Tlen notlajtoltiaj akin kitaj revistas
¿Tlenon okijtosnek Jesús ijkuak okijto: “Maka xnemilikan ika nejua onikuajkik yolseuilistli”?
Jesús otechijli maka matokualanikan imiuan oksekimej, san ika, sejpatsin okimijli iapóstoles: “Maka xnemilikan ika nejua onikuajkik yolseuilistli ipan tlaltikpaktli. Nejua tej, xonikuajkik yolseuilistli, yej onikuajkik nouijsokilistli. Oniuajlaj para noxexeloskej on tlakamej. Nopampa sen telpochtli kipiyas tlauejli iuan itataj, niman sen ichpochtli kipiyas tlauejli iuan inanaj, niman sen siuamontli kipiyas tlauejli iuan imonan” (Mat. 10:34, 35). ¿Tlenon okijtosnek Jesús?
Jesús xkinekiya kinxelos familias, san ika, kimatstoya ika sekimej xkuelitaskiaj tlen yejua temachtia. Akin kinekiskej yeskej inomachtijkauan niman kinekiskej noapolaktiskej, noneki kuajli kimatstoskej ika kanaj sekimej inchanejkauan xkuelitaskej tlen kichiuaskej. Tla yakaj akin nomachtia Biblia kitlaueltoka iueuentsin noso se ichanejkauj, kanaj ouijtika kitas kichiuas nochi tlen Jesús okijto.
Biblia kimijlia akin kichiuaj ken Cristo: “Xchiuakan kanika hasta kampa nenueliskej kenijki nennemiskej kuajlotika [noso ika yolseuilistli] iuan nochi tlakatl” (Rom. 12:18). Maski ijkon, Jesús okijto ika ijkuak yakaj peua nomachtia tlen melauak, kipiyas tlauejli. ¿Tleka? Pampa ijkuak yakaj peua nomachtia Biblia, sekimej inchanejkauan xkuelitaj niman peuaj kitlaueltokaj. Yejua noijki okijto ika ijkuak yakaj peuas nomachtis tlen melauak, “kipiyas itlauelikniu sano ifamilia” (Mat. 10:36).
Sekimej inomachtijkauan Cristo chantij imiuan akin kipiyaj okse religión. Yejuin ouijtika, ¿tleka? Pampa kemantika noneki kiteititiskej tla yemelak kitlasojtlaj Jehová niman Jesús. Kanaj kemantika kinchiualtiaj imiuan mailuipanokan. Ijkuak ijkon panoua, tokniuan noneki kitlapejpeniskej akinon kinekij kiyolpaktiskej. Jesús okijto: “On yejuan más kitlajsojtlas itataj noso inanaj xken nejua, xkitocaroua nouikas nouan” (Mat. 10:37). Nikan, Jesús xtechijlitoya ika tla tiknekij tochiuaskej inomachtijkauan, xok nonekiya tikintlasojtlaskej totajuan. Ka, yejua techijlitoya kenon ueliskia tikmatiskej akinon noneki más tikyolpaktiskej. Tejuamej kema tiktlasojtlaj tochanejkauj akin techtlaueltoka, san ika, noneki más tiktlasojtlaskej Jehová.
Tikmatstokej ika teyolkoko ijkuak tochanejkauan techtlaueltokaj. San ika, akin tikchiuaj ken Cristo noneki tikilnamikiskej ika Jesús okijto: “On yejuan xkinekis kiselis on tlajyouilistli ipan inemilis niman xkinekis nouan yas, xkitocaroua nouikas nouan” (Mat. 10:38). Kuakon, akin tikchiuaj ken Cristo tikmatstokej ika titlajyouiskej niman ika tochanejkauan techtlaueltokaskej. Tikchiaj ika akin techtlaueltokaj makitakan tlen kuajli tikchiuaj niman manopatlakan niman mapeuakan manomachtikan Biblia (1 Ped. 3:1, 2).