Xsajnoye tomojtiskej tla tikneltokaj ika Jehová techtlasojtla

1. ¿Tlenon ueliskia techmojtis?

MATIKITAKAN tlen inpan onochiuj sekimej tokniuan. Néstor niman isiuauj, María, kinekiyaj ontlapaleuiskej kampa xmiyekej nemiyaj akin tenojnotsayaj.b San ika, para kichiuaskej yejon nonekiya xmás miyek tomintsin kipopoloskej. Niman yejon kinmojtiaya pampa kinemiliayaj ika tla xmás itlaj kinopiliayaj, xika inyojlo nemiskiaj. Aman matikteneuakan tokniuj Biniam, yejua chanti kampa xkinkauiliaj tokniuan matenojnotsakan. Ijkuak yejua onochiuj iteixpantijkauj Jehová okitak ika noijki kitlauelitaskiaj niman yejon kimojtiaya. San ika, más kimojtiaya tlen ueliskia kijliskej ichanejkauan pampa yokipatlaka ireligión. Aman matikitakan tlen ipan onochiuj Valeria, yejua okijlikej ika kipiaya cáncer tlen ueliskia kimiktis. Yejua xkinekiya makitlalilikan yestli ijkuak kipajtiskiaj pampa kinekiya kitlakamatis tlen kijtoua Biblia. Ika yejon, melak ouejkauj okitejtemo se tlapajtijketl akin makitlakaita tlen yejua kinekiya. Yejua xkinekiya mikis, san ika, yejon melak kimojtiaya.

2. ¿Tlenon ueliskia panos tla sajnoye tomojtiaj?

² ¿Kemantika yotimomachilijka ijkon ken tokniuan akin yotikinteneujkej? Miyekej kema ijkon yonomachilijkaj. San ika, tla sajnoye tomojtiaj, ueliskia tikchiuaskej itlaj tlen Jehová xkuelita niman xok kuajli iuan touikaskiaj. Niman yejon tlen kineki Satanás. Noijki, Satanás xkineki matiktlakamatikan Jehová. Niman ijkuak kita ika tomojtiaj titenojnotsaskej, yejua melak kuelita. Maski Satanás sajnoye xkuajli niman sajnoye kojtik, uelis tikixnamikiskej. ¿Kenon?

3. ¿Tlenon noneki kuajli tikmatstoskej tla xtiknekij sajnoye tomojtiskej?

³ Tla kuajli tikmatstokej ika Jehová techtlasojtla niman ika techpaleuis, Satanás xuelis techmojtis (Sal. 118:6). Matitlajtokan itech akin okijkuilo Salmo 118. Yejua miyek tlen okixnamik. Ipan versículos 9 niman 10 kijtoua ika miyekej kitlauelitayaj niman sekimej itlauelikniuan melak uejueyixtoyaj. Sakin, ipan versículo 13 kijtoua ika miyekej kinekiyaj makichiua tlen xkuajli. Niman ipan versículo 18 kijtoua ika Jehová okimelajkatlali. Maski yejua okixnamik nochi yejuin, yejua okijto ipan se tlakuikajli: “Xninomojtia”. ¿Tleka xnomojtiaya? Pampa kimatstoya ika maski iueyiTajtsin okimelajkatlali, yejua melak kitlasojtlaya. Yejuin salmista kuajli kimatstoya ika maski san tlenon panoskia, iueyiTajtsin Jehová nochipa kipaleuiskia (Sal. 118:29).

4. ¿Tlenon xtechmojtis tla tikneltokaj ika Jehová techtlasojtla?

⁴ Tla xtiknekij sajnoye tomojtiskej, noneki kuajli tikneltokaskej ika Jehová melak techtlasojtla. ¿Tlenon ueliskia techmojtis? Kachtopa, ueliskia techmojtis tla xtiuelij tikinmakaj tochanejkauan tlen kinpoloua. Ika ome, ueliskia techmojtis tlen texchiuiliskej oksekimej. Niman ika yeyi, ueliskia techmojtis timikiskej. Tokniuan akin otikinteneujkej ipan kachtopa párrafo xsajnoye onomojtikej pampa kuajli kimatstoyaj ika Jehová kintlasojtla.

