Xtlasojkamachili Jehová ika ueli tiknotsa

1. ¿Kenon tomachiliaj pampa Jehová kinektika matiknotsakan?

AKIN okichijchiuj iluikak niman tlaltikpaktli techkauilia matiknotsakan ika teoyotl. Tejuamej xnoneki tiktlajtoltiskej Jehová tla uelis tiknotsaskej pampa maski san kemanon niman ika totlajtol uelis tikijliskej nochi tlen tikmachiliaj. Maski tla tinemij hospital pampa tikualoj noso maski tla titsauktokej, uelis kuajli tikmatstoskej ika tla tiknotsaj toTajtsin, yejua techkakis. ¡Melak kualtsin ika ueli tiknotsaj Jehová!

2. ¿Kenon okiteititi tekiuaj David ika kitlasojkamatiya pampa ueliya kinotsaya toTajtsin?

² Tekiuaj David melak kitlasojkamatiya pampa ueliya kinotsaya toTajtsin. Ipan se tlakuikajli, yejua okijli Jehová: “Xseli noueyikatsajtsilis kenon ajuiyak poktli ijkuak kitlatiaj on kopajli mixpan” (Sal. 141:1, 2). Yeuejkaui, ijkuak nemiya David, teopixkej melak kuajli ken kichijchiuayaj tlen melak ajuiyak niman sakin kitlatiayaj ijkuak kiueyichiuayaj Jehová (Éx. 30:34, 35). Ijkuak David okiteneuj yejon tlen melak ajuiyak, okiteititi ika kinekiya kuajli kinemilis tlen kijliskia iTaj ipan iteoyouan. Niman tejuamej noijki tiknekij tikchiuaskej ken David pampa tiknekij ika toteoyouan makiyolpakti Jehová.

3. ¿Kenon noneki tiknotsaskej Jehová, niman tleka?

³ Ijkuak tiknotsaskej Jehová noneki tikititiskej ika melak tiktlakaitaj. Matitlanemilikan itech tlen okitakej Isaías, Ezequiel, Daniel niman Juan. Maski xsanoijki tlen okitakej, nochimej okitakej ika Jehová se tekiuaj akin melak ueyixtika. Isaías okitak ika Jehová “yeuatikatka ipan sen trono yejuan onkatka sanoyej tlakpak” (Is. 6:1-3). Ezequiel okitak ika Jehová yeuatoya ne iluikak ipan icarro niman iyeualiujyan petlaniya itlaj ken se akosamalotl (Ezeq. 1:26-28). Daniel okitak “sen Ueuentsin yejuan yejuekaui nemiya” niman itlaken istak katka niman itrono kampa yeuatoya uajkisaya tlitl (Dan. 7:9, 10). Niman Juan noijki okitak ika Jehová yeuatoya ipan itrono niman iyeualiujyan onkatka se akosamalotl tlen “petlantikatka xoxojki ken on tetl itoka esmeralda” (Apoc. 4:2-4). Ijkuak tikitaj ika Jehová melak ueyixtika, techpaleuiya matiktlasojkamatikan ika ueli tiknotsaj niman techpaleuiya matikilnamikikan ika melak noneki matiktlakaitakan. Aman tej, ¿tlenon uelis tikijliskej ipan toteoyouan?

“IJKIN XCHIUAKAN ORACIÓN”

4. ¿Tlenon okijto Jesús ika kachtopa noneki tiktlajtlaniskej ipan toteoyouan, niman tlenon techmachtia yejon? (Mateo 6:9, 10).

⁴ (Xpoua Mateo 6:9, 10). Ijkuak Jesús nemiya nikan ipan tlaltikpaktli, okimititi inomachtijkauan kenon nonekiya kichiuaskej teoyotl. Sakin ika okijto “ijkin xchiuakan oración”, yejua okitlajtlanili Jehová manochipaua itoka, mauajla itekiuajyo tlen kinpopolos nochimej itlauelikniuan niman manochiua ipan tlaltikpaktli nochi tlen yejua yokijto. Tla tejuamej noijki tiktlajtlanij yejuin, tikteititiskej ika tiknekij manochiua tlen Jehová kineki.

5. ¿Kenon tikmatij ika ipan toteoyouan noijki uelis tiktlajtlaniskej tlen tiknekij?

