Nochipa matoyekanakan ken Jehová yokijto

Jehová yejua akin kintlalia tlanauatiltin ken toyekanaskej. Se neskayotl, yejua okitlali namiktilistli, yejuin nochiua ika se tlakatl niman se siuatl niman xkeman noxelouaj (Mt 19:4-6, 9). Melak kitlauelita nochi auilnemilistli (1Co 6:9, 10). Niman techmaka tlajtolyekanalistin tlen techpaleuiyaj kuajli totlakentiskej niman toyektlaliskej, yejon kichiua ika tlaltikpakchanejkej matechitakan ika xijkon tikchiuaj ken yejuamej (Dt 22:5; 1Ti 2:9, 10).

Ipan yejuin tonaltin, miyekej xkinekij noyekanaskej ken Jehová tlanauatia (Ro 1:18-32). Kikauiliaj ika tlen yenkuik kisa makimijtlako itech ken notlakentiaj, noyektlaliaj niman tlen kichiuaj. Xnokauiliaj itlaj makimijlikan itech ken auilnemij niman kintejteneuaj akin xkichiuaj ken yejuamej (1Pe 4:3, 4).

Akin tiiteixpantijkauan nochipa toyekanaj ken Jehová yokijto (Ro 12:9). ¿Kenon tikchiuaj? Ijkuak tikteijliaj ika tlajtojli yemanki niman tlakaitalistli tlen toTajtsin kuelita niman ijkuak toyekanaj ken yejua tlanauatia. Se neskayotl, ijkuak tiktlapejpeniaj kenon totlakentiskej niman toyektlaliskej, matotlajtoltikan: “¿Niktlapejpenia nikchiuas ken Jehová kuelita noso ken tlaltikpakchanejkej? ¿Kiteititia itech ken ninesi ika niktekichiuilia toTajtsin?”. Noso ijkuak tiktlapejpeniaj tlen tikitaj, kuajli tiknemiliskej tla Jehová kiyolpaktis, tla techpaleuiya matoyekanakan ken yejua yokijto niman tla yejon uelis kichikauas notlaneltokil (Sl 101:3). ¿Kenon uelis kimijtlakos tochanejkauan niman oksekimej? (1Co 10:31-33).

¿Tleka melak noneki nochipa matoyekanakan ken Jehová yokijto? Pampa sa achijtsin poliui ika Jesucristo kinpopolos uejueyimej kalpamej niman nochi tlen xkuajli niman san makisaskej akin kichiuaj tlen toTajtsin kineki (Eze 9:4-7; 1Jn 2:15-17). Ika yejon, matokojtilikan nochipa toyekanaskej ken Jehová yokijto niman ijkuak oksekimej kitaskej tlen kuajli tikchiuaj, kiueyichiuaskej toTajtsin (1Pe 2:11, 12).

XKITAKAN VIDEO XMOUIKA IUAN JEHOVÁ: SE TLAKATL NIMAN SE SIUATL, SAKIN XKINNANKILIKAN YEJUIN TLAJTOLTILISTIN:

• ¿Tleka noneki matoyekanakan ken Jehová tlanauatia?

• ¿Tleka tajtin noneki kinmachtiskej inkoneuan maski ok pipitikej manoyekanakan ken Jehová tlanauatia?

• ¿Kenon telpokamej niman akin iuejueyimej uelis kinpaleuiskej tlaltikpakchanejkej manopaleuikan itech iteiknelilis toTajtsin?