UELISKIA TECHMOJTIS TLA XTIUELIJ TIKINMAKAJ TOCHANEJKAUAN TLEN KINPOLOUA

5. ¿Tlenon ueliskia kinmajmanas akin kinyekanaj inchanejkauan? (Xkita tlaixkopinajli tlen onka ixpan yejuin revista).

⁵ Tokniuan akin kinyekanaj inchanejkauan kimatstokej ika melak noneki kinmakaskej inchanejkauan tlen kinpoloua (1 Tim. 5:8). Tla tejua tikinyekana mochanejkauan, kanaj aman ika opanok ueyi kokolistli COVID-19 mitsajmanaya tla xok ueliskia titekitis. Kanaj opeuj tiknemilia kenon tikinmakas mochanejkauan tlen kinpoloua, kenon tiktlaxtlauas renta noso kenon tiktlaxtlauas mokal. Niman kanaj otiknemili ika tla mitskixtiaj kampa titekiti, xok ueliskia tiknextis okse tekitl. Noso, ijkon ken Néstor niman María, akin yotikinteneujkaj, kanaj otiknemili ika xueliskia tinemis san ika achijtsin. Satanás melak kuelita ijkuak miyekej nomojtiaj ika yejuin, pampa uelis kichiuas maka sa makitekichiuilikan Jehová.

6. ¿Tlenon kineki Satanás matiknemilikan?

⁶ Satanás kineki matiknemilikan ika Jehová xnajmana topampa. Niman ika yejua xtechpaleuis tla kemantika xtiuelij tikinmakaj tochanejkauan tlen kinpoloua. Tla peua titlanemiliaj ijkon ken Satanás kineki, uelis tiknemiliskej ika melak noneki titekitiskej maski maka matikchiuakan seki tlen Biblia kijtoua.

7. ¿Tlenon techijlia Jesús?

⁷ San Jesús melak kuajli kixmatstok iTajtsin. Yejua ika, techijlia: “NemoTajtsin ye kimatstikaj tlinon nemejuamej mechpoloua ijkuak xe nenkitlajtlanilia” (Mat. 6:8). Niman Jesús noijki kimatstok ika Jehová kinektika techmakas tlen techpoloua. Matikilnamikikan ika tejuamej tiikoneuan toTajtsin. Niman pampa yejua toTaj, uelis kuajli tikmatstoskej ika yejua kichiuas tlen kintlajtlanilia tatajtin ipan 1 Timoteo 5:8.

8. a) ¿Tlenon techpaleuis tla tiknemiliaj ika xtiueliskej tikinmakaskej tochanejkauan tlen kinpoloua? (Mateo 6:31-33). b) ¿Kenon uelis tikchiuaskej ijkon ken tokniuan akin uajnesij ipan tlaixkopinajli?

⁸ Tla tikneltokaj ika Jehová techtlasojtla niman ika kintlasojtla tochanejkauan, kuajli tikmatstoskej ika yejua techmakas tlen ika topanoltiskej (xpoua Mateo 6:31-33). Jehová techtlasojtla niman kinektok techteochiuas niman techmaka tlen techpoloua. Ijkuak Jehová okichijchiuj tlaltikpaktli xsan okitlali tlen nonekiya. Yejua noijki okitlali tlen kualtsin pampa kinekiya ika toyojlo matinemikan (Gén. 2:9). Niman tla xmás itlaj topiliaj, san ika, xtechpoloua tlen tikuaskej, matiktlasojkamachilikan Jehová pampa mojmostla techmaka tlen tikuaskej (Mat. 6:11). Sa achijtsin poliui ijkuak Jehová techteochiuas niman ijkuak kichiuas melak matipakikan. Kuakon, tla aman xmiyek tikpiyaj tlen ika tipakiskej, maka sajnoye matajmanakan. Yejon techmachtia tlen ipan onochiuj Néstor niman María (Is. 65:21, 22).

9. ¿Tlenon mitsmachtia tlen okichiujkej tokniuan Néstor niman María?

