Kenon tajsiskej ipan inyojlo akin techkakij
1. ¿Tlenon okimachilijkej inomachtijkauan Jesús itech tlen okinmachti?
1 Jesús oajsik ipan inyojlo akin kikakiyaj, ika yejon, Biblia kiteneua ika se tonajli inomachtijkauan melak oyolpakej (Luc. 24:32). Noneki makisa ipan toyojlo tiktlakamatiskej toTajtsin, ika yejon, ¿kenon uelis tikinyoleuaskej akin tikinmachtiaj makinekikan kipatlaskej innemilis? (Rom. 6:17.)
2. ¿Kenon techpaleuiya ika kuajli tikinnotsaj niman ika tikinmasikamatij matajsikan ipan inyojlo tlaltikpakchanejkej?
2 Kuajli matikinnotsakan niman matikinmasikamatikan. Miyekej tlaltikpakchanejkej xnopatlaj ijkuak tikimijliaj tlenon kuajli niman tlenon xkuajli. Niman, maski tikinpouiliaj miyekej tlaxeloltin kampa kijtoua ika tlen kineltokaj xmelauak, uelis kichiuas ika maka makiselikan tlen tikimijliaj. Tla tiknekij tikinyoleuaskej, kachtopa noneki tikasikamatiskej tleka kineltokaj itlaj niman tleka ijkon kichiuaj ipan innemilis. Tla kuajli tiktlapejpeniaj tlen tikintlajtoltiskej niman kuajli tikinnotsaj, kichiuas matechijlikan tlen kinemiliaj (Prov. 20:5). San ijkuakon uelis tiktlapejpeniskej tlaxeloltin itech Biblia tlen maajsi ipan inyojlo. Ika yejon, melak noneki inpampa matajmanakan niman maka matosiaujkauakan (Prov. 25:15). Noneki xmatsto ika tlaltikpakchanejkej xsan noijki noskaltia itlaneltokil. Kanaj achijtsin uejkauis ika iespíritu santo Jehová makipatla ken tlanemiliaj niman ken kichiuaj ipan innemilis (Mar. 4:26-29).
3. ¿Kenon uelis tikinpaleuiskej akin tikinmachtiaj makiskaltikan kualneskayomej?
3 Matikinpaleuikan makiskaltikan kualneskayomej: Tla imiuan tomachtiaj tlaxeloltin tlen tlajtouaj itech kenon Jehová yolkuajli niman tetlasojtla, kinpaleuis makiskaltikan ikualneskayouan toTajtsin. Uelis tikinpouiliskej Salmos 139:1-4 niman Lucas 12:6, 7 niman ijkon kitaskej ika toTajtsin melak najmana topampa. Ijkuak se melak kitlasojkamati ika Jehová techmaka tlen xtechnamiki tikseliskej, itlasojtlalis niman ika san Jehová kineki kiueyichiuas melak noskaltia (Rom. 5:6-8; 1 Juan 4:19). Noijki, ijkuak kimatij ika Jehová kita tlen kichiuaj, kinekiskej kichiuaskej tlen kiyolpaktia niman tlen kiueyichiua toTajtsin (Sal. 78:40, 41; Prov. 23:15).
4. Ijkuak tikinmachtiskej tlaltikpakchanejkej, ¿kenon tikimititiaj ika tiktlakaitaj tlen yejuamej kitlapejpeniskej itech tlenon kinemiliskej?
4 Jehová xtexchiualtia matiktlakamatikan itlanauatiluan, yejua techititia ika tla tikintlakamatij techpaleuiya ipan tonemilis (Isa. 48:17, 18). Tejuamej tikchiuaj ken Jehová tla tikinkauiliaj akin tikinmachtiaj makitlapejpenikan san inselti tlenon kinemiliskej itech tlen nomachtijtokej. Ijkon tlen kipatlaskej ipan innemilis nochipa kinpaleuis (Rom. 12:2). Tla ijkon kichiuaj, mojmostla nonisiuiskej itech Jehová akin “kita tlenon onka ipan toyojlo” (Prov. 17:3).