechmaka sen nekilistli yejuan yenkuik niman yejuan nochipa kinekis mitstlakamatis” (Sal. 51:10). Matikselikan ika noneki tikpatlaskej toyojlo niman totlamachilis. Noijki noneki tiktlajtlaniliskej Jehová matechpaleui. ¿Tleka kuajli tikmatij ika techpaleuis? Matikitakan tlenon okijto kichiuas inpampa israelitas akin yoltechikajkej katkaj niman akin chantiyaj ijkuak nemiya Ezequiel, yejua okijto: “Niman nejua nikinmakas san se inyojlo, niman nikchiuas san se tlanemilijli makipiyakan; [...] niman nikinmakas se yojlotl tlachijchiujtli ika nakatl”, kijtosneki, tlen makineki kitlakamatis toTajtsin (Ezeq. 11:19, TNM). Yejuin tlen okijto itech israelitas melak techyolchikaua. Jehová kinekiya kinpaleuis israelitas niman noijki kineki techpaleuis.

12, 13. a) Ijkon ken kijtoua Salmo 119:59, ¿itech tlenon noneki titlanemiliskej? b) ¿Tlenon noneki totlajtoltiskej?

¹² Ika ome, noneki titlanemiliskej. Mojmostla matikpouakan Biblia niman matitlanemilikan itech tlen noneki tikpatlaskej (xpoua Salmo 119:59; Heb. 4:12; Sant. 1:25). Kuajli matikitakan tla noijki yopeuj titlanemiliaj ken tlaltikpakchanejkej. Noneki tikitaskej kanon topopolouaj niman tokojtiliskej xok ijkon tikchiuaskej.

¹³ Ika yejon, uelis totlajtoltiskej yejuin: “¿Nikmachilia ika ok nitenexikolita maski san achijtsin?” (1 Ped. 2:1). “¿Ninoueyimati ipampa tlen onikchiuj yeuejkaui, ipampa tlen oninomachti noso ipampa notomin?” (Prov. 16:5). “¿Nikimita ika xuejueyixtokej akin xkipiyaj tlen nejua nikpiya noso akin oksekan ualeuaj?” (Sant. 2:2-4). “¿Nechyoltilana tlen onka ipan tlaltikpaktli tlen Satanás kiyekana?” (1 Juan 2:15-17). “¿Nikuelita nikitas kampa uajnesi auilnemilistli niman tlauisokilistli?” (Sal. 97:10; 101:3; Amós 5:15). Kanaj ken tikinnankiliskej yejuin techititis kanon kipiya ika topatlaskej. Tla tikixtiaj yejuin tlen melak saliujtok ipan totlamachilis, tikyolpaktiskej toTajtsin iluikakchane (Sal. 19:14).

14. ¿Tleka noneki kuajli matikintlapejpenikan toamigos?

¹⁴ Ika yeyi, noneki kuajli matikintlapejpenikan toamigos. Maski tla tikitaj noso xtikitaj, tinochimej tipeuaj titlanemiliaj ken akin imiuan touikaj (Prov. 13:20). Kampa tomachtiaj noso kampa titekitij, nemij miyekej akin xtechpaleuiyaj matitlanemilikan ken Jehová. San ika, ipan tlanechikoltin uelis tikinnextiskej amigos akin techpaleuiskej matitetlasojtlakan niman matikchiuakan tlen kuajli (Heb. 10:24, 25).

“MÁS XMOKOJTILIKAN IPAN NEMOTLANELTOK”

15, 16. ¿Kenon Satanás kiyejyekoua kipatlas ken titlanemiliaj?

¹⁵ Maka matikilkauakan ika Satanás melak kineki kipatlas ken titlanemiliaj. Yejua kimatstika ika Biblia techpaleuiya kuajli matitlanemilikan. Ika yejon, yejua kikui miyek tlanemililtin niman ijkon kipatlas ken titlanemiliaj niman kichiuas matiometlamatikan.

¹⁶ Satanás okichiuj ika Eva maometlamati ijkuak okitlajtolti: “¿Tlen melauak omechijlij Dios para...?” (Gén. 3:1). Niman Satanás ok ijkon kichiua. Ipan tlaltikpaktli tlen yejua kiyekana, miyekej techtlajtoltiaj tlen ueliskia kichiuas matiometlamatikan, techijliaj: “¿Melauak ika toTajtsin xkitekauilia manonamiktikan tlakamej iuan tlakamej niman siuamej iuan siuamej? ¿Melauak ika toTajtsin xmechkauilia xpanoltikan navidad niman cumpleaños? ¿Melauak ika nemoTajtsin xmechkauilia xmotlalilikan yestli? ¿Melauak ika toTajtsin akin tetlasojtlani xmechkauilia xmouikakan imiuan nemochanejkauan noso nemoamigos akin yokinkixtijkej itech tlanechikojli?”.

17. a) ¿Tlenon noneki tikchiuaskej tla itlaj onka tlen kichiua matiometlamatikan? b) Ken nesi ipan Colosenses 2:6, 7, ¿tlenon topan nochiuas tla ijkon tikchiuaj?

¹⁷ Noneki kuajli tikasikamatiskej tlen tikneltokaj, pampa tla xijkon tikchiuaj, uelis peuas tiometlamatiskej niman xok titlaneltokaskej. Kuakon, ¿tlenon noneki tikchiuaskej? ITlajtol toTajtsin techijlia ika noneki tikyenkuiliskej ken titlanemiliaj niman ijkon sa no tejuamej tikitaskej “tlinon Dios kineki: on tlen kuajli, on tlen kipaktia niman nochi on tlen chipauak” (Rom. 12:2). Tla nochipa tomachtiaj, techpaleuis kuajli matikmatstokan ika tlen yotiuelkej ipan Biblia yejon tlen melauak. Noijki, kuajli tikmatstoskej ika itlanauatiluan Jehová kuajkualtin. Niman yejon kichiuas matochiuakan ken se kojtli tlen ineluayouan chikaujkej, kuakon, chikauak tikpiyaskej totlaneltok (xpoua Colosenses 2:6, 7).

18. ¿Tlenon techpaleuis maka matechijtlako yejuin tlaltikpaktli tlen kiyekana Satanás?

¹⁸ Xakaj uelis kichikauas totlaneltok; kipiya ika tejuamej tikchikauaskej. Kuakon, matikyenkuilijtokan toyojlo niman totlamachilis. Nochipa matikchiuilikan teoyotl Jehová niman matiktlajtlanilikan matechmaka iespíritu. Matikxelokan tiempo niman matitlanemilikan, matikitakan kenon titlanemiliaj niman tleka ijkon titlanemiliaj. Matikintejtemokan amigos akin techpaleuiskej matikyenkuilikan ken titlanemiliaj. Tla tikchiuaj nochi yejuin, xtijkauiliskej matechijtlako yejuin tlaltikpaktli tlen kiyekana Satanás niman tijkixtiskej itech totlamachilis nochi tlanemililtin tlen xualeua itech toTajtsin (2 Cor. 10:5).