⁵ Ijkuak Jesús otechmachti kenon noneki tikchiuaskej teoyotl, noijki otechititi ika uelis tiktlajtlaniskej tlen tejuamej tiknekij. Uelis tiktlajtlaniliskej Jehová mojmostla matechmaka tlen tijkuaskej, matechtlapopolui, matechpaleui maka tikchiuaskej tlen xkuajli niman maka itlaj matexchiuili Satanás (Mat. 6:11-13). Ijkuak tiktlajtlanij yejuin, tikteititiaj ika tikmatstokej ika san Jehová uelis techpaleuis niman ika tiknekij tikyolpaktiskej.

6. ¿San noneki tikijtoskej tlen Jesús okiteneuj ipan iteoyouj? Xkijto tleka ijkon titlanankilia.

⁶ Jesús xkinekiya ika inomachtijkauan san makijtokan tlen yejua okijto ipan iteoyouj tlen uajnestiuj ipan Mateo 6:9-13. ¿Kenon tikmatij? Pampa Jesús noijki xnochipa okijto yejon ipan iteoyouan. Kemantika kijliaya iTajtsin tlen kajmanaya niman tlen kinekiya ipan yejon tonajli (Mat. 26:39, 42; Juan 17:1-26). Kuakon, tejuamej noijki uelis tikijliskej Jehová nochi tlen techajmana. Tla kemantika noneki itlaj tiktlapejpeniskej, uelis tikijliskej matechmaka tlamachilistli (Sal. 119:33, 34). Noso tla kemantika techmakaj se tekitl tlen xmás tiuelij, uelis tikijliskej Jehová matechpaleui kuajli matikchiuakan yejon tekitl (Prov. 2:6). Tatajtin uelis kitlajtlaniliskej Jehová makinpaleui inkoneuan. Niman tekoneuan uelis kijliskej makinpaleui intajuan. Noijki, tinochimej noneki tiktlajtlaniliskej Jehová makinpaleui akin tikinmachtiaj niman akin tikinnojnotsaj. San ika, matikilnamikikan ika noijki xnoneki san tiktlajtlantoskej.

7. ¿Tleka noneki tikueyiteneuaskej Jehová ipan toteoyouan?

⁷ Ijkuak tikchiuaskej teoyotl noijki noneki tikueyiteneuaskej Jehová pampa san yejua kinamiki matikueyiteneuakan. Akin okijkuilo se salmo, okijli Jehová: “Tejua noTEKO, kuajli moyojlo niman titetlapojpoluiya”. Niman sakin okijto: “TiDios yejuan titetlajsojtla niman titeiknelia; xnimantsin tikualani; sanoyej titetlajsojtla, niman nochipa tikijtoua tlen melauak” (Sal. 86:5, 15). Yejuin techititia ika melak miyek onka tlen ika uelis tikueyiteneuaskej Jehová.

8. ¿Tleka noneki tiktlasojkamachiliskej Jehová? (Salmo 104:12-15, 24).

⁸ Ijkuak tikchiuaskej teoyotl noneki tikueyiteneuaskej Jehová, san ika, noijki noneki tiktlasojkamachiliskej. ¿Tleka? Pampa yejua miyek tlen techmaka, techinmaka xochimej tlen melak kualtsitsintin, techmaka miyek tlen tijkuaskej niman techinmaka akin imiuan touikaskej. Jehová melak miyek tlen techmaka pampa melak techtlasojtla niman pampa kineki matinemikan ika toyojlo (xpoua Salmo 104:12-15, 24). Noijki, tiktlasojkamachiliaj pampa techmaka tlen ika tikchikauaskej totlaneltokil niman pampa yotechijli ika techmakas miyek tlen kualtsin ika tlayekapan.

9. ¿Tlenon uelis tikchiuaskej tla xtiknekij tikilkauaskej tiktlasojkamachiliskej Jehová? (1 Tesalonicenses 5:17, 18).

⁹ Kemantika tikilkauaj tiktlasojkamachiliskej Jehová. ¿Tlenon uelis tikchiuaskej tla xtiknekij ijkon topan manochiua? Kanaj uelis tikijkuiloskej tlen tiktlajtlaniliaj Jehová. Sakin, matikitakan kenon yotechnankili niman matiktlasojkamachilikan pampa yotechpaleui (xpoua 1 Tesalonicenses 5:17, 18). Ijkuak yakaj techtlasojkamachilia melak tiyolpakij. Kuakon, tla tiknekij ika Jehová mayolpaki, noijki matiktlasojkamachilikan pampa kinnankilia toteoyouan (Col. 3:15). San ika, onka itlaj okse tlen melak noneki matiktlasojkamachilikan Jehová. Matikitakan tlenon.

