TLAJTOUA ITECH INEMILIS
“Aman melak nikuelita nitenojnotsas”
NEJUA oninoskalti ne Balcluta, tlen nokaua isla Sur (Nueva Zelanda). Ijkuak nipitentsin katka, melak niktlasojtlaya Jehová niman nikuelitaya niktekichiuilis. Noijki, nikuelitaya nias tlanechikojli pampa ompa kuajli ninomachiliaya. Maski xmás nitlajtlajto katka, nikuelitaya nontenojnotsas nochi semanas. Xouijtika nikitaya nikinnojnotsas akin imiuan ninomachtiaya. Pampa melak nikuelitaya ninemis ipan ikalpan toTajtsin, ijkuak nikpiaya 11 xiuitl oninosentemakak itech Jehová.
XOK NIYOLPAKI
Ijkuak onichpochtiak, xok más oniktlasojtlak Jehová. Nikitaya ika akin imiuan niaya ipan escuela kichiuayaj tlen yejuamej kinekiyaj, niman nejua noijki niknekiya ijkon nikchiuas. Ouijtika nikitaya nikintlakamatis notajuan niman tlen kijtoua Biblia. Niman noijki xok más nikuelitaya niktekichiuilis Jehová. Maski kuajli nikmatstoya ika Jehová kema nemi, opeuj nikmachilia ika xok kuajli iuan ninouikaya.
San achijtsin nitenojnotsaya para oksekimej makitakan ika ok nitenojnotsa. Ijkuak nontenojnotsaya, ouijtika nikitaya nitlajtlajtos imiuan oksekimej pampa xninomachtiaya. Ika yejon, xniknextiaya akin nikmachtis niman xniyolpakiya ijkuak nitenojnotsaya. Hasta ninotlajtoltiaya: “¿Kenon oksekimej kuelitaj kichiuaskej yejuin nochi semanas niman nochi metstin?”.
Ijkuak nikpiaya 17 xiuitl, melak niknekiya san noselti nichantis. Niman ijkon onikchiuj, san noselti onichantito Australia. Notajuan onoyolkokojkej, san ika, yejuamej kimatstoyaj ika ok niktekichiuilijtoskia Jehová.
Ne Australia xok más niktekichiuiliaya Jehová. Xok niaya ipan nochi tlanechikoltin niman opeuj ninosentlalia imiuan sekimej telpokamej niman ichpokamej akin yayaj tlanechikoltin niman uajmostla ontlauaniyaj niman onnijtotiayaj. Aman nikasikamati ika nikchiuaya ken akin kitekichiuiliayaj Jehová niman noijki ken akin xkitekichiuiliayaj. San ika, xkanaj niyolpakiya.
ITLAJ NECHASIKAMACHILTIAJ
Opanok ome xiuitl, niman onikixmat se tokniuj, akin maski xokimat, onechpaleui manitlanemili itech tlen nikchiujtoya. Nichantiya imiuan makuijli ichpokamej. Ijkuak tlayekanketl ipan circuito otechtlajpaloto, otikijlikej ika yejua niman isiuatsin touan manokauakan se semana. Ijkuak tokniuj tlayekanketl ipan circuito kichiujtoya seki tekitl ipan tlanechikojli, isiuatsin, Tamara, touan nokauaya. Niman san sekan titlajtlajtouayaj niman melak tiuetskayaj. Yejon melak onikuelitak, pampa xniknemiliaya ika yakaj akin chikauak kipiya itlaneltokil, noijki noyolpaktia, tenotski niman yolyemanki.
Tamara melak kitlasojtlaya toTajtsin niman melak yolpakiya ijkuak tenojnotsaya. Yejua noijki yolpakiya pampa kimakaya Jehová nochi tlen kipiaya. Niman nejua xniyolpakiya pampa xnikmakaya Jehová nochi tlen kinamikiya. Nejua noijki niknekiya niyolpakis ijkon ken Tamara. Tlen yejua kichiuaya onechilnamikti tlen kijtoua Salmo 100:2, ompa kijtoua ika Jehová kineki matiktekichiuilikan “ikan paktli”.
OKSEJPA OPEUJ NIKUELITA NITENOJNOTSAS
Tla niknekiya niyolpakis ijkon ken Tamara, nonekiya miyek nikpatlas. Yolik oninopatlatiaj. Opeuj ninomachtia tlen nikteijlis kampa nontenojnotsas niman kemantika ninochiujtiaya precursora auxiliar. Yejon onechpaleui maniyolchikaui niman maka melak maninomojti. Melak niyolpakiya pampa aman más nijkuiya Biblia. Niman sakin onikijto ika ninochiuas precursora auxiliar nochi metstin.
Opeuj ninouika imiuan akin kipiyaj chikauak intlaneltokil niman kuelitayaj kitekichiuiliskej Jehová. Tlen kichiuayaj onechpaleui manikita tlenon kachtopa nonekiya nikchiuas. Niman noijki onikitak ika nonekiya kuajli ninomachtis Biblia. Opeuj más nikuelita nitenojnotsas. Niman sakin oninochiuj precursora regular. Oksejpa opeuj niyolpaki ipan tlanechikojli.
