TLAMACHTIJLI 49
¿Jehová kinnankilia noteoyouan?
“Nemejuamej nenmoueyikatsajtsiliskej, niman nenuajlaskej notech niman nejua nemechnankilis” (JER. 29:12).
TLAKUIKAJLI 41 Nimitstlajtlanilia xkaki noteoyouj
TLEN TIKITASKEJa
1, 2. ¿Tleka uelis tikmachiliskej ika Jehová xkinnankilia toteoyouan?
“XTLAJSOJTLA toTEKO niman yejua mitsmakas on tlen tikneki tipiyas” (Sal. 37:4). ¡Melak kualtsin tlen kijtoua! San ika ¿yejon kijtosneki ika Jehová nimantsin techmakas nochi tlen tiktlajtlaniliaj? Kuajli tla totlajtoltiaj yejuin. ¿Tleka? Matikonnemilikan ika se tokniuj siuatl akin xinonamiktia kijlia Jehová ika kineki yas ipan Tlamachtijli tlen kiseliaj akin Tenojnotsaj itech iTekiuajyo toTajtsin, san ika, panoua tiempo niman xkinotsaj mauiya. Noso, se tokniuj telpochtli melak kualo niman kitlajtlanilia Jehová makipajti niman ijkon más chikauak kitekichiuilis ipan tlanechikojli, san ika, yejua xpajti. Noso matikonnemilikan ika se tajtli niman nantli kitlajtlaniliaj toTajtsin makipaleui inkoneuj nochipa manemi ipan tlen melauak, san ika, tekoneuj kitlapejpenia kikauas.
2 ¿Xitikselia itlaj tlen otiktlajtlanili Jehová? Kanaj yejon kichiua xnemili ika Jehová san kinnankilia oksekimej, san ika, tejua ka. Noso, ika xmitsmaka tlen yotiktlajtlanili pampa yotikchiuj itlaj tlen xkuajli. Se tokniuj siuatl akin itoka Janice ijkon onomachili.b Yejua niman iueuentsin okijlikej Jehová ika kinekiyaj ontlapaleuiskej Betel. Janice kijtoua: “Kuajli nikmatstoya ika techuajnotsaskiaj”. San ika, opanokej seki metstin niman seki xiujtin, niman xokinnotskej. Yejua kijtoua: “Melak ninajmanaya niman xnikasikamatiya tlen panotoya. Niknemiliaya ika kanaj yonikchiujka itlaj tlen Jehová xkuelita. Kuajli yonikijlika Jehová tlenon niknekiya, niman xnikasikamatiya tleka xnechmakaya tlen yoniktlajtlanilijka”.
3. ¿Tlenon tikitaskej ipan yejuin tlamachtijli?
3 Kanaj kemantika yotiknemilijkej ika toTajtsin xkinnankilia toteoyouan. Sekimej itekipanojkauan akin youejkauj onenkej noijki ijkon okinemilijkej (Job 30:20; Sal. 22:2; Hab. 1:2). ¿Tlenon mitspaleuis xneltoka ika Jehová kema kinnankilia moteoyouan? (Sal. 65:2). Ipan yejuin tlamachtijli, tikitaskej yeyi tlemach tlen techpaleuis matikneltokakan ika Jehová kema technankilia. Tikitaskej: 1) tlen tikmatstokej ika Jehová kichiuas, 2) tlen Jehová kichia tejuamej matikchiuakan niman 3) tleka kemantika nonekis tikpatlaskej tlen tiktlajtlanij.
TLEN TIKMATSTOKEJ IKA JEHOVÁ KICHIUAS
4. Ken kijtoua Jeremías 29:12, ¿tlenon Jehová yokijto kichiuas?
4 Jehová kijtoua ika kinkakis toteoyouan (xpoua Jeremías 29:12). ToTajtsin kintlasojtla itekipanojkauan niman nochipa kikaki tlen kijliaj (Sal. 10:17; 37:28). San ika, yejon xkijtosneki tla techmakas nochi tlen tiktlajtlaniliaj. Kanaj seki tlen tiktlajtlaniliaj yejua techmakas hasta ipan xochitlalpan.
5. ¿Tlenon kita Jehová achto kinankilis tlen tiktlajtlaniliaj?