⁹ Néstor niman María, akin chantij Colombia, melak kuajli nemiyaj inchan. Yejuamej kijtouaj: “Xok tiknekiyaj miyek tikpopoloskej totomintsin pampa tiknekiyaj más titenojnotsaskej. San ika, techmojtiaya tikchiuaskej yejon pampa tiknemiliayaj ika xok ika toyojlo tinemiskiaj”. ¿Tlenon okichiujkej para xok nomojtiskej? Okilnamijkej kenon Jehová yokimititijka ika kintlasojtla. Pampa kimatstoyaj ika Jehová nochipa kintlajpiyaskia, xok otekitkej kampa miyek kintlaxtlauiliayaj, okinemakakej inkal niman oyajkej kampa xmiyekej nemiyaj akin tenojnotsayaj. ¿Aman kenon nomachiliaj? Néstor kijtoua: “Kuajli yotikitakej ika kema nochiua tlen kijtoua Mateo 6:33 pampa xkeman itlaj techpolouani. Niman aman tikmachiliaj ika más ika toyojlo tinemij”.

UELISKIA TECHMOJTIS TLEN TEXCHIUILISKEJ OKSEKIMEJ

10. ¿Tleka tomakasij?

¹⁰ Biblia kijtoua ika “sen tlakatl kipiya poder para ika nauiltia niman kichiuilia tlen xkuajli okse tlakatl” (Ecl. 8:9). Niman youejkauj ijkon uajnochiujtiuj. Sekimej akin uejueyixtokej kitechiuiliaj tlen xkuajli, sekimej teuisokij, teuijuikaltiaj niman sekimej kimijliaj akin imiuan nomachtiaj ika kinchiuiliskej tlen xkuajli noso sekimej hasta kintlajyouiltiaj inchanejkauan. ¡Ika yejon melak tomakasij! ¿Niman tlenon kichiua Satanás ijkuak kita ika tomojtiaj?

11, 12. ¿Tlenon kichiua Satanás ijkuak kita ika titemakasij?

¹¹ Satanás kineki matikinmakasikan tlaltikpakchanejkej niman ijkon maka sa matitenojnotsakan noso maka matiktlakamatikan tlen Jehová technauatia. Yejua yokichiuj ika seki gobiernos maka matechkauilikan matitenojnotsakan niman matosentlalikan niman yokichiuj matechtlaueltokakan (Luc. 21:12; Apoc. 2:10). Ipan yejuin tlaltikpaktli kampa Diablo tlanauatia, miyekej tlaltikpakchanejkej yokintlajtolchijchiuilijkej iteixpantijkauan Jehová. Akin kineltokaj tlen techijtouiliaj techtlauelitaj, techpijpinaujtiaj noso techtlajyouiltiaj (Mat. 10:36). San ika, maka matechmojkatlachialti yejuin pampa Satanás ijkon kinuajchiuilijtiuj tokniuan desde kachtopa siglo (Hech. 5:27, 28, 40).

¹² Niman Satanás xsan kichiua ika gobiernos matechtlauelitakan. Yejua noijki kichiua ika miyekej makinmojti tlen uelis kijtoskej inchanejkauan ijkuak kimatiskej ika yejuamej aman iteixpantijkauan Jehová. Miyekej más kinmojtia yejuin xijkon ken tla san kintlajyouiltiskiaj. Yejuamej melak kintlasojtlaj inchanejkauan niman kuelitaskiaj makixmatikan niman makitlasojtlakan Jehová. Kuakon, ijkuak inchanejkauan xkuajli tlajtouaj itech Jehová noso itech tokniuan, yejon melak kinyolkokoua. Kemantika tochanejkauan akin melak techtlauelitayaj peua nomachtiaj. San ika ¿tlenon uelis tikchiuaskej tla se tochanejkauj melak kualani niman xok kineki technotsas?

13. ¿Tleka noneki kuajli tikmatstoskej ika Jehová techtlasojtla ijkuak tochanejkauan techtlauelitaj? (Salmo 27:10).

¹³ ¡Melak kualtsin tlen kijtoua Salmo 27:10! (Xpoua). Tla nochipa tikilnamikij ika Jehová techtlasojtla, xtomojtiskej ijkuak techtlauelitaskej niman kuajli tikmatstoskej ika tla titlaxikouaj, Jehová techteochiuas. San Jehová uelis techyolseuis, techmakas tlen techpoloua niman kichikauas totlaneltok. Yejon tlen ipan onochiuj tokniuj Biniam, akin otikteneujkej ipan párrafo 1.

14. ¿Tlenon mitsmachtia tlen ipan onochiuj Biniam?