NIKNEXTIA AKIN NOCHIPA IUAN NITENOJNOTSAS
San opanok se xiuitl niman onikixmat Alex, yejua kitlasojtlaya Jehová niman kuajli kitekichiuiliaya. Alex tlapaleuijketl katka ipan tlanechikojli niman youejkaujka 6 xiuitl ken precursor. Yejua noijki tlapaleuijtoya Malaui, kampa nonekiyaj oksekimej tenojnotskej. Ompa okimixmat sekimej misioneros akin okipaleuijkej más kuajli makitekichiuili toTajtsin.
Ipan 2003, oninonamikti iuan Alex niman hasta aman kuajli tiktekichiuilijtokej toTajtsin. Yotiuelkej miyek tlen yotechpaleui, niman Jehová melak yotechteochiuj.
TOTAJTSIN MELAK TECHTEOCHIUA
Titenojnotstokej Gleno (Timor Oriental).
Ipan 2009 otechontitlankej ken misioneros ne Timor Oriental, yejuin país onka nisiuj Indonesia. Ijkuak otechijlikej melak otiyolpajkej, san ika, noijki melak otomojtikej. Opanok makuijli metstli niman otajsikej Dili, icapital Timor Oriental.
Ononek tikimixmatiskej akin ompa chantiyaj, tlen tlajtojli tlajtouaj, tlenon kikuaj niman kenon chantij. Ijkuak tontenojnotsayaj, tikinnextiayaj akin xtlaj kinopiliayaj, akin xmás onomachtijkej niman akin tlajyouiayaj. Noijki otikimixmatkej miyekej akin yotlajyouijkaj ipampa guerra tlen opanok.a
Melak tikuelitayaj ken ompa titenojnotsayaj. Se tonajli oniknextito María, akin kipiaya 13 xiuitl.b Yejua melak najmantoya. Yejua ijkon nomachiliaya pampa kemach omijka inan niman xmás kitaya itaj. Ijkon ken miyekej kokonej, María xkimatiya tlenon kichiuas. Sejpa onechijli kenon nomachiliaya niman hasta ochokak. San ika, nejua xnikasikamatiya tlen nechijliaya pampa xkuajli nikasikamatiya itlajtol. Kuakon, onikchiuili se teoyotl Jehová niman oniktlajtlanili manechpaleui manikyolchikaua. Sakin onikyolseui ika seki itlaxeloluan Biblia. Opanokej seki xiujtin niman María opeuj melak nopatla. Onoapolakti niman aman noijki kinmachtia oksekimej. Aman melak yolpaki ipan ikalpan toTajtsin.
Kuajli tikitaj ika Jehová kinteochiujtika tokniuan ne Timor Oriental. Maski miyekej kemach kipiyaj 10 xiuitl ika onoapolaktijkej, sekimej yonochiujkej precursores, tlapaleuijkej ipan tlanechikojli niman tlayekankej. Niman oksekimej tlapaleuiyaj kampa notlajtolkuepaj toamatlajkuiloluan. Nechyolpaktiaya ijkuak nikinkakiya kenon nokuikatiayaj ipan tlanechikoltin, ijkuak nikimitaya kenon yolpakiyaj niman kenon kitekichiuiliayaj toTajtsin.
Iuan Alex, ijkuak tikominxeloskej invitaciones para conmemoración.
XONIKNEMILI IKA IJKON NIYOLPAKISKIA
Ne Timor Oriental xijkon ken nikan Australia. Maski ijkon, ompa melak otiyolpajkej. Kemantika tiayaj ipan se pitentsin autobús kampa yayaj miyekej akin yokonkouatoj michin tlen uaki niman noijki verduras. Kemantika titemachtiayaj ipan kaltsitsintin niman kampa melak miyekej kuanakamej nemiyaj. Ompa melak tona katka. Maski ijkon, miyekpa oniknemili: “¡Melak nikuelita nikan ninemis!”.
Tiajtokej kampa tontenojnotsaskej.
Melak nikintlasojkamachilia notajuan pampa onechmachtijkej itech Jehová niman pampa onechpaleuijkej ijkuak nichpochtli katka. Kuajli nikita ika nopan yonochiuj tlen kijtoua Proverbios 22:6. Nonan niman notaj melak yolpakij pampa nejua niman Alex tiktekichiuilijtokej Jehová. Desde 2016 tikintlajpalojtinemij tlanechikoltin tlen kinyekana isucursal Australasia.
Tikimititijtokej se video de Caleb niman Sofía sekimej kokonej akin chantij Timor Oriental.
Xueli nikneltoka ika yeuejkaui xnikuelitaya nitenojnotsas. Pampa aman melak nikuelita nitenojnotsas. Kuajli yonikitak ika san uelis tiyolpakis tla ika moyojlo tiktekichiuilia Jehová, maski san tlenon tikixnamikis. Nejua iuan Alex yotiuejkaujkej 18 xiuitl tiktekichiuilijtokej Jehová niman melak yotiyolpajkej. Aman nikita ika melauak tlen David okijli Jehová ipan Salmo 5:11: “Ma pakikan on yejuan kitlaliaj inyojlo motech. Ma nokuikatikan ikan paktli nochipa [...]. On yejuan mitstlajsotlaj melauak pakij san mopampa”.
Melak tiyolpakij tikinmachtiskej akin yolyemankej.
a Desde 1975, Timor Oriental okipix se guerra tlen ouejkauj ipantsin 20 xiuitl pampa kinekiyaj noxeloskej itech gobierno.
b Itoka yonopatlak.