Matikpaleuikan Jesús akin techyekantika

1. ¿Tlenon kineki toTajtsin?

TOTAJTSIN kineki ika ipan nochi tlaltikpaktli manoteijli nochi tlen kichiuas iTekiuajyo (Mar. 13:10, TNM; 1 Tim. 2:3, 4). Niman yejua yokitlapejpeni iKoneuj para makiyekana yejuin tekitl. Ika yejon, kuajli matikmatstokan ika ijkuak Jehová tlapopolos, yejua melak yolpakis pampa kuajli onochiuj itekiyo (Mat. 24:14, TNM).

2. ¿Tlenon tikitaskej ipan yejuin tlamachtijli?

² Ipan yejuin tlamachtijli tikitaskej ika “tekitketl” yolmelauak niman tlamachilise kipaleuiya Jesús ijkuak techmaka tlen ika tikchikauaskej totlaneltokil niman ijkuak kita kenon uelis más chikauak titenojnotsaskej ipan nochi tlaltikpaktli (Mat. 24:45). Noijki, tikitaskej kenon uelis tikpaleuiskej Jesús niman “tekitketl” yolmelauak niman tlamachilise.

JESÚS TECHYEKANA IJKUAK TITENOJNOTSAJ

3. ¿Tlen tekitl okimakakej Jesús?

³ ¿Kenon tikmatij ika Jesús techyekana ijkuak titenojnotsaj? Achto yas iluikak, onosentlali imiuan sekimej inomachtijkauan ipan se tepetl ne Galilea niman okimijli: “Nejua yonechmakakej nochi tekiuajyotl para nitlamandaros ne iluikak niman nikan ipan in tlaltikpaktli”. Niman sakin okimijli: “Xuiyan niman xkinmachtikan tlaltikpakchanejkej ipan nochi kalpamej” (Mat. 28:18; Mat. 28:19, TNM). Ika yejon, tikijtouaj ika Jesús okitekitlalijkej para matechyekana ijkuak titenojnotsaskej.

4. ¿Tleka kuajli tikmatstokej ika Jesús techyekantika ijkuak titenojnotsaj?

⁴ Jesús okijto ika nochiuiyan titenojnotsaskiaj niman titemachtiskiaj. Niman xsan yejon, yejua noijki otechijli ika mojmostla touan nemis “hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (Mat. 28:20, TNM). Ika yejon, kuajli tikmatstokej ika yejua techyekantika ijkuak titenojnotsaj.

5. ¿Kenon titlapaleuiyaj manochiua Salmo 110:3?

⁵ Jesús kuajli kimatstoya ika ipan itlamiyan tonaltin nemiskiaj miyekej akin kipaleuiskiaj. Kuajli kimatstoya ika nochiuaskia on teotlajtojli tlen kijtoua: “On tlakamej notemakaskej ika nochi inyojlo ipan on tonajli ijkuak titetlanis” (Sal. 110:3). Tla tejua titenojnotsa, tikpaleuijtika Jesús niman “tekitketl” yolmelauak niman titlapaleuijtika manochiua yejuin teotlajtojli. San ika, ijkuak titenojnotsaj noijki tikixnamikij itlaj tlen ouijtika.

6. ¿Tlenon tikixnamikij ipan yejuin tonaltin?

⁶ ¿Tlenon tikixnamikij? Miyekej xkuelitaj ika titenojnotsaj. Ika yejon, akin kixnamikij ikalpan toTajtsin, akin tlayekanaj ipan tlaneltokiltin xmelajkej niman políticos kijtouaj ika xmelauak tlen titemachtiaj. Tla tochanejkauan, akin tikimixmatij noso akin imiuan titekitij kinneltokiliaj tlen kijtouaj, kanaj uelis texchiualtiskej matiktlalkauikan Jehová niman maka sa matitenojnotsakan. Ipan okseki países, totlauelikniuan kinmojtiaj tokniuan, kimixnamikij niman hasta kintsakuaj. San ika, nochi yejuin xtechmojkatlachialtia pampa Jesús okijto: “San nopampa nochi tlakatl mechtlauelitas” (Mat. 24:9). Niman pampa techtlauelitaj, kijtosneki ika tikchiujtokej ijkon ken Jesús niman tikyolpaktijtokej Jehová (Mat. 5:11, 12). Satanás yejua akin kichiua matechtlauelitakan, san ika, xuelis kitlanis Jesús. Niman pampa Jesús techpaleuijtika, nochiuiyan ititenojnotstokej.

7. ¿Tlenon mitsititia ika inochiujtika tlen kijtoua Apocalipsis 14:6, 7?