¹⁴ Biniam onochiuj iteixpantijkauj Jehová maski kimatstoya ika kitlaueltokaskiaj. Yejua kijtoua: “Gobierno melak onechtlaueltokak, san ika, más nechmojtiaya tlen kijtoskiaj nochanejkauan. Xniknekiya nikyolkokos notaj niman niknekiya ika nochanejkauan ok manechtlakaitakan”. ¿Tlenon okipaleui maka melak manomojti? Yejua xkeman okilkauj ika Jehová kitlasojtla niman ika Jehová kintlajpiya akin kitlasojtlaj. Biniam kijtoua: “Nejua opeuj niknemilia kenon Jehová okinpaleui tokniuan matlaxikokan ijkuak xmás kipiayaj tlen ika nopanoltiskiaj, ijkuak kinchikoitayaj niman ijkuak okintlajyouiltijkej. Nikmatstoya ika tla nochipa ninopaleuiaya itech Jehová, yejua nechteochiuaskia. Miyekpa onechtsajkej niman melak onechtlajyouiltijkej. Ijkuak melak nitlajyouijtoya kuajli onikitak ika ijkuak timelajkanemij, yejua melak techpaleuiya”. Biniam kita Jehová ken itaj niman tokniuan ken ichanejkauan.

UELISKIA TECHMOJTIS TIMIKISKEJ

15. ¿Tleka tikmakasij timikiskej?

¹⁵ Biblia kijtoua ika mikilistli totlauelikniuj (1 Cor. 15:25, 26). Maski san tiknemiliaj ika uelis timikiskej noso se akin melak tiktlasojtlaj uelis mikis, melak tomojtiaj niman tajmanaj. Niman yejon ueliskia más tiknemiliskej tla tikualoj noso tla yakaj akin tiktlasojtlaj kualo. ¿Tleka tomojtiaj ijkuak titlanemiliaj itech yejon? Pampa Jehová otexchijchiuj para nochipa matinemikan (Ecl. 3:11). San ika, tla tikmakasij timikiskej, uelis techpaleuis pampa ijkon kanaj kuajli totlakualtiskej, tikchiuaskej ejercicio, xtikchiuaskej itlaj tlen uelis kichiuas matimikikan, tiaskej kampa doctor niman tikoniskej noso tiktoloskej medicina ijkuak nonekis.

16. ¿Tlenon kichiua Satanás ijkuak kita ika tikmakasij timikiskej?

¹⁶ Satanás kimatstok ika melak tiktlasojkaitaj tonemilis. Ika yejon, kijtoua ika tiknektoskej san tlenon tikchiuaskej pampa xtiknekij timikiskej. Hasta uelis tijkajkauaskej ika touikaj iuan Jehová (Job 2:4, 5). ¡San ika xmelauak tlen kijtoua! Biblia kijtoua ika Satanás kipiya “poder para temiktis”, ika yejon, kuelita ijkuak tejuamej tikmakasij timikiskej para más techmojtis niman kichiuas matiktlalkauikan Jehová (Heb. 2:14, 15). Kemantika, Satanás kichiua ika sekimej matechijlikan ika tla xtikajkauaj ika tomachtiaj, techmiktiskej. Noijki, ijkuak tikualoskej uelis kichiuas ika tochanejkauan noso tlapajtikej matechijlikan ika noneki totlaliliskej yestli niman ijkon xtimikiskej. San ika, tikmatstokej ika tla ijkon tikchiuaskiaj titlajtlakojtoskiaj ixpan Jehová, niman yejon tlen kineki Satanás. Noso kanaj yakaj techijlis matopajtikan ijkon ken techijliaj tlapajtikej, maski xtiktlakamatstoskiaj toTajtsin.

