Yonijkauili Jehová manechyekana

OTITLAPALEUITOJ ÁFRICA

Oninemiko ipan 1935 ne Darlaston (Inglaterra). Kampa nichantiya onkatkaj miyek fábricas tlen melak tlapojkixtiayaj, ika yejon, ompa kixmatij ken “país negro”. Ijkuak nikpiaya kanaj naui xiuitl, notajuan opeuj nomachtiaj Biblia imiuan iteixpantijkauan Jehová. Ijkuak inikpiaya kanaj 14 noso 15 xiuitl, onikasikamat ika melauak katka tlen nomachtijtoyaj notajuan, niman oninoapolakti ijkuak nikpiaya 16 xiuitl, ipan 1952.

Ipan yejon xiuitl opeuj nitekiti kampa kinchijchiuaj tlen ika kiyektlaliaj carros. Ompa opeuj nechmajmachtiaj para niyes secretario, niman nejua melak nikuelitaya yejon tekitl.

Se tonajli, se tlayekanketl ipan circuito onechijli tla ueliskia nikyekanas Tlamachtijli itech Biblia iuan tlanechikojli kampa ninosentlaliaya, ne Willenhall. Xnikmatiya tlenon nikchiuas pampa nejua ojkan ninosentlaliaya. Itlajkotian semana ninosentlaliaya Bromsgrove pampa nisiuj nokauaya kampa nitekitiya. Niman itlamiyan semana ninosentlaliaya Willenhall pampa ninemiya ichan notajuan.

Pampa nejua niknekiya nitlapaleuis ipan ikalpan Jehová, onikchiuj tlen onechijli tlayekanketl ipan circuito. Maski melak nikuelitaya notekiyo, onikis. Xninoyolkuepa itech tlen onikchiuj. Pampa oniknokauili Jehová manechyekana, aman ueli más chikauak niktekichiuilia.

Ijkuak niaya ipan tlanechikojli tlen onka Bromsgrove, onikixmat Anne, se tokniuj akin melak kualtsin niman kuajli kitekichiuilijtoya Jehová. Otonamiktijkej ipan 1957. Desde ijkuakon, chikauak yotiktekichiuilijkej Jehová. Otochiujkej precursores regulares, precursores especiales, yotikintlajpalojkej tlanechikoltin niman yotitlapaleuijkej Betel. Anne niman nejua tiyolpakij pampa san sekan kuajli tiktekichiuilijtokej Jehová.

Ipan 1966, otechnotskej ipan itlamachtil Galaad número 42. ¡Melak otiyolpajkej! Ijkuak otlan totlamachtil, otechtitlankej ipan país de Malaui. Ompa melak kimixmatij pampa kipiyaj kuajli inyojlo niman kuajli teseliaj, san ika, ompa xotiuejkaujkej.

TLEN OPANOK MALAUI

Ipan 1 de febrero de 1967 otajsikej Malaui. Ipan se metstli otechmachtijkej tlajtojli tlen ompa tlajtouaj, niman sakin otechtlalijkej ken tlayekankej ipan distrito. Tikpiayaj se carro Kaiser Jeep niman tikchiayaj ika nochiuiyan mapano, hasta ipan atentin. San ika, kampa onkatka miyek atl tocarro xouel opanok. Kemantika tokauayaj ipan se chinankaltsintli. Pampa san tlapachijtoya ika sakatl, itsintlan nonekiya tiktlaliliskej se lona para maka makalaki atl ijkuak kiyauiya. Maski otikixnamijkej miyek tlen ouijtika, melak otiyolpajkej.

Ipan abril onikitak ika nochiujtoya tlen melak xkuajli ne Malaui. Ipan radio onijkak tlen okijto presidente de Malaui, doctor Hastings Banda, yejua okijto ika iteixpantijkauan Jehová xkitlaxtlauayaj impuestos niman ika xkinekiyaj kintlakamatiskej tekiuajkej. Presidente san techtlajtolchijchiuilijtoya, pampa tikmatstokej ika yejuamej kinkualaniaya ika tejuamej xkanaj tokalaktiayaj niman ika xtikpaleuiayaj nion se partido.