MATIKTLASOJKAMACHILIKAN JEHOVÁ IPAMPA IKONETSIN

10. ¿Tleka noneki tiktlasojkamachiliskej Jehová ika okuajtitlan iKonetsin? (1 Pedro 2:21).

¹⁰ (Xpoua 1 Pedro 2:21). Melak noneki matiktlasojkamachilikan Jehová pampa okuajtitlan iKonetsin. ¿Tleka? Pampa Jesús miyek otechmachtiko itech Jehová niman itech tlenon noneki tikchiuaskej tla tiknekij tikyolpaktiskej Jehová. Tla tikteititiaj ika tikneltokaj ika Jesús yemelak omikiko topampa, uelis kuajli touikaskej iuan Jehová niman iuan tiyolseujtoskej (Rom. 5:1).

11. ¿Tleka tiktekitiltiaj itoka Jesús ijkuak tiknotsaj toTajtsin?

¹¹ Matiktlasojkamachilikan Jehová pampa ueli tiknotsaj itechkopa iKonetsin. Itechkopa Jesús techmaka tlen tiktlajtlaniliaj. Kuakon, tla tiktekitiltiaj itoka iKonetsin Jehová ipan toteoyouan, yejua techkakis niman technankilis. Jesús okijto: “Nochi tlen nemejuamej nentlajtlaniskej ikan notoka, nejua nikchiuas para noTajtsin kiselis ueyilistli notechkopa yejuan niiKoneu” (Juan 14:13, 14).

12. ¿Tlenon noijki noneki tiktlasojkamachiliskej Jehová?

¹² Jesús omik topampa, yejua ika, Jehová ueli techtlapopoluiya. Biblia kijtoua ika Jesús “sen ueyi tlayekanki tiopixki” niman “noseuijtikaj iyekmakopa on trono kampa on toueyi Dios tlamandaroua” (Heb. 8:1). Noijki Biblia kijtoua ika “tikpiyaj totepantlajtojkau yejuan techpaleuis” niman “in totepantlajtojkau yejua JesuCristo” (1 Juan 2:1). Melak tiktlasojkamachiliaj Jehová ika otechmakak “sen ueyi tlayekanki tiopixki” akin techiknelia, techasikamati niman akin “topampa tlajtojtikaj” (Rom. 8:34; Heb. 4:15). Tla Jesús xmikiskia topampa, tejuamej xueliskia tiknotsaskiaj toTajtsin pampa titlajtlakolejkej. ¡Melak tiktlasojkamachiliaj Jehová ika okitemakak isenteKonetsin topampa!

MATIKCHIUAKAN TEOYOTL INPAMPA TOKNIUAN

13. ¿Kenon okiteititi Jesús ika melak kintlasojtlaya inomachtijkauan?

¹³ Ijkuak sa achijtsin poliuiya para kimiktiskej Jesús, yejua okinots iTaj niman okitlajtlanili makinpaleui inomachtijkauan niman makintlajpiya itech Satanás (Juan 17:15). Jesús okimititi iapóstoles ika melak kintlasojtlaya pampa maski kimatstoya ika ikimiktiskiaj, onajman inpampa.

14. ¿Kenon tikteititiaj ika tikintlasojtlaj tokniuan?

¹⁴ Ijkon ken Jesús, tejuamej noijki tikchiuaj teoyotl inpampa tokniuan niman xsan titlanemiliaj itech tlen tejuamej techpoloua. Ijkuak ijkon tikchiuaj, tikteititiaj ika yemelak tikintlasojtlaj tokniuan ijkon ken otechnauati Jesús. Niman noijki tikititiaj Jehová ika melak tikintlasojtlaj tokniuan (Juan 13:34). Niman tikmatstokej ika ijkuak tikchiuaj teoyotl inpampa tokniuan, Jehová kema kinpaleuiya pampa Biblia kijtoua: “Ioración on yolmelajki tlakatl yejuan ikan nochi iyojlo kichiua, sanoyej kipiya poder” (Sant. 5:16).

15. ¿Tleka melak noneki matikchiuakan teoyotl inpampa tokniuan?

¹⁵ Tokniuan kixnamikij miyek tlen ouijtika, ika yejon, noneki matikchiuakan teoyotl inpampa. Uelis tiktlajtlaniliskej Jehová makinpaleui tokniuan akin kualoj, akin kintlaueltokaj, akin chantij kampa yotlaixpoliuj noso kampa onka guerra. Noijki uelis tikchiuaskej teoyotl inpampa tokniuan akin tlapaleuiyaj kampa tlaixpoliui. Hasta uelis tikintokayotiskej tokniuan ijkuak tikchiuaskej toteoyouj. Ijkuak tiktlajtlaniliaj Jehová makinpaleui tokniuan, tikimititijtokej ika melak tikintlasojtlaj.