5 Jehová kita tla tlen tiktlajtlaniliaj tlapaleuis manochiua tlen kineki (Is. 55:8, 9). Yejua kineki ika ipan yejuin tlaltikpaktli manemikan tlakamej niman siuamej akin kinokauiliskej makinyekana, makitekichiuilikan ika nochi inyojlo niman san sekan manemikan. San ika, Satanás okijto ika más kuajli tinemiskiaj tla san no tejuamej toyekanaskiaj (Gén. 3:1-5). Pampa Jehová kineki kiteititis ika Diablo san tlakajkayaua, okinkauili tlaltikpakchanejkej san no yejuamej manoyekanakan, niman yejon yokichiuj ika aman maonia miyek tlauejli (Ecl. 8:9). Tikmatstokej ika Jehová xkiyektlalis nochi tlen xkuajli nochiujtika. Tla kichiuaskia, sekimej ueliskia kinemiliskej ika tlaltikpakchanejkej kema ueli san inselti noyekanaj niman ika uelis kiyektlaliskej tlen xkuajli panotika.
6. ¿Tleka noneki tikneltokaskej ika Jehová techtlasojtla niman nochipa kichiua tlen melajki?
6 Ijkuak itlaj tiktlajtlaniliaj Jehová, tlamantik ken technankilia. Matontlanemilikan itech tekiuaj Ezequías, ijkuak yejua melak okualok, okitlajtlanili Jehová makipajti, niman yejua ijkon okichiuj (2 Rey. 20:1-6). San ika, ijkuak apóstol Pablo okitlajtlanili makikixtili se kokolistli tlen katka “ken itlaj uitstli”, Jehová xokichiuj (2 Cor. 12:7-9). Noijki, matikilnamikikan tlen inpan onochiuj apóstoles Santiago niman Pedro. Tekiuaj Herodes kinekiya kinmiktis yejuin omemej apóstoles. Maski tlanechikojli okichiuj teoyotl ipampa Pedro niman noijki kanaj ipampa Santiago, Santiago okimiktijkej, san ika, Pedro omakis ipampa se milagro tlen Jehová okichiuj (Hech. 12:1-11). ¿Tleka Jehová okimakixti Pedro niman xokimakixti Santiago? Maski Biblia xkijtoua, uelis kuajli tikmatstoskej ika Jehová “xkaman kichiua itlaj yejuan xmelajki” niman ika kitlasojtlaya Pedro niman Santiago (Deut. 32:4; Apoc. 21:14).c Maski kemantika Jehová xkinankilis toteoyouj ijkon ken tejuamej tikchiayaj, xtiknemiliaj tla xkuajli tlen kichiua pampa tikmatstokej ika techtlasojtla niman nochipa kichiua tlen melajki (Job 33:13).
7. ¿Tlenon xnoneki tikchiuaskej, niman tleka?
7 Xnoneki san tikitstoskej ken Jehová kinnankilia inteoyouan oksekimej niman ken tejuamej technankilia. Matikonnemilikan ika itlaj tiktlajtlaniliaj Jehová niman xtechmaka. San ika, sakin tikmatij ika yakaj noijki okitlajtlan tlen tejuamej otiktlajtlankaj niman Jehová kema okimakak. Yejon tlen ipan onochiuj se tokniuj siuatl akin itoka Anna. Iueuentsin, Matthew, kipiaya cáncer, niman yejua okitlajtlanili Jehová makipaleui mapajti. Ijkuakon, omemej tokniuan siuamej akin iuejueyimej noijki kipiayaj cáncer, niman tokniuj Anna okichiuj teoyotl inpampa. Yejon tokniuan akin iuejueyimej katkaj opajtikej, san ika, Matthew omik. Kachtopa, Anna notlajtoltiaya tleka Jehová okinpaleui yejon tokniuan akin iuejueyimej mapajtikan, niman xkasikamatiya tleka xokipaleui iueuentsin. Xtikmatij tleka yejon omemej tokniuan opajtikej, san ika, kema tikmatij ika sa achijtsin poliui ijkuak Jehová kipopolos nochi tlen techtlajyouiltia niman kinyolitis nochimej itekipanojkauan (Job 14:15).