Ipan Septiembre, periódicos okijtokej ika presidente okijto ika tokniuan kichiuayaj ika nochiuiyan maonia tlauejli. Presidente okijto ika xok kinkauiliskiaj makichiuakan intekiyo iteixpantijkauan Jehová. Ipan 20 de octubre de 1967 otechteltilijkej totekiyo. Sakin, sekimej policías okitsakuatoj sucursal niman okinkixtijkej nochimej tokniuan akin ualeuayaj ipan okse país.

Otechtsakuatoj yeyi tonajli, sakin otechtitlankej Mauricio, se país tlen kiyekantoya Gran Bretaña. San ika, tekiuajkej noijki xotechkauilijkej ompa matokauakan. Kuakon, sucursal otechtitlan Rodesia (tlen aman noixmati ken Zimbabue). Ijkuak ompa otajsikej, ompa nemiya se policía akin melak tlauele katka niman noijki xkinekiya ompa matokauakan. Yejua otechijli: “Omechuajkixtijkej de Malaui, xomechkauilijkej nemokauaskej Mauricio niman aman nikan onenuajlajkej san pampa xok nenkipiyaj kanon nemokauaskej”. Anne opeuj choka. Niman nesiya ika xkanaj kinekiyaj techseliskej. Ijkuak ijkon topan nochiujtoya, nejua melak niknekiya nias Inglaterra. Sakin, tekiuajkej otechijlikej ika ueliskia tikochiskej sucursal, san ika, uajmostla nonekiya tiaskej kampa yejuamej nemiyaj. Melak tisiaujtoyaj, san ika, tikmatstoyaj ika Jehová techpaleuiskia. Uajmostla ika teotlak otechijlikej ika ueliskia tokauaskej Zimbabue. Xkeman nikilkauas kenon oninomachili ipan yejon tonajli. Kuajli otikitakej ika Jehová techyekantoya.

SE YENKUIK TEKITL: DESDE ZIMBABUE OTITLAPALEUIJKEJ MALAUI

Ijkuak tinemiyaj ipan sucursal de Zimbabue, onechijlijkej manitlapaleui ipan Departamento de Servicio para nikitas tlen nochiua Malaui niman Mozambique. Tokniuan akin chantiyaj Malaui melak kintlaueltokatoyaj. Tlayekankej ipan circuito de Malaui kinuajtitlaniyaj amamej kampa kijtouaya tlen panotoya, niman nejua nonekiya nikintlajtolkuepas. Sejpa melak itlayoua onitlan niktlajtolkueptoya se amatl. Ijkuak onikamapouj nochi tlen xkuajli kinchiuilijtoyaj tokniuan, opeuj nichoka.a San ika, noijki onechyolchikauj pampa tokniuan melajkanentoyaj, tlaxikojtoyaj niman tlaneltokatoyaj itech Jehová (2 Cor. 6:4, 5).

Otikchiujkej nochi tlen otiuelkej para ijkon tokniuan akin nemiyaj Malaui niman akin oyajkaj Mozambique makipiyakan tlen ika kichikauaskej intlaneltok. Akin tlajtolkuepaj ika chichewa oyajkej Zimbabue. Ompa se tokniuj okitemakak itlal, noijki okichijchiuj se kajli kampa akin tlajtolkuepaj ueliskia tekitiskej niman noijki ueliskia ompa chantiskej. Ijkon, tokniuan xokikajkaujkej ika tlajtolkuepaj.

Otikchiujkej nochi tlen ononek niman ijkon tlayekankej ipan circuito, akin nemiyaj Malaui, mauiyan sejse xiuitl Zimbabue niman ompa makipanoltitij ueyi tlanechikojli yeyi tonajli ika chichewa. Ompa kinmakayaj tlen kipanoltiskiaj ipan ueyi tlanechikojli. Ijkuak nokuepayaj Malaui, kimijliayaj tokniuan nochi tlen ouelkaj ipan ueyi tlanechikojli. Noijki, ne Zimbabue ouel otikpanoltijkej se Tlamachtijli itech iTekiyo Tekiuajyotl kampa otikinyolchikaujkej nochimej tlayekankej ipan circuito.

