Xninomojtia pampa nitlaneltoka itech Jehová

NIKIXMATI JEHOVÁ NIMAN PEUA ITECH NITLANELTOKA

Onitlakat ipan 1948 ipan se pueblito tlen onka ne Nigeria. Ijkuakon notío Moustapha, ikniuj notaj, niman Wahabi, nokniuj akin yakatstiuj, onochiujkej iteixpantijkauan Jehová. Ijkuak nikpiaya 9 xiuitl, notaj omik. Niman yejon melak onechyolkoko. Wahabi, onechijli ika ueliskia oksejpa tikitaskej notaj ijkuak yoliuiskia. Tlen onechijli onechyolchikauj maninomachti Biblia. Oninoapolakti ipan 1963, niman yeyimej nokniuan noijki onochiujkej iteixpantijkauan Jehová.

Ipan 1965, onichantito Lagos, kampa chantiya nokniuj Wilson, se itech nokniuj akin noijki yakatstiuj. Ompa, opeuj kuajli touikaj imiuan sekimej precursores regulares itech tlanechikojli Igbobi. Ijkuak nikimitaya kenon melak yolpakiyaj pampa kitekichiuiliayaj Jehová, onechyolchikauj maninochiua precursor ipan enero de 1968.

Tokniuj Albert Olugbebi, akin nemiya Betel, otechsentlali nochimej akin titelpokamej niman otechijli ika nonekiyaj precursores especiales ne Nigeria. Nikilnamiki ika tokniuj Olugbebi okijto: “Nemejuamej nentelpokamej niman uelis nenkitekitiltiskej nemotiempo niman nemokojtilis para nenkitekichiuiliskej Jehová. Ompa onka miyek tekitl”. Pampa nejua niknekiya nikchiuas ijkon ken teotlajtoketl Isaías niman nias kampa nechtitlaniskia Jehová, oniktemilti se solicitud (Is. 6:8).

Ipan mayo de 1968, onechontitlankej ken precursor especial ipan ueyikalpan Kano, tlen nokaua Nigeria. Ijkuakon nochiujtoya guerra de Biafra tlen opeuj ipan 1967 niman otlan 1970. Yejuin guerra melak otlaixpolo, san ika, noijki opeuj ipan okseki kalpamej. Se tokniuj akin kinekiya nechpaleuis nechijliaya maka maniuiya Kano. San ika, onikijli: “Tlaxtlaui, nikmatstika ika tikneki tinechpaleuis, san ika, tla Jehová kineki ompa maniuiya, nikmatstika ika yejua nochipa nouan nemis”.

NITLANELTOKA ITECH JEHOVÁ MASKI NINEMI KAMPA GUERRA OTLAIXPOLO

Sajnoye xkuajli tlen onikitak Kano. Guerra tlen opanok melak miyekej okinmikti. Ijkuak titenojnotstiayaj, kemantika ipan ojtli tikimitayaj miyekej mijkatsitsintin. Maski onkatkaj miyekej tlanechikoltin ne Kano, miyekej tokniuan yocholojteujkaj. San nokauayaj kanaj 15 tokniuan, niman melak nomojtiayaj niman najmanayaj. ¡Melak oyolpajkej ijkuak okitakej ika oajsikej chikuasen precursores especiales! Melak kuajli onomachilijkej ijkuak otikinyolchikaujkej. Otikinpaleuijkej oksejpa makipiyakan tlanechikoltin, matenojnotsakan, makintitlanikan iinformes ne sucursal niman makintlajtlanikan amatlajkuiloltin.

Nochi precursores especiales opeuj titomachtiaj tlajtojli hausa. Miyekej kuajli techkakiyaj pampa tikinnojnotsayaj ika intlajtol. San ika, miyekej akin tlayekanayaj ipan tlaneltokiltin xkuelitayaj matitenojnotsakan. Ika yejon, nonekiya totlajpiyaskej. Sejpatipan, se tlakatl otechtotokak ika se cuchillo iuan akin onitenojnotsato. Xitlaj otexchiuili pampa melak ototlalojkej. Maski tikixnamiktoyaj miyek tlen xkuajli, ijkon ken kijtoua Salmo 4:​8, Jehová otechtlajpix niman oksejpa opeuj miyekiyaj tokniuan. Aman ne Kano onka 11 tlanechikoltin niman nemij ipantsin 500 tenojnotskej.

TECHTLAUELTOKAJ NE NÍGER

Ipan agosto de 1968, seki metstin sakin ika otajsikej Kano, nejua niman ome precursores especiales otechtitlankej Niamey, icapital de República de Níger, ne África Occidental. Nimantsin otikitakej ika ne Níger melak tona. Maski melak tona katka niman ononek tomachtiskej tlajtojli francés tlen ompa tlajtouayaj, otitlaneltokakej itech Jehová niman opeuj titenojnotsaj ipan icapital Níger iuan tokniuan akin ompa chantiyaj. San xouejkauj, miyekej akin chantiyaj Niamey niman ueliyaj tlaamapouayaj, ikipiayaj amoxtli tlen ika titemachtiayaj: La verdad que lleva a vida eterna. Miyekej uajlayaj kampa tinemiyaj niman techtlajtlaniliayaj se amoxtli.

