¿Tleka toTajtsin xnochipa technankilia?
ToTajtsin Jehová akin nemi iluikak, kuelita techkakis ijkuak tiknotsaj ika nochi toyojlo. San ika, toTajtsin xnochimej kinnankilia. ¿Tleka? ¿Tlenon noneki tikilnamikiskej ijkuak tiknotsaskej toTajtsin? Xkita tlen kijtoua Biblia.
“Ijkuak nenkichiuaskej oración, maka miyekpa sano yejua tlajtojli nenkijtoskej” (Mateo 6:7).
Jehová xkineki ika ijkuak tiknotsaskej san matiktsontekontlalikan noso san matikpouakan ipan se libro. Yejua kineki matiknotsakan ika nochi toyojlo. Xkonnemili ika se moamigo nochipa san noijki mitsijlia. ¡Yejon melak teajman! Akin yemelak moamigos nochipa mitsijliskej tlen kimachiliaj. Ijkuak tikijliaj toTajtsin tlen tikmachiliaj, tikititiaj ika yemelak iuan touikaj.
“Niman ijkuak nentlajtlanij, xnenkiseliaj, pampa nentlajtlanij ikan xkuajli eleuilistli” (Santiago 4:3).
Xuelis tikchiaskej ika toTajtsin matechnankili tla tiktlajtlaniliaj itlaj tlen tikmatstokej ika yejua xkuelita. Xkonnemili ika yakaj teuan nauiltia niman ijkon kitlanis tomin, niman kitlajtlanilia toTajtsin makimaka suerte. ¿Technankilis toTajtsin ijkuak yejua kuajli yokijto maka matiktejtemokan miyek tomin niman maka matitlaneltokakan ipan suerte? (Isaías 65:11; Lucas 12:15). Xuelis tikchiaskej ika Jehová matechnankili tla tiktlajtlaniliaj yejon. Tla tiknekij ika toTajtsin matechnankili, noneki kuajli tikitaskej ika tlen tiktlajtlaniliaj makinamiki ika tlen kijtoua Biblia.
“Yejuan xkinekis kitlakamatis ileyes Dios, Dios no xkinekis kakis iueyikatsajtsilis” (Proverbios 28:9).
Yeuejkaui, toTajtsin kinkakiya akin kitlakamatiyaj itlanauatiluan niman aman ok ijkon kichiua (Isaías 1:15, 16; Malaquías 3:6). Tla tiknekij ika toTajtsin matechkaki, noneki tokojtiliskej tiktlakamatiskej itlanauatiluan. ¿Niman tla yeuejkaui otikchiujkej itlaj tlen xkuajli? ¿Kijtosneki ika toTajtsin xkeman techkakis? Ka, xijkon kijtosneki. Yejua kinektika techtlapopoluis tla tikititiaj ika yotoyolkuepkej niman tokojtiliaj tikchiuaskej tlen yejua kineki (Hechos 3:19).