⁷ ¿Tlenon okseki tikixnamikij? Miyekej okse tlajtojli tlajtouaj. San ika, ipan se tlatlachalistli, Jesús okititi apóstol Juan ika titenojnotsaskiaj ika miyek tlajtoltin (xpoua Apocalipsis 14:6, 7). ¿Niman kenon nochiujtika tlen okitak apóstol Juan? Ipan jw.org tikinpiyaj amatlajkuiloltin ipantsin 1,000 tlajtoltin. Noijki, Grupo akin Tlayekana yokijto ika libro ¡Nochipa uelis tiyolpakis! manotlajtolkuepa ipantsin 700 tlajtoltin. Noijki, tikinpiyaj videos para akin xtlakakij niman amatlajkuiloltin ika braille para akin xtlachiaj. Ken tikitaj, más miyekej uelis kimatiskej tlen kichiuas iTekiuajyo toTajtsin ika tlayekapan. Teotlajtoltin inochiujtokej pampa miyekej “tlakamej itech nochi tlajtoltin tlen onka ipan países” inomachtijtokej tlen melauak itech toTajtsin (Zac. 8:23; Sof. 3:9, TNM). Nochi yejuin tekitl ueli nochiua pampa Jesucristo techyekantika.

8. ¿Kenon tepaleuiya pampa titenojnotsaj?

⁸ Aman ipan 240 países nemij ipantsin 8 millones itekipanojkauan Jehová. ¡Niman sejse xiuitl melak miyekej noapolaktiaj! San ika, xsan techyolpaktia ika melak yotimiyekiyakej, tejuamej más techyolpaktia ika yejuin yenkuikej tokniuan yopeujkej kichiuaj tlen Jehová kuelita. Biblia kijtoua ika yejuamej ikipiyaj “yenkuik nemilistli” (Col. 3:8-10). Yejuin tokniuan xok auilnemij, xok teuisokij niman xok techikoitaj. Inochiujtika tlen kijtoua Isaías 2:4, ompa kijtoua: “Xok kintlayejyekoltiskej para ueliskej tlauisokiskej”. ¿Kenon tepaleuiya pampa tikteititiaj ika tikpiyaj “yenkuik nemilistli”? Kichiua ika miyekej manonisiuikan ipan ikalpan toTajtsin niman tikteititiaj ika tejuamej yemelak tikchiuaj ken Cristo, akin techyekantika (Juan 13:35; 1 Ped. 2:12). Niman nochi yejon kiteititia ika Jesús techpaleuijtika.

JESÚS KITLAPEJPENIA SE TEKITKETL

9. Ken kijtoua Mateo 24:45-47, ¿tlenon okijto Jesús ika panoskia ipan itlamiyan tonaltin?

⁹ (Xpoua Mateo 24:45-47). Jesús okijto ika kitlaliskia se “tekitketl” yolmelauak niman tlamachilise akin techmakaskia tlen ika tikchikauaskiaj totlaneltokil ipan itlamiyan tonaltin. Niman aman kuajli tikitstokej ika yejuin “tekitketl” kuajli kichiua itekiyo. ¿Akinon yejuin “tekitketl”? Se grupo kampa nemij tokniuan tlapejpeniltin. Yejuamej techmakaj tlen ika tikchikauaskej totlaneltokil ijkuak noneki. Yejuin grupo xtexchiualtia matiktekichiuilikan Jehová pampa yejuamej kuajli kimatstokej ika san Jesucristo yejua “tlayekanketl niman temachtijketl” ipan ikalpan toTajtsin (2 Cor. 1:24; Is. 55:4).

10. ¿Katlejua libro tlen uajnesij ipan tlaixkopinaltin ika otikixmat Jehová?

¹⁰ Desde 1919, yejuin “tekitketl” kinuajkixtijtiuj miyek amatlajkuiloltin tlen kinpaleuiya miyekej tlaltikpakchanejkej manonisiuikan itech toTajtsin niman makichikauakan intlaneltok. Ipan 1921, okikixti ika inglés libro El Arpa de Dios tlen ika otemachti tlen melauak. Sakin okinkixtijtia okseki libros. ¿Tejua katlejua libro omitspaleui xkixmati niman xtlasojtla Jehová? Kanaj libro “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Tlenon melauak temachtia Biblia? noso ¿Qué nos enseña la Biblia? Noso kanaj timomachtijtika yenkuik amatlajkuilojli ¡Nochipa uelis tiyolpakis! Yejuin libros ika titemachtiaj niman otechinmakakej ijkuak nonekiya.

11. ¿Tleka melak noneki ika tinochimej matexchikauilikan totlaneltok?

¹¹ Tinochimej noneki tikchikauaskej totlaneltok, niman xsan akin kemach nomachtijtokej Biblia. Apóstol Pablo okijto: “On yetik tlakuajli para on yejuan yonoskaltijkej”. Noijki okijto ika tla tikchiuaj tlen tomachtijtiuej, techpaleuis matikmatikan “on tlen kuajli niman on tlen xkuajli” (Heb. 5:14). Pampa aman nochiua miyek tlen xkuajli, kanaj kemantika ouijtika tikitaj tiktlakamatiskej Jehová. San ika, Jesús techpaleuijtika pampa kichikaujtika totlaneltokil ika iTlajtoltsin toTajtsin, Biblia. Niman xsan yejon, yejua noijki kipaleuiya “tekitketl” yolmelauak makinchijchiua niman matechinmaka amatlajkuiloltin tlen ika tikchikauaskej totlaneltok.

12. ¿Kenon yotikteititijkej ika tiktlakaitaj itoka toTajtsin ijkon ken Jesús okichiuj?