8. a) Ken kijtoua Isaías 43:2, ¿tlenon kichiua Jehová niman ijkon techpaleuis? b) ¿Kenon techpaleuiya tla tiknotsaj Jehová ijkuak tikixnamikij tlen ouijtika? (Xkita video Uelis titlaxikoskej tla tiknotsaj toTajtsin).
8 Jehová nochipa techpaleuis. ToTajtsin, Jehová, melak techtlasojtla niman xkuelita matitlajyouikan (Is. 63:9). San ika, yejua xtechkixtilia nochi tlen techtlajyouiltia, tlen Biblia kiteneua ika yeskia ken atentin noso tlitl (xpoua Isaías 43:2). Yejua techijlia ika techpaleuis matikxikokan maski san tlenon tikixnamikiskej niman xkikauilis topan manochiua itlaj tlen xtikxikoskej, noijki Jehová techmaka iespíritu niman ijkon matitlaxikokan (Luc. 11:13; Filip. 4:13). Ika yejon, kuajli tikmatstokej ika nochipa tikpiyaskej nochi tlen noneki niman ijkon titlaxikoskej niman timelajkanemiskej.d
TLEN JEHOVÁ KICHIA IKA TEJUAMEJ MATIKCHIUAKAN
9. ¿Kenon Santiago 1:6, 7 kichiua matikneltokakan ika Jehová techpaleuis?
9 Jehová kichia itech matitlaneltokakan (Heb. 11:6). Kanaj kemantika tikixnamikij itlaj tlen melak ouijtika niman hasta tiknemiliaj ika Jehová xtechpaleuis. San ika, Biblia kuajli techijlia ika toTajtsin techmakas ikojtilis niman ijkon kentla matitlejkokan ipan se tepantli (Sal. 18:29). Kuakon, maka matiometlamatikan. Matikchiuilikan teoyotl toTajtsin ika nochi toyojlo niman kuajli matikmatstokan ika yejua technankilis (xpoua Santiago 1:6, 7).
10. Xkijto itlaj tlen makiteititi ika noneki itlaj tikchiuaskej sakin ika yotikchiujkej teoyotl.
10 Jehová kichia itlaj matikchiuakan sakin ika yotikchiuilijkej teoyotl. Matikonnemilikan ika se tokniuj kineki yas ipan se ueyi tlanechikojli niman kitlajtlanilia Jehová makipaleui para tlajtos iuan akin itech tekiti. ¿Kenon Jehová uelis kinankilis yejuin tokniuj? Yejua kanaj kiyolchikauas para matlajto iuan akin itech tekiti. San ika, tokniuj noijki noneki yas iuan ontlajtos, niman kanaj miyekpa noneki ijkon kichiuas. Yejua hasta uelis kijlis akin itech tekiti ika kipatlas iuan okse icompañero yejon tonajli ijkuak tekiti. Niman tla nonekiskia uelis kijlis ika maski maka makitlaxtlauilikan ijkuak xontekitis.
11. ¿Tleka miyekpa noneki tikchiuaskej teoyotl?
11 Jehová kineki ika miyekpa matikijlikan tlen techajmana (1 Tes. 5:17). Jesús okiteititi ika seki tlen tiktlajtlanij xnimantsin tikseliskej (Luc. 11:9). Ika yejon, xnoneki tosiaujkauaskej. Miyekpa niman ika nochi toyojlo matiknotsakan Jehová (Luc. 18:1-7). Ijkuak tejuamej miyekpa tikchiuaj teoyotl ipampa itlaj, tikititijtokej Jehová ika yemelak tiknekij matechmaka tlen tiktlajtlaniliaj niman tikneltokaj ika yejua uelis techpaleuis.
¿TLEKA KEMANTIKA NONEKIS TIKPATLASKEJ TLEN TIKTLAJTLANIJ?
12. a) ¿Tlenon uelis totlajtoltiskej, niman tleka? b) ¿Tlenon noneki tikilnamikiskej niman ijkon tikteititiskej ika tiktlakaitaj toTajtsin ijkuak tikchiuiliaj teoyotl? (Xkita recuadro “¿Tlen niktlajtlani kiteititia ika niktlakaita Jehová?”).