Ipan febrero de 1975, oniaj Mozambique pampa onikintlajpaloto tokniuan de Malaui akin ompa onopaleuitoj. Yejuin tokniuan ikichiujtoyaj ijkon ken ikalpan toTajtsin, niman hasta yokintlalijkaj tlayekankej. Yejuin tlayekankej yokichiujkaj nochi tlen noneki para kinchikauiliskej intlaneltok tokniuan. Kinpanoltiayaj tlamachtiltin, nomachtiayaj amatlajkuilojli Mojmostla matomachtikan iTlajtol toTajtsin niman Amatl Tekakistilijketl niman hasta kinpanoltiayaj uejueyimej tlanechikoltin. Kampa chantiyaj katka ijkon ken kampa tikinpanoltiaj touejueyitlanechikoluan pampa onkatka kampa konkuiyaj tlen ika tlachipauaskej, kampa noxelouaya tlakuajli niman kampa tlajtlajpiayaj. Kuajli nesiya ika Jehová kinteochiujtoya yejon tokniuan niman yejon melak onechyolchikauj.

Itlamiyan 1970, sucursal de Zambia opeuj kiyekana Malaui. San ika, nejua ok nikimilnamikiya tokniuan de Malaui niman niktlajtlaniliaya toTajtsin makinpaleui. Niman nikmatstok ika miyekej noijki ijkon nomachiliayaj. Pampa teuan nikyekanaya sucursal de Zimbabue, miyekpa oninosentlali imiuan tokniuan akin nemiyaj kampa noyekanaj nochi sucursales, noijki ninosentlaliaya imiuan tokniuan akin tlayekanayaj Malaui, Sudáfrica niman Zambia. Nochipa ijkuak tosentlaliayaj totlajtoltiayaj: “¿Kenon uelis más tikinpaleuiskej tokniuan akin chantij Malaui?”.

Sakin, xok más okintlaueltokakej tokniuan niman akin okiskaj de Malaui oksejpa onokuepkej. Akin xokiskaj de Malaui, xok más tlajyouiayaj. Noijki, ipan okseki países tokniuan opeuj kinkauiliaj makichiuakan intekiyo. Niman ipan 1991 tokniuan de Mozambique noijki okinkauilijkej makichiuakan intekiyo. San ika, ok totlajtoltiayaj: “¿Kemanon kinkauiliskej tokniuan akin chantij Malaui makichiuakan intekiyo?”.

OKSEJPA OTIAJKEJ MALAUI

Ipan 1993, gobierno de Malaui okinkauili tokniuan manosentlalikan niman matenojnotsakan. Sakin, se misionero onechtlajtolti: “¿Oksejpa tias Malaui?”. Pampa inikpiaya 59 xiuitl, oniknankili: “¡Ka, nejua melak iniueuentsin!”. San ika, ipan yejon tonajli Grupo akin tlayekana otechuajtitlanili se amatl kampa techijliayaj tla tiknekiyaj oksejpa tiaskej Malaui.

Xtikmatiyaj tlenon tikchiuaskej pampa tikuelitayaj titlapaleuiskej Zimbabue. Melak yotomatkaj ompa niman itikinpiayaj amigos. Grupo akin tlayekana melak teasikamati pampa otechijli ika tla tiknekiyaj, ueliskia tokauaskej Zimbabue. Niman ueliskia tikijtoskiaj ika ompa tokauaskiaj pampa yotomatkaj, san ika, otitlanemilijkej itech Abrahán niman Sara. Yejuamej iueuentsitsintin katkaj ijkuak okikaujteujkej nochi tlen kipiayaj pampa kinekiyaj yaskej kampa Jehová okintitlan (Gén. 12:1-5).

Otikijtokej tikchiuaskej tlen Jehová techijlitoya, niman otokuepkej Malaui ipan 1 de febrero de 1995. Ipan yejon xiuitl otikajxiltijkej 28 xiuitl ijkuak kachtopa otajsikaj Malaui. Sakin, omemej tokniuan niman nejua otechijlikej matitlapaleuikan ipan grupo akin kiyekanaskia sucursal. Kuakon, otikitakej kenon iteixpantijkauan Jehová ueliskiaj nosentlaliskej niman tenojnotsaskej Malaui.