¹² Ijkon ken Jesús, tejuamej noijki yotikteititijkej ika tiktlakaitaj itoka toTajtsin (Juan 17:6, 26). Ipan 1931 ototokayotijkej iteixpantijkauan Jehová. Ijkon otikteititijkej ika tikpatiojkaitaj itoka Jehová niman ika tiknekij ika nochimej makixmatikan (Is. 43:10-12). Niman ipan octubre de 1931 opeuj notlalia itoka toTajtsin ixpan Amatl Tekakistilijketl ika inglés. Noijki, ipan Traducción del Nuevo Mundo onotlali itoka toTajtsin nochiuiyan kampa nonekiya yas. Tejuamej xtikchiuaj ijkon ken okseki religiones akin kipopolouaj itoka Jehová ipan inBiblias.

JESÚS KINYEKANA INOMACHTIJKAUAN

13. ¿Kenon tikmatij ika Jesús kitekitiltijtika “tekitketl” yolmelauak niman tlamachilise? (Juan 6:68)

¹³ Jesús kuajli kiyekana ikalpan toTajtsin nikan ipan tlaltikpaktli itechkopa “tekitketl” yolmelauak niman tlamachilise. ¿Tlenon tiknemilia itech ikalpan toTajtsin? Kanaj timomachilia ken Pedro akin okijli Jesús: “NoTEKO, ¿akinon uelis tiaskej itech? San motlajtoltsin yejuan tikijtoua yejua kitemaka nemilistli yejuan para nochipa” (Juan 6:68). Itechkopa ikalpan toTajtsin, Cristo texchikauilia totlaneltok niman techititia kenon uelis más kuajli titemachtiskej. Noijki techpaleuiya matikpiyakan “yenkuik nemilistli” para tikyolpaktiskej Jehová (Efes. 4:24). San xkonnemili kenon tinemiskiaj tla xtikixmatiskiaj ikalpan Jehová.

14. ¿Kenon omitspaleui ikalpan Jehová ijkuak opeuj ueyi kokolistli COVID-19?

¹⁴ Jesús melak kuajli techyekana ijkuak tikixnamikij itlaj tlen ouijtika. ¿Tleka ijkon tikijtouaj? Ijkuak opeuj ueyi kokolistli COVID-19, miyekej tlaltikpakchanejkej xkimatiyaj tlenon kichiuaskej, san ika, Jesús okintekitilti tokniuan para matechijlikan kenon nonekiya totlajpiyaskej. Otechyolchikaujkej matotlalilikan cubrebocas kampa tojlan niman maka melak matitenisiuikan. Tlayekankej okimijlikej nochipa makinyolchikaujtokan tokniuan akin tenojnotsaj niman makintlajtoltikan tla itlaj kinpoloua (Is. 32:1, 2). Niman ipan videos Grupo akin Tlayekana kijtoua tlen panotika techijliaj tlenon noneki tikchiuaskej niman melak techyolchikauaj.

15. ¿Tlenon okseki otechnauatijkej ijkuak opeuj ueyi kokolistli COVID-19, niman kenon yotepaleui?

¹⁵ Ijkuak opeuj ueyi kokolistli COVID-19, noijki nimantsin otechijlikej kenon tikinpanoltiskiaj totlanechikoluan niman kenon titenojnotsaskiaj. Nimantsin opeuj tikinpanoltiaj totlanechikoluan niman toueyitlanechikoluan ika videoconferencia, niman noijki opeuj titenojnotsaj ika carta niman teléfono. Niman Jehová melak yotechteochiuj pampa miyek sucursales kijtouaj ika más yomiyekiyakej akin tenojnotsaj. Miyekej tokniuan yokitakej kenon Jehová yokinpaleui ijkuak tenojnotsaj. (Xkita recuadro “Jehová techpaleuiya ijkuak titenojnotsaj”).

16. ¿Tlenon uelis kuajli tikmatstoskej?

¹⁶ Kanaj sekimej tokniuan kinemiliaj ika ikalpan toTajtsin sajnoye notlajpiya, ika yejon, xtlaj techkauilia matikchiuakan. San ika, miyekpa yotikitakej ika nochi tlen technauatia melak techpaleuiya (Mat. 11:19). Jesús melak techtlasojtla niman melak kuajli techyekantika. Tla itech yejon titlanemiliaj, kuajli tikmatstoskej ika ijkuak tikixnamikiskej tlen ouijtika, Jehová niman iKonetsin techpaleuiskej (xpoua Hebreos 13:5, 6).

17. ¿Kenon timomachilia pampa tikpaleuijtika Jesús?

¹⁷ ¡Melak tiyolpakij pampa tikpaleuijtokej Jesús! Tinochimej totlasojtlaj maski oksekan tiualeuaj niman okse tlajtojli titlajtouaj. Tikpiyaj miyek tlen ika tikchikauaj totlaneltokil niman tlen techpaleuiya matitenojnotsakan. Niman tinochimej tokojtiliaj topatlatiaskej niman más titetlasojtlaskej. ¡Melak tiyolpakij pampa techyekantika Jesús!