Nimantsin otikitakej ika tekiuajkej kintlauelitayaj iteixpantijkauan Jehová. Ipan julio de 1969 otikpanoltijkej kachtopa toueyitlanechikol ipan circuito ipan yejuin país, kampa onosentlalijkej kanaj 20 tokniuan. Melak tiyolpakiyaj pampa noapolaktiskiaj omemej tenojnotskej. San ika, ijkuak opeuj toueyitlanechikol oajsikej policías niman otechteltijkej. Tokniuj akin kintlajpalouaya tlanechikoltin niman tejuamej ken precursores especiales otechuikakej kampa nemij policías. Ompa, opeuj miyek techtlajtoltiaj niman otechijlikej ika uajmostla oksejpa ompa matiuiyan. Pampa itikmatstoyaj ika tekiuajkej ueliskia techteltiskiaj, otikijtokej ika tlamachtijli tlen kikakiskiaj akin noapolaktiskiaj, nochiuaskia ipan se kajli niman sakin tokniuan oyajkej ipan atentli niman ijkon noapolaktiskej.

San opanok seki semanas, nejua iuan okseki makuijli precursores especiales otechkixtijkej ipan yejon país. Tekiuajkej, san otechmakakej 48 horas para tikisaskej ne Níger niman san tejuamej otikitakej kenon tikisaskej. Otitetlakamatkej niman otiajkej ipan sucursal tlen onka Níger. Ijkuak ompa otajsikej, otechijlikej kanon tontlapaleuiskiaj.

Nejua onechontitlankej Orisunbare, tlen nokaua ne Nigeria. Niman melak oniyolpak pampa ouel onitenojnots iuan tokniuan akin ompa chantiyaj niman ouel onitemachti itech Biblia. San ika, chikuasen metstin sakin, sucursal onechijli oksejpa maninokuepa Níger. San ika, aman san noselti ninokuepaskia. Ijkuak onechijlijkej, melak onimojkatlachix. Niman maski onechajman, noijki melak niknekiya nikimitas tokniuan de Níger.

Ijkuak oksejpa onajsik Niamey, uajmostla se tlakatl akin tlanemakaya ne Nigeria okitak ika nejua niiteixpantijkauj Jehová niman opeuj miyek nechtlajtoltia itech Biblia. Opeuj san sekan tomachtiaj, niman sakin ijkuak okikajkauj ika poki niman tlauani, onoapolakti. Sakin noijki ouel onitenojnots ipan okseki kalpamej niman onikitak kenon miyekej okiselijkej tlen melauak. Ijkuak onajsik Níger nemiyaj 31 tokniuan, niman ijkuak oniaj, inemiyaj 69.

“XKUAJLI TIKMATIJ KENON NEMIJ TOKNIUAN NE GUINEA”

Ipan diciembre de 1977, oninokuep Nigeria pampa nechmachtiskia yeyi semanas. Ijkuak otlan nechmachtiaj, tokniuj Malcolm Vigo, akin kiyekanaya grupo akin kiyekana sucursal, onechmakak se amatlajkuilojli tlen okiseli itech sucursal de Sierra Leona. Tokniuan kitejtemojtoyaj se tokniuj precursor akin xnonamiktiaya, akin chikaujtoya niman akin matlajto inglés niman francés, ijkon kintlajpaloskia tlanechikoltin ne Guinea-Conakri. Tokniuj Vigo onechijli ika ipampa yejon onechnotskaj. Noijki, onechijli ika tekitl tlen onechijlijkej nikchiuas ouijtika yeskia. Niman okijto: “Kuajli xnemili tla tikselis yejuin tekitl”. Nejua xokpa oniknemili niman onikijli: “Nejua nias pampa Jehová yejua akin nechtitlantika”.

Oniaj ipan avión ne Sierra Leona niman ompa oninosentlali iuan tokniuan itech sucursal. Se tokniuj itech Grupo akin kiyekana Sucursal onechijli: “Xkuajli tikmatij kenon nemij tokniuan ne Guinea”. Maski yejuin sucursal kiyekanaya tekitl tlen nochiuaya ne Guinea, xueliya nonotsayaj iuan tokniuan ipampa se tlanauatijli tlen onkatka ipan yejon país. Miyekpa okititlankej se tokniuj para makita tla ueliskiaj kinkauiliskiaj manonotsakan imiuan tokniuan, san ika, xkinkauiliayaj. Ika yejon, onechijlikej maniuiya Conakri, ipan icapital de Guinea niman manitlajto imiuan tekiuajkej.

Ijkuak onajsik Conakri, oninosentlali imiuan tekiuajkej. Niman onikimijli ika niknekiya nitenojnotsas ne Guinea, san ika, onechijlijkej ika maka manitenojnotsa pampa ueliskia nechtsakuaskiaj noso nexchiuiliskiaj itlaj tlen melak xkuajli. Onechijlijkej: “Xmokuepa Nigeria niman ompa xtenojnotsa”. Niman onikinnankili: “Nejua nikneki nikan nitenojnotsas”. Tekiuajkej okititlanilijkej se amatlajkuilojli tekiuaj akin nemi ne Guinea niman okitlajtlanilijkej manechpaleui, niman yejua ijkon okichiuj.

