Matiuelikan itech akin kuajli youelkej tenojnotsaj
Melak tikintlasojkaitaj tenojnotskej akin kuajli youelkej tenojnotsaj. Sekimej melak youejkaujkej kitekichiuiliaj Jehová. Oksekimej kanaj kemach yopeujkej kuajli tenojnotsaj. Nochimej yejuin tlajtolmoyaujkej yokimatkej ika Jesucristo kiyekantika tlanechikojli ipan yejuin itlamiyan tonaltin niman tlapaleuiyaj manotenojnotsa niman manotemachti (Mat. 28:19, 20). Pampa youejkaujkej tenojnotsaj, yokiselijkej “ueyi poder yejuan [...] ualejtikaj itech Dios” tlen kinpaleuiya makixnamikikan tlemach tlen xkuajli niman tlatlatalismej (2 Cor. 4:7). Yejuamej melak kinyolpaktia kinmachtiskej oksekimej itech tlen youelkej niman tejuamej uelis melak techpaleuis tlen yejuamej kimatstokej (Sal. 71:18). ¿Kenon uelis techpaleuiskej?
Ijkuak titenojnotsaj. Tla tiknekij tiueliskej kuajli titenojnotsaskej, akin kemach tipeuaj noneki matiuelikan itech akin melak youelkej. Tiueliskej miyek ijkuak tikimitaskej kenon kuajli tenojnotsaj. (Xkita párrafo yeyi itech subtítulo “Ayude a los nuevos”, ipan tlamachtijli “Cómo mantener el entusiasmo en la predicación”, tlen onotlali ipan La Atalaya del 15 de febrero de 2015.) ¿Kenon yomitspaleui ijkuak titenojnotsa imiuan akin kuajli youelkej tenojnotsaj?
¿Tleka xtikijlia se mouan matenojnotsa? Tla se akin tenojnotsa kualo, uelis kemantika tikuikas kampa chanti akin tikmachtia itech Biblia niman ompa iuan tikmachtis. Ijkuak yotlan nemomachtiaj, xtlajtolti tenojnotsketl akin kuajli youel temachtia kenon okitak itech ken otitemachti niman xtlajtlanili mamitsijli tlen uelis mitspaleuis.
Imiuan xmosentlali. Xmochikaua xkimixmati yejuin tlajtolmoyaujkej. Xnotsa se mauiya mochan ijkuak tikueyichiua toTajtsin iuan mochanejkauan niman xtlajtolti itech yejua. Xmati kenon okixmat tlen melauak, kenon Jehová yokiteochiuj, kenon yonopatlak tlanechikojli ken ijkuak onochiuj iteixpantijkauj Jehová niman tlenon melak kuajli ipan yonochiuj pampa kitekichiuilia toTajtsin. Tla kualo noso youeuentsintiak, uelis tias ichan niman ompa tikpanoltis ijkuak tikueyichiua toTajtsin iuan mochanejkauan.
Maka xkintlajtlanili makichiuakan itlaj tlen xok ueli kichiuaj niman xkinmasikamati. Ijkon ken tejuamej, akin melak miyek xiujtin kipiyaj ika tenojnotsaj noijki kipiyaj miyek tlemach tlen ueli kuajli kichiuaj (Rom. 12:6-8). Pampa sekimej youeuentsintiakej, kanaj xok uelis miyek tlemach kichiuaskej touan, san ika, uelis melak techpaleuis tlen kimatstokej niman ika yomelaujkanenkej itech Jehová.