Kampa Tomachtiaj iTekiyo toTajtsin 2015 techpaleuis kuajli matitemachtikan

¹ David okijkuilo: “Notlajtoluan tlen kisaj nokamak niman notlanemililuan ipan noyojlo mamitsyolpaktikan, Jehová, noueyiTetl niman noTemakixtijkauj” (Sal. 19:​14). Tejuamej noijki tiknekij ika totlajtoluan makiyolpaktikan Jehová, pampa tiktlasojkaitaj titlajtoskej itech tlen melauak ipan tlanechikojli niman noijki ijkuak titenojnotsaj. Tlanechikojli Kampa Tomachtiaj iTekiyo toTajtsin, Jehová techmachtia kenon titenojnotsaskej. Yejuin tlamachtijli nochiua ipantsin 111,000 tlanechikoltin ipan nochiuiyan tlaltikpaktli. Nochimej tokniuan yokinpaleui matenojnotsakan, matemachtikan, kualtsin matlajtokan, matetlaneltokiltikan niman makichiuakan ika yolchikaualistli (Hech. 19:8; Col. 4:6).

² Tlen nopanoltis ipan 2015 noijki nokixtis itech Tlen timomachtis itech iTlajtol toTajtsin, ¡ToTajtsin techijlia tlen kualtsin!, Uelis touikaskej iuan toTajtsin niman Xkaki toTajtsin niman tinemis nochipa. Niman, yonopatlak kech uejkauis tlen onotlapejpeni itech tlen onopouj ipan Biblia niman tlamachtijli 1. Tlen yonopatlak niman kenon nopanoltis noitas ipan párrafos tlen uajlauej.

³ Tlen onotlapejpeni itech tlen onopouj ipan Biblia. Tokniuj akin kipanoltis yejuin kipiyas san ome minutos kampa kiteijlis se tlen tepaleui itech tlen onopouj ipan Biblia. Tla kuajli nomachtia, kijtos tlen melauak kipaleuis tlanechikojli ipan yejon ome minutos. Niman, kikauas chikuasen minutos kampa uelis kijtoskej ipan 30 segundos itech tlen okinextijkej ijkuak okipoujkej Biblia ipan yejon semana. Noneki kuajli matomachtikan niman ijkon tikijtoskej tlen tepaleui ipan 30 segundos, yejuin melak techpaleuis. Ijkon tikinkauiliskej oksekimej matlanankilikan itech tlen yonomachtijkej.

⁴ Tlamachtijli 1. Aman yejuin tlamachtijli xkipiya ika panos itech yeyi minutos. Akin kipanoltiskej yejuin tlamachtijli noneki miyekpa kipouaskej chikauak, makitakan kenon kipouaj tlajtoltin niman tla xnoteteltiaj niman ijkon kuajli manasikamati. Nochimej akin tiktekichiuiliaj Jehová noneki tochikauaskej kuajli tiamapouaskej, pampa ijkuak tiamapouaj noijki ijkon tikueyichiuaj toTajtsin. Melak tipakij ika melak miyekej telpokatsitsintin melak kuajli tlaamapouaj, niman noneki tikinyolchikauaskej tajtin pampa kinpaleuiyaj ika tlasojtlalistli inkoneuan kuajli maamapouakan.

⁵ Tlamachtijli 2. Yejuin kipanoltis se tokniuj siuatl ipan makuijli minutos. Akin kipanoltis noneki tlajtos itech ken itoka itlamachtil. Ijkuak tlamachtijli nokixtia itech amatlajkuilojli Tlen timomachtis itech iTlajtol toTajtsin, noneki makipanolti itech ken tikchiuaj totekiyo niman matepaleui ijkon ken melauak nochiua kampa tenojnotsa tlanechikojli. Ijkuak tlamachtijli nokixtia ipan okse amatlajkuilojli, noneki nopanoltis ijkon ken ompa uajnestiuj niman notlapejpeniskej textos tlen ompa uajlauej. Noijki uelis kikuis okseki textos tlen tlajtoua itech yejon tlamachtijli. Akin kiyekana yejuin tlanechikojli kitlalis akinon tepaleuis.