12 Tla xtikseliaj itlaj tlen yotiktlajtlanilijkej Jehová, matotlajtoltikan yejuin yeyi tlemach. Kachtopa “¿Kuajli tlen oniktlajtlanili?”. Kemantika tejuamej tiknemiliaj ika tikmatij tlenon más techpaleuis. San ika, kemantika tlen tiktlajtlanij sakin xok techpaleuiya. Kanaj tiktlajtlanilijtokej Jehová makiyektlali itlaj ijkon ken tejuamej tiknekij, san ika, sejneka ken uelis noyektlalis itlaj. Niman kanaj seki tlen tiktlajtlanij xtepaleuiya manochiua tlen toTajtsin kineki (1 Juan 5:14). Matontlanemilikan itech yejon tajtin akin otikinteneujkej ipan párrafo 1. Yejuamej okitlajtlanilijkej Jehová makipaleui inkoneuj niman ijkon nochipa makitekichiuili. Nesi ika kuajli tlen okitlajtlanilijkej. San ika, matikilnamikikan ika Jehová xakaj kichiualtia makitekichiuili. Yejua kineki ika, hasta tokoneuan, matiktekichiuilikan pampa ijkon tiktlapejpeniaj (Deut. 10:12, 13; 30:19, 20). Kuakon, ¿tlenon uelis kitlajtlaniliskej Jehová yejuin tajtin? Uelis kitlajtlaniliskej toTajtsin makinpaleui yejuamej niman ijkon kipaleuiskej inkoneuj makitlasojtla niman makineki nochipa iuan nouikas (Prov. 22:6; Efes. 6:4).
13. Ken kijtoua Hebreos 4:16, ¿kemanon techpaleuiya Jehová?
13 Noijki uelis totlajtoltiskej “¿Jehová kinemilia ika ikinamiki nechmakas tlen niktlajtlanilia?”. Kanaj tejuamej tiknemiliaj ika noneki nimantsin matechnankilikan toteoyouan. San ika, Jehová akin más kimati kemanon uelis techpaleuis (xpoua Hebreos 4:16). Ijkuak Jehová xnimantsin kinnankilia toteoyouan, kanaj uelis tiknemiliskej ika yejua “xkineki” techmakas tlen tiktlajtlaniliaj. San ika, kanaj Jehová kita ika “xinoneki” techmakas tlen tiktlajtlanij. Oksejpa matitlanemilikan itech yejon telpochtli akin kitlajtlaniliaya toTajtsin makipajti. Tla Jehová kipajtiskia ika se milagro, Satanás ueliskia kijlis ika yejon telpochtli san kitekichiuilia pampa yokipajti (Job 1:9-11; 2:4). Noijki, tikmatij ika sa achijtsin poliui ijkuak toTajtsin kinpopolos nochi kokolistin (Is. 33:24; Apoc. 21:3, 4). Yejua ika, ipan yejuin tonaltin xtikchiaj ika Jehová matechpajti ika milagros. ¿Tlenon ueliskia kitlajtlanilis Jehová yejon telpochtli? Ueliskia kitlajtlanilis makikojtili niman makipaleui kuajli matlanemili para kixikos ikokolis niman yolmelajkanemis (Sal. 29:11).
14. ¿Tlenon mitsmachtia tlen ipan onochiuj tokniuj Janice?
14 ¿Tikilnamiki Janice, akin yejua iuan iueuentsin okijlikej Jehová ika kinekiyaj ontlapaleuiskej Betel? Ouejkauj makuijli xiuitl niman ijkon kasikamatis kenon Jehová okinankili iteoyouj. Yejua kijtoua: “Ijkuakon, Jehová onechmajmachti niman onechpaleui más manikchiua tlen kuajli. Onikitak ika nonekiya más nitlaneltokas itech Jehová, más kuajli ninomachtis niman nikasikamatis ika uelis niyolpakis maski san tlenon mapano”. Sakin, Janice niman iueuentsin okinnotskej matlapaleuikan ipan circuito. Yejua kijtoua: “Onikitak ika Jehová kema okinnankili noteoyouan, san ika, xken nejua nikchiaya. Melak ouejkauj para nikasikamatis ika Jehová kualtsin ken onechnankili. Melak niktlasojkamati pampa yonechititi ika nechtlasojtla niman nechiknelia”.
