Ken nopanoltis tlanechikojli Nemilistli niman Tekitl ken Cristo

Tlen kipiya

1. Tlen nikan noijtoua kinpaleuis nochimej akin tlapaleuiyaj ipan totlanechikol Nemilistli niman Tekitl ken Cristo. Akin kipanoltiskej se tlamachtijli noneki kitaskej kenon kichiuiliskej ijkon ken kijtoua toamatlajkuilol Tlen tomachtiskej niman tlen notekitiltis niman ken nikan uajnestiuj. Noneki makinyolchikauakan nochimej akin tenojnotsaj makinpanoltikan tlamachtiltin. Oksekimej akin nochipa nosentlaliaj touan noijki uelis kinpanoltiskej tlamachtiltin tla kiseliaj tlen temachtia Biblia niman tla kichiuaj ken Cristo. Tla yakaj kineki kipanoltis tlamachtiltin, akin kiyekana tlanechikojli Nemilistli niman Tekitl noneki nomachtis tlen noneki kichiuas niman tla kita ika kema nochi kichiujtika, uelis kijlis ika kema uelis tlapaleuis. Ijkuak kijlis yejuin noneki ompa nemis akin kimachtia (noso itaj akin noijki nomachtia). Yejuin sa noyejua notlajtlani ijkuak se kineki nochiuas tenojnotsketl (od-S cap. 8 párr. 8).

TLEN NOIJTOS IJKUAK PEUAS TLANECHIKOJLI

2. Se minuto. Tla yotokuikatijkej niman yonochiuj teoyotl, akin kiyekana tlanechikojli Nemilistli niman Tekitl kichiuas matikmatisnekikan tlen noitas ipan tlanechikojli. Kijtos tlen kitas ika melak kinpaleuis tokniuan.

TLEN TEPALEUI ITECH ITLAJTOL TOTAJTSIN

3. Tlamachtijli (10 minutos). Ipan amatlajkuilojli Tlen tomachtiskej niman tlen notekitiltis uajlauj itoka tlamachtijli niman noijki kuajkui ome noso yeyi tlen noneki noteneuas. Yejuin tlamachtijli kipanoltis se tlayekanketl noso se tlapaleuijketl akin kuajli temachtia. Ijkuak peuas nopouas se yenkuik amoxtli itech Biblia, notlalis se video itech yejon amoxtli. Akin kipanoltis, uelis tlajtos itech kenon video notlajtolnamiki iuan tlamachtijli tlen noitstika, san ika, noijki noneki kinteneuas tlamachtiltin tlen uajlauej ipan Tlen tomachtiskej niman tlen notekitiltis. Noijki, tla kipiya tiempo, noneki kintekitiltis tlaixkopinaltin tlen ompa uajlauej. Uelis kitekitiltis itlaj okse, tla yejon kipaleuiya kuajli manasikamati itlamachtil.

4. Matiktejtemokan tlen tepaleui niman iyantika (10 minutos). Nikan tokniuj tetlajtoltis niman tokniuan tlanankiliskej niman xtlaj kijtos ijkuak peuas nion ijkuak tlamis. Yejuin noneki kipanoltis se tlayekanketl noso se tlapaleuijketl akin kuajli temachtia. Tokniuj kipiya ika tetlajtoltis tlen ompa uajnestiuj. Noijki, yejua uelis kijtos tla noneki noso xnoneki nopouaskej nochi tlaxeloltin. Akin tlanankiliskej xkipiya ika panoskej 30 segundos.

5. Tlen nopoua ipan Biblia (4 minutos). Yejuin kipanoltis se tokniuj tlakatl. Noneki kipouas ijkon ken yonotlali niman xtlaj kijtos ijkuak peuas nion ijkuak tlamis. Akin kiyekanas tlanechikojli kinpaleuis tokniuan akin panoskej ika tlen kipouaj manasikamati, makipouakan ijkon ken nestika, maka manoteteltikan, manauati ken yejuamej tlajtouaj, makipapatilikan ken kakisti, manoteltijtiakan kampa kinamiki niman makitlejkoltikan intlajtol kampa nonekis. Pampa seki tlen nopoua ipan Biblia melak ueyak, akin kita ken nopanoltis tlanechikojli Nemilistli niman Tekitl, noneki kuajli kitas akinon kipanoltis.

