Hulda okipix tlen melak kinekiya

TLA yeuejkaui tiaskia ipan isla de Sangir Besar (Indonesia), kanaj ompa tikimitaskia yeyimej tokniuan siuamej ipan playa. Maski nochimej kimatij ika yejuamej temachtiaj ipan yejon isla, ijkuakon xtenojnotstoyaj ipan playa. Kuakon, ¿tlenon kichiujtoyaj?

Kachtopa, kalakiyaj ijtik mar niman kintejtemouayaj temej tlen uejueyimej katkaj, kanaj ken se pelota de fútbol, niman sakin kinkixtiayaj itenpan mar. Sakin, notlaliayaj ipan sillitas de tabla niman ika se martillo kintlapanayaj yejon temej hasta kinkuechtiliayaj. Sakin, kintlaliayaj ipan se cubeta de plástico niman kitkiyaj inchan, san ika, para ajsiskej nonekiya tlejkoskej ipan se escalera. Niman kimejyeuayaj yejon temej ipan seki costales. Sa ika tlami, panouayaj seki carros tlen kimitkiyaj yejon temej kampa kinchijchiuayaj carreteras.

Se itech yejon tokniuj itoka Hulda. Yejua akin más uejkauiya kintlapanaya temej. Niman ika tomintsin tlen kitlaniya ueliya kinpaleuiyaya ichanejkauan. San ika, aman ika yejon tomintsin kinekiya kikouas se tablet niman ijkon kalakis ipan aplicación JW Library^®. Hulda kimatstoya ika videos niman tlen kipiya aplicación kipaleuiskiaj más kuajli matenojnotsa niman kuajli makasikamati Biblia.

Ipan se metstli iuan tlajko, Hulda otekit ome horas ika kualkan. Ika temej tlen okintlapan ouel okitemilti se pitentsin carro. Aman ikipiaya tomin tlen ika ueliskia kikouas se tablet.

Hulda okijto: “Melak onisiauj niman melak nechkokouaya nochi notlalnakayo pampa onikintlapan temej. San ika, ijkuak onikouj tablet niman onikitak ika nechpaleuiskia más kuajli manitenojnotsa niman nechpaleuiskia más totoka maninoyektlali para tlanechikoltin, nimantsin onikilkauj ika nechkokouaya notlalnakayo”. Noijki okijto ika tablet okipaleui ijkuak opeuj pandemia niman ijkuak nochi tlanechikoltin san nopanoltiayaj ika videoconferencia. ¡Melak tiyolpakij pampa Hulda okipix tlen melak kinekiya!