Tla tiknemilia ika Jehová xkinankilia moteoyouj, ¿tleka xtiktlajtlani itlaj okse? (Xkita párrafo 15).f
15. ¿Tleka kuajli tla kemantika tiktlajtlanij sejneka matechnankilikan? (Noijki xkimita tlaixkopinaltin).
15 Niman sa ika tlami, uelis totlajtoltiskej “¿Uelis niktlajtlanilis Jehová sejneka manechnankili?”. Maski kuajli tla tikijliaj toTajtsin kenon tiknekij matechnankili, noijki kuajli yes tla tiktlajtlaniliaj sejneka matechnankili niman ijkon tikitaskej tlenon kineki para tejuamej. Matontlanemilikan itech tokniuj siuatl akin xinonamiktia, akin okijli Jehová ika kineki yas ipan Tlamachtijli tlen kiseliaj akin Tenojnotsaj itech iTekiuajyo toTajtsin. Yejua kineki yas ipan yejuin tlamachtijli pampa kineki ontlapaleuis kampa más nonekij tenojnotskej. Maski yejua okitlajtlanili toTajtsin makipaleui mauiya ipan yejuin tlamachtijli, ¿tlenon más uelis kitlajtlanilis? Uelis kitlajtlanilis makipaleui makita kenon más chikauak tenojnotsas (Hech. 16:9, 10). Sakin ika yokichiuj teoyotl, ueliskia kitlajtoltis tlayekanketl ipan circuito ipan tlen tlanechikoltin más nonekij precursores. Noijki, uelis ontlajkuilos ipan sucursal niman ijkon kimatis kanon más nonekij tenojnotskej.e
16. ¿Tlenon uelis kuajli tikmatstoskej?
16 Ken yotikitakej, uelis kuajli tikmatstoskej ika Jehová kinnankilis toteoyouan, pampa yejua techtlasojtla niman nochipa kichiua tlen kuajli (Sal. 4:3; Is. 30:18). Kanaj kemantika xtechnankilis ken tejuamej tikchiayaj, san ika, yejua nochipa kinkakis toteoyouan, pampa techtlasojtla niman xkeman techkauas (Sal. 9:10). Kuakon, nochipa matitlaneltokakan itech Jehová niman ika nochi toyojlo matikchiuilikan teoyotl (Sal. 62:8).
TLAKUIKAJLI 43 Teoyotl tlen ika tiktlasojkamachiliskej toTajtsin
a Yejuin tlamachtijli techititis tleka uelis kuajli tikmatstoskej ika Jehová nochipa kinnankilia toteoyouan ika tlasojtlalistli niman kichiua ijkon ken kinamiki.
b Seki tokayomej yonopatlakej.
c Xkita tlamachtijli “¿Tikneltokaj ika Jehová nochipa kichiua tlen kuajli?”, itech Amatl Tekakistilijketl de febrero de 2022, párrafos 3-6.
d Ipan video Uelis titlaxikoskej tla tiknotsaj toTajtsin, tlen onka ipan jw.org, tikitas kenon Jehová techpaleuiya matikxikokan nochi tlen tikixnamikij.
e Tla tikneki tikmatis tlenon tikchiuas niman ijkon tontlapaleuis ipan okseki tlanechikoltin de okse sucursal, xkita libro Organizados para hacer la voluntad de Jehová, capítulo 10, párrafos 6-9.
f TLEN NESI IPAN TLAIXKOPINALTIN: Omemej tokniuan kichiuaj teoyotl achto kitemiltiskej solicitud para Tlamachtijli tlen kiseliaj akin Tenojnotsaj itech iTekiuajyo toTajtsin. Sakin, se tokniuj kinotsaj, san ika, okse ka. Tokniuj akin xokinotskej xsajnoye noyolajmana, yej kichiuilia teoyotl Jehová niman kitlajtlanilia makipaleui makita kenon más chikauak tenojnotsas. Kuakon, kontitlani se carta ne sucursal kampa kiteijlia ika kineki ontlapaleuis kampa más nonekij tenojnotskej.