Sakin, oninokuep ipan sucursal tlen onka ipan Sierra Leona niman onikimijli tokniuan tlenon yokijtokaj tekiuajkej. Tokniuan melak oyolpakej ijkuak okimatkej ika pampa Jehová onechpaleui, tekiuajkej onechkauilijkej maninokaua ne Guinea.

Ipan 1978 hasta 1989, onikintlajpaloto tlanechikoltin tlen onokej ne Guinea niman Sierra Leona, niman kemantika nikomintlajpalouaya tlanechikoltin tlen onokej ne Liberia. Kachtopa, san nochipa nikualouaya. Niman kemantika nikualouaya ijkuak uejka nikomintlajpalouaya tokniuan, san ika, tokniuan nochipa kitayaj kenon nechuikaskej ipan hospital.

Sejpatsin melak onikualok pampa onechajsik malaria niman onijtiokuilyouaka. Ijkuak onipajtik, onikmat ika tokniuan yokijtokaj kenon nechtokaskiaj. Maski onikixnamik miyek tlen ueliskia kichiuas manimiki, xkeman oniknemili nikajkauas ika niktekichiuilis Jehová. Kuajli nikmatstika ika san Jehová uelis nechmakixtis, pampa maski tla timikij, yejua uelis oksejpa techyolitis.

NOSIUATSIN NIMAN NEJUA TITLANELTOKAJ ITECH JEHOVÁ

Ipan 1988, onikixmat Dorcas, se precursora akin yolyemanki niman chikauak itlaneltok. Otonamiktijkej niman opeuj san sekan tikintlajpalouaj tlanechikoltin. Dorcas melak nechtlasojtla niman melak yonechpaleui, niman san tlenon kinektika kichiuas ipampa Jehová. Para tajsiskej ipan se tlanechikojli, nonekiya tinejnemiskiaj hasta 25 kilómetros, niman nochipa tikitkiyaj tlen tiktekitiltiskiaj. Ijkuak tikomintlajpalouayaj tlanechikoltin tlen más uejka onkatkaj, tiayaj san ipan tlen tiknextiayaj. Tipanouayaj kampa melak tlasokititlan niman kampa tlauejkatlan.

Dorcas melak yolchikauak. Kemantika nonekiya tipanoskej ipan atentin kampa nemiyaj miyekej cocodrilos. Sejpatipan, ijkuak otiuejkaujkej makuijli tonaltin para tajsiskej ipan se tlanechikojli, ononek tipanoskej se atentli ika canoa pampa puentes tlachijchiujtin ika kojtli melak yoijtlakaujkaj. Ijkuak Dorcas kisaskia ipan canoa, iapolaktoya. Ompa nemiyaj cocodrilos niman tejuamej xtiueliyaj tiapanouayaj. San ika, seki telpokamej okipaleuijke Dorcas ijkuak iapolaktoya. Yejon tlen opanok xnimantsin otikilkaujkej, pampa kemantika hasta titemikiyaj, san ika, xotikaujkej totekiyo.

Ipeujyan 1992, otechijlikej ika Dorcas koneuaj katka, yejuin itlaj tlen xtikchiayaj. ¿Kijtosnekiya ika xok más chikauak tiktekichiuiliskiaj Jehová? Otikijtokej: “Yejuin konetsintli se itetlayokolil Jehová”. Ika yejon, otiktokayotijkej tochpoch, Jahgift (tlen kijtosneki “itetlayokolil Jah”). Naui xiuitl sakin otlakat tokoneuj Eric. Tokoneuan se itetlayokolil Jehová. Jahgift otlapaleui ipan Kajli kampa Tlajtolkuepaj tlen onka ne Conakri, niman Eric tlapaleuijketl ipan tlanechikojli.

Dorcas xok ouel otlapaleui ken precursora especial, san ika, ok tlapaleuijtoya ken precursora regular maski tokoneuan ok pipitikej katkaj. Niktlasojkamachilia Jehová pampa nejua ok ouel onitlapaleui ken precursor especial. Ijkuak tokoneuan ouejueyiyakej, Dorcas oksejpa onochiuj precursora especial, niman aman tiomemej titlapaleuiyaj ken misioneros ne Conakri.

JEHOVÁ AKIN TECHPALEUIYA

Nochipa niauj kampa Jehová nechontitlani. Nosiuatsin niman nejua miyekpa yotikitakej kenon yejua yotechtlajpix niman yotechteochiuj. Pampa titlaneltokaj itech Jehová niman xtitlaneltokaj itech tlemach tlen onka ipan yejuin tlaltikpaktli, xtikpiyaj miyek tlauejli nion ajmantli. Dorcas niman nejua kuajli yotikitakej ika Jehová “totemakixtijkau”, niman ika san yejua uelis techtlajpiyas (1 Crón. 16:35). Kuajli nikmatstika ika Jehová nochipa kinmanauis akin itech tlaneltokaj (1 Sam. 25:29).