XMOMACHTI MELAK KUAJLI XTENOJNOTSA

6. Quince minutos. Yejuin kinpaleuiya tokniuan más kuajli matemachtikan niman matenojnotsakan. Tla noneki, tlayekankej noijki uelis kinpanoltiskej yejuin tlamachtiltin. Akin panoskej noneki kitaskej amatlajkuilojli Titlaamapouas niman titemachtis noso Xtetlasojtla: Xtemachti ipan tlamachtijli tlen kijtoua Tlen tomachtiskej niman tlen notekitiltis. San ika, ipan seki tlamachtiltin tlen ompa uajlauej san noneki kipanoltiskej tlayekankej noso tlapaleuijkej akin kuajli temachtiaj (ipan párrafo 15 nesi kenon noneki nopanoltiskej yejuin tlamachtiltin).

7. Xpeua xtenotsa. Yejuin tlamachtijli uelis kipanoltis se tokniuj tlakatl noso siuatl. Akin kipaleuis tlakatl noneki yes se tlakatl niman akin kipaleuis siuatl noneki yes se siuatl noso se inchanejkauj. Yejuamej ueliskej notlalijtoskej noso ijkatoskej. (Ipan párrafos 12 niman 13 uelis tikitas kenon tikpanoltis yejuin tlamachtijli).

8. Oksepa xteitati. Yejuin tlamachtijli uelis kipanoltis se tokniuj tlakatl noso siuatl. Akin kipaleuis tlakatl noneki yes se tlakatl niman akin kipaleuis siuatl noneki yes se siuatl (km-S 5/97 pág. 2). Yejuamej ueliskej notlalijtoskej noso ijkatoskej. Tokniuj noneki kiteititis tlen kijlis akin kachtopa okitlajpaloto niman okinek okseki kimatis. (Ipan párrafos 12 niman 13 uelis tikitas kenon tikpanoltis yejuin tlamachtijli).

9. Xtemachti. Yejuin tlamachtijli uelis kipanoltis se tokniuj tlakatl noso siuatl. Akin kipaleuis tlakatl noneki yes se tlakatl niman akin kipaleuis siuatl noneki yes se siuatl (km-S 5/97 pág. 2). Yejuamej ueliskej notlalijtoskej noso ijkatoskej. Nikan noneki noteititis achijtsin kenon nochiua se tlamachtijli itech Biblia tlen yonopeualti. Xnoneki itlaj kijtos ijkuak peuas nion ijkuak tlamis, san uelis nochiuas tla tokniuj akin kipanoltis tekititika ipan yejon. Noijki, xnoneki nopouas nochi kampa nokixtia itlamachtil, maski uelis nochiuas.

10. Xteijli tlen tikneltoka. Ijkuak kijtos Tlamachtijli, noneki kipanoltis se tokniuj tlakatl. Niman ijkuak kijtos Xteititi tlen opanok, uelis kipanoltis se tokniuj tlakatl noso siuatl. Akin kipaleuis tlakatl noneki yes se tlakatl niman akin kipaleuis siuatl noneki yes se siuatl. Tokniuj xnoneki ouijtika tenankilis, tlen kijtos noneki kikixtis ipan tlamachtijli tlen kimelaua itlamachtil. Yejua kijtos tla kiteneuas amatlajkuilojli tlen kitekitiltijtika.

11. Tlamachtijli. Yejuin kipanoltis se tokniuj tlakatl ken se tlamachtijli tlen notemaka ipan tlanechikojli. Ijkuak tlamachtijli nokixtis ipan apéndice 1 itech folleto Xtetlasojtla, tokniuj noneki kijtos kenon yejon textos uelis techpaleuiskej ijkuak titenojnotsaj. Kanaj uelis kijtos kenon uelis tiktekitiltiskej se texto, tlenon kijtosneki niman kenon uelis ika tikinpaleuiskej akin tikinnojnotsaj. Ijkuak tokniuj kikixtis tlen kijtos ipan se tlamachtijli itech folleto Xtetlasojtla, noneki kijtos kenon techpaleuis ijkuak titenojnotsaj. Uelis kitekitiltis kachtopa punto noso se texto tlen uajlauj ipan tlamachtijli.