16. ¿Tleka noneki tikchiuaskej teoyotl inpampa tokniuan akin techyekanaj?

¹⁶ Tokniuan tlayekankej noijki kitlasojkamatij ijkuak inpampa tikchiuaj teoyotl pampa yejon kinpaleuiya kuajli makichiuakan intekiyo. Ijkon onomachili apóstol Pablo, yejua okijkuilo: “No ijki xchiuakan oración nopampa, para Dios ma nechmaka tlajtojli ijkuak nitlajtos, niman para uelis nitlajtos ikan yolchikaualistli ijkuak niktemachtis on tlen iyantikaj itech on kuajli tlajtojli yejuan kiteijlia ken Dios temakixtia” (Efes. 6:19). Aman noijki nemij tokniuan tlayekankej akin chikauak tekititokej. Ijkuak tiktlajtlaniliaj Jehová makinteochiua, tikteititiaj ika tikintlasojtlaj.

IJKUAK TECHTLAJTLANILIAJ MATIKCHIUAKAN TEOYOTL

17, 18. ¿Kanaj kemanon ueliskia techijliskej matikchiuakan teoyotl, niman tlenon noneki tikilnamiktoskej?

¹⁷ Kanaj kemantika techtlajtlaniliskej matikchiuakan teoyotl. Matikonnemilikan yejuin: se tokniuj siuatl akin temachtia uelis kijlis tokniuj akin iuan otemachtito makichiua se teoyotl. Kanaj yejuin tokniuj akin oteuikak xmás kixmati akin kimachtiaj, ika yejon, kanaj más kuajli yeskia tla kichiua teoyotl ijkuak tlamiskej nomachtiaj pampa ijkon ikimatstos tlenon kitlajtlanis ipampa akin kimachtiaj.

¹⁸ ¿Tlenon noneki kilnamiktos se tokniuj tlakatl akin kijliaj makichiua teoyotl ijkuak kisaskej ontenojnotsaskej noso ipan se tlanechikojli? Tokniuan tlakamej noneki kilnamiktoskej ika ipan inteoyouan xnoneki temelajkatlaliskej nion xnoneki itlaj kitemachiltiskej. Ipan tlanechikoltin techmakaj makuijli minutos para tokuikatiskej niman para nochiuas teoyotl. Kuakon, tokniuj akin kijliskej makichiua teoyotl xnoneki melak uejkauis, niman más ijkuak peuas tlanechikojli (Mat. 6:7).

NOCHIPA MATIKCHIUAKAN TEOYOTL

19. ¿Tlenon techpaleuis ijkuak Jehová teyolkuitis?

¹⁹ Melak noneki nochipa matikchiuakan teoyotl. ¿Tleka? Pampa sa achijtsin poliui ijkuak Jehová teyolkuitis. Jesús okijto: “Xnemikan listos. Niman nochipa xchijtiakan oración para ijki uelis nemomanauiskej ipan nochi on tlajyouilistli yejuan nochiuas” (Luc. 21:36). Tla nochipa tikchiuaj teoyotl, chikaujtos totlaneltok niman yejon techpaleuis ijkuak Jehová teyolkuitis.

20. ¿Tlenon uelis tikchiuaskej para Jehová makimita toteoyouan ken itlaj tlen melak ajuiyak?

²⁰ Ipan yejuin tlamachtijli yotikitakej ika melak tiktlasojkamatij ika Jehová techkauilia matiknotsakan. Noijki yotikitakej ika ipan toteoyouan kachtopa noneki tiktlajtlaniskej tlen Jehová kineki. Noijki, noneki tiktlasojkamachiliskej Jehová pampa okuajtitlan iKonetsin niman pampa okitlali iTekiuajyo niman matikchiuakan teoyotl inpampa tokniuan. Niman noijki, uelis tiktlajtlaniliskej Jehová matechtlajpiya niman makichikaua totlaneltok. Tla tejuamej kuajli tiknemiliaj tlen tiktlajtlaniskej ipan toteoyouan, tikititiskej Jehová ika melak tiktlasojkamatij pampa techkauilia matiknotsakan. Tla ijkon tikchiuaj, Jehová kimitas toteoyouan ken itlaj tlen melak ajuiyak niman melak kipaktis (Prov. 15:8).