Iamatlajkuilol Grupo akin Tlayekana ipan nochi tlanechikoltin

Totlasojkaikniuan:

“Nochipa tikmakaj tlaxtlauijli Dios para nochimej nemejuamej, niman nochipa temechelnamikij ikan tooración. Temechelnamikij ixpan Dios toTajtsin ken ijki ipampa nemotlaneltok nenkichiuaj miyek tekitl, niman ken ijki ipampa nemotetlajsojtlalis nenkitekipanouaj, niman ken ijki ipampa nemotlamachalis itech toTeko Jesucristo nenmelajkanemij.” (1 Tes. 1:​2, 3.) ¡Melak kualtsin kijtouaj yejuin tlajtoltin tlen tikmachiliaj nemopampa! Tiktlasojkamachiliaj Jehová nemopampa niman pampa melak kuajli tekitl nenkichiuaj.

Ipan xiuitl tlen yopanok, ueyi tekitl yonenkichiujkej “ipampa nemotlaneltok” niman “ipampa nemotetlajsojtlalis” ika onentlapaleuijkej itech iTekiuajyo toTajtsin. Miyekej nemejuamej nenkitejtemouaj kenon nenkiueyiliskej nemotekiyo. Matikinteneuakan yejuin, sekimej oyajkej kampa melak nonekiyaj tlajtolmoyaujkej, ipan país kampa chantij niman ipan okseki países. Oksekimej tenojnotsaj kampa tojlan nojuitilo. Niman oksekimej onochiujkej precursores auxiliares ijkuak onoilnamik imikilis Cristo, ipan metstli ijkuak techuajtlajpaloua tlayekanketl ipan circuito noso ipan ueyi tekitl tlen onochiuj ipan agosto, 2014. Melak techyolpaktia pampa chikauak nenkitekichiuiliaj Jehová itech nochi tlen ueli nenkichiuaj (Col. 3:​23, 24). Melak tiktlasojkamachiliaj toTajtsin ika “ipampa nemotlaneltok nenkichiuaj miyek tekitl”.

Noijki melak tiktlasojkamatij ika “ipampa nemotetlajsojtlalis” nentlapaleuiyaj manochijchiuakan kaltin tlen notekitiltiaj ipan ikalpan toTajtsin. Pampa ipan ikalpan Jehová nomiyekilijtiuej, melak noneki manochijchiuakan yejuin kaltin (Is. 60:​22). Ipan xiuitl tlen yopanok otajsikej 8,201,545 tenojnotskej, niman ipan nochi metstin kanaj 9,499,933 otikinmachtijkej itech Biblia. Ipampa yejuin, noneki tikinueyiliskej noso tikinyektlaliskej miyekej sucursales. Noijki kijtosneki ika noneki nochijchiuaskej okseki kaltin kampa tosentlaliaj. Niman, ipan miyek países nonekij kaltin kampa notlajtolkuepaj amatlajkuiloltin, kampa uelis chantiskej tlajtolkuepkej niman ijkon tlajtolkuepaskej ika tlajtojli tlen ompa tlajtouaj.

Ika yejon, uelis totlajtoltiskej, ¿kenon uelis titlapaleuiskej manochijchiuakan yejuin kaltin? Kanaj sekimej uelis tikteijliskej ika tiknekij titlapaleuiskej ipan yejuin tekitl. Niman maski tla tikmatstokej tikalchiuaj noso ka, tinochimej uelis tiyolpakiskej titlapaleuiskej “ika nochi tlemach tlen patioj tikpiya[j]” (Prov. 3:​9, 10). Ijkuak xnochijchiuaya tabernáculo, israelitas okuajkuikej melak miyek tlemach tlen notekitiltiskia niman hasta okimijlikej maka sa makuajkuikan (Éx. 36:​5-7). Tlen tiknextiaj ipan Biblia itech tlen okichiujkej yeuejkaui, techyolmapeua niman techpaleuiya ika noijki ijkon matikchiuakan. Totlasojkaikniuan, ika “ipampa nemotetlajsojtlalis” nentlapaleuiyaj ipan yejuin kuajli tekitl, kichiua ika noijki matiktlasojkamachilikan Jehová.

Okse tlen melak tiktlasojkaitaj ika tikitaj kenon tokniuan melak tlaxikojtokej. Se neskayotl, ipan 1950 hasta ipan yejuin tonajli, iteixpantijkauan Jehová akin telpokamej, ipan Corea del Sur kintsakuaj uejkaujtipan noso san achijtsin pampa xkinekij nokalaktiskej ipan política. Oksekimej tokniuan noijki yokixnamijkej yejuin niman yotlaxikojkej. ¡Pampa yotlaxikojkej melak kichikaua totlaneltokil!

Ipan Eritrea, yeyimej tokniuan kuikaj ipantsin veinte xiuitl ika tsauktokej. Noijki, ok xkipiya veinte xiuitl ika okintsaujkej tokniuan siuamej imiuan inkonetsitsinuan. Melak yotochikaujkej tiktejtemouaj ika makinkixtikan, san ika, hasta aman xtlaj ueli nochiua. Maski ijkon, tokniuan akin melak tikintlasojtlaj nochipa yolmelaujkanemij. Yoyolmelaujkanenkej maski kixnamikij itlaj tlen melak xkuajli. Tejuamej nochipa tikchiuaj teoyotl inpampa (Rom. 1:​8, 9).

Kanaj nemejuamej xmechtsakuaj ipampa tlen nenkineltokaj. San ika, nentlajyouiyaj pampa yonenueuentsintiakej, nenkualoj, mechtlauelitaj nemochanejkauan akin xnomachtiaj, niman nenkixnamiktokej miyek okseki tlatlatalistin tlen san nemejuamej nenkimatij. Maski ijkon, xnenkikajkauaj nenkitekichiuiliaj Jehová (Sant. 1:​12). Timechijliaj ika melak kuajli tlen yonenkichiujkej. Pampa melak yonentlaxikojkej, noijki kichiua ika matiktlasojkamachilikan Jehová.

Kema, kuajli tekitl tlen yonenkichiujkej, nemotetlasojtlalis niman pampa yonentlaxikojkej kichiua matiktlasojkamachilikan Jehová ika nochi toyojlo “pampa yejua yolkuajli” (Sal. 106:1). Melak timechtlasojtlaj niman tikchiuiliaj teoyotl Jehová ika mamechyolchikaua, mamechpaleui niman mamechteochiua niman ijkon nochipa xtekichiuilikan.

Nemokniuan,

Grupo akin Kinyekana iTeixpantijkauan Jehová