12. Ken uelis tikchiuas. Ipan yejuin niman okse párrafo uelis tikitas kenon tikpanoltis tlamachtijli “Xpeua xtenotsa” niman “Oksepa xteitati”. Tla xtlaj okse kijtoua, ijkuak tipanos nonekis tikteneuas se tlaxelojli itech Biblia tlen xmás ouijtika para akin tiknojnotstika niman tikauas se tlajtoltilistli para oksejpa tikontlajpalos. Ijkuak tikpanoltis tlamachtijli nonekis titlajtos itech tlen panotika kampa tichanti. Noijki, uelis tiktlapejpenis tla tiktemakas se amatlajkuilojli noso tikteititis se video tlen onka ipan Tlen ika titemachtiaj. Xnoneki tiktsontekontlalis tlen tikijtos, nonekis timomajmachtis kenon más kuajli titenotsas, tikteititis ika timajmana intech oksekimej niman titlajtos ken nochipa titlajtoua.

13. Uelis tikpatlas ken tikpanoltis motlamachtil. Xteititi kenon titenojnotsaskia:

(1) Techajchan: Yejuin kijtosneki ijkuak titenojnotsa techajchan (noso maski ipan carta noso telefono) niman noijki ijkuak oksepa tikominita.
(2) San kanon xtenojnotsa: Yejuin kijtosneki ijkuak tikteititia se tlaxelojli itech Biblia maski titekititika, tinemi escuela, tiauj ipan ojtli, noso tikchiujtika itlaj okse.
(3) Xtenojnotsa kampa tojlan: Yejuin kijtosneki ijkuak titenojnotsa ika carrito, kampa tlanemakalo, parques, estacionamientos noso oksekan kampa tojlan.

14. Ken tikintekitiltis videos niman amatlajkuiloltin. Tejua uelis tiktlapejpenis tla tiktemakas se amatlajkuilojli noso tikteititis se video. San ika, tla ipan tlamachtijli onka se video noso tikneki tiktekitiltis, xnoneki tiktlalis, san noneki itech nentlajtoskej.

MATINEMIKAN KEN CRISTO

15. Tla yotokuikatijkej, ipan yejuin sección tlen uejkaui 15 minutos, nopanoltis se noso ome tlamachtiltin tlen kinpaleuis akin tlakaktokej makichiuakan tlen kijtoua iTlajtol toTajtsin. Tla xkijtoua itla okse, yejuin tlamachtiltin kipanoltiskej tlayekankej noso tlapaleuijkej akin kichiuaj tlen kinamiki niman kuajli temachtiaj. San ika, tlen noneki ipan tlanechikojli kipiya ika kipanoltis se tlayekanketl. Ijkuak uajlas se tlamachtijli kampa nonekis san sekan tomachtiskej, tokniuj akin kipanoltis uelis okseki tetlajtoltis niman ijkon noteneuas tlen más ueyi kijtosneki itech yejon tlamachtijli. Ijkuak peuas xnoneki miyek kijtos niman ijkon kinkauilis oksekimej noijki matlanankilikan. Tla ipan tlamachtijli notlajtlani itlaj manotlajtolti se tokniuj, yejua noneki tlejkos ipan plataforma niman ompa tlanankilis.

16. Tlamachtijli itech Biblia iuan tlanechikojli (30 minutos). Yejuin kipanoltis se tlayekanketl akin kichiua tlen kinamiki niman kuajli temachtia (ipan tlanechikoltin kampa xnemij miyekej tlayekankej uelis kintekitiltiskej tlapaleuijkej akin kichiuaj tlen kinamiki niman kuajli temachtiaj). Grupo ika tlayekankej kintlapejpeniskej akinomej ueliskej kuajli kiyekanaskej yejuin tlamachtijli. Akin kintlapejpeniskej xkipiya ika melak uejkauiskej, noneki kinteititiskej textos tlen itech tomachtijtokej niman kinpaleuiskej nochimej makitakan kenon techpaleuiya tlen noitstika. Kinpaleuis tla kitaj kampa kijtoua kenon noneki nopanoltis Amatl Tekakistilijketl (w23.04 pág. 24, recuadro). Tla yonoitak nochi tlamachtijli, xnoneki okseki kijtoskej niman ijkon kajxiltiskej 30 minutos. Tla ueli, nochi semanas manopatlatiakan akin tlayekanaskej niman amapouaskej. Tla akin kiyekana tlanechikojli kitlajtlanilia akin kipanoltia yejuin tlamachtijli ika maka mauejkaui, kuakon yejua kitas kenon kichiuilis. Uelis kitlapejpenis maka manopouakan seki párrafos.

