¿Kenon tikimititiaj oksekimej ika tikintlasojtlaj?

Pampa tinochimej tiualeuaj itech kachtopa tlakatl, Adán, tinochimej tikniujtin. Maski tikmatstokej ika ikniujtin noneki notlasojtlaskej niman notlakaitaskej, aman xijkon panoua. San ika, yejon xkuelita toTajtsin.

¿TLENON KIJTOUA ITLAJTOL TOTAJTSIN ITECH TLASOJTLALISTLI?

“Xtlajsojtla san akinon ken tejua timotlajsojtla” (LEVÍTICO 19:18).

“Xkintlajsojtlakan on nemotlauelikniuan” (MATEO 5:44).

¿KENON TIKTEITITIAJ TLA TITETLASOJTLAJ?

Ipan 1 Corintios 13:4-7 toTajtsin techijlia tlenon kijtosneki ijkuak titetlasojtlas.

Akin tetlasojtla “tlajtlamach kimijyouilia oksekimej niman yolyemanki”.

Xnemili yejuin. ¿Kenon timomachilia ijkuak yakaj mitsijyouiya, yolkuajli niman xkualantiuetsi ijkuak timopopoloua?

Akin tetlasojtla “xnexikolej”.

Xnemili yejuin. ¿Kenon timomachilia ijkuak yakaj xtlaneltoka motech niman mitsnexikolita?

Akin tetlasojtla “xkitejtemoua on tlen kuajli san para yejua”.

Xnemili yejuin. ¿Kenon timomachilia ijkuak yakaj kitlakaita tlen tiknemilia niman xnochipa kichiua tlen yejua kineki?

Akin tetlasojtla “xsa konelnamiktikaj on tlen oksekimej itlaj xkuajli okichiuilijkej”.

Xnemili yejuin. ToTajtsin kinektika kintlapopoluis akin noyolkuepaj. “Xnochipa techajua, nion xuejkaui kualantikaj” (Salmo 103:9). Melak tiktlasojkamatij ijkuak techtlapopoluiya akin yotikyolkokojkej. Ika yejon, tejuamej noneki tiknektoskej tikintlapopoluiskej akin techyolkokouaj (Salmo 86:5).

Akin tetlasojtla “xpaki ika on tlen xkuajli kichiuaj oksekimej”.

Xnemili yejuin. Ijkuak topan nochiua tlen xkuajli, xtikuelitaj ika oksekimej mayolpakikan. Kuakon, xtiyolpakij ijkuak oksekimej tlajyouiyaj, maski yotechyolkokojkaj.

Tla tiknekij ika toTajtsin matechteochiua, noneki tikintlasojtlaskej nochimej maski tla iuejueyimej noso ka, maski san kanon maualeuakan noso san tlenon makineltokakan. Ijkuak tikinpaleuiyaj akin kinpoloua, tikteititiaj ika titetlasojtlaj.