JEHOVÁ KICHIUA MAMIYEKIYAKAN

Melak kualtsin pampa otikitakej kenon Jehová okiteochiuj intekiyo tokniuan. De 1993 hasta 1998 melak otimiyekiyakej: ¡nemiyaj 30,000 tenojnotskej niman sakin otochiujkej ipantsin 42,000!b Ika yejon, onkatka miyek tekitl, niman Grupo akin tlayekana okijto manochijchiua se yenkuik sucursal. Otijkoujkej 12 hectáreas de tlajli ne Lilongüe, niman onechijlijkej manitlapaleui ipan Comité de Construcción.

Ipan mayo de 2001, tokniuj Guy Pierce, akin tlapaleuiya ipan Grupo akin tlayekana, okipanolti se tlamachtijli ijkuak opeuj notekitiltia yenkuik sucursal. Onosentlalijkej ipantsin 2,000 iteixpantijkauan Jehová akin chantij Malaui. Miyekej ikipiayaj ipantsin 40 xiuitl ika onoapolaktijkej. Yejuin tokniuan tlakamej niman siuamej otlaxikojkej ijkuak okintlaueltokakej. Maski yejuamej xkipiayaj miyek tomin, kema kipiayaj chikauak intlaneltok. Niman aman melak pakiyaj pampa kipiayaj se yenkuik Betel. Niman ipan sucursal ompa nokuikatijtinemiyaj totlakuikaluan ijkon ken nokuikatiaj ne África. Yejon tlen onikitak melak onechyolchikauj pampa onechilnamikti ika Jehová kinteochiua akin tlaxikouaj.

Sakin, ijkuak yotlankaj kichijchiuaj sucursal, nechtitlaniyaj manikinpanoltiti tlamachtiltin kampa kiyenkuiliaj se Kajli kampa tosentlaliaj. Pampa tokniuan okitakej kenon uelis más nochijchiuaskej Kaltin kampa tosentlaliaj ika achijtsin tomin, melak okinpaleui tlanechikoltin de Malaui. Kachtopa, seki tlanechikoltin san kiyauak nosentlaliayaj, niman kampa nosentlaliayaj kitlapachouayaj ika ixiujyo eucalipto niman akatl. Niman ika sokitl kichijchiuayaj kampa notlaliayaj. Aman tokniuan opeujkej kimikxitiaj tabiques tlen ika kinchijchiuaskiaj kaltin kampa nosentlaliskiaj. Maski tikinmakayaj sillas, yejuamej kinekiyaj bancas, pampa, ijkon ken ompa kijtouaj, “más miyekej onakij ipan se banca”.

Melak niyolpaki pampa yonikitak kenon Jehová yokinpaleui oksekimej makichikauakan intlaneltok. Niman noijki onikitak kenon telpokamej de África melak tlapaleuiyaj, niman nimantsin uelij tlen kimititia ikalpan Jehová. Yejon noijki okinpaleui makinmakakan okseki tekitl ipan Betel niman ipan tlanechikoltin. Niman tlayekankej ipan circuito akin yenkuikej katkaj, melak kinpaleuiayaj tlanechikoltin. Miyekej tokniuan ikipiayaj insiuauj, san ika, pampa kinekiyaj más kitekichiuiliskej Jehová, okijtojkej xkinpiyaskej inkoneuan maski inchanejkauan niman oksekimej kimijliayaj makinpiyakan.

XNINOYOLKUEPA ITECH TLEN YONIKTLAPEJPENI

Ijkuak yotiuejkaujkaj 52 xiuitl ne África, opeuj nikualo. Tokniuan akin kiyekanayaj sucursal de Malaui okijlikej Grupo akin tlayekana tla ueliskia tiaskej sucursal de Gran Bretaña, niman okijtojkej ika kema. Melak otechyolkoko ijkuak otiuajkiskej de África, san ika, tokniuan akin nemij Betel de Gran Bretaña melak kuajli techtlajpixtokej.

Melak kuajli onikchiuj pampa onijkauili ika Jehová manechyekana. Tla san notech nitlaneltokaskia, xnikmati kenon nontlamiskia. Jehová nochipa yonechpaleui manikchiua tlen kuajli (Prov. 3:5, 6). Ijkuak nitelpochtli katka melak niknekiya nikitas kenon tekiti se ueyi empresa, san ika, ikalpan Jehová onechmakak miyek tekitl tlen más onikuelitak. Melak niyolpaki pampa oniktlapejpeni niktekichiuilis Jehová.