TLEN NOIJTOS IJKUAK TLAMIS TLANECHIKOJLI

17. Yeyi minutos. Akin kiyekana tlanechikojli kiteneuas seki tlen onoitak niman tepaleui. Noijki, kichiuas matikmatisnekikan tlen noitas amanchikueyi. Tla onka tiempo, uelis kinteneuas akin kinpanoltiskej tlamachtiltin. Tla xkijtoua itlaj okse, akin kiyekana tlanechikojli uelis kiteijlis tlen noneki nomatis noso kinpouas seki cartas. Yejua xkipiya ika kualijtos tlen nochipa nochiua, ken tlen hora kisaskej ontenojnotsaskej niman akinomej tlachipauaskej, pampa yejuin notlalis ipan tablero. Tla xonka tiempo para noijtos itlaj tlen noneki noso nopouaskej cartas, akin kiyekana tlanechikojli kimijlis tokniuan ika makitsolokan tlen kipanoltiskej itech “Matinemikan ken Cristo” (xkimita párrafos 16 niman 19). Tlanechikojli tlamis ika tlakuikajli niman teoyotl.

IJKUAK KINYOLCHIKAUAJ NIMAN KINPALEUIYAJ TOKNIUAN

18. Ijkuak se tokniuj tlamis itlamachtil, akin kiyekana tlanechikojli, kanaj ipan se minuto kijlis tlenon kuajli okichiuj niman kipaleuis ika amatlajkuilojli Titlaamapouas niman titemachtis. Ijkuak tokniuj akin kiyekana tlanechikojli kijtos akinon kipanoltis se tlamachtijli, xkipiya ika kijtos ipan tlen tlamachtijli tekititok yejon tokniuj. Ijkuak tokniuj yotlan itlamachtil niman akin kiyekana tlanechikojli yokijli tlenon kuajli okichiuj, uelis kiteneuas itech tlenon tekititoya niman kijtos tleka kuajli okichiuj noso ika yemanki tlajtojli kijlis kanon ok noneki tekititos. Akin kiyekana tlanechikojli noijki uelis kijtos okseki tlen kipaleuis tokniuj noso akin ompa nemij. Ijkuak yotlan tlanechikojli noso okse tonajli, tokniuj akin okipanolti se tlamachtijli uelis san iselti kipaleuiskej ika amatlajkuiloltin Xtetlasojtla: Xtemachti, Titlaamapouas niman titemachtis noso ika amoxtli Benefíciese (ipan párrafos 19, 24, niman 25 uelis tikitas okseki tlen kichiua akin kiyekana tlanechikojli Nemilistli niman Tekitl niman tlen kichiua akin kinpaleuiya tokniuan).

TIEMPO

19. Nochimej akin kipanoltiskej se tlamachtijli xnoneki sajnoye uejkauiskej (akin kiyekanas tlanechikojli noijki noneki ijkon kichiuas). Ipan toamatlajkuilol Tlen tomachtiskej niman tlen notekitiltis kijtoua kech noneki uejkauis se tlamachtijli, san ika, tla nimantsin tiktlamiltia motlamachtil xok noneki okseki tikijtos. Tla se tokniuj akin kipanoltijtika itlamachtil tlami itiempo, kiteltiskej san ken kinamiki. Tla tokniuan akin kinpanoltiaj tlamachtiltin melak uejkauij, akin kinpaleuiya tokniuan uelis san inselti kinnotsas (xkita párrafos 24 niman 25). Nochi tlanechikojli iuan tlakuikaltin niman teoyomej, uejkauis 1 hora niman 45 minutos.