⁶ Tlamachtijli 3. Yejuin kipanoltis se tokniuj tlakatl noso siuatl ipan makuijli minutos. Ijkuak tokniuan siuamej kipanoltiskej, kichiuaskej ken tlamachtijli 2. Ijkuak kipanoltis se tokniuj tlakatl, kichiuas ken se discurso. Makinemili kenon kinpaleuis nochimej akin ompa tlakaktokej. Nomachtijketl kuajli makitetomili itlamachtil niman kuajli makintlapejpeni textos.

⁷ Yenkuik ken tokniuan tlakamej kipanoltiskej tlamachtijli 3. Ijkuak yejuin nokixtis itech amatlajkuilojli Tlen timomachtis itech iTlajtol toTajtsin, nopanoltis kentla ijkuak kiueyichiua toTajtsin ken familia noso ken ijkuak ontenojnotsa. Akin kiyekana tlanechikojli kijlis akinon iuan kipanoltis niman noijki kenon uelis kipanoltiskej. Akin kipaleuis nomachtijketl noneki yes se ichanejkauj noso se tokniuj tlakatl itech tlanechikojli. Uelis kikuis okseki textos tlen tlajtouaj itech yejon tlamachtijli. San kemantika se tlayekanketl kijliskej makipanolti yejuin tlamachtijli, niman yejua uelis kitlapejpenis akinon iuan panos niman kenon kichiuilis. Tikmatstokej ika ijkuak panos tlayekanketl iuan se ichanejkauj noso iuan okse tokniuj kiyolchikauas tlanechikojli ijkuak kitaskej kenon temachtia.

⁸ Tlajtolpaleuijli. Akin kiyekana yejuin tlanechikojli ipan ome minutos kijtos tlen kiyolchikauas nomachtijketl sakin ijkuak yopanok niman kimakas tlajtolpaleuilistli itech tlen uajlauj ipan amoxtli Benefíciese de la Escuela del Ministerio Teocrático. Akin kiyekana tlanechikojli xkiteneuas tlenon ipan tekititok se nomachtijketl ijkuak xipanoua. Tla yotlamito itlamachtil makiyolchikaua, makijto ipan tlenon tekititoya, niman makijli tleka kuajli okichiuj noso ika tlasojtlalistli makijli tleka noneki matekiti itech yejon.

⁹ Xkilnamiki itech tlen mitstlajtolpaleuiskej uajlauj ipan amoxtli Benefíciese ipan páginas 79 ontlami ipan 81. Sakin, akin kiyekana yejuin tlanechikojli kijkuilouilis ipan iamox ken noneki. Akin kiyekana yejuin tlanechikojli kitlajtoltis iselti nomachtijketl tla okichiuj ejercicios itech tlamachtijli kampa tekititoya. Uelis kiyolchikauas noso kijlis tlen kipaleuis tla yotlan tlanechikojli noso okse tonajli. Nomachtijkej noneki makitakan ika tlen kimijlis akin kiyekana tlanechikojli uelis kinpaleuis manoskalti intlaneltokil (1 Tim. 4:​15).

¹⁰ Tla se nomachtijketl kipanauiya minutos tlen kipiya, akin kiyekana yejuin tlanechikojli noso akin kipaleuiya, kitas kenon kinamikis kinteltis ika se campanita noso ika itlaj okse. Nomachtijketl kipiya ika kasikamatis ika yotlan minutos. Kipiya ika tlamis tlen kijtotika niman mauajtemo maski maka matlamiti itlamachtil (xkita amoxtli Benefíciese página 282, párrafo 4).

¹¹ Nochimej akin kichiuaj tlen notlajtlani tikinyoleuaj manoijkuilokan ipan yejuin tlanechikojli Kampa Tomachtiaj iTekiyo toTajtsin (xkita amoxtli Benefíciese página 282, párrafo 6). Yejuin tlanechikojli kinmachtia itekipanojkauan toTajtsin matlajtokan niman matemachtikan itech kuajli tlajtoltin itech Tekiuajyotl ika yolchikaualistli niman tlasojtlalistli. Melak kipaktiaj Jehová nochimej akin kiueyichiuaj ika tlamachtijli tlen itech ualeua (Sal. 148:​12, 13; Is. 50:4).