Ijkuak noilnamiki imikilis Jesús, ¿melak tiknekis tikchiuas kuajli tekitl ken Jehová niman Jesús?
1. ¿Kenon nochikauaj iteixpantijkauan Jehová ijkuak noilnamiki imikilis Cristo?
1 Jehová chikauak tekiti niman ijkon manochiua tlen kineki. Itech seki tlateochiualistin itech iTekiuajyo toTajtsin, Isaías 9:7 kijtoua: “Chikauak itekiyo [noso tlen melak kineki] Jehová, akin kinyekana akin tlaixnamikij, kichiuas yejuin”. Noijki ijkon okichiuj iKoneuj toTajtsin ijkuak okitekichiuili ipan tlaltikpaktli (Juan 2:13-17; 4:34). Ipan nochi xiuitl ijkuak noilnamikis imikilis Cristo, melak miyekej tenojnotskej ipan nochi tlaltikpaktli nochikauaj kichiuaj ken Jehová niman Jesús pampa melak chikauak tenojnotsaj. ¿Noijki ijkon tikchiuas?
2. ¿Tlenon melak tiknekiskej tikchiuaskej ipan tonajli 7 metstli marzo ika tlayekapan?
2 Ueyi tekitl ijkuak noteijlia makilnamikikan imikilis Cristo. Ipan sábado 7 metstli marzo peuas tikteijliskej kemanon noilnamikis imikilis Cristo. Kuajli tla peua tikitaj kenon titlapaleuiskej chikauak itech yejuin ueyi tekitl. Tlanechikoltin ika pakilistli kinekiskej kinnojnotsaskej nochimej kampa tenojnotsaj. Kuajli matoyektlalikan niman ijkon tikinmakaskej se amatl noso tikimititiskej ipan jw.org akin tikinmachtiaj itech Biblia, akin iuan titekitij, akin ken tikimitaj, akin oksejpa tikomintlajpalouaj kampa titenojnotsaj niman akin iuan tomachtiaj.
3. ¿Kenon uelis chikauak titenojnotsaskej ipan marzo niman abril?
3 Precursor auxiliar. Melak tiknekiskej tikchiuaskej totekiyo techyolchikauas chikauak matitenojnotsakan. Tikmatstokej ika timiyekej uelis tochiuaskej precursores auxiliares ipan marzo niman abril, pampa uelis tiktlapejpeniskej titenojnotsaskej 30 horas. Ijkuak tikueyichiuaskej toTajtsin ken familia, noso ijkuak tomachtiaj toselti, uelis tikchiuaskej teoyotl niman ijkon tikitaskej kenon tikchiuaskej yejuin (Prov. 15:22). Tla chikauak titekitij, uelis kichiuas ika oksekimej noijki ijkon makichiuakan. Tla tikyektlaliaj tlen kachtopa noneki tikchiuaskej, chikauak titekitiskej ijkon ken Jesús (Mar. 6:31-34).
4. ¿Tlenon tlateochiualistli tikseliskej tla tikixkopinaj Jehová niman Jesús?
4 Tikixkopinaskej Jehová niman Jesús itech ken tikchiuaj totekiyo ijkuak noilnamiki imikilis Jesucristo, kuajkuis tlateochiualistli. Melak miyekej tikinnojnotsaskej kampa titenojnotsaj. Kuajli tomachiliskej pampa tiktekichiuiliskej Jehová pampa tikinpaleuiskej oksekimej (Hech. 20:35). Melak chikauak titekitiskej kiyolpaktis toTajtsin niman iKoneuj, niman yejon melak ueyi kijtosneki.