IJKUAK TLAYEKANKETL IPAN CIRCUITO KITLAJPALOUA TLANECHIKOJLI

20. Ijkuak tlayekanketl ipan circuito kitlajpalos tlanechikojli, nopanoltis tlen yonotlali ipan Tlen tomachtiskej niman tlen notekitiltis, san xnopanoltis “Tlamachtijli itech Biblia iuan tlanechikojli”, pampa tlayekanketl ipan circuito kipanoltis itlamachtil tlen uejkaui 30 minutos. Achto ika peuas yejuin tlamachtijli, akin kiyekana tlanechikojli achijtsin tlajtos itech tlen otikitakej niman kijtos tlen tikitaskej ipan okse semana, kiteijlis tlen noneki matikmatikan, kinpouas cartas tlen nonekij niman kijtos ika panos tlayekanketl ipan circuito. Ijkuak tlamis itlamachtil tlayekanketl ipan circuito, ontlamis ika se tlakuikajli tlen yejua kitlapejpenis. Yejua uelis kijlis se tokniuj makichiua teoyotl. Niman ijkuak tlayekanketl ipan circuito nemis ipan tlanechikojli, akin kinpanoltiaj intlamachtiluan ipan Sala B xkinpanoltiskej. Grupos akin tlajtouaj okse tlajtojli uelis kipiyaskej intlanechikoluan maski tlayekanketl ipan circuito kitlajpaloua tlanechikojli. San ika, ijkuak tlayekanketl ipan circuito kitemakas sa ika tlami tlamachtijli, grupos kipiya ika nosentlaliskej iuan intlanechikol.

IJKUAK TIKPIYASKEJ TOUEYITLANECHIKOL

21. Ipan semana ijkuak onias ueyitlanechikojli, xnopanoltis nion se tlanechikojli. Xkimintlalnamiktikan tokniuan ika noneki inselti noso iuan inchanejkauan nomachtiskej tlen tikitaskiaj ipan tlanechikojli yejon semana.

IJKUAK TIKPIYASKEJ CONMEMORACIÓN

22. Tla Conmemoración nochiua ipan semana, xnopanoltis tlanechikojli Nemilistli niman Tekitl.

AKIN KITA KEN NOPANOLTIS TLANECHIKOJLI NEMILISTLI NIMAN TEKITL

23. Grupo ika tlayekankej kitlapejpeniskej se tlayekanketl akin kichiuas yejuin tekitl. Yejuin tokniuj noneki kitas ika tlanechikojli manopanolti ijkon ken kinamiki niman ken nikan nestika. Noneki iuan tekitis tokniuj akin kinpaleuiya tokniuan. Ijkuak kisas se yenkuik amatlajkuilojli Tlen tomachtiskej niman tlen notekitiltis, tokniuj akin kita ken nopanoltis yejuin tlanechikojli noneki nimantsin kintlalis nochimej akin panoskej ipan tlanechikojli tlen tikpiyaj itlajkotian semana para yejon ome metstli. Kijtosneki ika noneki kintlalis akin kinpanoltiskej tlamachtiltin niman akin kiyekanas tlanechikojli (xkimita párrafos 3-16 niman 24). Ijkuak kitaskej akinomej panoskej, noneki kitaskej kech xiuitl kipiyaj noso tla kasikamatij itech tlen tlajtoskej para ueliskej nimatsin kiteasikamachiltiskej. Tokniuan akin kipanoltiskej se tlamachtijli, noneki kinmakaskej amatl Tlen tikpanoltis ipan tlanechikojli Nemilistli niman Tekitl (S-89), ijkuak ok poliui yeyi noso más semanas ika kipanoltiskej intlamachtil. Akin kita ken nopanoltis tlanechikojli noneki kitas ika programa manotlali ipan tablero. Tokniuan tlayekankej uelis kijliskej okse tlayekanketl noso se tlapaleuijketl para makipaleui. San ika, san tlayekankej uelis kijtoskej akinomej kinpanoltiskej tlamachtiltin tlen uajlauej ipan “Tlen tepaleui itech iTlajtol toTajtsin” niman ipan “Matinemikan ken Cristo”.