17. Ken kijtoua Romanos 8:37-39, ¿tleka xnoneki tikmakasiskej timikiskej?

¹⁷ Xakaj kuelitaskia mikis, san ika, tikmatstokej ika tla timikij, Jehová ok techtlasojtlas (xpoua Romanos 8:37-39). Nochimej iamigos Jehová akin mikij, kentla xmikiskiaj pampa yejua kuajli kimilnamiki (Luc. 20:37, 38). Yejua sa kichiatika tonajli ijkuak oksejpa kinyolitis (Job 14:15). Jehová hasta yokitemakak isenteKonetsin para ijkon tejuamej nochipa matinemikan (Juan 3:16). Kuajli tikmatstokej ika yejua melak techtlasojtla niman techtlajpiya. Ika yejon, ijkuak tikualoj noso techmiktisnekij xtiktlalkauiyaj, yej más tiknisiuiyaj niman tiktlajtlaniliaj matechyolseui, matechmaka tlamachilistli niman matechpaleui matitlaxikokan. Niman yejon tlen okichiujkej Valeria niman iueuentsin (Sal. 41:3).

18. ¿Tlenon mitsmachtia tlen ipan onochiuj Valeria?

¹⁸ Ijkuak Valeria kipiaya 35 xiuitl okijlikej ika kipiaya cáncer niman yejon cáncer xmás noixmatiya niman melak xkuajli katka. Yejua melak kitlasojtla Jehová niman yejon okipaleui maka sajnoye makimakasi mikis. Valeria kijtoua: “Ijkuak onechijlikej ika nikpiya cáncer nochi nimantsin onopatlak. Tlapajtikej onechijlikej ika noneki nexchiuiliskej se ueyi operación. Oniktejtemo se tlapajtijketl akin makinekto nechpajtis niman xnechtlalilis yestli, san ika, xakaj kinekiya ijkon nechpajtis. ¡Nejua xnikseliskia yestli! Maski ninomojtiaya niknekiya niktlakamatis toTajtsin. Jehová nochipa yonechititijka ika melak nechtlasojtla..., niman aman nejua niknekiya nikititis ika noijki melak niktlasojtla. Ijkuak nechijliayaj itlaj tlen xkuajli, más ninokojtiliaya para niktlanis Satanás. Niknekiya ika Jehová mapaki ijkuak nechitaskia ika xnikchiujtoya tlen Satanás kineki. Maski xokikuikej yestli nochi kuajli okisato. Niman maski aman nejua ok san nikuajkualo, Jehová nochipa techmaka tlen techpoloua. Ijkon yonikitak pampa achto ika nechijliskiaj ika nikpiaya cáncer, otomachtijkej ipan tlanechikojli tlamachtijli tlen itoka, ‘Afrontemos con valentía los golpes de la vida’.c Melak otechpaleui yejon tlamachtijli niman miyekpa otomachtijkej. Noueuentsin niman nejua nochipa tikitayaj kenon tikchikauaskej totlaneltok niman yejon otechpaleui pampa tla xijkon tikchiuaskiaj, xueliskia titlaxikoskiaj niman xueliskia tiktlapejpeniskiaj tlen más kuajli”.

MAKA SAJNOYE MATOMOJTIKAN

19. ¿Tlenon kichiuas Jehová ika tlayekapan?

¹⁹ Ipan nochi tlaltikpaktli nemij tokniuan akin yokixnamijkej tlen ouijtika, san ika, yotlaxikojkej pampa Jehová okinpaleui maka makichiuakan tlen Satanás kinekiya (1 Ped. 5:8, 9). Niman tejua noijki uelis titlaxikos. Sa achijtsin poliui ijkuak Jehová kijlis Jesús niman akin iuan tekiuajtiskej makipopolokan nochi “tlen kichiua on diablo” (1 Juan 3:8). Sakin, tinochimej akin tiktekichiuiliskej Jehová nikan ipan tlaltikpaktli, tikitaskej kenon nochiuas tlen Jehová yotechijli: “Motlauelikniuan xok tikinmakajsis” (Is. 54:14; Miq. 4:4). San ika, aman ika xiyejko yejon tonajli, matokojtilikan maka sajnoye matomojtikan.

20. ¿Tlenon uelis tikchiuaskej tla xtiknekij sajnoye tomojtiskej?

²⁰ Noneki tikneltokaskej ika Jehová melak techtlasojtla niman ika yejua nochipa kinpaleuiya itekipanojkauan. Ika yejon, matitlanemilikan itech kenon Jehová melak yokinpaleui itekipanojkauan niman matikimijlikan oksekimej. Noijki, nochipa matikilnamiktokan kenon Jehová otechpaleui ijkuak otikixnamijkej itlaj tlen ouijtika. Jehová techpaleuis maka sajnoye matomojtikan (Sal. 34:4).