AKIN KIYEKANA TLANECHIKOJLI NEMILISTLI NIMAN TEKITL

24. Nochi semanas se tlayekanketl kiyekanas nochi tlanechikojli Nemilistli niman Tekitl (tlanechikoltin kampa xnemij miyekej tlayekankej uelis kintekitiltiskej tlapaleuijkej akin kichiuaj tlen kinamiki niman kuajli temachtiaj). Yejua kitas tlen kijtos ijkuak peuas tlanechikojli, ijkuak tlamis niman kinpanoltis videos itech “Kenon peuas titenojnotsas”. Kinteneujtias nochi tlamachtiltin tlen nopanoltijtiaskej niman tla xnemij miyekej tlayekankej, noijki uelis kipanoltis seki tlamachtiltin ijkon ken kampa san notlalia se video. Xnoneki uejkauis tlen kijtos ijkuak tlamis se tlamachtijli. Grupo ika tlayekankej kintlapejpeniskej tlayekankej akin ueliskej kiyekanaskej yejuin tlanechikojli. Akin yokintlapejpenijkej uelis nopatlatiaskej nochi semanas. Tla noneki, akin kita ken nopanoltis tlanechikojli Nemilistli niman Tekitl kanaj miyekpa kiyekanas tlanechikojli xijkon ken oksekimej tlayekankej akin yokintlapejpenijkej. Miyekpa, tla se tlayekanketl kitlapejpeniaj kipanoltis “Tlamachtijli itech Biblia iuan tlanechikojli”, kanaj noijki uelis kiyekanas tlanechikojli Nemilistli niman Tekitl. San ika, akin kiyekana tlanechikojli noneki kuajli teyolchikauas niman kinpaleuis ika tlasojtlalistli akin kipanoltiskej tlamachtijli. Akin kiyekana tlanechikojli noijki noneki kitas ika matlami ijkuak noneki (xkimita párrafos 17 niman 19). Tla akin kiyekana tlanechikojli kineki, niman tla tlaueyi ipan plataforma, uelis onias okse micrófono kampa tokniuj uelis kinteneujtias akin kinpanoltiskej tlamachtiltin chika tokniuan yauej ipan plataforma. Noijki, akin kiyekana tlanechikojli uelis kitekitiltis se mesa niman se silla para notlalis ijkuak panotok tlen nopoua ipan Biblia niman tlamachtiltin tlen nopanoltiaj ipan “Xmomachti melak kuajli xtenojnotsa”. Yejuin kipaleuis maka mauejkaui.

AKIN KINPALEUIYA TOKNIUAN

25. Kuajli tla yejuin tekitl kichiua se tlayekanketl akin kuajli tlamachtia. Tla noneki, yejua kinpaleuis tlayekankej niman tlapaleuijkej akin kipanoltiaj tlamachtijli ipan tlanechikojli Nemilistli niman Tekitl, akin technojnotsaj tlen kisa itech Biblia, akin kiyekana Amatl Tekakistilijketl noso akin kiyekana “Tlamachtijli itech Biblia iuan tlanechikojli” noso akin kinamapoua párrafos (xkita párrafo 19). Tla ipan tlanechikojli nemij miyekej tlayekankej akin kuajli tlamachtiaj, sejse xiuitl uelis nopatlatias akin kinpaleuiya tokniuan. Xnoneki kinpaleuiskej nochipa ijkuak tlamij intlamachtil.

TLAMACHTILTIN TLEN NOPANOLTIAJ IPAN SALA B

26. Tla nemij miyekej nomachtijkej, uelis kinpanoltiskej ipan Sala B okseki tlamachtiltin tlen nopanoltiaj ipan “Xmomachti melak kuajli xtenojnotsa”. Ompa noijki noneki nemis se tokniuj akin kinpaleuiya tokniuan, tla ueli, yejon tekitl makichiua se tlayekanketl, tla xnemij, uelis kichiuas se tlapaleuijketl akin kuajli tlamachtia. Grupo ika tlayekankej kitlapejpeniskej akinon kichiuas yejuin tekitl niman tla uelis nopatlatiaskej. Tokniuj akin kinpaleuiya tokniuan noneki kichiuas ken kijtoua párrafo 18. Akin panoskej kintlajtlaniliskej mauiyan Sala B ijkuak yonopanolti “Tlen tepaleui niman iyantika”. Tla yotlan “Xmomachti melak kuajli xtenojnotsa”, tokniuan uajkisaskej ipan Sala B.

VIDEOS

27. Ipan tlanechikojli tlen nopanoltia itlajkotian semana nopanoltiskej seki videos niman yejuin uelis tikinnextis ipan aplicación JW Library®.

S-38-NHG 11/23